“Lõñliñ Ilo Jeova”
“Kwon bareinwõt lõñliñ ilo Jeova, im E naj lewoj men in kajitõk ko an buruõm.”—SAM 37:4.
1, 2. Wõn eo ej Unjen mõnõnõ eo emol, im ewi wãwen King David ear jitõñlok ñan men eo emol?
“EMÕNÕNÕ ro rej kile aikwij eo air kin men ko lor jitõb, . . . emõnõnõ ro rej tiriamokake, . . . emõnõnõ ro rej ainemõn.” Ekoba jiljino ennan ko jet an ro rej mõnõnõ, rej kwalok juõn nan in kabellok ekabwilõñlõñ ñan katak eo an Jesus ion Tol eo, ekkar ñan ri jeje Gospel eo Matu. (Matthew 5:3-11, NW) Nan ko an Jesus rej kallimur bwe jemaroñ lo mõnõnõ.
2 Juõn al ekwojarjar David King in Israel eo etto ear kine ej jitõñlok ñan Unjen mõnõnõ eo emol, Jehovah. “Komin bareinwõt lõñliñ ilo Jeova,” David ear ba, “im E naj lewoj men in kajitõk ko an buruõm.” (Sam 37:4) Ak ta eo enaj kõmman bwe jelã Jehovah im kadkad ko kadkadin juõn men in “lõñliñ”? Ewi wãwen am kalmenlokjen kin ta eo ear kõmmane im enaj kõmmane ñan kajejjet kitien karõk ko an im lewoj juõn kejatdikdik ñan bõk uak ko ñan “kajitõk ko an buruõm”? Juõn ien ñan etale aolep tibdik ko ilo Sam 37, jen 1 ñan 11 eon, enaj letok uak ko.
“Jab Junmar”
3, 4. Ekkar ñan Sam 37:1, ta nan in kakabilek eo David ej letok, im etke bokake nan in kakabilek in ej juõn men ekkar ñan ran kein?
3 Jej bed ilo “ien ko renana,” im men ko renana rej bed ibelakid. Emwij ad lo an nan kein an ri jilek Paul jejjet kitieir: “Armij renana im ro dri jela mon re naj laplok ilo air nana, re naj mone im naj mone ir.” (2 Timote 3:1, 13) Elap an bidodo an tõbrakin mweie eo an armij ro renana jelet kij! Aolep men kein remaroñ kamade kij, im kabiloik lolokjen eo ad ilo jitõb. Lale kin ewi wãwen an nan ko an Sam 37 kakkõl kij kin kauwatata in: “Kwon jab ãlñõrñõr kin ro rej kõmõn nana, im kwon jab junmare nae ro rej jerbal ilo jab wãnik.”
4 News ko ibelakin lal ekkeini air kejelãik kij kin elõñ bwebwenato ko rejjab wãnik rej walok ilo jikin otemjej. Ri wia ro rejelã mon rej kwot im jab bõk kaje. Ri kowadoñ ro rej mone ro rettã. Ri uror ro rej bedwõt ilo ittino ak anemkwoj wõt. Aolep joñok kein rej kokkure ekajet jimwe remaroñ kamakit armij bwe ren illu im kokkure ainemõn eo ad ilo lemnak. Mweie eo an ri nana ro remaroñ kamakit jet armij bwe ren junmade ir. Ak buromõj kin men kein enaj kakõmõnmõnlok ke wãwen eo ad? Junmare kin tõbrak ko ri nana ro rej lañliñ kaki enaj ukõt ke jemlok eo air? Ejjab ñan jidik! Im ejelok unin ad aikwij “ãlñõrñõr.” Etke?
5. Etke ejimwe ad keidi ri nana ro ñan ujoij im mar eo emaroro?
5 Ri jeje sam ej uak: “E naj mõkõj in bukwe ir einwõt ujoij; im renaj aimerlok einwõt mar e maroro.” (Sam 37:2) Mar emaroro remaroñ aibujuij, ak ejjabto tokelik bwilikeir rej aemedlok im mij. Eindein ibben ri nana ro. Tõbrak ko air ejjabto air bed. Ñe rej mij men ko mweieir rejjab maroñ jibañ ir. Ilo jemlokin ekajet jimwe enaj bok anjo ioir. “Wõnãn jerawiwi, mij,” Paul ear je. (Dri Rom 6:23) Ri nana eo im aolep ro rewãnik renaj bõk ‘wõnãir’ im jako. Emol ej juõn ial in mour ejelok tokjen!—Sam 37:35, 36; 49:16, 17.
6. Ta eo jemaroñ katak jen Sam 37:1, 2?
6 Inem, jej aikwij kõtlok ke bwe tõbrak ko an ri nana ro ren kainebataik kij? Katak eo jej bõk jen 1 im 2 eon ilo Sam 37 ej eñin: Jab kõtlok bwe tõbrak ko air ren kabo yuk jen bebe eo kwar kãlet kadede ñan karejar ñan Jehovah. Jen men in, kwon jibadõk wõt jerammõn im mejenkajjik ko ilo jitõb.—Jabõn Kennan Ko 23:17.
“Kwon Liki Jeova im Kõmõn Emõn”
7. Etke jej aikwij liki ilo Jehovah?
7 “Kwon liki Jeova im kõmõn emõn, ri jeje sam ej rejañ kij kake. (Sam 37:3a) Ñe jej abõnõnõ kin inebata ko ak men ko jej bere, jej aikwij kabin liki eo ad ion Jehovah. E eo ej letok ilo likieo jokane eo ilo jitõb. “Eo ej jokwe ilo jikin etino an Eo Eutiejtata,” Moses ear je, “e naj berwõt iomin lurin Eo dri kajur otem kajur.” (Sam 91:1) Ñe jej inebata kin an laplok kõtõrãi kien jej aikwij kalaplok ad atartar ion Jehovah. Elañe ej iñrõk need, ej juõn men ekabuñburõd ñe ewõr juõn jerad jemaroñ atartar ion ñan jibañ kij etetal. Eindein, ñe jej etetal ilo tiljek, jej aikwij atartar ion Jehovah.—Aiseia 50:10.
8. Ewi wãwen ad bõk kunad ilo jerbal eo an Christian maroñ kejbãrok kij jen ad inebata le jen joñan kin tõbrak ko an ro renana?
8 Juõn mejelan ñan jab inebata kin tõbrak ko an ri nana ej bwe jen boub wõt ilo jerbal in bukõt im jibañ ro rej einwõt sheep bwe ren bõk jelãlokjen eo ejejjet im jimwe kin karõk eo an Jehovah. Ibwiljin men ko rej nanalok wõt, jej aikwij lukkun boub in jibañ ro jet. “Komin jab meloklok kin kõmõnmõn emõn im lelok ñõn ro jet,” ri jilek Paul ear ba, “bwe kin men in katok ko eirwõt Anij ej buñburuen.” “Emõn” eo elaptata jemaroñ kõmmane ej ñan kwalok ñan ro jet news eo emõn im aibujuij kin Ailiñ eo an Anij. Ad kwalok nan iman mejen armij ej juõn “men in katok” in nebar eo emol.—Dri Hibru 13:15, 16; Dri Galetia 6:10.
9. Kamelele kin nan in kakabilek eo ñan “jokwe ilo ene eo.”
9 “Kwon jokwe ilo ene,” David ej wõnmanlok, im “lore tiljek.” (Sam 37:3b) “Ene” eo ilo ran eo an David kar territory eo Jehovah ear lelok ñan Israel, Enen Kallimur eo. Ilo ien iroij eo an Solomon jabõn ene eo ear jen Dan ilo tueañ ñan Beer-sheba ilo tu rak. Eñin kar jikin jokwe eo an Israel. (1 Kiñ Ro 4:25) Ran kein, jabdewõt jikin jej jokwe ion lal, jej reimanlok ñan ien eo ñe aolepen lal in enaj erom juõn paradise ilo lal eo ekãl im wãnik. Mae ien eo, jej jokwe ilo jokane eo ilo jitõb.—Aiseia 65:13, 14.
10. Ta eo enaj walok ñe jej “lore tiljek”?
10 Ta eo enaj walok ñe jej “lore tiljek”? Jabõn Kennan eo emwij kakõrmole ej kakememej kij: “Elõñ men in jerammõn naj iben armij dri tiljek; a eo ej kate e bwe en mweie, e naj bõk joñõn kwotõn.” (Jabõn Kennan Ko 28:20) Ad kate wõt im tiljek ilo jerbal in kwalok nan kin news eo emõn ilo jabdewõt jikin jej jokwe ie im ñan jabdewõt armij joñan ad maroñ ej bõktok jerammõn jen Jehovah. Ñan wanjoñok, Frank im lio ibben etan Rose, rar bõk jerbal in pioneer iumin 40 yiõ ko remotlok ilo juõn bukwon eo itueañin Scotland. Armij ro reiet rar itoklimo kin mol eo ijo rar mololok. Rar jab ebwer, pioneer rein rar jino kwalok nan im kõmman ri kalor ro. Kiõ ewõr juõn congregation ilo bukwon eo. Emol bwe Jehovah ear kajerammõn jerbal eo an pioneer rein. “Jerammõn eo elaptata,” Frank ear kamelele ilo ettã buru, “ej bwe kimij bed ilo mol eo wõt im Jehovah ej kajerbale kimro.” Aet, ñe jej jerbal “ilo tiljek,” elap jerammõn jej bõki im kamolol kaki.
“Komin Lõñliñ ilo Jeova”
11, 12. (a) Ewi wãwen jemaroñ “lõñliñ ilo Jeova”? (b) Ta mejenkajjik eo kwomaroñ likit ikijen katak Bible ibbam make, im ta tokjen eo enaj walok kin men in?
11 Ñan kakajur kõtan eo ad ibben Jehovah im debij wõt liki eo ad ilo e, jej aikwij “lõñliñ ilo Jeova.” (Sam 37:4a) Ewi wãwen ad kõmman men in? Jen ad madjake inebata ko ad make, meñe ebin, jej aikwij boub kin Jehovah. Juõn wãwen ad maroñ kõmmane men in ej ñan bõk ien ñan read Nan eo an. (Sam 1:1, 2) Ñe kwoj read Bible eo ej kalañliñ yuk ke? Enaj ñe kwoj read im kõmman juõn mejenkajjik ñan kalaplok jelã eo am kin Jehovah. Etke kwojjab bõjrak jidik elikin am read jet eon ko im kajitõk ibbam make, ‘Ta eo ij katak jen eon kein kin Jehovah?’ Emaroñ emõn bwe kwon bõk juõn notebook ak peba ñe kwoj read Bible eo. Ilo kajjojo ien kwoj bõjrak im kalmenlokjen kin ta melelen eon ko kwoj readi, kwon jei ennan ko kwoj readi im rej kakememej yuk kin juõn ian kadkad ko kadkadin Anij. Ilo bar juõn sam, David ear al: “Nan ko jen loõ, im lemnok ko ilo buruõ, ren emõn iman mejõm, O Jeova aõ dreka im aõ Dri Lomor.” (Sam 19:14) Ad liñõre Nan in Anij ej “emõn” ibben Jehovah im ej kalañliñ kij.
12 Ewi wãwen ad maroñ lo mõnõnõ ilo katak eo ad im ñe jej kalmenlokjen? Jemaroñ kõmman juõn mejenkajjik ñan kamaat ad maroñ ñan jelã kin Jehovah im wãwen ko an. Ñe jej kõmman eindein enaj kalaplok kamolol eo ad. Eñin unin, David ej kallimur ro rewãnik, Jehovah ej “lewoj men in kajitõk ko an buruõm.” (Sam 37:4b) Liki rot in ear kamakit ri jilek John ñan jei nan kein: “Eñin beran eo ibed ñõn E, bwe elañe jej kajitõk iben kin jabrewõt men eo ekar ñõn ankil An, Ej roñjake kij.”—1 John 5:14, 15.
13. Ilo yiõ ko rej kab motlok, ta laplok eo ñan jerbal in kwalok nan kin Ailiñ eo ear alikar ilo elõñ ailiñ ko?
13 Einwõt ro rej kejbãrok air tiljek, lañliñ eo ad elaptata ej ñan lo an Jehovah karreoik etan einwõt Iroij Bõtata ijoko otemjej ilañ im ion lal. (Jabõn Kennan Ko 27:11) Buruõd ej lutõklok ke kin lañliñ ñe jej lo joñan an lap jerbal in kwalok nan ro jeid im jatid rej kõmmani ilo ailiñ ko rar matõrtõre ir mokta? Jej kijoror in lo bar ta ien ko ranemkwoj remaroñ waloktok mokta jen jemlokin jukjuk im bed in. Elõñ ri karejar ro an Jehovah ilo ailiñ ko me jerbal ko an Christian rej wõnmanlok ilo anemkwoj rej niknik in kwalok nan ñan ri school ro, ro rar ko jen ailiñ ko, im ro jet rej jokwe jejjo yiõ ko ijo, im lañliñ kin air kabuñ ilo anemkwoj. Ej kõnan eo ad bwe armij rein ren jeblak ñan kabijuknen eo air, im kwalok wõt meram in mol ilo ailiñ ko ewõr matõrtõr ie kin air kwalok nan ijo.—Matu 5:14-16.
“Kwon Karebillok am ial ion Jeova”
14. Ta eo ej kamol bwe jemaroñ atartar ion Jehovah?
14 Elukkun juõn ien emõn ñan jelã bwe inebata ko ad im jej watõk relukkun eddo jemaroñ joloki! Ewi wãwen? “Karebillok am ial ion Jehovah, kwon bareinwõt liki E,” David ear ba im ear kobaiklok, “E naj kõmõne.” (Sam 37:5) Ilo congregation ko ad, ebwe men ko rej kamol bwe jemaroñ atartar ion Jehovah ñan jibañ kij. (Sam 55:22) Ro rej kwalok nan full-time, einwõt pioneer, traveling overseer, missionary, ak Ri Bethel ro, remaroñ kamol bwe Jehovah ej jurake kij. Etke kwojjab konono ibben ro me kwoj jelã kajjiir im kajitõk kin ewi wãwen Jehovah ear jibañ ir? Ejelok bere bwe kwonaj roñ elõñ bwebwenato ko rej kwalok bwe meñe ilo ien ko rebin, pein Jehovah ejjab kadu. Ej kabwe aolep aikwij ko ad ien otemjej.—Sam 37:25; Matu 6:25-34.
15. Ewi wãwen wãnik eo an armij ro an Anij ej romaklok?
15 Ñe jej liki Jehovah kin aolepen buruõd, jemaroñ lo men ko ri jeje sam ear konono kake: “E naj kwaloktok am wãnik einwõt maram, im am ekajet einwõt ke loliñ al.” (Sam 37:6) Einwõt Ri Kennan ro an Jehovah, ekkã ad lo armij ro rej kariape kij. Ak Jehovah ej kabellok mejen ro emol burueir bwe ren kile bwe jej kwalok nan kinke jej yokwe Jehovah im ro ri turid. Ilo ejja ien eo wõt, meñe elõñ rej kariap kij, mwilid emõn ej alikar. Jehovah ej kejbãrok kij iumin elõñ kain jumae im matõrtõr. Tokjen men in, wãnik eo an armij ro an Anij ej romak einwõt ñe ej loliñ al.—1 Peter 2:12.
“Kwon Ikõñ . . . Kõttar im Kijoror”
16, 17. Ekkar ñan Sam 37:7, kiõ ej ien ñan ta, im etke?
16 Nan ko an ri jeje sam kiõ rej: “Kwon ikõñ iman mejen Jehovah im kõttar im kijoror wõt kin e. Kwon jab ãliñõrñõr kin jabdewõt eo ej lo jerammõn ilo ial eo an, eo ej kajejjet kitien bebe ko an make.” (Psalm 37:7, NW) Ijin David ej kalikar aikwij eo ñan kij bwe jen kõttar ilo meanwõd kin Jehovah bwe en jerbal. Meñe jemlokin jukjuk im bed in ejañin itok, jejjab aikwij abõnõnõ. Emwij ke ad lo bwe tiriamokake im meanwõd eo an Jehovah rej laplok jen ad lemnak kake mokta? Jemaroñ kwalok ke bwe jej kõttar im boub wõt ilo jerbal in kwalok nan kin news eo emõn mokta jen an jemlokin itok? (Mark 13:10) Kiõ ej ien ñan kejbãrok kij jen men ko remaroñ kwote lañliñ im jokane eo ilo jitõb jen kij. Ej ien kiõ ñan kalaplok ad jumae kareelel eo an lal in an Satan. Im ej ien kiõ ñan kejbãrok ad mour erreo im jab kokkure jutak eo ad ewãnik ibben Jehovah. Jej aikwij jolok lemnak ko retton otemjej im kejbãrok kij jen aolep makitkit ko rejõkkar kin mour in belele, maan im kõrã ro otemjej.—Dri Kolosse 3:5.
17 “En jokwõr am illu, im kwon illok jen e,” David ej kakabilek kij. “Kwon jab ãlñõrñõr im kõmõn nana wõt. Bwe ro rej kõmõn nana re naj joko; a ro re kõtar Jeova re naj jolit ene eo.” (Sam 37:8, 9) Aet, jemaroñ kijoror im liki ñan ien eo—ebak kiõ—ñe Jehovah enaj jolok jen lal in wabanban otemjej im ro rar kõmman nana.
“Jidik Wõt Ien”
18, 19. Ta nan in rejañ eo kwoj bõk jen Sam 37:10?
18 “Bwe jidik wõt ien, im eo enana e naj joko; aet, kwo naj kalimjeke jikin im e naj ejelok.” (Sam 37:10) Nan kein elap air rejañ kij ñe ien jemlokin jukjuk im bed in im jemlokin jitõbõn anemkwoj jen Jehovah ej ebaktok wõt! Jabdewõt kien ak maroñ armij ro rar ejaak rar lukkun likjap. Im kiõ jej bed ebak ñan ien eo iroij eo an Anij enaj jeblak, Ailiñ eo an Jehovah iumin pein Jesus Christ. Enaj iroij ion aolepen makitkit ko an lal im jolok aolep ro rej jumae Ailiñ eo an Anij.—Daniel 2:44, NW.
19 Ilo lal eo ekãl iumin Ailiñ eo an Anij. Elañe kwoj bukõte, kwojamin lo “ri nana” eo. Emol, jabdewõt eo ej jumae Jehovah enaj jako mõkaj. Jabdewõt eo ej jumae iroij bõtata eo an Anij ak jab bokake iroij eo an Anij enaj jako. Aolep ro ri turõm renaj bed ilo juõn lemnak ilo kõnan eo air ñan kabuñburuen Jehovah. Enaj bõktok elap jokane—ejelok lock ñan kejam ko, ejelok jikin kalbuj ko, ejelok jabdewõt men enaj kokkure liki im mõnõnõ eo ad!—Aiseia 65:20; Micah 4:4, NW; 2 Piter 3:13.
20, 21. (a) Wõn ro rej “etã burueir” ilo Sam 37:11, im ia eo rej lo “ainemõn elõñlok”? (b) Ta jerammõn ko jemaroñ bõki elañe jej kajeoñe David eo Elaplok?
20 Inem, “ro etã burueir re naj jolit ene eo.” (Sam 37:11a) Ak wõn rein “etã burueir”? Nan eo “etã buru” ak “inemõn” ej itok jen juõn nan eo ej melelen “kaeñtan, ñan kõttãik, kajook.” Aet, “ro etã burueir” ej ro rej kõttar Jehovah ilo etã buru bwe en kajimwe aolep men ko rejjab wãnik rar kaeñtan ir. “Re naj kalõñliñ ir mõke kin ainemõn elõñlok.” (Sam 37:11b) Kiõ elaptata ad lo elap ainemõn ilo paradise eo ilo jitõb ibben congregation in Christian eo emol.
21 Meñe men in kaeñtan ko rejañin jako, jej rejetak im kainemõn ro rej buromõj im ebwer. Tokjen men in bwe, armij ro an Jehovah rej kowõnmanlok jokane eo emol iloa. Ri tõmak lõmaro emwij kãlet ir einwõt shepherd ro rej jerbal ilo yokwe ñan kabwe aikwij ko ad ilo jitõb—im jet ien aikwij ko ad ilo kanniek—im kamaroñ kij ñan kijenmij iumin eñtan ko kin wãnik. (1 Dri Tessalonika 2:7, 11; 1 Piter 5:2, 3) Ainemõn in ej juõn men in letok eo eaorõk! Bareinwõt ewõr ibbed juõn kejatdikdik ñan mour indio ilo ainemõn ilo Paradise eo ej ebak. Inem, jen kajeoñe David eo Elaplok, Jesus Christ, eo me kijejeto eo an ñan Jehovah ear kamakit e bwe en tiljek wõt ñan jemlokin. (1 Piter 2:21) Ilo ad kõmman eindein, jenaj mõnõnõ wõt, im wõnmanlok im nebar eo jej lañliñ kake, Anij eo ad, Jehovah.
Kwomaroñ Ke Uak?
• Ta katak ko kwar bõk jen Sam 37:1, 2?
• Ewi wãwen am maroñ “lõñliñ ilo Jeova”?
• Ta eo ej kamol bwe jemaroñ liki Jehovah?
[Pija eo ilo peij 21]
Ri Christian ro ‘rejjab junmare ro rej kõmman men ko rejjab wãnik’
[Pija eo ilo peij 22]
“Liki ilo Jeova im kõmõn emõn”
[Pija eo ilo peij 23]
Kwon lañliñ ilo Jehovah ilo am kamaat am maroñ ñan katak kin e
[Pija eo ilo peij 24]
“Ro etã burueir re naj jolit ene eo”