Ekkõl Eo Ad Elaplok An Aorõk Kiõ Jen Mokta
“Inem, komin ekil, bwe kom jaje ilo ran õt Iroij e naj itok.”—Matu 24:42.
1, 2. Ta eo ej kwalok bwe jej bed ilo jemlokin jukjuk im bed in?
“ILAÑIN men otemjej, tarinae ear jelet ebeben eo kein karoñoul,” ri jeje eo Bill Emmott ear ba. Meñe ear alikar bwe tarinae im kowadoñ ko rar jelet aolep ebeben ko an armij ro mour, ear koba: “Ebeben eo kein ka roñoul ear jab einjuõn kinke ear lo tarinae im kowadoñ ko, ak ear einjuõn ilo joñan an men kein jelete. Ilo ebeben eo kein kajuõn juõn tarinae ear jelet aolepen lal . . . Im, ñan kalikarlok men in, ilo ebeben eo ejjab juõn wõt tarinae ear walok ibelakin lal, ak kar wõr ruo.”
2 Jesus Christ ear kanan kin tarinae ko renaj kitibuj ‘ailiñ nae ailiñ im kien nae kien.’ Bõtab, rej juõn wõt ian men ko rej mõttan ‘kakõllan bed eo an Christ im jemlokin jukjuk im bed in.’ Ilo kanan in elap, Jesus ear bareinwõt kanan kin ñitta, nañinmij, im makitkit lõl. (Matu 24:3, 7, 8; Luk 21:6, 7, 10, 11) Ilo elõñ wãwen ko, kain jorrãn rot kein rar laplok im nanalok wõt. Nana eo an armij ej laplok wõt, im men in ej alikar ilo wãwen an armij ro lemnak kin Anij im ro ri turiir. Elaplok kowadoñ im etton mour erreo im rej kalikar men in. Armij ro rej yokwe money jen air yokwe Anij, reboub wõt kin men in kamõnõnõ ko. Men kein aolep rej kamol bwe jej mour ilo “ien ko renana.”—2 Timote 3:1-5.
3. Ewi wãwen “kakõllan ien kein” ren jelet kij?
3 Ewi am lemnak kin an nanalok wãwen ko an armij ro? Elõñ rejjab itoklimo, emol ebin burueir, kin men ko rej walok ran kein. Armij ro rebuñbuñ im meletlet rejjab kile melelen “kakõllan ien kein”; im ri tel ro an kabuñ rejjab tel ilo jimwe. (Matu 16:1-3) Ak Jesus ear kakabilek ri kalor ro an: “Inem, komin ekkõl wõt ien otemjej, bwe kom jaje ilo ran õt Iroij e naj itok.” (Matthew 24:42) Jesus ej rejañ kij ñan jab ekkõl wõt jejjo wõt ien ak ñan “ekkõl wõt ien otemjej.” Ñan ekkõl wõt ien otemjej, jej aikwij bojak ien otemjej im emmakit ilo mõkaj. Ej melelen elaplok jen ad baj kile wõt ad bed ilo ran ko eliktata, elaplok jen ad baj kile bwe ien kein ad ej juõn ien ebin mour. Jej aikwij lukkun tõmak bwe “Jemlokõn men otemjej ej ebaktok.” (1 Piter 4:7) Ilo ien eo wõt jenaj aikwij jutak bin im ekkõl wõt. Inem, kajitõk eo jej aikwij kalmenlokjen kake ej: ‘Ta eo enaj kakajurlok tõmak eo ad bwe ien jemlokin ej ebaktok?’
4, 5. (a) Ta eo emaroñ kakajur tõmak eo ad bwe jemlokin jukjuk im bed in ebaktok, im etke? (b) Ta juõn ian men ko rej eirlok wõt juõn ikõtan ran ko an Noah im ien an Nejin armij bed?
4 Lemnak kin men ko rar walok mokta wõt jen juõn men ejejuan ilo aolepen bwebwenato ko an armij ear walok—Ibwijleplep eo ilo ran ko an Noah. Armij ro ilo ien eo rar lukkun nana im Jehovah ear “buromõj buruen.” Ear ba: “I naj jeorlok armij ro I ar kõmõnmõn, jen mejen lõl.” (Jenesis 6:6, 7) Im ear kõmman eindein. Ilo an keidi ran ko an Noah ibben ran kein kiõ, Jesus ear ba: “Im einwõt ran ko an Noa, e naj ein drein an Nejin armij itok.”—Matu 24:37.
5 Ilo kõmmanwa jemaroñ ba bwe lemnak eo an Jehovah kin lal in kiõ ej einwõt lemnak ko an ilo ien eo mokta jen ien Ibwijleplep eo. Kinke ear kokkure lal eo enana ilo ran ko an Noah, enaj kõmman eindein ñan lal in enana ilo ran kein. Ad melele ilo alikar kin men ko rar walok ñe jej keidi ien eo etto ibben ran kein ad ren kar kabin tõmak eo ad bwe jemlokin lal in ej ebaktok. Inem ta einwõt juõn ko ilo men kein? Ewõr lalem men ko. Moktata ewõr nan in kakkõl eo ilo tibdikin kin ien jeebeplok eo ej itok wõt.
Bõk Nan in Kakkõl eo “Kin Men ko Re Jañin Walok”
6. Ta nan in kakkõl eo Jehovah ear lelok ilo ien lok iman ilo ran ko an Noah?
6 Ilo ran ko an Noah, Jehovah ear keañ: “Aõ Jitõb e jamin kowe armij in drio, bwe ej kõniek wõt; a ran ko an re naj jibuki roñoul yiõ.” (Jenesis 6:3) Ilo ien eo ear kwalok bebe in ekwojarjar ilo 2490 B.C.E. ear kalikar jinoin jemlokin lal eo enana. Baj lemnak mõk kin ewi joñan aorõkin kar men in ñan ro rar mour ilo ien eo! Kar 120 yiõ ko wõt im Jehovah enaj kar bõktok “”ibij liplip ion lõl, bwe en kokkure kõniek otemjej iomin lõñ.”—Jenesis 6:17.
7. (a) Kar ta uak eo an Noah ñan nan in kakkõl eo kin Ibwijleplep eo? (b) En ewi uak eo ad ñan nan in kakkõl ko kin jemlokin jukjuk im bed in?
7 Noah ear bõk nan in kakkõl eo kin kokkure in ilo ien eo lok iman, im ear kajerbal ien eo ilo meletlet ñan kebojak bwe en ellã im mour. Elikin “an Anij kowe e kin men ko re jañin walok,” ri jilek Paul ear ba, “[Noah] ilo an mijõk Anij e ar kapojõk wa eo ñõn lomoren e im ro nukin.” (Dri Hibru 11:7) Ta kin kij? Emotlok enañin 90 yiõ ko jen jinoin ran ko eliktata ñan jukjuk im bed in eo ear jinoe ilo 1914. Emol bwe jej bed ilo “ien jemlokin.” (Daniel 12:4, New World Translation) Ewi wãwen ad aikwij in uak nan in kakkõl ko emwij litok ñan kij? “Eo ej kõmõnmõn ankil an Anij ej berwõt in drio,” Bible eo ej ba. (1 Jon 2:17) Eñin unin eien kiõ ñan kõmanman ankil an Jehovah ilo juõn wãwen ekaiuriur.
8, 9. Ta nan in kakkõl ko emwij litoki ilo ran kein, im ewi wãwen air kwaloki?
8 Ilo ran kein ad, ri katak Bible ro emol burueir rar katak jen Jeje ko rekakõrmol bwe jukjuk im bed in enaj jako. Kwoj tõmak ke men in? Lale kin ta eo Jesus Christ ear ba ilo alikar: “Bwe ilo ien eo e naj lap iñtan, eo e jañin einwõt jen jinoin lõl ñõn ien in, aet, e jamin einwõt tokelik.” (Matu 24:21) Bareinwõt Jesus ear ba bwe enaj kar itok einwõt Ri Ekajet eo Anij ear kãlete im enaj kajenolok armij einwõt juõn shepherd ej kajenolok sheep jen goat ko. Ro im rejjab tellokin renaj ilok ñõn iñtan in drio; a ro remõn ñõn mour in drio.”—Matu 25:31-33, 46.
9 Jehovah ear wõnmanlok im likit nan in kakkõl kein iman armij ro an ikijen nan in kakememej ko rejejjet jen ekan ko lor jitõb “dri korijer eo e tiljek im meletlet” ear litoki. (Matu 24:45-47) Bareinwõt, rar kir aolep ailiñ, bwij, lo ko, im armij ro ñan “mijõk Anij im lelok aibujuij ñõn E, bwe auõ in ekajet eo An e mottok.” (Reveles̃õn 14:6, 7) Juõn mõttan ennan in Ailiñ eo eaorõk Ri Kennan ro an Jehovah rej kwaloke ibelakin lal ej nan in kakkõl eo bwe Ailiñ eo an Anij enaj kokkure aolep wãwen iroij eo an armij. (Daniel 2:44, NW) Nan in kakkõl in ejjab juõn nan bajjek jemaroñ kajekdone. Anij eo Ekajur Bõtata ear kajejjet kitien kallimur ko an ien otemjej. (Aiseia 55:10, 11) Ear kõmman eindein ilo ran ko an Noah, im enaj bar kõmmane ilo ran kein ad.—2 Piter 3:3-7.
Mour in Ejej Ej Laplok Wõt
10. Kar ewi joñan an lap mour in ejej ilo ran ko an Noah?
10 Ien kein ad rej einwõt ien ko ilo ran eo an Noah ilo bar juõn wãwen. Jehovah ear kakien emaan im kõrã eo moktata ñan “kobrõk lõl” kin ajiri ro nejeir, kajerbal maroñ in kõmman ajiri eo Anij ear lelok ñan ir ilo jimwe ikõtan wõt leo im lio belen. (Jenesis 1:28) Ilo ran ko an Noah, enjel ro rekiblia rar katton armij ro kin mour in ejej. Rar wanlaltak, kõnak enbwinin armij, im kobalok ibben kõrã ro rerreo, im timmon im orlok kin ajiri ro rej jimettan armij im demon—ri Nephilim ro. (Jenesis 6:2, 4) Jerawiwi eo an enjel rein remijkaie rar einwõt manit ko retton ilo Sodom im Gomorrah. (Jud 6, 7) Kin men in, mour in ejej ear jededlok ilo aolepen lal ilo ran ko mokta.
11. Ta eo kin mour erreo ej kõmman bwe ran kein ad rej einlok wõt ran ko an Noah?
11 Ta kin mour erreo rainin? Ilo ran kein eliktata, elõñ armij rej lemnak wõt kin mour in belele. Paul ej kamelele ilo alikar bwe armij rein rar einwõt “ro rej elã jen iñjake”; elõñ iair rar lelok ir “ñõn ejej bwe ren jerbale etton otemjej ilo dõr.” (Dri Epesõs 4:19) Pornography ak pija in kelwan, belele mokta jen mare, katton ajiri ro, im mour in ejej maan ibben maan ro im kõrã ibben kõrã ro ekkã air walok rej ran kein. Jet armij rej bõk “wõnan ekar ñõn air nana” kiõ ilo air bõk nañinmij in jiroñ im likao, jorrãn ko ilo mour in family eo air, im abañ ko eirlok wõt.—Dri Rom 1:26, 27.
12. Etke jej aikwij kijirãte men eo enana?
12 Ilo ran ko an Noah, Jehovah ear jilkintok Ibwijleplep eo elap im kajemlok lal eo etton kin mour in ejej. Jejjab kõnan meloklok kin mol eo bwe ran kein rej einwõt ran ko an Noah. “Iñtan eo elap” eo ej itok wõt enaj jolok ‘ri lejen, ri ejej, ri Sodom, im maan ro rej belele ibben maan ro.’ (Matu 24:21; 1 Dri Korint 6:9, 10; Reveles̃õn 21:8) Elap an aorõk bwe jen dike men eo enana im bed etolok jen wãwen ko remaroñ tellok ñan mour in ejej!—Sam 97:10; 1 Dri Korint 6:18.
Lal In Ej “Obrõk kin Koaroñ”
13. Ilo ran ko an Noah, etke lal ear “obrõk kin koaroñ”?
13 Ñan jitõñlok ñan bar juõn wãwen mour ilo ran ko an Noah, Bible eo ej ba: “Lõl etton iman mejen Anij im lõl e obrõk kin koaroñ.” (Jenesis 6:11) Kowadoñ ear jab juõn men ekãl. Cain nejin Adam ear urõt jatin eo ear wãnik. (Jenesis 4:8) Ñan kalikar juõn jitõb in kowadoñ ilo ran eo an, Lamech ear kine juõn poem im ear jua kin ewi wãwen ear aikwij mõn juõn likao, bwe en jab mij. (Jenesis 4:23, 24) Men eo ekãl ear bed ilo ran ko an Noah kar ikijen ewi joñan an lap kowadoñ ear walok ilo ien eo. Ñe enjel ro rekiblia nejin Anij rar belele ibben kõrã ro ion lal im kõmman ajiri ro nejeir—Ri Nephilim ro—kowadoñ ear nanalok ñan joñan eo elaplok jen jabdewõt ien mokta. Ekkar ñan ukok in Bible eo New World Translation, Ri inea rein relej rar naetair “Feller ro”—“ro rar kowõtlok armij ro jet.” (Jenesis 6:4, footnote) Kin men in, lal ear “obrõk kin koaroñ.” (Jenesis 6:13) Baj lemnak wõt kin abañ ko Noah ear aikwij jelmae ke ear kejbãrok family eo an ilo kain lal rot eo! Ak, Noah ear kamol bwe ear ‘wãnik iman mejen Jehovah ilo ebeben eo.’—Jenesis 7:1.
14. Ñan joñan et eo lal eo rainin ear “obrõk kin koaroñ”?
14 Kowadoñ ear bed ibben armij toan wõt an armij ro mour. Ak einwõt ilo ran ko an Noah, ilo ien kein ad emwij ad lo elaplok kowadoñ jen jabdewõt ien mokta. Ekkeini ad roñ kin kowadoñ, terrorism, karõk ko ñan mõn juõn kumi in armij, im ri nana ro rej buuk bwijin armij ilo ejja ien eo wõt kin ejelok un. Kobaik ibben aolep men kein katorlok bõtõktõk ilo tarinae ko. Lal in ear bar obrak kin kowadoñ. Etke? Ta unin an laplok kowadoñ? Uak eo ej kalikar bar juõn men einlok wõt men eo ear walok ilo ran ko an Noah.
15. (a) Kar ta juõn ian un ko unin an laplok kowadoñ ilo ran ko eliktata? (b) Ta jemlok eo jemaroñ liki kake?
15 Ke Ailiñ eo an Anij ear jutak ilo lañ ilo 1914, Jesus Christ, eo ej King, ear emmakit ilo wãwen eo eaorõktata. Satan Devil eo im dimon ro an rar jollaltak ir jen lañ ñan lal. (Reveles̃õn 12:9-12) Mokta jen Ibwijleplep eo, enjel ro rekiblia rar ilok jen lañ ilo jelã; bõtab, rar kadiojlok ir. Bareinwõt, ejelok air maroñ kiõ ñan weaktok im kõnak enbwinin armij ion lal im bõk kamõnõnõ ko ilo kanniek. Inem ilo elulu, im mijak kin ekajet eo imair, rej kareel buruen armij im dolul ko ñan kõtõrãi kien im kõmman kowadoñ ñan juõn joñan elaplok jen ran ko an Noah. Jehovah ear kajeebeplok lal eo ear bed mokta jen ien Ibwijleplep eo elikin an enjel ro rekiblia im ro nejeir kobrak e kin nana. Emol, ejamin kadiklok jorrãn ko ilo ran kein ad! (Sam 37:10) Bõtab, ro rej ekkõl wõt ilo ran kein rejelã bwe ien anemkwoj eo air ebaktok.
Emwij Kwalok Ennan Eo
16, 17. Ta men ko emen kar walok ilo ran ko an Noah im rej einlok wõt ilo ran kein ad?
16 Ñe jej keidi lal in ilo ran kein ibben lal eo mokta jen Ibwijleplep eo jemaroñ lo point eo kein kemen ilo jerbal eo Noah ear aikwij kõmmane. Noah ear kalek juõn wa ekilep. Ear bareinwõt jerbal einwõt juõn “dri kwalok.” (2 Piter 2:5) Ta ennan eo ear kwaloke? Ennan eo Noah ear kwaloke ear kitibuj ukwelok im juõn nan in kakkõl kin jorrãn eo ej itok wõt. Jesus ear ba bwe armij ro ilo ran ko an Noah rar “jaje ñõn ter eo ibij liplip ej itok, im bõklok ir otemjej; e naj ein drein an Nejin armij itok.”—Matu 24:38, 39.
17 Eindein lok wõt, ñe Ri Kennan ro an Jehovah rej niknik ilo jerbal eo air ñan kwalok nan, ennan eo an Ailiñ in Anij ej jededlok wõt ibelakin lal. Ilo enañin aolepen lal, armij ro rej eoroñ im konono kin ennan eo an Ailiñ eo ilo kajin eo air. Magazine in Imõniaroñroñ eo, eo ej kejelã kin Ailiñ eo an Jehovah, rej printi elõñlok jen 25,000,000 copy ko im ilo elõñlok jen 140 kajin ko. Emol, rej kwalok nan kin news eo emõn kin Ailiñ eo an Anij “i aolepen lõl kin men in kennan ñõn ailiñ otemjelok.” Ñe ededelok jerbal in ekkar ñan bebe eo an Anij, jemlokin lal enaj itok.—Matu 24:14.
18. Ewi uak ko an elõñ armij kin jerbal in kwalok nan eo ad ñe jej keidi ibben enañin aolep armij ro ilo ran ko an Noah?
18 Ñe jej lo joñan an armij ro jab itoklimo kin men ko lor jitõb im ejelok mour erreo ilo ran eo mokta jen ien Ibwijleplep eo jemaroñ melele kin unin an ro ri turin family eo an Noah kar kajirereik ir. Jemlok eo ear walok. Eindeinlok wõt, “dri kajirere” ro renaj orlok ilo ran ko eliktata. “A ran in Iroij e naj itok einwõt dri kwot, “ Bible eo ej ba. (2 Piter 3:3, 4, 10) Enaj itok ilo ran eo ejejjet. Ejamin rumijtok. (Habakkuk 2:3, NW) Emen in meletlet bwe jen ekkõl wõt!
Eiet Renaj Ellã im Mour
19, 20. Ta men eo jemaroñ keidi ikõtan Ibwijleplep eo im jeebeplok eo an jukjuk im bed in?
19 Men ko jej keidi ikõtan ran ko an Noah im ran kein ad rejjab jerbali ñan wãwen ko renana an armij im ien air jeebeplok wõt. Einwõt ke ear wõr ro rar ellã im mour jen Ibwijleplep eo, eindein enaj wõr ro im renaj ellã im mour jen jemlokin jukjuk im bed in. Ro rar ellã im mour jen Ibwijleplep eo rar ettã burueir im rar jab mour einwõt armij ro mokta. Rar bokake nan in kakkõl eo an Anij im kajenolok ir jen lal eo enana ilo ien eo. “Noah e ar lo joij iman mejen Jeova,” Bible eo ej ba. “[Noah] e dru wãnik im e jime ilo ebeben eo an.” (Jenesis 6:8, 9) Jen armij otemjej, juõn wõt family, “drualitõk armij,” rar bõk lomor jen den ak ibwijleplep eo. (1 Piter 3:20) Im ñan ir Jehovah Anij ear lelok kien eo: “Komin keutak, im orlok, im bar kobrõk lõl.”—Jenesis 9:1.
20 Nan in Anij ej kallimuri kij bwe juõn “jar elap” enaj “itok jen iñtan eo elap.” (Reveles̃õn 7:9, 14) Enaj jete armij ilo jar eo elap? Jesus ear make ba: “Bwe erãniñ kejem, im eairik ial eo ej tellok ñõn mour, im eiet ro rej loe.” (Matu 7:13, 14) Ñe jej keidi elõñ billion armij ro rej mour kiõ ion lal, emol bwe ro renaj ellã im mour jen eñtan eo elap renaj eiet. Ak remaroñ bõk jerammõn eo einlok wõt ro rar ellã im mour jen Ibwijleplep eo rar bõke. Ro rej ellã im mour remaroñ keotak ajiri ro nejeir ilo ien eo einwõt ro rej mõttan dolul in lal eo ekãl.—Aiseia 65:23.
“Komin Ekil” Wõt
21, 22. (a) Ewi wãwen ad maroñ bõk tokjen jen bwebwenato eo kin Ibwijleplep eo? (b) Ta unin tel in yiõ eo ñan 2004, im etke jej aikwij bokake nan in kakabilek eo ej letok?
21 Meñe Ibwijleplep eo ear walok ilo ien ko etto, ilo alikar ej letok juõn nan in kakkõl eo jejjab kõnan kajekdone. (Dri Rom 15:4) Men ko jej keidi ikõtan ran ko an Noah im ran kein ad ren kalaplok ad lale aorõkin men ko rej walok im kakkõl kij kin wãwen an Jesus itok einwõt juõn ri kwot ñan kokkure ri nana ro.
22 Ran kein, Jesus Christ ej tel juõn jerbal elap kin ekkal ilo jitõb. Ñan kejbãrok ri kabuñ ro remol bwe ren ellã im mour, ewõr juõn paradise ilo jitõb eo ej einwõt juõn waan lomor. (2 Dri Korint 12:3, 4) Ñan ellã im mour jen eñtan eo elap, jej aikwij bedwõt ilo paradise eo. Ibelakin paradise in ilo jitõb ej lal eo an Satan, im ej bojak in kañ jabdewõt eo ej mejki ilo jitõb. Elap an aorõk bwe jen “ekil wõt” im bojak kin ran eo an Jehovah.—Matu 24:42, 44.
Kwoj Kememej Ke?
• Ta nan in kakabilek eo Jesus ear kwalok ikijen itok eo an?
• Jesus ear keidi ien bed eo an ñan ta?
• Ilo wãwen et ko ien kein ad rej einlok wõt ran ko an Noah?
• Ewi wãwen kalmenlokjen kin men ko rar walok ikõtan ran ko an Noah im ran kein jelet juõn lemnak in ekaiuriur?
[Naan ko ilo peij 7]
Un in tel eo ñan yiõ in 2004 enaj: “Komin ekil . . . Komin bareinwõt pojõk.”—Matu 24:42, 44.
[Pija eo ilo peij 4]
Noah ear bokake nan in kakkõl eo ekwojarjar. Jej kõmman eindein ke?
[Pija ko ilo peij 5]
“Einwõt ilo ran ko an Noa, e naj ein drein an Nejin armij itok”