‘Kajerbal Nan In Anij Ilo Jimwe’
“Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.”—2 TIMOTE 2:15.
1, 2. (a) Etke ri jerbal ro rej aikwij kein jerbal ko? (b) Ri Christian ro rej bed ilo kain jerbal rot eo, im ewi wãwen rej kwalok air bukõte mokta Ailiñ eo?
RI JERBAL ro rej aikwij kein jerbal ko ñan jibañ ir ilo jerbal ko air. Bõtab, ejabwe an baj wõr wõt kein jerbal ko ibbed. Juõn ri jerbal ej aikwij kajerbale ilo jimwe. Ñan wanjoñok, elañe ilo ien am kalek juõn imõn kakonkon mweiuk, kwar dilaike ruo alal ibben don, enaj laplok am aikwiji jen baj juõn hammer im dila ko wõt. Kwonaj aikwij jelã kilen dilaik alal im jab kaib dila ko. Ñan kajeoñ in dilaik juõn alal ñe jej jaje kilen kajerbal juõn hammer ejadin bin, elaptata je bane. Ak kajerbal kein jerbal ko ilo jimwe enaj kabidodo jerbal eo im wõr tokjen.
2 Einwõt Ri Christian ro, ewõr juõn jerbal jej aikwij kõmmane. Ej juõn jerbal elap an aorõk. Jesus Christ ear rejañ ri kalor ro an bwe ren ‘bukõt mokta ailiñ eo.’ (Matu 6:33) Ewi wãwen ad maroñ kõmmane men in? Juõn wãwen ej ilo ad kijejeto in kwalok nan kin Ailiñ eo im kõmman ri kalor ro. Ilo ad kõmman bwe jerbal eo ad en bedbed ion Nan in Anij ej bar juõn wãwen ñan bukõt Ailiñ in Anij. Wãwen eo kein kajilu ej ikijen emõn mwilid. (Matu 24:14; 28:19, 20; Jerbal 8:25; 1 Piter 2:12) Ñan kõmman bwe jen bolemen im mõnõnõ ilo jerbal in Christian in, jej aikwij kein jerbal ko remõn im jelãlokjen ñan kajerbali ilo jimwe. Ikijen men in, ri jilek Paul ear likit juõn joñok emõn einwõt juõn Christian ri jerbal, im ear rejañ ri tõmak ro mõttan bwe ren kajeoñe. (1 Dri Korint 11:1; 15:10) Inem, ta eo jemaroñ katak jen Paul, ri jerbal eo mõttad?
Paul—Juõn Ri Keañ eo an Ailiñ eo
3. Etke jemaroñ ba bwe ri jilek Paul ear juõn ri jerbal eo ekijejeto an Ailiñ eo?
3 Paul ear kain ri jerbal rot eo? Emol ear lukkun kijejeto. Paul ear kate wõt, im kajededlok news eo emõn ilo jikin ko ibelakin Mediterranean. Ke ear kwalok juõn unin an kwalok nan ilo kijejeto kin Ailiñ eo, ri jilek in ejaje mõk ear ba: “Bwe elañe ij kwalok gospel, ejelok iba bwe in kimjãje kake; bwe men in e relel ilo buruõ, bwe Wo ñõn iõ elañe I jab kwalok gospel!” (1 Dri Korint 9:16) Paul ear itoklimo ke in lomoren mour eo an make? Jaab. Ear jab juõn armij ekibbon. Ak, ear kõnan bwe ro jet ren bõk tokjen jen news eo emõn bareinwõt. Ear je: “A men otemjej ij kõmõni kin gospel, bwe in dri bõk mõtõn eo iben ro jet.”—1 Dri Korint 9:23.
4. Ta kein jerbal eo eaorõktata Ri Christian ro rej kaorõke?
4 Ri jilek Paul ear juõn ri jerbal einemõn eo ear kile bwe ear jab maroñ atartar ion kabel ko an make. Einwõt juõn carpenter eo ej aikwiji juõn hammer, Paul ear aikwij kein jerbal ko rejimwe ñan kõmman bwe mol ko an Anij ren lel buruen ri roñjake ro an. Ta kein jerbal eo ear lap an kajerbale? Kar Nan in Anij, Jeje ko Rekwojarjar. Ilo ejja wãwen in lok wõt, aolepen Bible eo ej kein jerbal eo elap jej kajerbale ñan jibañ kij ñan kõmman ri kalor ro.
5. Ñan jerbal einwõt ri kwalok ro rebolemen, ta eo jej aikwiji ijellokin ad kwalok eon ko ilo Bible?
5 Paul ear jelã bwe kajerbal Nan in Anij ilo jimwe ear kitibuj elõñlok men ko jen ad baj read jen e. Ear “kemeleleik” in karel burueir. (Jerbal 28:23) Ewi wãwen? Paul ear lo tõbrak ilo an kajerbal Nan in Anij ñan karel elõñ bwe ren bõk mol eo an Ailiñ eo. Ear kamelele ilo kõmmanwa ibbeir. Iumin jilu alliñ ko ilo juõn imõn kwelok edik ilo Ephesus, Paul ear “kameleleik im karel kin men ko an ailiñ in Anij.” Meñe “jet rebin, im jab bokake,” ro jet rar roñjake. Tokjen jerbal eo an Paul ilo Ephesus kar “ein drein an kanuij laplok im kajurlok nan in Anij.”—Jerbal 19:8, 9, 20.
6, 7. Ewi wãwen an kar Paul kaibujuij jerbal eo an, ewi wãwen ad maroñ kõmman eindein?
6 Einwõt juõn ri keañ ekijejeto an Ailiñ eo, Paul ear ‘kaibujuij jerbal eo an.’ (Dri Rom 11:13) Ekijkan? Ear jab itoklimo in kautiej emake; ear jab jok kin an armij ro jelã kajjen einwõt juõn ian ri jerbal ro an Anij. Jen men in, ear watõk jerbal eo an einwõt men in kautiej eo elaptata. Paul ear kajerbal Nan in Anij ilo juõn wãwen ekabel im bolemen. Tõbrakin jerbal eo an ear kamakit ro jet, im lujur ir bwe ren kamwijlok jerbal eo air ilo juõn wãwen elaplok. Ilo wãwen in bareinwõt, ear kaibujuij jerbal eo an.
7 Einwõt Paul, jemaroñ kaibujuij jerbal eo ad einwõt ri kwalok ro ilo ad keini in kajerbal Nan in Anij ilo bolemen. Ilo wãwen otemjej in ad kwalok nan, mejenkajjik eo ad en kar bwe jen kwalok juõn katak jen Bible eo ibben aolep armij ro joñan wõt ad maroñ. Ewi wãwen ad maroñ kõmmane men in im karel buruen armij? Lemnak kin wãwen ko jilu raorõk: (1) Tel armij ñan Bible ilo juõn wãwen ej kautiej e. (2) Jen jelã kilen kamelele ilo kõmmanwa im jerbale ta eo Bible ej ba. (3) Kamelele ilo kõmmanwa jen Jeje ko ilo juõn wãwen ej karel buruen.
8. Ta kein jerbal ko ñan kwalok nan kin Ailiñ eo rej bed ibbed ilo ran kein, im ewi wãwen am kar kajerbali?
8 Ewõr kein jerbal ko ibben ri keañ ro an Ailiñ eo rainin me ejañin kar wõr ibben Paul ke ear kwalok nan. Rej koba book, magazine, brochure, peba in kirtok armij, tract ko, im cassette in roñjake ko im video ko ñan aluij. Ilo ebeben eo mokta, rar kajerbal kein jerbal ko einwõt testimony card, phonograph, waan ettõr ko rej kajerbal microphone ñan kwalok nan jen i, im kwalok nan ikijen radio station ko. Emol, kein jerbal eo emõntata ibbed ej Bible eo, im jej aikwij kajerbal kein jerbal in eaorõk ilo jimwe im ekkar.
Jerbal eo Ad Ej Aikwij Bedbed ion Nan in Anij
9, 10. Ikijen kajerbale Nan in Anij, ta eo jemaroñ katak jen nan in kakabilek eo an Paul ñan Timote?
9 Ewi wãwen ad maroñ kajerbal Nan in Anij einwõt juõn kein jerbal ebolemen? Ilo ad jerbale nan kein an Paul ñan ri jerbal eo mõttan Timote: “Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.” (2 Timote 2:15) Ta eo ej kitibuje “ejimewõt an katakin kin nan in mol”?
10 Nan in kajin Greek eo rar ukõte “ejimewõt” ej melelen “ejimwe im jejjet an mwijmwij” ak “jeke juõn ial ilo juõn wãwen ekajju im jimwe.” Nan in jej loe wõt ilo nan ko an Paul ñan Timote ilo Jeje ko an Christian ilo kajin Greek ak Bible eo. Ejja nan eo wõt rar kajerbale ñan kamelele kin juõn jerbal in kallip ilo juõn melaj elap. Elañe juõn ri kallip ekabel ear kũbiji juõn ial in kallip eankeke emaroñ juõn men in kajookok ñan e. Ñan kõmman bwe juõn “dri jerbal e jamin jok,” ear kakememej Timote bwe en jab illok jen katak ko remol an Nan in Anij ñan jidik. Timote ear jab maroñ kõtlok bwe lemnak ko an make ren jelet men ko ear katak kaki. Jerbal eo an ñan kwalok nan im katakin armij en kar bedbed ilo Bible eo wõt. (2 Timote 4:2-4) Ilo wãwen in, armij ro emol burueir rej aikwij bõk lemnak ko an Jehovah kin men ko, im jab bõk lemnak ko an lal. (Dri Kolosse 2:4, 8) Ej eindein ilo ran kein.
Mwilid Ej Aikwij Emõn
11, 12. Ewi wãwen mwilid ej jelet wãwen ad kajerbale Nan in Anij ilo jimwe?
11 Jej aikwij kõmmane elaplok jen ad baj kajerbal wõt ñan in Anij ilo jimwe ñan kwalok nan ko an remol. Mwilid ej aikwij ekar ñan nan ko an. Jej “dri jerbal iben Anij,” inem jen jab armij ro rej jelã mon. (1 Dri Korint 3:9) Nan in Anij ej ba: “Kweo kwoj katakin bar juõn, kwo jab mõke katakin yuk ke? Kweo kwoj kwalok ren jab kwot, kwoj kwot ke? Kweo kwoj ba armij en jab lũñ, kwoj lũñ ke? Kweo kwoj kijirãte ekjõp ko, kwoj kwot jen tempel ko ke?” (Dri Rom 2:21, 22) Inem, einwõt ri jerbal ro an Anij ilo ran kein, juõn wãwen jej kajerbal Nan in Anij ilo jimwe ej ilo ad lor nan in kaiñi eo: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am.”—Jabõn Kennan Ko 3:5, 6.
12 Ta tõbrak ko jemaroñ loi ilo ad kajerbal Nan in Anij ilo jimwe? Lemnak mõk kin wãwen an kajur eo an Nan in Anij emwij jeje kake maroñ jelet mour ko an armij ro emol burueir.
Nan in Anij Ej Ukõt Mour eo an Armij Ro
13. Jerbale Nan in Anij emaroñ jebar ta iloan juõn armij?
13 Ñe jej bõke einwõt juõn ennan emwij kabine, ennan eo an Nan in Anij ewõr juõn kareelel elap eo me ej jibañ armij ñan kõmman oktak ko ilo mour ko air. Paul ear lo wãwen eo emõn an Nan in Anij jelet ro rar erom Ri Christian ilo Tessalonika eo etto. Inem ear jiroñ ir: “Kin men in e jab jokwõr am kamolol Anij, bwe ke kom ar bõk jen kim nan eo kom ar roñjake, nan in Anij, kom ar jab bõke einwõt nan in armij, a ein drein emol, einwõt nan in Anij, eo ej bareinwõt jerbal ilo kom ro rej tõmak.” (1 Dri Tessalonika 2:13) Ñan Ri Christian ro—emol, ñan aolep ri kalor ro remol an Christ—lemnak eo ettã an armij jeban keidi ibben meletlet eo eutiejtata an Anij. (Aiseia 55:9) Ri Tessalonika ro rar ‘bõk nan eo ilo iñtan elap kab lõñliñ an Jitõb Kwojarjar” im rar erom joñok ko remõn ñan ri tõmak ro jet.—1 Dri Tessalonika 1:5-7.
14, 15. Ewi joñan kajurin ennan eo an Nan in Anij, im etke?
14 Nan in Anij elap an kajur, kinke Ri Kõmanman eo an, ej Jehovah. Ej itok jen juõn “Anij emour,” eo ear “kõmõnmõn lõñ ko,” kin ennan eo an im bwe nan eo an ‘ewõr tõbrak’ ien otemjej. (Dri Hibru 3:12; Sam 33:6; Aiseia 55:11) Juõn ri meletlet in Bible eo ear ba: “Anij ejjab kajenolok e jen Nan eo an. Ejjab karmijeteik im watõk e einwõt juõn men eruwamaejet jen e. . . . Inem ejjab juõn men emij, einwõt juõn men ejelok tokjen elikin ad konono kake; kinke ej juõn kein lukwoj armij ñan ibben Anij eo emour.”
15 Ewi joñan an ennan in romaklok jen Nan eo an Anij? Ewõr kajur eo elap. Ilo an jejjet, Paul ear je: “Nan in Anij ej mour im jerbal wõt, im ekañ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.”—Dri Hibru 4:12.
16. Ewi joñan an Nan in Anij maroñ ukõt mour eo an juõn armij?
16 Ennan eo an Nan in Anij emwij jeje “ekõñ jen jabrewõt jãji ruo mejen.” Inem, joñan an lap kajurin ej ellã jen jabdewõt kein jerbal eo an armij. Nan in Anij ej wie nononmej eo an armij im emaroñ ukõte jen loan, jelet lemnak eo an im men ko ej kaorõki, bwe en juõn ri jerbal emõn im ekwojarjar. Ej juõn kein jerbal ekajur!
17. Kamelele kin kajurin Nan in Anij ñan ukõt wãwen mour eo an armij.
17 Nan in Anij ej kajerwawaik tuloan juõn armij ñe jej keidi ibben ta eo ej lemnak kake ak ta eo ej kõtlok armij ro jet bwe ren loi ilo e. (1 Samuel 16:7) Juõn armij enana emaroñ noje men eo ituloan im kwalok joij ak kabuñ ñan Anij iman mejen armij. Ri nana ro rej mone armij kin un ko renana. Armij ro eutiej burueir rej mone armij ilo air kwalok ettã buru iman mejeir bwe ren bõk kautiej jen armij ro jet. Bõtab, ilo an kalikar men eo ej bed ilo buruen armij, Nan in Anij emaroñ lukkun kamakit juõn eo ettã buruen bwe en wutik kadkad eo emor im “kõnõk armij eo ekãl eo ekar ñõn Anij emwij kõmõne ekal ilo wãnik im kwojarjar in mol.” (Dri Epesõs 4:22-24) Nan in katakin ko ilo Nan in Anij emaroñ ukõt buruen ro rejook bwe ren beran einwõt Ri Kennan ro an Jehovah im ri keañ ro rekijejeto an Ailiñ eo.—Jeremiah 1:6-9, New World Translation.
18, 19. Ekkar ñan paragraph kein ak juõn bwebwenato kwar bõk ke kwar kwalok nan, kwon kwalok kin ewi wãwen an mol eo ilo Bible maroñ ukõt lemnak eo an juõn armij.
18 Kajur eo an Nan in Anij ej jelet armij ijoko otemjej ilo juõn wãwen emõn. Ñan wanjoñok, ri keañ ro an Ailiñ eo ilo Phnom Penh, Cambodia, rar kwalok nan ilo bukwon eo Kompong Cham ruo alen ilo kajjojo alliñ. Elikin an roñjake bwebwenato ko an ri utiej ro an kabuñ konono nae Ri Kennan ro an Jehovah, juõn pastor ilo bukwon eo ear karõk bwe en wõnmae Ri Kennan ro ñe rebar etal ñan bukwon eo an. Elõñ kajitõk ko ear kwalok ñan ir kin holiday ko im ear lukkun roñjake ke rar kamelele ilo kõmmanwa jen Bible eo. Inem ear kalikar: “Kiõ ijelã bwe nan ko an ri tel ro mõtta rejjab mol! Rej ba bwe kwojjab kajerbal Bible eo, ak men in wõt kwar kajerbale jibboñnin!”
19 Kõrã in ear wõnmanlok im katak Bible ibben Ri Kennan ro im jab kõtlok nan in kamijak ko ñan to jen jerbal eo an einwõt juõn pastor en kabõjrake jen an katak Bible. Ear konono ibben juõn jeran kin katak ko ilo Bible, im ear jino katak Bible ibben Ri Kennan ro bareinwõt. Jeran ear lukkun mõnõnõ kin ta eo ear katak kake bwe ilo juõn ian kwelok ko ilo mõn jar eo an, ear emmakit im ba, “Komin itok, im katak Bible ibben Ri Kennan ro an Jehovah!” Ejjabto tokelik ear jolok etan im illok jen kabuñ eo an. Eo ear juõn pastor mokta, im jeran, im ro jet rar jino katak Bible ibben Ri Kennan ro an Jehovah.
20. Ewi wãwen bwebwenato eo kin juõn kõrã ilo Ghana ear kwalok kin kajurin Nan in Anij?
20 Kajurin Nan in Anij jemaroñ wanjoñok kake ilo bwebwenato eo kin Paulina, juõn kõrã in Ghana. Juõn ri keañ eo an Ailiñ eo ej kwalok nan full-time ear katak Bible ibben ilo book eo Jelãlokjen Eo Ej Tellok ñan Mour Indio.a Paulina ear belele ibben juõn emaan elõñ belen im ear lo aikwij eo ñan kajimwe mour eo an, ak leo belen im aolep ro nukin rar lukkun lej im jumae e. Jimman, juõn ri ekajet im juõn ri utiej ilo kabuñ, rar kajeoñ in ukõt lemnak eo an ilo air jerbale ilo jab jimwe Matu 19:4-6. Ri ekajet eo ear konono einwõt juõn eo ear jimwe, ak ilo mõkaj Paulina ear kile bwe ear einlok wõt wãwen an kar Satan ikiri Jeje ko ke ear kajeoñ in kabo Jesus Christ. (Matu 4:5-7) Ear kememeje nan eo ealikar an Jesus kin mour in belele, ilo tukaduin bwe Anij ear kõmanman armij ro maan im kõrã, jab maan im kõrã ro, im bwe erro wõt, im jab erjil, renaj kar juõn wõt kanniek. Ear eddeb ñan bebe eo an inem rar kõtlok bwe ren jebel jen leo elõñ belen. Ejjabto tokelik, ear jutak einwõt juõn ri keañ eo an Ailiñ eo emõnõnõ im emwij an baptais.
En Jimwewõt Wãwen Am Kajerbale Nan in Anij
21, 22. (a) Ta eo jekõnan bebe kake ilo buruõd einwõt ri keañ ro an Ailiñ eo? (b) Ta eo jenaj katak kake ilo katak in tok ilal?
21 Emol bwe Nan in Anij ej juõn kein jerbal eo ekajur ñan kajerbale im jibañ ro jet ñan kõmman oktak ko ilo mour ko air bwe ren kebak Jehovah. (Jemes 4:8) Einwõt ñe ri jerbal ro rekabel rej kajerbal kein jerbal ko ñan lo tõbrak ko remõn, jen beek ilo buruõd ñan kajerbal Nan in Anij, Bible eo, ilo kabel ilo jerbal eo Anij ear letoke einwõt ri keañ ro an Ailiñ eo.
22 Ewi wãwen ad maroñ kakõmanmanlok bolemen eo ad ilo jerbal in kõmman ri kalor? Juõn wãwen ej ilo ad kaddek maroñ ko ad einwõt ri katakin armij ro rekabel. Joij im lale katak in tok ilal, kinke ej kwalok wãwen ko ñan katakin im jibañ ro jet bwe ren bõk ennan eo an Ailiñ eo.
[Kamelele eo itulal]
a Ri Kennan ro an Jehovah rar kõmman book in.
Kwoj Kememej Ke?
• Ta kein jerbal ko ewõr ibben ri keañ ro an Ailiñ eo?
• Ilo wãwen et ko Paul ear juõn joñok einwõt ri jerbal eo an Ailiñ eo?
• Ta eo ej kitibuj ad kajerbal Nan in Anij ilo jimwe?
• Ewi joñan kajurin Nan eo emwij jeje an Jehovah?
[Pija ko ilo peij 6]
Jet kein jerbal ko Ri Christian ro rej kajerbali ilo jerbal in kwalok nan kin Ailiñ eo