Kon In Kau Gold Eo

UMM! Ta eo armij ro rej kõmõne kiõ? Rej jar ñõn juõn kon in kau. Etke rej kõmõn men in?

Ke e ar to an Moses ber ion tol eo, armij ro r’ar ba: ‘Je jaje ebajet Moses. Inem jen kõmõn juõn anij bwe en tellok kij jen enin.’

‘Eokwe emõn,’ leo jein Moses, Aron e ar ba. ‘Komin wutik dredre gold ko ami, im bõktok ñõn ibã.’ Ke armij ro r’ar kõmõn men in, Aron e ar tili im kõmõne juõn kon in kau gold. Im armij ro r’ar ba: ‘Eñin Anij eo ar, eo e ar tel kij jen Ijipt!’ Inem dri Israel ro r’ar kõmõn juõn kwojkwoj elap, im kabuñ ñõn kon in kau gold eo.

Ke Jeova e ar lo men in, e lukkun illu. Inem e ar ba ñõn Moses: ‘Kwon kaiur im wonlõllok. Armij ro rej kõmõn elap nana. R’ar meloklok kien ko aõ im rej kabuñ ñõn juõn kon in kau gold.’

E mõkaj an Moses wonlõllok jen tol eo. Im ke e ar ebaklok, eñin men eo ej loe. Armij ro rej al im eeb iturin kon in kau gold eo! Joñan an Moses illu e ar julõllok tebel dreka ko ruo emwij jeje kien ko ion, im r’ar rup ilo elõñ mõttõn ko. Inem e ar bõk kon in kau gold eo im tile. Tokelik e ar kebrakilkili gold eo mae ien ej erõm bõnõlnõl.

E lukkun nana men eo armij ro r’ar kõmõne. Kin men in Moses e ar jiroñ jet ian lõmaro bwe ren bõk jãji ko air. ‘Armij nana ro im r’ar kabuñ ñõn kon in kau gold eo re aikwij mij,’ Moses ej ba. Inem lõmaro r’ar wie 3,000 armij im re mij! Men in ejjab kalikar ke bwe jej aikwij kejbarok bwe jen kabuñ ñõn Jeova wõt, im jab anij wan ko?