E Nar Jokwõn Eo An Aron

LALE mõk wut ko im leen amond ko re kalo rej edrek jen jokwõn in, ak alal in. Jokwõn in ej jokwõn eo an Aron. Wut kein im leen amond ko re kalo r’ar edrek jen jokwõn eo an Aron ilo juõn wõt boñ! Jen lale unin.

Ro dri Israel r’ar jebwabwe ilo ene jemaren kiõ iomin jirik ien. Jet ian armij ro r’ar lemnõk bwe Moses en jab tel ir, im bwe Aron en jab pris eo e utiej. Ko’ra ej juõn eo ej lemnõk ilo wãwen in, im bareinwõt De’tan, E-bai’ram, im 250 ian ro rej tel armij ro. Rein rej itok im ba ñõn Moses: ‘Etke kwoj mõke kairoij yuk iom?’

Moses ej jiroñ Ko’ra im ro mõttõn: ‘Ñe ejiboñ komin bõk nien kijeek ko ami im likit kaijurjur ioir. Inem komin itok ñõn imõn kaber eo an Jeova. Je naj lale wõn eo Jeova ej kãlete.’

Ran eo juõn Ko’ra im ro mõttõn 250 r’ar itok ñõn imõn kaber eo. E bar lõñ ro rej iten rajitak lõmarein. E lukuun lap an Jeova illu. ‘Komin ilok jen mokko imõn armij rein re nana,’ Moses ej akwelap. ‘Komin jab uñir jabrewõt ian men ko mweiir.’ Armij ro rej roñjake, im rej druaklok jen iturin imõn kaber ko an Ko’ra, De’tan im E-bai’ram.

Inem Moses ej ba: ‘Kin men in kom naj jela eo Jeova e ar kãlete. Lõl e naj waloñi loñin im waroñlok lõmarein re nana.’

Mõjen wõt an Moses konono nan kein, e bellok brij eo. Imõn kaber ko an Ko’ra im men ko mweien De’tan im E-bai’ram im ro mõttair rej wonlõllok im e kilik lõl ioir. Ke armij ro r’ar roñ air lamij, ro rej wõtlok lõllok ñõn loan lõl, rej lamij im ba: ‘Jen ko! Ñe lõl e ab waroñlok kij bareinwõt!’

Ko’ra im armij ro 250 mõttõn rej berwõt iturin imõn kaber eo an Jeova. Inem Jeova e ar jilkinlok kijeek, im tili aolepiir im re joko. Inem Jeova e ar jiroñ leo nejin Aron, I-li-e’zar bwe en bõk nien kijeek ko an ro re mij im kõmõn juõn mejen lokatok eo e meni jen ir. Mejen lokatok in e naj berwõt einwõt juõn men in kakkil ro dri Israel bwe en ejelok juõn ijallokin Aron im lõmaro nejin ren bõk jerbal in pris ñõn Jeova.

Ak Jeova e kõnan lukkun kalikar bwe e ar kãlet Aron im lõmaro nejin bwe ren pris. Kin men in ej jiroñ Moses: ‘Juõn iroij jen kajojo bwij in Israel en bõktok jokwõn eo an. Aron en bõktok jokwõn eo an jen bwijin Livai. Inem kwon likit jokwõn kein iloan imõn kaber eo iman dipdip in kalimur eo. Eo Ij kãlete bwe en pris, jokwõn eo an e naj nar.’

Ke Moses e ar lale jiboñ in ran eo juõn, lale mõk, jokwõn eo an Aron e nar im wut kein im leen amond ko re kalo rej edrek jen e! Inem kwoj kile ke kiõ unin an Jeova kõmõn bwe en nar jokwõn eo an Aron?