Kien Gold Eo Juõn Katak Ijoko Otemjelok

“Inem men otemjej jabrewõt komij kõnan bwe armij ren kõmõnmõn ñõn kom, en ein drein ami kõmõnmõn ñõn ir.”​​—⁠Matu 7:​12.

NAN kein Jesus Christ ear konono kake iturinlok ruo thousand yiõ ko remotlok ilo Katak eo an ebuñbuñ ion Tol eo. Ilo ebeben ko jen ien eo, elap wõt ijo rej ba im jeje kake kin ennan in elamwan. Ñan wanjoñok, rej nebare einwõt men eo ej “lukkun ejaakin Jeje ko,” “juõn elij in eddo eo an Christian ñan ri turin,” im “juõn bedbedin kien erreo.” Kin an lap jelã kake ear oktak im ekkã jitõñlok ñane einwõt Kien Egold.

Bõtab, lemnak eo kin Kien Gold eo, ejjab ñan wõt men eo rej naetan lal eo an Christian bwe e wõt ej bõk lemnak in kin Kien Gold eo. Jelã eo an Judaism, Buddhism, im Greek aolep rar kameleleik menin ilo tibdikin ilo elõñ wãwen ko. Elap air jelã kake, elaptata armij ro ilo Far East, ej juõn ennan jen Confucius, eo elap kautieje ilo Ailiñ ko Iturear einwõt ri kaki eo elaptata im kabel. Ilo Analects ko an Confucius, book eo kein kajilu in book ko Emen an Confucian, jej lo lemnak eo rej kwalok jilu alen. Ruo alen, ilo uak ñan kajitõk ko jen ri school ro, Confucius ear ba: “Men eo kwoj jab kõnan bwe ren kõmmane ñan yuk, jab kõmmane ñan ro jet.” Ilo bar juõn ien, ke ri school eo an Zigong ear kemjãje “Men eo Ij jab kõnan bwe ro jet ren kõmmane ñan iõ, Ij bareinwõt jab kõnan kõmmane ñan ir,” ri kaki eo ear kwalok uak in, “Aet, ak menin kwoj jañin maroñ kõmmane.”

Ilo Readi nan kein, juõn emaroñ lo bwe ennan eo an Confucius ej juõn melele ewan in men eo Jesus ear ba kake tokelik. Oktak eo ealikar ej bwe Kien Gold eo Jesus ear kwalok kake ej aikwij emmakit ko remol in kõmman emõn ñan ro jet. Jen baj ba ñe armij ro ren kar jerbal ilo air errã ibben ennan eo emol an Jesus, kejbãrok im bõk buñten nee ko ñan jibañ ro jet, im mour ilo kien kaiñi in ran otemjej. Kwoj lemnak menin en kar kõmmane ke lal eo rainin juõn jikin eo emõnlok? Ejelok bere.

Meñe kien eo rej kwalok ilo mol in, jab mol in, ak jabdewõt wãwen ko jet, men eo elap tokjen ej bwe armij ro ilo ien ko reoktak jen don im jikin ko im bedbedin jelã ko reinjuõn jen don rar lukkun tõmak ilo Kien Gold eo. Menin ej kwalok bwe men eo Jesus ear kwalok kake ilo Katak eo an ion Tol eo ej juõn katak ijoko otemjelok eo ej jelet mour an armij ro ijoko jabdewõt ilo jabdewõt joñan dettan armij.

Kajitõkin yuk make: ‘In kar kõnan ke bwe ren kõmman ñan iõ ilo kautiej, ejelok jeb, mol? In kar kõnan ke mour ilo juõn lal eo ejelok kalijeklok in armij, kowadoñ im tarinae? In kar kõnan ke bed ilo juõn family eo aolep ro ie rej kwalok air lemnak kin eñjake ko im emõn eo an ro jet?’ Ilo mol, wõn enaj kar ba jab ñan kain eddo rot kein? Mol eo ej bwe jejjo wõt rej lañliñ kin wãwen kein. Ñan elõñ wõt armij, ejelok air kejatdikdik kin kain men rot kein.

Kien Gold eo Emãr

Ilo aolep bwebwenato, ear wõr wãwen ko kin jorrãn ko nae mour in armij eo me jimwe ko an armij rar lukkun kajekdoni. Men kein ekoba wia kake ri kamakoko ilo Africa, mij ilo jikin kalbuj ko an Nazi, ijjibed ajiri ñan kamakoko, im torlokbõke kumi in armij ro ilo elõñ jikin ko. Lajrak in men kein rekalelñoñ emaroñ aetoklok wõt.

Rainin, lal in ad im elõñ menin ellolo ko rekãl im kein jerbal ko rekãl rej kajerbali ej ijoko kein elap an armij mad ie. Jejjo armij rej lemnak kin ro jet ñe emõn eo air make ak jimwe ko air rej bed ilo kauwatata. (2 Timote 3:​1-5) Etke ekanuij lõñ rej oktak im kibbon, lej, ejelok air eñjake, im lemnak kin ir make? Ejjab kin Kien Gold eo, meñe ej lap wõt an jeded jelã kake, rej kajekdone bwe einwõt ejjab mol, juõn mour erreo ej mour mantak wõt ke? Ekaburomõj, bwe eñin wãwen eo ibwiljin ro rej ba bwe rej tõmak ilo Anij. Im ilo etale wãwen an men ko wõnmanlok, armij rej naj oktak wõt im laplok air lemnak kin ir make.

Kin menin, kajitõk ko elap tokjeir im jej aikwij lemnak kaki rej: Mour kin Kien Gold eo ta eo ekoba ie? Ewõr ke jabdewõt armij rej mour wõt kake? Im en wõr ke juõn ien ñe armij otemjej renaj mour ilo air errã ibben Kien Gold eo? Ñan uak ko remol ñan kajitõk kein, joij im read katakin tok ilokan.

[Pija eo ilo peij 3]

Confucius im ro jet rar katakin kin wãwen ko reinjuõn jen don kin Kien Gold eo