Ilo Tiljek Jen Kõttãik Kij Ñan Ri Utiej Ro Rekwojarjar
“Jeova ej dri ekajete kij, Jeova ej am dri kaiñi, Jeova ej am kiñ.”—AISEIA 33:22.
1. Ta men ko rar kõmman bwe Israel eo etto en einjuõn jen ailiñ ko?
ILO 1513 B.C.E., ailiñ in Israel ear jutak. Ilo ien eo, ear jañin wõr juõn jikin kwelok, kabijuknen, im ejelok king ibben. Ri ailiñ ro an rar bed ilo kamakoko mokta. Bõtab, ailiñ in ekãl ear einjuõn ilo bar juõn wãwen. Jehovah Anij ear Ri Ekajet eo an jejjab maroñ loe, Ri Kakien eo, im King. (Exodus 19:5, 6; Aiseia 33:22) Ejelok bar juõn ailiñ emaroñ kar ba eindein!
2. Ta kajitõk eo ej walok ikijen wãwen an Israel karõk, im etke uak eo ej juõn men eaorõk ñan kij?
2 Kinke Jehovah ej juõn Anij ej jerbal ekkar ñan juõn lajrak, im juõn Anij in ainemõn bareinwõt, jenaj kõtmene bwe jabdewõt ailiñ enaj kar iroij ion enaj emmakit ekkar ñan juõn lajrak bareinwõt. (1 Dri Korint 14:33) Emol kar wãwen dein ibben Israel. Ak ewi wãwen an kar Anij eo jejjab maroñ loe tel juõn dolul ion lal im jemaroñ loe? Emaroñ wõr tokjen ñan kij ñan ad lale wãwen an kar Jehovah iroij ion ailiñ in etto, im elaptata lale wãwen an jerbal in tel Israel kalikar aorõkin kõttãik kij ilo tiljek ñan ri utiej ro rekwojarjar.
Wãwen An Kar Iroij Ion Israel Eo Etto
3. Ta karõk ko remõn Jehovah ear kõmmani ñan tel armij ro an?
3 Meñe Jehovah ear King eo an Israel jejjab maroñ loe, ear jitõñ emaan ro retiljek bwe ren jutak ikijen. Kar wõr iroij ro, jeban family ko, im lõmaro reritto ilo jitõb bwe ren jerbal ñan armij einwõt ri lelok kakabilek im ri ekajet ro. (Exodus 18:25, 26; Duteronomi 1:15) Bõtab, jen jab baj lemnak bwe lõmarein remaroñ kar ekajete armij ro ilo ejelok likjap meñe kar ejelok meletlet im jelãlokjen jen lañ. Rar jab wãppen, im rar jab maroñ lo buruen ri kabuñ ro mõttair. Mekarta, ri ekajet ro remijak Anij rar maroñ kakabilek ri tõmak ro mõttair kinke ear bedbed ion Kien Jehovah.—Duteronomi 19:15; Sam 119:97-100.
4. Ta manit ko ri ekajet ro retiljek an Israel rar jab lori im etke?
4 Bõtab, ebar wõr men ko jet rar aikwiji ñan jerbal einwõt juõn ri ekajet jen air baj jelã wõt kin Kien eo. Kin air jab wãppen, maan ro reritto rar aikwij ekkõl wõt im kabõjrak jabdewõt wãwen nana ko air—einwõt kibbon, kalijeklok, im ankwonak—ko remaroñ kokkure ekajet jimwe eo air. Moses ear jiroñ ir: “Komin jab kaljiklok armij ilo ekajet; komin roñjake ro redrik im ro relap; einwõt juõn; komin jab mijõk mejen armij; bwe an Anij ekajet eo.” Aet, ri ekajet ro an Israel rar ekajete armij ñan Anij. Men in ear juõn jerammõn elap!—Duteronomi 1:16, 17.
5. Ijellokin air kãlet ri ekajet ro, bar ta men in aikwij ko Jehovah ear kabwe ñan kejbãrok armij ro an?
5 Jehovah ear ejaake karõk ko jet ñan kabwe aikwij ko lor jitõb ñan armij ro an. Moktalok jen air tõkeãklok Enen Kallimur eo, ear kaiñi ir bwe ren kalek imõn kabbed eo, jikin kabuñ eo emol. Bareinwõt ear karõk juõn jar in priest ñan katakin armij kin Kien eo, ñan katok men in mour ko, im kaijurjur ilo jibboñ im jota. Anij ear karõk bwe Aaron, jein Moses, en priest eo elap kein kajuõn im jitõñ ro nejin Aaron bwe ren jibañ jemeir ilo jerbal ko an.—Exodus 28:1; Bwinbwin 3:10; 2 Kronikel 13:10, 11.
6, 7. (a) Kar ta kõtan eo ikõtan priest ro im Ri Levi ro rejjab priest? (b) Ta eo jemaroñ katak kake jen mol eo bwe Ri Levi ro rar kõmman elõñ kain jerbal rej kajju jen don? (Dri Kolosse 3:23)
6 Ñan kabwe aikwij ko lor jitõb an elõñ million armij ro kar juõn jerbal elap, im kar eiet priest ro. Inem rar karõk bwe ro uan bwijin Levi ren jibañ ir. Jehovah ear jiroñ Moses: “Kwon lelok ro dri Livai ñõn Aron im ñõn lõmaro nejin; emwij lelok ir ñõn e kin ro nejin Israel.”—Bwinbwin 3:9, 39.
7 Ri Levi ro rar lukkun bojak. Rar ajej ñan jilu family ko—Ri Gershon ro, Ri Kohath ro, im Ri Merari ro—kajjojo iair kar wõr air jerbal ñan kõmmane. (Bwinbwin 3:14-17, 23-37) Ñan jet armij jet ian jerbal ko air raorõk jen ko jet, ak ilo mol aolep ir rar aorõk. Jerbal eo an Ri Kohath Ri Levi ro ear bõklok ir ebak ñan tebteb in bujen eo ekwojarjar im mweiuk ko an imõn kabbed eo. Bõtab, Ri Levi ro aolep, jekdon elañe rar juõn Ri Kohath ak jab, rar bõk jerammõn ko rekabwilõñlõñ. (Bwinbwin 1:51, 53) Ej men in kaburomõjmõj bwe, jet rar jab kamolol kin jerammõn ko air. Jen air kõttãik ir ilo tiljek ñan ri utiej ro rekwojarjar, rar abõnõnõ im kautiej burueir, wãlok, im kamo. Juõn Ri Levi etan Korah kar juõn iair.
“Komij kabukot jerbal in Pris bareinwõt Ke?”
8. (a) Kar wõn Korah? (b) Ta eo emaroñ kar kamakit Korah bwe en jino bõk juõn lemnak ilo kanniek kin jerbal in priest?
8 Korah ear jab jeban in mweo imõn Ri Levi ro, ear jab jeban in family ko an Ri Kohath ro bareinwõt. (Bwinbwin 3:30, 32) Mekarta, ear juõn iroij armij ro rar kautieje ilo Israel. Jerbal ko an Korah remaroñ kar karuaklok e ñan Aaron im ro nejin. (Bwinbwin 4:18, 19) Elikin an lo kin mejen aolep likjap ko an maan rein, Korah emaroñ kar lemnak: ‘Priest rein rejjab wãppen, ak Ij aikwij kõttãik iõ ñan ir! Ejjabto lok iman Aaron ear jeke juõn ekjap in kon in cow gold. Kabuñ ñan kon in cow eo ear kõmman bwe armij ro ad ren kabuñ ñan ekjap. Kiõ Aaron, eo ej jein Moses, ej jerbal einwõt priest eo elap! Elap an kalijeklok men in! Im ta kin ro nejin Aaron, Nadab im Abihu? Emol, joñan an lap air jab kautiej jerbal ko air Jehovah ear mõn ir ñan mij!’a (Exodus 32:1-5; Livitikõs 10:1, 2) Jekdon ta lemnak eo an Korah, ear alikar bwe ear jino bõk juõn lemnak bwe jerbal in priest kar juõn jerbal jen armij. Men in ear tellok ñan an jumae Moses im Aaron im, ilo jemlokin, nae Jehovah.—1 Samuel 15:23; Jemes 1:14, 15.
9, 10. Ta eo Korah im ri jumae ro mõttan rar kinaake Moses kake, im etke ren kar katak jen men eo ear walok mokta?
9 Einwõt juõn armij aejemjem, ear jab bin an Korah kareel buruen armij ro jet bwe ren jutak ibben. E, koba Dathan im Abiram, rar lo 250 armij ro rar errã ibbeirjil—ir aolep rar ri utiej ilo ailiñ eo. Ir aolep rar kebak Moses im Aaron im ba: “Aolepen jar re kwojarjar, jabrewõt iair, im Jeova ej ber iolapir; inem etke komij mõke koutiej kom jen jar eo an Jeova?”—Bwinbwin 16:1-3.
10 Jen men ko rar jelã kake mokta, ri jumae rein ren kar jab jumae wãwen iroij eo an Moses. Jejjo ran ko lok iman, Aaron im Miriam rar kõmman eindein. Emol, rar bõk ejja lemnak eo wõt einwõt Korah! Ekkar ñan Bwinbwin 12:1, 2, rar kajitõk: “Jeova e ar konono iben Moses wõt ke? E ar jab konono ibemro bareinwõt ke?” Jehovah ear roñjake. Ear kaiñi Moses, Aaron, im Miriam ñan kwelok iturin jikin deloñ eo an imõn kabber eo bwe en kalikar wõn ri tel eo ear kãlete. Inem, ilo alikar, Jehovah ear ba: “Elañe eor juõn dri kanan ibemi, Ña Jeova I naj kwalok iõ ñõn e kin vision, I naj konono iben ilo tõmak. Korijera Moses e jab einwõt e tiljek ilo aolepen mweo imõ.” Jeltokin, Jehovah ear kõmman bwe Miriam en bõk nañinmij in leper iumin jidik wõt ien.—Bwinbwin 12:4-7, 10.
11. Ewi wãwen an kar Moses emmakit ikijen aitwerõk eo ej kitibuj Korah?
11 Korah im ro mõttan ren kar jelã kin men in. Jumae eo air kar juõn men ejelok wãwen jolok air bwid. Bõtab, Moses ear kate wõt e ilo meanwõd ñan kamelele ilo kõmmanwa ibbeir. Ear rejañ ir ñan kwalok air kamolol kin jerammõn ko air, im ba: “Ej juõn men erik ibemi ke, bwe Anij in Israel e ar kejenolok kom jen jar an Israel?” Jaab, ear jab “juõn men erik”! Elõñ men ko kar bed ibben Ri Levi ro kadede. Bar ta eo rar kõnan? Nan ko jet an Moses rar kalikar ta lemnak ko ilo burueir: “Komij kabukot jerbal in pris bareinwõt ke?”b (Bwinbwin 12:3; 16:9, 10) Bõtab, ewi wãwen an kar Jehovah lemnak kin jumae in nae maroñ in iroij eo ekwojarjar?
Ri Ekajet eo an Israel Ej Bõk Eddo Eo
12. Kõtan eo emõn ikõtan Israel im Anij ear bedbed ion ta?
12 Ke Jehovah ear lelok Kien eo ñan Israel, ear jiroñ armij ro bwe elañe rar bokake, renaj kar erom “juõn ailiñ ekwojarjar” im bwe ailiñ eo enaj kwojarjar toan wõt an jerbal ekkar ñan karõk eo an Jehovah. (Exodus 19:5, 6) Kiõ, kin air jino jumae ilo alikar, kar ien eo ñan an ri ekajet eo an Israel im eo ej letok-kien bwe en bõk eddo eo! Moses ear ba ñan Korah: “Kwe im aolepen jar eo am komin ber iman Jeova, kwe, im ir, im Aron, ilju: im jabrewõt armij en bõk senser eo an, im likit kaijurjur ion, jabrewõt iami en bõktok iman Jeova senser eo an, rubuki limñoul senser; bareinwõt kwe, im Aron, jabrewõt an senser.”—Bwinbwin 16:16, 17.
13. (a) Etke ear juõn wãwen ewãlok ke ri jumae ro rar lelok kaijurjur ñan Jehovah? (b) Ta eo Jehovah ear kõmmane ñan ri jumae ro?
13 Ekkar ñan Kien Anij, priest ro wõt rar maroñ katok kin men in mour ko. Bareinwõt lemnak eo bwe Ri Levi ro rejjab priest rej kaijurjur iman mejen Jehovah en kar kõmman bwe ri jumae rein ren lemnak ilo alikar. (Exodus 30:7; Bwinbwin 4:16) Ear jab eindein ibben Korah im ro rejetan! Ran eo jeltokin “e ar kokweloktok aolepen jar eo nae ir [Moses im Aaron] ñõn kejem in imõn kwelok eo.” Bwebwenato eo ej jiroñ kij: “Jeova e ar konono ñõn Moses im ñõn Aron, im ba, Komin mõke kejenolok kom jen iben jar in, bwe In mõn ir ilo bũkkinkwõle.” Ak Moses im Aaron rar akwelap bwe armij ro ren ellã im mour. Jehovah ear uake jar ko air. Ikijen Korah im jar in armij eo an, “kijeek e ar walok jen Jeova, im kõñi man ro rubuki limñoul, ro rar lelok kaijurjur eo.”—Bwinbwin 16:19-22, 35.c
14. Etke Jehovah ear emmakit nae Ri Israel ro?
14 Ekabwilõñlõñ bwe, Ri Israel ro me rar lo wãwen an kar Jehovah ekajete ri jumae ro rar jab katak jen men in. “A ran eo ilju aolepen jar an ro nejin Israel rar wanõketak nae Moses im nae Aron, im ba, Kom ar mõn armij ro an Jeova.” Ri Israel ro rar rejetak ri jumae ro! Eliktata, meanwõd eo an Jehovah ear jemlok. Ejelok jabdewõt—meñe Moses ak Aaron—rar maroñ jibañ armij ro ñan kamadmõde abañ eo. Jehovah ear kõmman bwe juõn nañinmij ekabobo en jelet ri kiblia ro, “ak ro rar mij kin nañinmij eo, joñoul emen tausan jiljilimjuõn buki, bareinwõt ro rar mij kin men eo ruõn Kora.”—Bwinbwin 16:41-49.
15. (a) Kin un et ko Ri Israel ro ren kar jab makoko in lore tel eo an Moses im Aaron? (b) Ta eo kwar katak jen bwebwenato in kin Jehovah?
15 Armij ro rar jab aikwij mij. Enaj kar emõn elañe rar lemnak ilo kõmmanwa kin men kein. Remaroñ kar kajitõkin ir make: ‘Wõn ro rar jutak iman Pharaoh meñe remaroñ kar mij ilo air kõmman men in? Wõn ro rar kajitõk bwe Ri Israel ren anemkwoj? Wõn eo wõt ear maroñ wanliñlok ñan Tol Horeb im konono jelmae mej kin mej ibben enjel eo an Anij elikin kanemkwoj eo an Israel?’ Emol bwe bwebwenato eo emõn kin Moses im Aaron ear kamol air tiljek ñan Jehovah im yokwe eo air kin armij ro. (Exodus 10:28; 19:24; 24:12-15) Jehovah ear jab mõnõnõ in mõn ri jumae ro ñan mij. Bõtab, ke ear alikar bwe armij ro rar etal wõt ilo jumae eo air, ear beek in ekajete ir. (Ezekiel 33:11, New World Translation) Aolep wãwen kein raorõk ñan kij ran kein. Etke?
Kalikar Ial eo Ejimwe Ran Kein
16. (a) Ta men in kamol ko ren kar kamol ñan Ri Jew ro ilo ebeben eo kein kajuõn bwe Jesus ear binej jenkwon Jehovah? (b) Etke Jehovah ear kõmman bwe Ri Levi priest ro ren to jen jerbal eo air, im ta eo ear bõk jikiir?
16 Ran kein, ewõr juõn “ailiñ” ekãl Jehovah ej kajerbale einwõt Ri Ekajet eo an, Ri Kakien eo an, im King eo an. (Matu 21:43) “Ailiñ” in ear jutak ilo ebeben eo kein kajuõn C.E. Ilo ien eo, temple eo eaibujuij ilo Jerusalem ear bõk jikin imõn kabbed eo ilo ran eo an Moses, ijo Ri Levi ro rar jerbal wõt ie. (Luk 1:5, 8, 9) Bõtab, ilo yiõ eo 29 C.E., bar juõn temple, eo ilo jitõb, ear jutak, im Jesus Christ ear jerbal ie einwõt Priest eo Elap. (Dri Hibru 9:9, 11) Kajitõk eo kin iroij eo ekwojarjar ear bar walok. Wõn eo Jehovah enaj kar kajerbale ñan tel “ailiñ” in ekãl? Jesus ear kamole tiljek eo ejej uan ñan Anij. Ear yokwe armij. Ear bareinwõt kõmman elõñ men ko rekabwilõñlõñ. Bõtab, einwõt jimmair ro rekijñeñe-kenwair, enañin aolep Ri Levi ro rar jab lor Jesus. (Matu 26:63-68; Jerbal 4:5, 6, 18; 5:17) Eliktata, Jehovah ear kõmman bwe bar juõn jar in priest ro ren bõk jikin jar in priest ro jen bwij in Levi—juõn jar in priest ro rekwojarjar. Jar in priest rein rekwojarjar rej bedwõt ñan ran kein.
17. (a) Jar et eo ej jar in priest eo ekwojarjar ilo ran kein? (b) Ewi wãwen an Jehovah kajerbale jar in priest in ekwojarjar?
17 Wõn ro ian jar in priest rein rekwojarjar ran kein? Ri jilek Peter ej uake kajitõk in ilo letter eo ekakõrmol an kein kajuõn. Ñan ri kabit ro uan enbwinin Christ, Peter ear je: “Kom ebeben emwij kãlete, priest ro im iroij ro, dri ailiñ rokwojarjar, armij ro an Anij wõt, bwe komin kennaneklok men ko remõn an Eo e ar kir kom jen marok im ñõn iloan maram eo An e men in bwilõñ.” (1 Piter 2:9) Jen nan kein rej kalikar bwe, einwõt juõn jar in armij, ri kabit ri kalor ro an Jesus rar einwõt “priest ro im iroij ro,” Peter ear naetan juõn “dri ailiñ rokwojarjar.” Rej wõnmanlok einwõt ial eo Jehovah ej kajerbale ñan lelok ñan ir nan in jiroñ im tel ko ilo jitõb.—Matu 24:45-47.
18. Ewi wãwen an elder ro emwij kãlet ir ekkeijaklok ibben jar in priest eo ekwojarjar?
18 Ro rej jutak ikijen priest rein rekwojarjar rej elder ro, rej bõk eddo eo ilo congregation ko an armij ro an Jehovah ibelakin lal. Maan rein ej tellokin bwe ren bõk nebar jen kij, jekdon elañe rej ri kabit ro ak jab. Etke? Kinke, ikijen jitõb kwojarjar eo an, Jehovah ear kãlet elder ro ñan jerbal ko air. (Dri Hibru 13:7, 17) Ewi wãwen air maroñ kõmman men in?
19. Ilo wãwen et eo jitõb kwojarjar eo ej kãlet elder ro?
19 Maan rein reritto ilo jitõb rar tõbar aikwij ko ilo Nan in Anij, eo me ear waloktok jen jitõbõn Anij. (1 Timote 3:1-7; Taitõs 1:5-9) Kin men in, jemaroñ ba bwe jitõb kwojarjar eo ear kãlet ir. (Jerbal 20:28) Maan ro ilo jitõb, ak elder ro, rej aikwij lukkun jelã kin Nan in Anij. Einwõt Ri Ekajet Laplap eo ear kãlet ir, elder ro bareinwõt rej aikwij dike jabdewõt wãwen kalijeklok ilo ien ekajet eo.—Duteronomi 10:17, 18.
20. Ta eo kwoj kamolol kake kin elder ro reniknik?
20 Jen ad aitwerõke maroñ eo air, jej kamolol kin elder ro ad reniknik! Lokbook eo kin air jerbal ilo tiljek, im ekkã air jerbal iumin elõñ yiõ ko, ej kamakit kij ñan ad liki ir. Ilo tiljek rej kebojak im tel kwelok ko an congregation eo, jerbal aera ñan aera ibbed ilo jerbal in kwalok nan kin “gospel in an Ailiñ eo,” im letok nan in kakabilek eo jen Bible eo ñan kij ñe jej aikwiji. (Matu 24:14; Dri Hibru 10:23, 25; 1 Piter 5:2) Rej lotok kij ñe jej nañinmij im kainemõn kij ñe jej buromõj. Ilo tiljek im ejelok kibbon rej jurake men ko an Ailiñ eo. Jitõbõn Jehovah ej bed ioir; ej buñburuen kake ir.—Dri Galetia 5:22, 23.
21. Ta eo elder ro rej aikwij ekkõl wõt kake, im etke?
21 Emol, elder ro rejjab wãppen. Kinke rej kememej wõt joñan maroñ ko air, rejjab jibede bwij eo, eo ej “men in jolet eo an Anij.” Jen men in, rej watõk ir einwõt ‘ri jerbal ro mõttair ilo lañliñ.’ (1 Peter 5:3, NW; 2 Dri Korint 1:24) Elder ro reniknik im ettã burueir rej yokwe Jehovah, im rej jelã bwe joñan wõt air kajeoñe e, enaj eindein tokjen ko remõn renaj bõktok ñan congregation eo. Kin men in, rej kate ir ñan kaddek kadkad ko rekwojarjar einwõt yokwe, tiriamo, im meanwõd.
22. Ewi wãwen ad eliji bwebwenato eo kin Korah ear kakajurlok tõmak eo am ilo dolul eo jemaroñ loe an Jehovah?
22 Elap ad mõnõnõ bwe Jehovah ej Iroij eo ad jejjab maroñ loe, Jesus Christ ej Priest eo ad eutiej, ro uan jar in priest ro rekwojarjar rej katakin kij, im Christian maan ro reritto ilo jitõb im tiljek rej ri kakabilek ro ad! Meñe ejelok jabdewõt dolul eo me armij ro rej tel remaroñ wãppen, jej mõnõnõ in karejar ñan Anij ibben ri tõmak ro mõttad, ro rej mõnõnõ in kõttãik ir!
[Kamelele ko itulal]
a Eleazar im Ithamar, bar ro nejin Aaron rar likit juõn joñok emõn ilo jerbal eo an Jehovah.—Livitikõs 10:6.
b Dathan im Abiram, ri jumae ro mõttan Korah, rar Ri Rueben ro. Kin men in, rar jab ankwonak kin jerbal in priest. Ikijen ir, rar notaike tel eo an Moses im ñan ien eo rejañin lo Enen Kallimur eo rar kallimur kake.—Bwinbwin 16:12-14.
c Ilo ien karo ko etto, bõr ko bõran family ko kajjojo rar jutak ikijen limaro beleir im ro nejiir iman mejen Anij, im wijtak men in katok ko kin ir. (Jenesis 8:20; 46:1; Job 1:5) Bõtab, ke Kien eo ear jino jerbal, Jehovah ear jitõñ maan ro jen menmenbwij eo an Aaron bwe ren jerbal einwõt priest im katok men in katok ko. Alikar bwe 250 ri jumae ro rar jab errã ibben karõk in.
Ta Eo Kwar Katak Kake?
• Ta men in letok ko Jehovah ear litoki ilo yokwe ñan kejbãrok Ri Israel ro?
• Etke kar ejelok wãwen jolok bwid eo an Korah kin an jumae Moses im Aaron?
• Ta eo jemaroñ katak kake ikijen wãwen an kar Jehovah kõmman ñan ri jumae ro?
• Ewi wãwen ad maroñ kwalok kamolol kin karõk ko an Jehovah ilo ran kein?
[Pija eo ilo peij 5]
Kwoj watõk ke jabdewõt jerbal ilo jerbal eo an Jehovah einwõt juõn jerammõn?
[Pija eo ilo peij 6]
”Etke komij mõke kautiej kom jen jar eo an Jeova?”
[Pija eo ilo peij 9]
Elder ro emwij kãlet ir rej binej jenkwon jar in priest ro rekwojarjar