Rar Rupe Kallim̦ur eo Aer

Jeova ear ba ñan Moses: ‘Kwõn wanlõñtak ñan ioon tol̦ e. Inaaj je kien ko aõ ioon dekã im liwaji ñan kwe.’ Innem Moses ear wanlõñl̦o̦k ñan ioon tol̦ eo im ear pãd ie ium̦win 40 raan im 40 boñ. Ke ear pãd ijin, Jeova ear je Kien ko Joñoul ioon ruo dekã im ear lil̦o̦ki ñan Moses.

Tokãlik, RiIsrael ro rar l̦õmn̦ak bwe em̦õj an Moses etal jãn er. Rar ba ñan Aron: ‘Kõm kõn̦aan bwe en wõr juon eo ej tõl kõj. Kwõn kõm̦m̦ane juon ad anij!’ Innem Aron ear ba: ‘Litok gold ko ami.’ Ke rar lil̦o̦ki, ear kaõnl̦o̦ki im kõm̦m̦ane juon ekjab in koon in kau. Innem armej ro rar ba: ‘Eñin Anij eo ad, eo ear ãñintok kõj jãn Ijipt!’ Im rar jino kabuñ ñan ekjab in im kõm̦m̦ane juon kwõjkwõj. Ekar ke bõd men in rar kõm̦m̦ane? Aet, kõnke armej rein rar kallim̦ur bwe renaaj kar kabuñ ñan Jeova wõt. Ak kiiõ em̦õj aer rupe kallim̦ur eo aer.

Jeova ear lo men ko rej kõm̦m̦ani, im ear ba ñan Moses: ‘Kwõn wanlal̦l̦o̦k ñan ippãn armej ran̦. Rejjab pokake eõ im rej kabuñ ñan juon anij waan.’ Kõn men in, Moses ear bõk dekã ko ruo ippãn im wanlal̦l̦o̦k jãn tol̦ eo.

Ke ear wanlal̦l̦o̦k im ej epaakel̦o̦k ijo armej ro rej pãd ie, Moses ear roñ aer al im ear reilo̦k im lo aer eb im badikdik ñan ekjab eo. Moses ear lukkuun illu. Joñan, ear jolal̦l̦o̦k dekã ko ruo im rar rup im tipdikdik. Innem ear m̦õkaj im ko̦kkure ekjab eo. Ear kajjitõk ippãn Aron im ba: ‘Etke kwaar kõm̦m̦ane men in enana armej ro rar jiroñ eok bwe kwõn kõm̦m̦ane?’ Im Aron ear ba: ‘Kwõn jab illu. Kwõjel̦ã kadede kain armej rot rein. Rar kõn̦aan bwe en wõr juon aer anij, im iar tũli gold ko aer ilo kijeek eo im ewal̦o̦ktok ekjab in koon in kau in!’ Ilo m̦ool, Aron en kar jab kõm̦m̦ane men in. Innem Moses ear bar wanlõñl̦o̦k ñan ioon tol̦ eo im akwel̦ap ñan Jeova bwe en jol̦o̦k an armej ro bõd.

Jeova ear jol̦o̦k bõd ko an ro rar kõn̦aan pokake e. Kwõj ke kile unin an aorõk ñan an kar RiIsrael ro kõttãik er im l̦oore tõl eo an Moses?