Jehovah Ej Kajerammõn Im Kejbãrok Ro Rej Kiblie

“A jabrewõt eo e naj eoroñ iõ e naj ber im ejelok an jorran, im e naj jokwõr jen nana.”​—JABÕN KENNAN KO 1:​33.

1, 2. Etke bokake Anij elap tokjen? Kamelele.

TOKKWI yellow ko redik rej toktok kijeir mõñã ilo ujoj ko rekadu, ak ejelok air jelã kin bao hawk eo ej jeblã ioir im apãde ir. Im ilo jidimkij, jinen jojo ko ej bikbik im kwalok ainikien ñan kakkõl im ej erlokwe pã ko pein. Jojo ko nejin rej ettõrlok ñan ibben, im mõkaj im tilekek im jokane iumin pein jineir. Bao hawk eo ej bõjrak jen an iten kokkure ir.a Ta katak eo ijin? Bokake ej lomoren mour!

² Katak in elaptata an lap tokjen ñan Christian ro rainin, kinke Satan ej kõmmane juõn jibadbad ilo men otemjej ñan an apãde armij ro an Anij. Im ilo nan in kõkkar rej keidi Satan einwõt bao hawk eo ilo paragraph 1. Ej kõmman joñan wõt an maroñ ñan an kokkure joñan wõt an lõñ armij ro an Anij. (Reveles̃õn 12:​9, 12, 17) Mejenkajjik eo an ej ñan kokkure tõmak im kõtan jimjera eo ad ibben Jehovah bwe jen jab kabuñburuen Jehovah im luji jerammõn eo kin mour indio. (1 Piter 5:8) Bõtab, elañe jej bed ebake Anij im emmakit ñan ialin tel eo jej bõke ikijen Nan eo an im dolul eo an, jemaroñ liki kin kejbãrok eo an. “E naj kalibubu yuk kin kol ko kolõn bao, im iomin pein kwo naj lo ainemõn,” ri jeje sam ear je.​—Sam 91:4.

Juõn Ailiñ Ekiblia Ej Oktak Im Jorrãn

3. Ta tokjen eo ear walok kin an Israel eliji an jab bokake?

³ Ke ailiñ in Israel ear kiblie ñan Jehovah, ekin emakijkij an bõk tokjen jen lale im kejbãrok eo an. Ak, ekin emakijkij an walok bwe armij ro ellok jen Ri Kõmanman eo air im oktaklok ñan anij alal im dekã ko​—“men ko re wan, ko re ban jibõñ.” (1 Samuel 12:21) Elikin buki yiõ ko in jumae eo einwõt in, ailiñ eo aolepen ear oktak im lap an reel ilo buñ jen tõmak eo ear ellãlok jen an maroñ bar ukwelok. Kin menin, Jesus ear liãjlol: “O Jerusalem, Jerusalem, eo ej mõn ro dri kanan, im kare kin dreka ro jilkinlok ñõn e,​—O enañin lõñ alen I ar kõnan kokweloktok ro nejõm, im einwõt lolo ej kokweloktok nejin jojo iomin pein, im kom ar jab kõnake. Lo! mweo imwemi likit e ñõn kom im jeebeplok.”​—Matu 23:37, 38.

4. Ellok eo an Jehovah jen Jerusalem ewi wãwen an kar oktak im alikar ilo 70 C.E.?

⁴ Ellok eo an Jehovah jen Israel eo ear karmijete ear alikar an jab menin kamõnõnõ im menin liãjlol ilo yiõ eo 70 C.E. Ilo yiõ eo jar in tarinae ko an Ri Rom, eo ej kwotakliñlok kakõlle ko kakõllan ailiñ eo air emwij kainikniki kin annañin eagle, ear jokwadikdiklaltak ion Jerusalem im mõnmõn. Inem jikin kwelok eo ear eobrak kin armij ro rej kememe ran in Kijone eo. Menin katok lõñlõñ ko air rar jab jibañ ir ñan bõk juburu eo an Anij. Menin kar juõn menin kakememej kin nan ko an Samuel ñan King Saul eo ear kiblia: “Jeova ej buñburuen kin men in katok kijeek, im men in katok ko, einwõt ilo bokake ainiken Jeova ke? Lo! bokake emõn jen katok, im eoroñ emõn jen kioeo an jip koman ko.”​—1 Samuel 15:22.

5. Kain bokake rot eo Jehovah ej aikwiji, im ewi wãwen ad jelã bwe kain bokake rot in emaroñ wõr?

⁵ Meñe ej akwelap kin menin aikwij eo kin bokake, Jehovah emõn an jelã kin joñan maroñ eo an armij jab wãppen. (Sam 130:​3, 4) Men ko ej aikwiji rej mol in buru im bokake eo ej bedbed ion tõmak, yokwe, im kin mijak eo emõn ilo jab kamõnõnõik e. (Duteronomi 10:12, 13; Jabõn Kennan Ko 16:6; Aiseia 43:10; Micah 6:​8, NW; Dri Rom 6:​17) Bwe kain bokake rot in ewõr maroñ ie kar kalikare ikijen juõn ‘kõdo elap in Christian ri kennan ro mokta,’ ro rar debij wõt air tiljek ilo jelmae melejoñ ko rebin, meñe mij. (Dri Hibru 11:36, 37; 12:1) Rein rar lukkun kalañliñ buruen Jehovah! (Jabõn Kennan Ko 27:11) Bõtab, ro jet, rar tõmak ilo jinoin ak rar likjap in bed wõt ilo juõn ialin bokake. Juõn ian rein kar King Jehoash in Judah eo etto.

Juõn King Ear Jorrãn kin Kamao ko Renana

6, 7. Kar kain king rot eo Jehoash ke Jehoiada ear mour wõt?

⁶ King Jehoash ear dik an bõprae an kamao ak tel an ke ear einwõt juõn ajiri ibben ro ear tel an ibbeir. Ke Jehoash ear tõbar jiljilimjuõn yiõ dettan, Priest eo Elap Jehoiada ilo beran ear kadioje jen an tilekek im kõmmane bwe en king. Kin mijak eo an kin Anij Jehoiada ear kõmman einwõt jemen im ri kakabilek ñan Jehoash, iroij eo edik im “e ar kõmõn men ko remõn iman mejen Jeova ran otemjej an Jihoiada pris.”​—2 Kronikel 22:⁠10–​23:​1, 11; 24:​1, 2.

⁷ Jerbal ko remõn an Jehoash ear koba bar kõmanmanlok temple eo an Jehovah​—juõn kõmman eo ear “ebaklok ñan buruen Jehoash.” Ear kakememej Priest eo Elap Jehoiada kin aikwij eo ñan ae owõj in temple eo jen Judah im Jerusalem, einwõt an “Moses korijeran Jeova,” kar kaiñi kake, ñan wõnãn jerbal in kõmanmanlok temple eo. Alikar, Jehoiada ear lo tõbrak ilo an kõketak king eo edik ñan an katak im bokake Kien eo an Anij. Tokjen eo, jerbal in temple eo im jãbi ko an temple eo ear mõkaj air dedelok.​—2 Kronikel 24:​4, 6, 13, 14; Duteronomi 17:18.

8. (a) Ta men eo moktata ear tellok ñan buñ eo an Jehoash ilo jitõb? (b) Ta eo jab bokake eo an king eo ear tellok e ñan an kõmmane?

⁸ Ekaburomõjmõj, bwe bokake eo an Jehoash ear likjap im jab aetok kitien. Etke? Nan in Anij ej jiroñ kij: “Ak elikin an Jihoiada mij, iroij ro in Juda rar item barikrik ñõn kiñ eo. Inem kiñ eo e ar eoroñ ir. Im rar illok jen imõn Jeova, Anij an ro jimair, im rar korijer ñõn Ashira ko im ekjõp ko; im illu ear itok ion Juda im Jerusalem kin nana in rueir.” Kareelel eo enana an iroij ro an Judah ear bareinwõt tellok king eo ñan an oktak im jab eoroñ ri kanan ro an Anij, juõn iair kar leo nejin Jehoiada, Zechariah, eo ear ilo beran kauwe Jehoash im armij ro kin jab bokake eo air. Jen an ukwelok, Jehoash ear kõmman karõk bwe ren kade Zechariah ñan mij. Jehoash ear oktak im juõn emaan eo eutiej buruen im jab bokake​—ear eindein kinke ear lelok e ñan kareelel ko an kamao ko renana!​—2 Kronikel 24:​17-​22; 1 Dri Korint 15:33.

9. Ewi wãwen an kar tokjen eo ear walok eliktata an Jehoash im iroij ro kalikar bwebwe kin jab bokake?

⁹ Ke rar ellok jen Jehovah, ewi wãwen an kar Jehoash im iroij ro mõttan renana lo tokjen? Juõn jar in tarinae an Ri Syria​—“im eiet wõt armij ro”​—rar nitbwili Judah “im rar mõn iroij otemjej jen iben armij ro.” Ri nitbwili ro rar bareinwõt jibed king eo bwe en lelok men ko mweien make bareinwõt gold im silver ko an jikin kwojarjar eo. Meñe Jehoash ear ellã im mour, ear oktak im mõjno im ri nañinmij. Elikinlok wõt jidik ien, armij ro jen ibwiljin ro ri karejaran make rar mõne. (2 Kronikel 24:23-​25; 2 Kiñ Ro 12:17, 18) Emol nan ko an Jehovah ñan Israel: “A elañe kwo jab kõnan eoroñ ainikien Jeova am Anij, bwe kwon bokake im kõmõn kien ko otemjej An . . . , inem jerata otemjej kein re naj itok iom im re naj tõbar yuk”!​—Duteronomi 28:15.

Juõn Ri Jeje eo Ear Bõk Lomor Kin Bokake

10, 11. (a) Etke ej menin jibañ ñan kalmenlokjen kin nan in kakabilek eo an Jehovah ñan Baruch? (b) Ta nan in kakabilek eo Jehovah ear lelok ñan Baruch?

¹⁰ Jet ien kwoj eñjake ke am ebwer kinke jejjo wõt ibwiljin armij ro kwoj ione ir ilo jerbal in kwalok nan eo an Christian rej kwalok itoklimo ilo news eo emõn? Jet ien kwoj bõk ke juõn eñjake in ebanbane ro remweie im ranemkwoj ilo style in mour ko air? Elañe eindein, kanuij kalmenlokjen kin Baruch, ri jeje eo an Jeremiah, im kin nan in kakabilek in yokwe eo an Jehovah ñan e.

¹¹ Baruch ear bed ilo an je juõn ennan in kanan ke e make ear oktak im Jehovah ear kalimjeke. Etke? Kinke Baruch ear jino liãjlol kin wãwen eo ear bed ie im kõnan eo an ñan juõn men eo emõnlok jen jerammõn eo an einjuõn ilo an karejar ñan Anij. Ilo an lo oktak in ilo lemnak eo an Baruch, Jehovah ear lelok ñane nan in kakabilek eo ejoij ilo alikar, im ba: “Kwoj bukõt wõt men ko relap ñan kwe make. Kwon jab bukõti wõt. Bwe Ij bõktok juõn jorrãn ion kanniek otemjej, . . . im I naj lewõj ñan am einwõt juõn menin joor jen mij ijoko otemjej kwoj ilok ielok.”​—Jeremiah 36:​4; 45:⁠5, NW.

12. Etke jej aikwij bõprae ad bukõt “men ko relap” ñan kij make ilo jukjuk im bed in?

¹² Kwomaroñ ke kalmenlokjen ilo nan ko an Jehovah ñan Baruch kin an lap An lemnak kin armij in emõn, eo ear karejar ñane ilo tiljek im beran kobalok ibben Jeremiah? Eindein rainin, Jehovah elap an lemnak kin ro rej kabo ir ñan jibadõk men ko rej lemnaki bwe remõnlok ilo jukjuk im bed in. Ekamõnõnõ, bwe einwõt Baruch, elõñ kain armij rot in emwij air uak ñan yokwe in kajimwe eo jen ro jeiir im jatiir ilo jitõb me rej bõk eddo. (Luk 15:​4-7) Aet, kij otemjej jen melele bwe ejelok juõn ilju ñan ro rej bukõt “men ko relap” ñan ir make ilo jukjuk im bed in. Rein rejjab likjap wõt jen air lo mõnõnõ eo emol ak, men eo elaplok an nana, ejjabto renaj jakolok ibben lal in im aolep kõnan ko an rekibbon.​—Matu 6:​19, 20; 1 Jon 2:​15-​17.

13. Ta katak eo ilo ettã buru bwebwenato eo kin Baruch ej katakin kij?

¹³ Bwebwenato eo kin Baruch ej bareinwõt katakin kij kin juõn katak eo emõn kin ettã buru. Lale bwe Jehovah ear jab kajju an lelok nan in kakabilek ñan Baruch ak ear konono ikijen Jeremiah, eo jab wãppen ko an im mantin bõlen ear emõn an Baruch jelã kaki. (Jeremiah 45:​1, 2, NW) Ak, Baruch ear jab likjap kin utiej buru; e ar jelã ilo ettã buru unjen eo ear lelok nan in kakabilek​—Jehovah. (2 Kronikel 26:​3, 4, 16; Jabõn Kennan Ko 18:12; 19:20) Inem elañe jej ‘bõk juõn buñten nee eo ewan mokta jen ad jelã kake’ im bõk nan in kakabilek eo ej menin aikwij jen Nan in Anij, jen kajeoñe ritto eo an Baruch, jelã eo ilo jitõb, im ettã buru.​—Dri Galetia 6:1.

14. Etke ej juõn men ewõr tokjen ñan kij bwe jen bokake ro ibwiljid rej tel kij?

¹⁴ Juõn lemnak in ettã buru eo einwõt in ibbed ej bareinwõt jibañ ro rej lelok nan in kakabilek. Dri Hibru 13:17 ej ba: “Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.” Emakijkij an elder ro jar ñan Jehovah, jar kin kakajur, meletlet, im jelã kilen eo ej menin aikwij ñan kajejjet kitien wãwen in ebin ilo jerbal in shepherd in air! Jen “kili ro eirwõt.”​—1 Dri Korint 16:18.

15. (a) Ewi wãwen an kar Jeremiah kalikar an liki Baruch? (b) Ewi wãwen kar nawõnãn Baruch kin ettã buru in bokake eo an?

¹⁵ An Baruch kar kajimwe lemnak eo an ej alikar, kinke Jeremiah jeltokin ear lelok ñan e juõn jerbal elap​—bwe en etal ñan temple eo im konono ilo elaj ainikien ennan in ekajet eo e make ear je ilo an Jeremiah konono lok ñane. Baruch ear bokake ke? Aet, “men ko otemjej Jeremiah ri kanan eo ear jiroñ e.” Ilo mol, ear konono ejja ennan eo wõt ñan iroij ro an Jerusalem, im ejelok bere bwe ear aikwij lukkun beran. (Jeremiah 36:​1-6, 8, 14, 15, NW) Ke jikin kwelok eo ear buñ ñan Babylon 18 yiõ ko tokelik, kalmenlokjen kin wãwen an Baruch kar kamolol kin an kar ellã im mour kin wõt an kar eoroñ nan in kakkõl eo an Jehovah im bõjrak jen an bukõt “men ko relap” ñan e make!​—Jeremiah 39:​1, 2, 11, 12; 43:​6, NW.

Bokake ilo Juõn Ien Nitbwili eo Ear Lomoren Mour

16. Ewi wãwen Jehovah ear kwalok an joij ñan Ri Jew ro ilo Jerusalem ilo ien nitbwili eo an Ri Babylon ilo 607 B.C.E.?

¹⁶ Ke jemlokin Jerusalem ear itok ilo 607 B.C.E., yokwe eo an Anij ñan ro rar bokake ear bar alikar. Ilo bwiltõñtõñin ien nitbwili eo, Jehovah ear ba ñan Ri Jew ro: “Ij likit imami juõn ial in mour im juõn ial in mij. Jabdewõt eo ej bed wõt ilo jikin kwelok in enaj mij ilo tarinae im kin kwuli im kin nañinmij; ak jabdewõt eo ej diojlok im lelok e make ñan pein ri Babylon ro rej nitbwili jikin kwelok in, ejamin mij, ak enaj joor im mour wõt.” (Jeremiah 21:​8, 9, NW) Meñe armij in Jerusalem ro rar tellokin jako, Jehovah ear kwalok yokwe ñan ro rar bokake e, meñe ilo ien ko eliktata im kauwatata.b

17. (a) Ta wãwen ko ruo bokake eo an Jeremiah kar melejoñe ke Jehovah ear jiroñ e bwe en jiroñ Ri Jew ro rar nitbwili ir bwe ren ajelok ir make ñan Ri Babylon ro’? (b) Ewi wãwen ad maroñ bõk tokjen jen joñok eo an Jeremiah kin beran in bokake?

¹⁷ Jiroñlok Ri Jew ro bwe ren ajelok ir make ejelok bere ear bar menin melejoñe bokake eo an Jeremiah. Juõn un kar, bwe ear kijejeto ilo etan Anij. Ear jab kõnan bwe ri kijirãt ro ren kananaiki, ro renaj kar lelok anjo eo air ñan ekjap ko rejjab mour. (Jeremiah 50:​2, 11, NW; Lamentations 2:​16, NW) Bareinwõt, Jeremiah ear jelã bwe ilo an jiroñlok armij ro bwe ren ajelok ir make, ear make likit mour eo an ilo kauwatata, bwe elõñ renaj kar ukõt melelen nan ko an einwõt ñan jumae kien ailiñ eo. Ak, ear jab bed ilo an mijak, ak ilo bokake ear konono ennan ko an Jehovah. (Jeremiah 38:​4, 17, 18, NW) Einwõt Jeremiah, kij bareinwõt jej keañ kin juõn ennan eo ejjab buñbuñ. Ejja ennan eo wõt rar kijirãte Jesus kake. (Aiseia 53:3; Matu 24:9) Inem jen jab ‘mijak kin armij,’ ak einwõt Jeremiah, jen ilo beran bokake Jehovah, liki e.​—Jabõn Kennan Ko 29:25.

Bokake ilo Jelmae Tarinae eo an Gog

18. Ta melejoñ ko ilo ran ko rej itok kin bokake ro ri karejeran Jehovah renaj jelmaiki?

¹⁸ Ejjabto, jukjuk im bed in enana an Satan enaj jako ilo juõn “eñtan elap.” eo ejañin kar wõr einwõt mokta. (Matu 24:21) Ejelok bere moktalok im ilo ien en, armij ro an Anij renaj lo melejoñ ko relap in tõmak im bokake eo air. Ñan wanjoñok, Bible eo ej jiroñ kij bwe Satan, ilo jerbal eo an einwõt “Gog jen enen Magog,” enaj kõmmane juõn tarinae eo elap nae aolepen ro ri karejaran Jehovah, keboj kajur ko ñan makitkit ko rej kwalok kaki einwõt “juõn jar elap in tarinae . . . , einwõt kõdo ko rej kalibubu ene.” (Ezekiel 38:​2, 14-​16, NW) Armij ro an Anij reiet im ejelok air kein tarinae renaj bukõt jikin air kone ilo “iomin pein” Jehovah eo ej erlokwe ñan kejbãrok ro rej bokake.

19, 20. (a) Etke bokake eo an Israel ear lap tokjen ke rar bed ilo Lomalo Ekilmir? (b) Kalmenlokjen ilo jar kin bwebwenato eo ilo Lomalo Ekilmir ewi wãwen an maroñ wõr tokjen ñan kij rainin?

¹⁹ Wãwen in ej kakememej kij kin diojlok eo an Israel jen Egypt. Elikin kaeñtan Egypt kin menin kaeñtan ko joñoul, Jehovah ear tel armij ro an, jab ion ial eo ekadutata lok ñan Enen Kallimur eo, ak lok ñan Lomalo Ekilmir, ijo enaj kar bidodo kobaj ir im tarinaik ir. Ilo kalimjeke jen juõn wãwen tarinae, menin ear einwõt juõn emmakit ñan jorrãn. Elañe kwar bed ijo, kwon kar bokake ke nan eo an Jehovah ikijen Moses im wanlallok ñan Lomalo Ekilmir kin likieo in liki, ilo am jelã bwe Enen Kallimur eo ejjab bed iman ial eo?​—Exodus 14:​1-4.

²⁰ Ke jej read manlok ilo Exodus chapter 14, jej lo wãwen an Jehovah kar kõtlok armij ro an ilo juõn wãwen ekalelñoñ ilo kalikar kajur. Ewi wãwen an bwebwenato rot in kakajurlok tõmak eo ad ñe jej bõk ien ñan katak im kalmenlokjen kaki! (2 Piter 2:9) Tõmak eo ekajur, oktan, ej kakajurlok kij ñan bokake Jehovah, meñe menin aikwij ko an einwõt reinjuõn jen kõmmanwa an armij. Ñan tõbar juõn jemlok jej aikwij kejbãrok ad etali aolep men in kamol ko ie. (Jabõn Kennan Ko 3:​5, 6) Inem kajitõkin yuk make, ‘Ij kate ke Iõ ñan kalek tõmak eo aõ ikijen aõ niknik katak Bible, jar, im kalmenlokjen, bareinwõt ekkeini kobalok ibben armij ro an Anij?’​—Dri Hibru 10:24, 25; 12:​1-3.

Bokake Ej Ejaake Kejatdikdik

21. Ta ãjinkij ko, kiõ im ilo ilju eo ej itok, renaj itok ñan ro rej bokake Jehovah?

²¹ Ro rej bokake Jehovah ilo wãwen mour eo air rej ione meñe kiõ jejjet in kitien Jabõn Kennan Ko 1:​33, eo ej ba: “A jabrewõt eo e naj eoroñ [bokake] iõ, e naj ber wõt im ejelok an jorran, im e naj jokwõr jen nana.” Nan in kabwilõñlõñ im kainemõn kein renaj jerbal ilo ran in idenwõne eo ej itok an Jehovah! Ilo mol, Jesus ear jiroñ ri kalor ro an: “A ñe men kein re jino in walok, inem komin reiliñlok im jer: bwe ebaktok kõtlok kom.” (Luk 21:28) Alikar, ro wõt rej bokake Anij enaj wõr air liki ñan eoroñ nan kein.​—Matu 7:​21.

22. (a) Etke armij ro an Jehovah ewõr juõn air bedbed kin liki? (b) Ta men ko naj konono kaki ilo katakin tok ilokan?

²² Bar juõn un ñan liki ej bwe “Iroij Kajur Bõtata Jehovah ejamin kõmman jabdewõt mae ien emwij an kwalok menin ittino ko an ñan ri kanan ro ri karejeran.” (Amos 3:​7, NW) Rainin, Jehovah ejjab kakõrmol ri kanan ro an einwõt ilo ien ko remotlok; ak, ej kajerbal juõn class in ri karejar etiljek ñan letok ilo ien ekkar mõñã ko ilo jitõb ñan ro ilo mweo imõn. (Matu 24:45-​47) Kin menin elap tokjen, bwe en wõr ibbed juõn lemnak in bokake ñan “ri karejar in”! Einwõt an katakin tok ilokan naj kwalok, bokake rot in bwe ej bareinwõt kalikar lemnak eo ad ñan, master eo an ‘ri karejar.’ Ej E eo me ‘bokake eo an armij ej ñan e.’​—Jenesis 49:10.

[Kamelele ko itulal]

Kwoj Kememej Ke?

• Ta tokjen eo ear walok kin an Israel eliji an jab bokake?

• Ewi wãwen an kar King Jehoash lorak ibben ro ear kobalok ibbeir, ilo jinoin mour eo an im tokelik?

• Ta katak ko jemaroñ katak jen Baruch?

• Etke armij ro rej bokake Jehovah ejelok unin air mijak ke jukjuk im bed in kiõ ej ebaktok jemlokin?

[Pija eo ilo peij 21]

Iomin tel eo an Jehoiada, jodikdik eo Jehoash ear bokake Jehovah

[Pija eo ilo peij 22]

Kamao ko renana rar kareel Jehoash ñan an mõn ri kanan eo an Anij

[Pija eo ilo peij 24]

Kwon kar bokake ke Jehovah im lo kajur in lomor eo an ekabwilõñlõñ?