Rar Jum̦ae Jeova

Juon iien tokãlik ke RiIsrael ro rar pãd ilo ãne jem̦aden, Kora, Detan, Ebairam, im bar 250 em̦m̦aan rar jum̦ae Moses im Aron. Rar ba ñan erro: ‘Komiro lukkuun nana! Etke kwe Moses kwõj likũt eok bwe kwõn ammim rũtõl im kõm̦m̦an bwe Aron en e eo ej bũrij l̦apl̦ap? Jeova ej pãd ippãd wõj aolep, im ejjab pãd ippemiro wõt.’ Ak ilo m̦ool, Jeova ear jab m̦õn̦õn̦õ kõn an rein jum̦ae Moses im Aron. Etke? Kõnke ej ãinwõt ñe rej jum̦aik E!

Moses ear jiroñ Kora im rijum̦ae ro jet ippãn im ba: ‘Ilju kom̦win itok ñan im̦õn kõppãd eo, im kom̦win bõktok nien kijeek ko ami im kanni kõn kein kaijurjur. Jeova enaaj kaalikkar wõn eo iaad ej kããlõte.’

Ilo raan eo tok juon, Kora im 250 em̦m̦aan ro ippãn rar etal ñan ippãn Moses ilo im̦õn kõppãd eo. Innem rar tũli kein kaijurjur ko aer, ãinwõt ñe er eo rej bũrij. Ak Jeova ear jiroñ Moses im Aron im ba: ‘Kom̦win kattol̦o̦k kom̦ jãn Kora im l̦õm̦aran̦e m̦õttan.’

Detan, Ebairam, im baam̦le ko aerro rar jab kõn̦aan etal ñan im̦õn kõppãd eo. Innem Jeova ear jiroñ RiIsrael ro bwe ren kattol̦o̦k er jãn em̦ nuknuk ko an Kora, Detan, im Ebairam. RiIsrael ro rar m̦õkaj im pokake. Detan, Ebairam, im baam̦le ko aerro rar diwõjl̦o̦k im jutak inabõjin wõt em̦ nuknuk ko aer. Innem bwidej eo ear m̦õkaj an pel̦l̦o̦k im wõrañel̦o̦k er aolep! Im ilo im̦õn kõppãd eo, juon kijeek jãn lañ ear tile Kora im em̦m̦aan ro 250 ippãn.

Innem Jeova ear jiroñ Moses im ba: ‘Kwõn bõk jokon̦ ko an ro rej tõl kajjojo bwij, im je etaer ioon jokon̦ ko aer. Ak ilo jokon̦ eo an bwijjin Livai, kwõn je etan Aron. Innem kwõn bũkil̦o̦k ñan ilowaan im̦õn kõppãd eo. Im jokon̦ eo an armej eo ij kããlõte enaaj eddek wũt ioon.’

Ilo raan eo tok juon, Moses ear bũki aolep jokon̦ ko im kwal̦o̦ki ñan rũtõl ro an bwij ko. Ilo jokon̦ eo an Aron, ear eddek wũt im ear wal̦o̦k almond ko rekalo. Men in ear kam̦ool bwe Jeova ear kããlõt Aron bwe e eo en bũrij l̦apl̦ap.