Bukõt Emõn Eo Ilo Armij Otemjej
“Kwon kememej iõ, O aõ Anij, ñõn emõn.”—Nihimaia 13:31.
1. Ewi wãwen an Jehovah jerbal ilo emõn ñan armij otemjej?
ELIKIN elõñ ran ko rekõtoto im marok, juõn ran emeramram ej bõktok juõn oktak emõn. Elaplok an eñjake ko an armij mõnõnõ. Eindein, elikin elõñ ran ko remeramram im mõrã, juõn ien wũt—ak wũtleplep—ej bõktok aemololo im ainemõn. Ri Kõmanman eo ad eo ej yokwe kij, Jehovah, ear kobaike ilo mejatoto eo an lal in men in letok in kin kõto. Jesus ear jitõñlok ñan joij eo an Anij ke ear katakin: “Komin yokwe ro dri kijirãte kom, im jar kin ro rej matõrtõr kom, bwe komin ro nejin Jememiuij ilõñ; bwe Ej kõtak al ion ro renana im ro remõn, im kowut ion ro rewãnik im ion ro re jab wãnik.” (Matu 5:43-45) Aet, Jehovah ej jerbal ilo emõn ñan armij otemjej. Ri karejar ro an rej aikwij kate wõt im kajeoñe e ilo air bukõt men ko remõn ilo armij ro jet.
2. (a) Ion bedbed et eo Jehovah ej jerbal ilo emõn? (b) Ta eo Jehovah ej loe ikijen wãwen ad uak kin emõn eo an?
2 Ta bedbed eo ej kamakit Jehovah bwe en jerbal ilo emõn? Jen ien eo ke Adam ear buñ im jerawiwi, Jehovah ear jab likjap in bukõt emõn eo ilo armij ro. (Sam 130:3, 4) Karõk eo an ej ñan kajeblak armij ro rekiblie ñan mour ilo Paradise. (Dri Epesõs 1:9, 10) Joij eo an ear letok ñan kij kejatdikdik ñan rõlok jen jerawiwi im jab wãppen ikijen Ine eo emwij kallimur kake. (Jenesis 3:15; Dri Rom 5:12, 15) Ad bõk karõk in binmour eo ej kamaroñ kij ñan jeblak ñan mour eo ewãppen. Kiõ Jehovah ej kalimjek kij kajjojo ñan lale, ewi ad lemnak kin joij eo an. (1 Jon 3:16) Ej lo ta eo jej kõmmane ñan kwalok ad kamolol kin emõn eo an. “Anij e wãnik wõt, im E jamin meloklok ami jerbal im yokwe, eo kom ar kwalok kin etan,” ri jilek Paul ear je.—Dri Hibru 6:10.
3. Ta kajitõk eo ej tellokin ad lemnak kake?
3 Inem, ewi wãwen jemaroñ kajeoñe Jehovah im bukõt emõn eo ilo armij ro jet? Jen lale uak ko ñan kajitõk in ilo emen wãwen ko an mour: (1) jerbal in kwalok nan einwõt juõn Christian, (2) family eo, (3) congregation eo, im (4) kõtan eo ad ibben ro jet.
Ilo Kwalok Nan im Kõmman Ri Kalor
4. Ewi wãwen bõk kunad ilo jerbal in kwalok nan ej juõn wãwen jej bukõt emõn eo ilo armij ro jet?
4 “Lõl e jikin kallip,” Jesus ear kamelele ke ear uake kajitõk ko an ri kalor ro an kin melelen parable eo kin wheat im taõ ko. Einwõt ri kalor ro an Christ ilo ran kein, jej kile mol in ñe jej kwalok nan. (Matu 13:36-38; 28:19, 20) Jerbal in kwalok nan eo ad ej kitibuj jerbal eo ñan kwalok tõmak eo ad ñan armij ro. Kinke Ri Kennan ro an Jehovah rej buñbuñ kin jerbal eo air jen em ñan em im iturin ial ko, ej kamole kijejeto eo air ñan bukõt aolep ro ej tellokiir bwe ren jelã kin ennan eo an Ailiñ eo. Emol, Jesus ear jiroñ: “Ilo jabrewõt jikin kwelok elap ak erik kom naj dreloñ ie, komin kajitõk wõn eo emõn iloan.”—Matu 10:11; Jerbal 17:17; 20:20.
5, 6. Etke jej kate wõt im bar jeblak elõñ alen ñan armij ro ilo moko imwiir?
5 Ñe kwoj lolok armij ro rejjab kõtmene am lolok ibbeir, jej lale ewi lemnak eo air kin ennan eo ad. Jet ien jej lo juõn ian ro uan family eo ej mõnõnõ in roñjake, ak bar juõn iloan mweo imõn emaroñ lamõj im ba, “Kimij jab itoklimo,” im kabõjrak bwebwenato eo. Elap ad buromõj bwe jumae ak jab itoklimo eo an juõn wõt armij ilo mweo emaroñ jelet ro jet! Inem, ta eo jemaroñ kõmmane ñan kate wõt im bukõt emõn ilo armij otemjej?
6 Ñe jej bar jeblak ñan mweo ñe jej kwalok ilo ejja jikin eo wõt emaroñ letok juõn ien emõn ñan bwebwenato ibben armij eo ear lamõj im kabõjrak kij ilo ien lolok eo mokta. Ad kememej wõt ta eo ear walok mokta emaroñ jibañ kij ñan kebojak. Bõlen ri jumae eo ear kõmman eindein kin jet un ko ear lemnak rejimwe, im kin un kein ear kabõjrak eo juõn jen an roñjake ennan eo an Ailiñ eo. Bõlen ear bõk lemnak in jen nan in riap ko ear roñ kin mejenkajjik eo ad kin jerbal in. Ak jumae in ejjab kabõjrak kij jen ad kate wõt in kwalok nan kin news eo emõn kin Ailiñ eo ilo mweo, im ilo joij im jelã kilen kajimwe lemnak ko rebwid. Jej itoklimo in jibañ aolep bwe ren bõk jelãlokjen eo ejejjet im jimwe kin Anij. Ñe Jehovah enaj karuaklok armij eo ñan e.—Jon 6:44; 1 Timote 2:4.
7. Ta eo emaroñ jibañ kij ñan bõk juõn lemnak ejimwe ñe jej kebak armij ro?
7 Nan in jiroñ ko an Jesus ñan ri kalor ro an rar koba kamelele ko kin jumae ilo family eo. Ear jab ba ke: “Ij itok bwe In kiõjõljõl armij ñõn jemen, im nejin kõra ñõn jinen, im bar nejin kõra ñõn bar jinen”? Jesus ear wõnmanlok im ba: “Im ro an armij kijirãt re naj ro nukin.” (Matu 10:35, 36) Ak, wãwen im lemnak ko remaroñ oktak. Juõn nañinmij eidiñ, juõn nukin emij, juõn abañ ekaburomõj, im elõñlok men ko remaroñ jelet lemnak eo an armij ro kin jerbal in kwalok nan eo ad. Elañe jej bõk juõn lemnak ejjab jimwe—bwe armij ro rejjab kõnan ad kwalok nan ñan ir rejamin oktak—jej lukkun bukõt ke emõn eo ilo ir? Etke jejjab jeblak ilo mõnõnõ ibbeir bar juõn ien? Jemaroñ lo juõn lemnak einjuõn. Jet ien ejjab baj ta eo jej ba wõt ak ewi wãwen ad ba juõn ennan emaroñ kamakit juõn bwe en uak ilo jimwe. Jar kin aolepen buruõd ñan Jehovah mokta jen ad jino kwalok nan enaj jibañ kij bõk juõn lemnak ejimwe im kwalok juõn ennan kin Ailiñ eo ilo juõn wãwen emejaja ñan armij otemjej.—Dri Kolosse 4:6; 1 Dri Tessalonika 5:17.
8. Ta eo emaroñ walok ñe Ri Christian ro rej bukõt emõn eo ilo ro nukiir me rejjab tõmak?
8 Ilo jet congregation ko elõñ armij ro ilo ejja family eo wõt rej karejar ñan Jehovah. Ekkã an walok bwe unin an jodikdik ro kautiej ritto ro ilo family ko air kinke juõn nukiir eritto ear kate wõt im kejbãrok juõn kõtan emõn ilo family eo im mour in belele eo im kin men in ear kabellok juõn ial ñan ukõt buruen jodikdik ro. Ilo air bokake nan in kakabilek eo an Peter elõñ Christian limaro ear kareel buruen lõmaro beleir meñe “ejelok nan.”—1 Piter 3:1, 2.
Ilo Family eo
9, 10. Ewi wãwen Jacob im Joseph rar jimor bukõt men eo emõn ilo family eo airro?
9 Men ko rej karuaktok ro uan juõn family ñan don ej bar juõn unin ad maroñ bukõt emõn eo ilo armij ro jet. Lemnak kin wãwen ko an Jacob ibben ro nejin. Ilo Jenesis chapter 37, 3 im 4 eon, Bible eo ej kalikar bwe ear laplok an Jacob yokwe Joseph jen likao ro jet nejin. Lõmaro jein im jatin Joseph rar junmade, ñan joñan eo rar bukõt kilen air urõte. Bõtab, lale mõk lemnak ko an Jacob im Joseph elõñ yiõ ko tokelik. Erro jimor rar bukõt emõn eo ilo family eo airro.
10 Ke Joseph ear jerbal einwõt ri ajej mõñã ilo Egypt ilo ien ñitta, ear karuwaineneik ro jein im jatin. Meñe ear jab kalikar wõn e ilo jinoin, ear karõk wãwen ko ñan kabwe aikwij ko air ñan kejbãrok air mour im bõklok mõñã ko ñan jemeir eo ebwijwõlã. Aet, meñe ear bed ilo jorrãn kin air kijirãte, Joseph ear jerbal ñan kejbãrok air mour. (Jenesis 41:53–42:8; 45:23) Eindein, ilo ien eo ke Jacob ear bojak in mij ear kajerammõn aolep ro nejin. Meñe bwid ko air ear tellok ñan air luji jet jerammõn ko, ejelok juõn iair ear jab bõk men in jolet eo ilo ene eo. (Jenesis 49:3-28) Ej juõn nan ekabwilõñlõñ kin yokwe eo ejjab jemlok Jacob ear kwalok!
11, 12. (a) Ta wanjoñok eo ilo kanan eo ej kalikar aorõkin bukõt emõn eo ilo family eo? (b) Ta eo jej katak jen wanjoñok eo an jemen eo ilo parable eo an Jesus ikijen likao eo ejerwan?
11 Wãwen an Jehovah kwalok lejokmen ke ear jerbal ibben ailiñ in Israel eo ear jab tõmak ej kalaplok lolokjen eo ad kin wãwen eo ej bukõt men ko remõn ilo armij ro an. Ilo an kajerbal wãwen family eo an ri kanan Hosea Jehovah ear kwalok yokwe eo an ejjab jemlok. Gomer, lio belen Hosea, ear lejen elõñ alen. Meñe eindein, Jehovah ear jiroñ Hosea: “Kwon ilok im yokwe juõn kõrã eo elõñ an ri yokwe im ej lejen. Kwon yokwe e einwõt ña ij yokwe wõt armij in Israel, meñe rar ellok ñõn bar jet anij im mejlokier katok kin raisin ñõn ekjap ko.” (Hosea 3:1, NW) Etke ear kwalok kain nan in jiroñ rot in? Jehovah ear jelã bwe jen ailiñ eo ear jebwãbwe jen wãwen ko an, ewõr armij ro kajjojo renaj uak ilo jimwe ñan meanwõd eo an. Hosea ear ba: “Tokelik ro nejin Israel renaj jeblak im reilok ñan Jehovah air Anij, im David air kiñ; im renaj wũdiddid ilo jimwe ñan Jehovah im emõn eo an ilo ien jemlokin ran ko.” (Hosea 3:5, NW) Emol men in ej juõn wanjoñok emõn ñan kalmenlokjen kake ñe jej jelmae abañ ko ilo family eo ad. Am bukõt wõt men ko remõn ilo ro jet uan family eo enaj likit juõn joñok emõn kin kijenmij.
12 Parable eo an Jesus ikijen likao eo e jerwan ej letok bar juõn men ñan kalmenlokjen kake kin wãwen eo jemaroñ bukõt emõn eo ilo family eo ar make. Likao eo edik ear jeblak ñan mweo imõn jemen elikin an bõjrak jen an mour einwõt juõn armij in jerwan. Jemen ear tiriamokake e. Kar ewi lemnak eo an jemen ke leo nejin eritto eo ear jab ilok jen family eo an ear abõnõnõ? Ke ear konono ñan nejin eo eritto, jemen ear ba: “Nejiõ, ien otemjej kwoj ber iba, im men otemjej aõ am.” Nan in ear jab juõn ainikien ewõr lotan ie ak jen men in ear baj juõn nan in kamole yokwe eo an jemen ñan nejin eo edik. “A emõn bwe jen lõñliñ im lioeo kake,” ear wõnmanlok, “bwe e in jãtõm e kar mij, im ej bar mour, e kar joko, im ej walok.” Emaroñ eindein lemnak eo ad ñe jej bukõt emõn eo ilo armij ro jet.—Luk 15:11-32.
Ilo Congregation eo an Christian
13, 14. Ta eo ej juõn wãwen ñan kwalok yokwe eo ej kadkad eo elap iloan congregation eo an Christian?
13 Einwõt Ri Christian ro, ej mejenkajjik eo ad in bwe jen jerbale kien eo elap ej yokwe. (Jemes 2:1-9) Emol, jemaroñ bõk ro uan congregation eo me reinjuõn jen kij ilo mweie. Ak ewõr ke juõn jitõb in “jibil” ilo buru ibbed im ej bedbed ion ta kil eo kiliir, ailiñ eo air, ak kabuñ eo air? Elañe aet, ewi wãwen ad maroñ bokake nan in kakabilek eo an Jemes?
14 Karuwaineneik aolep ro rej bed ilo kwelok ko an Christian ej kamol bwe ewõr jitõb in karuwainene im joij ibbed. Ñe jej bõk eddo eo ñan konono ibben ro rekãl rej itok ñan Kingdom Hall eo, ejjabto tokelik jabdewõt wãwen ikkũmkũm ko an ro rekãl ilo jinoin emaroñ jako. Emol, jet armij ro rej kab itok ñan kwelok eo juõn alen rej ba: “Aolep armij rar lukkun joij. Einwõt ñe rejelã kajjiõ. Ij mõnõnõ in bed ibbeir.”
15. Ewi wãwen jemaroñ jibañ ajiri ro ilo congregation eo ñan kwalok air itoklimo ibben ritto ro?
15 Ilo jet congregation ko, jet jodikdik ro remaroñ koba ibben don inabõj in Kingdom Hall eo elikin kwelok eo, im jab kamao ibben ritto ro. Ta men eo emõn jemaroñ kõmmane ñan kajimwe manit in? Emol bwe, buñten ne eo kein kajuõn ej bwe jemen im jinen ajiri ro ren katakin ir ilo moko imwiir, ñan kebojak ñan kwelok ko. (Jabõn Kennan 22:6) Remaroñ bõk eddo eo ñan keboji aolep kein katak ko rej aikwiji ñan bõklok ñan kwelok ko. Bareinwõt ro jemeir im jineir rej bed ilo juõn wãwen emõn ñan rejañ ajiri ro nejiir ñan bwebwenato ibben ritto ro im ro renañinmij ilo Kingdom Hall eo. Ilo air bojak in ba juõn nan ewõr tokjen ñan bwebwenato kake ibben armij rein emaroñ kajju buruen ajiri ro.
16, 17. Ewi wãwen ritto ro remaroñ bukõt men ko remõn ilo jodikdik ro ilo congregation eo?
16 Maan im kõrã ro rej aikwij kwalok air itoklimo kin ajiri ro ilo congregation eo. (Dri Pilippai 2:4) Remaroñ bõk eddo eo ñan konono ibben ajiri im jodikdik ro ñan rejañ ir. Emakijkij an walok jet point ko raorõk ilo ien kwelok eo. Remaroñ kajitõk ibben ajiri im jodikdik rein elañe rar mõnõnõ kin kwelok eo im elañe ear wõr jabdewõt point ko rar mõnõnõ kaki im bwe ren jerbali. Einwõt juõn mõttan eo eaorõk an congregation eo, jej aikwij kautiej jodikdik ro kin air liñõri katak ko im kamolol ir kin jabdewõt uak ko rar kwaloki ilo kwelok eo ak jabdewõt ro rar bõk kunair ilo kwelok ko. Wãwen an jodikdik ro kobalok ibben ritto ro ilo congregation eo im wãwen air jerbal ilo mweo imwiir ej kalikar bwe remaroñ bõk eddo ko relaplok tokelik ilo mour ko air.—Luk 16:10.
17 Ilo air bõk eddo eo air, jet jodikdik ro rar wõnmanlok ñan joñan eo kadkad ko ilo jitõb kadkadiir rar kamaroñ ir ñan bõk jerammõn ko relaplok. Bareinwõt ñe rej boub wõt ilo air jerbale men in emaroñ kejbãrok ir jen air kõmman manit ko rebwebwe. (2 Timote 2:22) Kain jerbal rot kein remõn remaroñ ‘melejoñe tiljek eo an ri tõmak likao ro rej jibadõk jerbal in ministerial servant. (1 Timote 3:10) Ilo air bojak in bõk kunair ilo kwelok ko im kijejeto wõt ilo jerbal in kwalok nan, ekoba kwalok air itoklimo ñan bed ibben aolep ilo congregation eo, aolep wãwen kein rej kamaroñ elder ro bwe ren lo maroñ ko air ñan bõk jerbal ko jet.
Bukõt Emõn eo ilo Armij Otemjej
18. Ta bwid eo ikijen ekajet jej aikwij kejbãrok kij jen e, im etke?
18 “Kabwiloklok mejen armij ilo ekajet e jab emõn,” Jabõn Kennan 24:23 ej ba. Meletlet jen lañ ej kakien elder ro bwe ren kejbãrok ir jen kalijeklok ñe rej ekajete men ko ilo congregation eo. Jemes ear ba: “Meletlet jen lõñ ej erreo mokta, inem e ainemõn, joij, ebiruru an rel, eobrõk kin tiriamokake im leen ko remõn, im ejelok akwail ak jela mon iben.” (Jemes 3:17) Alikar, ñe rej bukõt emõn eo ilo armij ro jet, elder ro rej aikwij kejbãrok bwe kõtan ko air rebak ñan armij eo en jab kabwilok mejeir ñe rej ekajete e. “Anij ej jutõk ilo jar an Anij,” ri jeje sam Asaph ear je. “Ej ekajet i bwiljin anij rõn [ak “ro rej einlok wõt anij,” ej jitõñlok ñan ri ekajet in armij ro]. Ietoõn kom naj ekajet im jab jime, im kabwiloklok mejen ro dri nana?” (Sam 82:1, 2) Inem, Ri Christian elder ro rej kejbãrok ir jen jabdewõt wãwen kalijeklok ñe ej kitibuj men ko an juõn jerair ak nukiir. Ilo wãwen in rej kejbãrok burukuk eo an congregation eo im kõtlok bwe jitõbõn Jehovah en toor wõt.—1 Dri Tessalonika 5:23.
19. Ilo wãwen et ko jemaroñ bukõt emõn eo ilo armij ro jet?
19 Ilo ad bukõt emõn eo ilo maan im kõrã ro mõttad ilo tõmak, jej kwalok lemnak eo an Paul ke ear konono ñan congregation eo ilo Tessalonika. Ear ba: “Im kimij liki wõt Iroij kin kom bwe komij kõmõn im naj kõmõn men ko kimij jiroñ kom kaki.” (2 Dri Tessalonika 3:4) Enaj bidodolok ad jeorlok bwid ko an ro jet ñe jej bukõt emõn eo ilo ir. Jenaj bukõt wãwen ad maroñ nebar ro jeid im jatid, im kejbãrok kij jen juõn jitõb in notaik armij. “A ijin rej kajitõkin dri kõmñe,” Paul ear je, “bwe ren lo an armij tiljek.” (1 Dri Korint 4:2) Ejjab tiljek eo an ro rej tel congregation eo wõt ak an aolep Ri Christian maan im kõrã ro ej kamakit kij ñan kaorõk ir einwõt jitenburu ro ad. Jej ruaklok ñan ir, im kakajurlok jimjera eo an Christian ibbeir. Jej bõk ejja lemnak eo wõt an Paul ikijen ro jein im jatin ilo tõmak ilo ran ko an. Rej “dri jerbal ro [ibbed] ñõn ailiñ in Anij” im rej “kainemõn” kij. (Dri Kolosse 4:11) Inem jej kwalok lemnak eo an Jehovah.
20. Ta jerammõn ko renaj buñõt ro rej bukõt emõn eo ilo armij otemjej?
20 Emol jej errã ibben jar eo an Nihimaia: “Kwon kememej iõ, O aõ Anij, ñõn emõn.” (Nihimaia 13:31) Elap ad mõnõnõ bwe Jehovah ej bukõt men eo emõn ilo armij ro! (1 Kiñ Ro 14:13) Jen kõmman eindein ilo men ko jej kõmmani ibben armij ro jet. Ilo ad kõmmane men in enaj letok juõn kejatdikdik ñan bõk lomor im mour ñan indio ilo lal eo ekãl eo ej ebaktok wõt.—Sam 130:3-8.
Ewi Wãwen Am Naj Uak?
• Ion bedbed et eo Jehovah ej jerbal ilo emõn ñan armij otemjej?
• Ewi wãwen ad maroñ bukõt emõn eo ilo armij ro jet?
• ilo jerbal in kwalok nan?
• ilo family eo ad?
• ilo congregation eo ad?
• ilo kõtan eo ad ibben armij otemjej?
[Pija eo ilo peij 26]
Meñe ro jein im jatin rar kijirãte ilo jinoin, Joseph ear bukõt emõn eo air
[Pija eo ilo peij 27]
Jumae ejjab bõpraek kij jen ad jibañ armij otemjej
[Pija eo ilo peij 28]
Meñe mokta rar jab emõn, ejelok juõn ian ro nejin Jacob ear luji jerammõn ko an
[Pija eo ilo peij 29]
Karuwaineneik armij otemjej ñan kwelok ko an Christian