“Ainikeir Ej Ilok Ñõn Aolepen Lõl”

“Komin ilok, im kõmõn dri ailiñ ko otemjej, bwe ren dri kalora, im baptais ir ilo etan Jema im Nejin im Jitõb Kwojarjar.”​—Matu 28:19.

1, 2. (a) Ta jerbal eo Jesus ear lelok ñan ri kalor ro an? (b) Etke Ri Christian ro ilo ebeben eo kein kajuõn rar lo elap tõbrak?

EJJABTO mokta jen an kar wanliñlok ñan lañ, Jesus ear lelok ñan ri kalor ro an juõn jerbal. Ear jiroñ ir: “Komin ilok, im kõmõn dri ailiñ ko otemjej, bwe ren dri kalora, im baptais ir ilo etan Jema im Nejin im Jitõb Kwojarjar.” (Matu 28:19) Ear juõn jerbal elap!

² Baj lemnak! Ilo Pentecost 33 C.E., enañin 120 ri kalor ro rar bõk jitõb kwojarjar eo im jino kajejjet kitien jerbal in ilo air kwalok ñan ro jet bwe Jesus ear Messiah eo kar kallimur kake im eo me lomor eo ad ej atartar ion. (Jerbal 2:​1-​36) Ewi wãwen juõn kumi edik emaroñ jibadõk “dri ailiñ ko otemjej”? Ilo nan ko an armij, jemaroñ ba, eban, ak “a Anij e maroñwe men otemjej.” (Matu 19:26) Jitõb kwojarjar eo an Jehovah ear jurake Ri Christian ro jinoin, im rar kile bwe ien eo air kar juõn ien ekaiuriur. (Zechariah 4:​6, NW; 2 Timote 4:2) Inem, iumin jejjo wõt yiõ ko, ri jilek Paul ear maroñ ba bwe rar kwalok news eo emõn ñõn ro otemjej rej ber iomin lõñ.”​—Kolosse 1:​23.

3. Ta eo ear noje Ri Christian ro rerreo einwõt “wheat”?

³ Ilo enañin aolepen ebeben eo kein kajuõn, kabuñ eo emol ear jededlok wõt. Bõtab, Jesus ear kanan bwe ej itok wõt juõn ien ñe Satan enaj jeor “taõ” ko renaj lõñlok jen Ri Christian ro remol einwõt “wheat” iumin elõñ ebeben ko mae ien madmõd. Elikin an kar ri jilek ro mij, kanan in ear jejjet kitien.​—Matu 13:24-​39.

Orlok ilo Mõkaj Rainin

4, 5. Jen 1919, ta jerbal eo Christian ri kabit ro rar jino kõmmane, im etke men in ear juõn aitwerõk elap?

⁴ Ilo 1919, ear mottok ien bwe Christian wheat eo erreo en jino jenolok jen taõ ko. Christian ri kabit ro rar jelã bwe jerbal in elap an Jesus ear wõnmanlok wõt. Rar lukkun tõmak bwe rar mour ilo “ran ko eliktata” im rar jelã kin kanan eo an Jesus: “Bwe naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (2 Timote 3:1; Matu 24:14) Emol, rar jelã bwe ear lap jerbal eo rar aikwij kõmmane.

⁵ Bõtab, einwõt ri kalor ro ilo 33 C.E., Christian ri kabit rein rar jelmae juõn jerbal elap. Kar wõr jejjo wõt thousand iair ilo jejjo wõt ailiñ ko. Ewi wãwen rar maroñ kwalok news eo emõn “i aolepen lõl?” Kememej bwe, oran armij ro ibelakin lal ear laplok wõt jen bõlen 300 million ilo ien eo an Caesar ñan enañin 2 billion elikin bata eo kein kajuõn ion lal. Im ilo aolepen ebeben eo kein ka 20, ora in enaj kar laplok wõt ilo mõkaj.

6. Ta tõbrak ko kin kajededlok news eo emõn kar walok tok ilo yiõ ko 1930?

⁶ Mekarta, ri karejar ro an Jehovah, einwõt ro jeid im jatid ilo ebeben eo kein kajuõn, rar kate wõt im jerbal ilo likieo in tõmak ñan Jehovah, im jitõb eo an ear bed ibbeir. Tok ñan tuiolapen yiõ ko 1930, enañin 56,000 ri evanjel ro rar kwalok mol ko an Bible ilo 115 ailiñ ko. Ñan kiõ, rar kõmman elap jerbal ak ebar wõr jerbal ko rej aikwij kõmmane wõt.

7. (a) Ta aitwerõk ko rekãl Christian ri kabit ro rar jelmae ilo 1935? (b) Kin jibañ eo an kumi in “sheep ro jet,” ewi joñan an jerbal in aintok armij wõnmanlok tok ñan ran kein ad?

⁷ Inem, juõn melele emũlal kin wõn “jar eo elap” Reveles̃õn 7:9 kar konono kake ear ejaak juõn aitwerõk ekãl im ear kallimure Ri Christian rein reboub bwe renaj bõk jibañ. Juõn jar in armij jejjab maroñ bwiniir “sheep ro jet,” ri tõmak ro ewõr air kejatdikdik ñan mour ion lal, rar aikwij aini ir jen “ailiñ otemjej, im jen bwij otemjej, im jen armij otemjej, im jen konono otemjej.” (Jon 10:16) Ri Christian rein renaj kar ‘kabuñ ñan Jehovah ran im boñ.’ (Reveles̃õn 7:​15) Renaj kar jibañ ilo jerbal in kwalok nan im katakin armij. (Aiseia 61:5) Christian ri kabit ro ear lukkun mõnõnõ in lo oran ri evanjel ro orlok wõt ñan elõñ thousand mokta inem ñan elõñ million tokelik. Ilo yiõ eo 2003, juõn laplok ekãl kin 6,429,351 rar bõk kunair ilo jerbal in kwalok nan​—enañin aolep ir rar mõttan jar eo elap.a Christian ri kabit ro elap air kamolol kin air jibañ ir, im kumi in sheep ro jet ewõr air kamolol ñan bõk jerammõn in jurake jeiir im jatiir ri kabit ro.​—Matu 25:34-​40.

8. Ewi wãwen an Ri Kennan ro an Jehovah kar uake ijjibed ko relap rar waloktok jen bata eo kein karuo an lal?

⁸ Ke class in wheat eo ear bar walok ilo alikar, Satan ear lukkun jumae e. (Reveles̃õn 12:17) Ewi wãwen ear emmakit ke jar eo elap ear walok? Ear jumae kin elap kowadoñ! Jej bere ke bwe ear bed ilikin jumae eo nae kabuñ eo emol ibelakin lal ilo bata eo kein karuo an lal? Ilo ailiñ ko aolep rar bõk kunair ilo tarinae eo, ear lap air jibede Ri Christian ro. Elõñ ro jeid im jatid rej eñtan ilo elõñ melejoñ ko, jet rej mij kin tõmak eo air. Meñe eindein, rar kwalok ilo makitkit ko air bwe rej errã ibben ri jeje sam: “Ilo Anij I naj nebar An in nan. I ar liki Anij, I jamin mijõk, ta eo kõniek e maroñ in kõmõn nae Iõ?” (Sam 56:4; Matu 10:28) Christian ri kabit ro im sheep ro jet, ro me jitõbõn Jehovah kar kakajur ir, rar jutak bin ibben don. (2 Dri Korint 4:7) Tokjen men in bwe, “nan in Anij [ear laplok]” wõt. (Jerbal 6:7) Ilo 1939, ke tarinae eo ear walok, rar report bwe 72,475 Ri Christian ro retiljek rar kwalok nan. Bõtab, juõn report ear jañin koba aolep tõbrak ko ilo 1945 kar report bwe 156,299 Ri Kennan ro rekijejeto an Jehovah rar kwalok nan kin news eo emõn. Ear juõn ien elap Satan ear jab lo tõbrak!

9. Ta school ko rekãl rar kejelã kaki ilo ien Bata eo kein Kajuõn an Lal?

⁹ Alikar, bwoktak eo an bata eo kein karuo an lal ear jab kõmman bwe ri karejar ro an Jehovah ren bere kin air kamwijlok jerbal in kwalok nan. Emol, ilo 1943, ke tarinae eo ear lukkun kauwatata jen jabdewõt ien mokta, rar kejelã bwe rar ejaak ruo school ko rekãl. Juõn, im kiõ rej naetan Theocratic Ministry School, rar karõk bwe school in en bed ilo aolep congregation ko ñan katakin Ri Kennan ro kajjojo kin jerbal in kwalok nan im kõmman ri kalor ro. School eo juõn, kar katakin missionary ro bwe ren jelã kilen kwalok nan ilo ailiñ ko retolok. Aet, ke tarinae ko rar jemlok, Ri Christian ro remol rar bojak kin jerbal in korlok ri tõmak ro.

10. Kar ewi joñan kijejeto eo an armij ro an Jehovah ilo 2003?

¹⁰ Im rar lo elap tõbrak kin jerbal eo rar kõmmane! Ilo air katak ilo school in Theocratic Ministry School, aolep​—ro redik im ritto, jemen im jinen im ajiri ro, im ro remõjno bareinwõt​—aolep rar bõk kunair im rej wõnmanlok ñan bõk kunair ñan kajejjet kitien jerbal eo elap an Jesus. (Sam 148:12, 13; Joel 2:​28, 29, NW) Ilo yiõ eo 2003, 825,185 rar kalikar lemnak in Ekaiuriur ilo air bõk kunair, iumin jejjo alliñ ak toan wõt air mour, ilo jerbal in pioneer. Ilo ejja yiõ eo wõt, Ri Kennan ro an Jehovah rar kwalok nan iumin 1,234,796,477 awa ko ñan konono ibben armij ro jet kin news eo emõn kin Ailiñ eo. Emol bwe Jehovah ej buñburuen kin kijejeto eo an armij ro an!

Ilo Ailiñ ko Retolok

11, 12. Ta report ko rej kalikar kin tõbrak ko remõn an missionary ro?

¹¹ Iumin elõñ yiõ ko, ro rar kadiojlok jen Gilead im, ilo ran kein, ro rar kadiojlok jen Ministerial Training School rar ejaak juõn lokbook kin tõbrak ko relap. Ñan wanjoñok, ilo Brazil, kar wõr eietlok jen 400 ri kwalok ke missionary ro moktata rar tõbraklok ijo ilo 1945. Rein im missionary ro rar etal tokelik rar boub im jerbal ibben Ri Brazil ro jeiir im jatiir rekijejeto, im Jehovah ear lap an kajerammõn jerbal ko air. Ej juõn men ekabwilõñlõñ ibben jabdewõt eo ear kememej wõt kin ran ko jinoin im lo bwe Brazil ear report juõn laplok ekãl kin 607,362 ilo 2003!

¹² Lemnak kin Japan. Mokta jen an tarinae eo kein karuo an lal kar walok, kar wõr enañin jibuki ri kwalok ro an Ailiñ eo ilo ene eo. Ilo ien tarinae eo, matõrtõr eo elej ear kaeitlok orair, im ilo tujemlokin tarinae eo, eiet Ri Kennan ro rar mour wõt ilo jitõb im kanniek. (Jabõn Kennan Ko 14:32) Ri tiljek rein meñe eiet orair rar mõnõnõ ilo 1949 in karuwaineneik 13 missionary ro moktata jen Gilead, im ilo mõkaj missionary rein rar bõk juõn jitõb emãnãn ibbeir kin air kijejeto, joij eo an ro jeid im jatid jen Japan. Elõñlok jen 50 yiõ ko tokelik, ilo yiõ eo 2003, Japan ear reporte juõn tõbrak kin 217,508 ri kwalok ro! Emol, Jehovah ear lukkun kajerammõn armij ro an ilo ailiñ eo. Ebar wõr report ko einlok wõt ilo elõñ ailiñ ko jet. Ro rar maroñ in kwalok nan ilo territory ko retolok ear lap air bõk kunair ilo air kajededlok news eo emõn, bwe ilo 2003 ear walok ilo 235 ailiñ, ene, im territory ko ibelakin lal. Aet, jar eo elap ej diojtok jen “ailiñ ko otemjej.”

“Jen . . . Bwij Otemjej im jen Ailiñ Otemjej im jen Konono Otemjej”

13, 14. Ilo wãwen et eo Jehovah ear kwalok kin aorõkin jerbal in kwalok nan ilo “konono otemjej”?

¹³ Men in bwilõñ eo kein kajuõn ear walok elikin an jitõb kwojarjar eo kabit ri kalor ro ilo Pentecost 33 C.E. ke rar konono ilo lo ko ñan jar in armij ro rar kwelok ibbeir. Aolep ro rar roñjake remaroñ kar konono ilo kajin ko an ailiñ ko, bõlen kajin Greek. Kinke rar “armij dri kabuñ” ro, rar maroñ melele katak ko ilo kajin Hebrew ilo temple eo. Ak burueir rar reel ke rar eoroñ news eo emõn ilo kajin eo rar katak kaki jen ke rar ajiri wõt.​—Jerbal 2:​5, 7-​12.

¹⁴ Rainin, bareinwõt, rej kwalok nan ilo elõñ kajin ko. Rar kanan bwe jar eo elap enaj itok jab jen ailiñ ko wõt ak bareinwõt jen “bwij otemjej, im jen armij otemjej, im jen konono otemjej.” Ñan errã ibben men in, ikijen Zechariah Jehovah ear kanan im ba: “Joñoul armij jen konono in ailiñ ko otemjej renaj jibwe nuknuk eo an juõn Ri Jew, im ba: ‘Kimnaj etal ibbemi, bwe kimar roñ bwe Anij ej ibbemi.’ ” (Zechariah 8:​23, NW) Meñe Ri Kennan ro an Jehovah rejjab konono ilo lo ko kiõ, rejelã aorõkin katakin armij ilo kajin ko air.

15, 16. Ewi wãwen an missionary ro bõk eddo eo ñan kwalok nan ilo kajin ko an ailiñ ko?

¹⁵ Emol, rainin ewõr jet kajin ko relap, einwõt kajin English, French, im Spanish. Bõtab, ro rar ilok jen kabijuknen eo air ñan kwalok nan ilo ailiñ ko jet rar kajeoñ in katak kajin ailiñ ko rej jerbal ie bwe news eo emõn emaroñ tõbar ro “jabrewõt ar likit ir bwe ren mour in drio.” (Jerbal 13:48) Emaroñ bin ñan kõmmane men in. Ke brother ro ilo enen Tuvalu ilo South Pacific rar aikwiji book ko ilo kajin eo air, juõn ian missionary ro ear bõk eddo eo ñan katak kajin eo an. Kinke kar ejelok juõn dictionary ilo kajin eo, ear jino kõmman juõn lajrak in nan ko ilo kajin Tuvalu. Tokelik, rar ukõt book eo Kwo Maroñ Mour Indrio ilo Paradais Ion Lõlb ilo kajin Tuvalu. Ke missionary ro rar etal ñan Curaçao, kar ejelok book in Bible ko im dictionary ilo kajin Papiamento. Bareinwõt elõñ rar jab errã kin ewi wãwen rar aikwij jeje kajin eo. Meñe eindein, iumin ruo yiõ ko jen ien eo missionary ro moktata rar tõbraklok ie, rar ukõt tract in Bible eo an Christian ilo kajin eo an. Rainin, Papiamento ej juõn ian kajin ko 133 rej ukõt magazine in Imõniaroñroñ jen kajin English.

¹⁶ Ilo Angola missionary ro moktata rar etal ijo rar jab lo jabdewõt Ri Angola Ri Kennan eo ñan jibañ ir ukõt book ko ilo kajin eo an ailiñ eo. Bareinwõt, elõñ nan ko ilo kajin ko ilo Angola, einwõt “wãppen” ear bin ukõte kinke ejeja air kajerbali ilo kajin ko air. Juõn missionary ear report im ba: “Ekkã aõ kajerbal ri kaki in school ro rej katak Bible ñan ukok. Kinke rar jab kanuij jelã kin mol eo, I ar aikwij jijet ibbeir im lale bwe aolep nan ko kajjojo rar jimwe im jejjet.” Mekarta, kimar ukõt tract in Bible eo Mour ilo juõn Lal Ekãl ilo elõñ kajin ko ilo Angola. Rainin, rej kõmmane magazine in Imõniaroñroñ eo, ilo kajin Umbundu, juõn ian kajin ko air ilo ejja ien eo wõt rej kõmmane ilo kajin English.

17, 18. Ta aitwerõk ko rej kõmmani ilo Mexico im ailiñ ko jet?

¹⁷ Ilo Mexico, kajin eo elap ijo ej, kajin Spanish. Bõtab, mokta jen an kar Ri Spain ro tõbarlok ijo, armij ro ijo rar konono ilo elõñ kajin ko, im elõñ ian kajin kein rej konono ilo ran kein. Eñin unin, Ri Kennan ro an Jehovah rej ukõt book im magazine ko air ilo jiljilimjuõn kajin ko ilo Mexico im ilo kajin ri jaroñroñ etan Mexican Sign Language. Kein katak eo Ad Jerbal ñõn Ailiñ Eo ilo kajin Maya ej ukok eo moktata rar ukõt ilo kajin ri jaroñroñ eo kajin American Indian. Emol, jiljilimjuõn thousand Ri Maya, Ri Aztec, im ri ailiñ ro ijo jemaroñ lo ir ibwiljin 572,530 ri kwalok ro an Ailiñ eo kiõ ilo Mexico.

¹⁸ Ilo ran kein, elõñ million armij ro rar ko jen ailiñ ko air ñan ailiñ ko jet, ak rar emmakit ñan bar juõn ailiñ ñan kabuk jerbal ko ijo. Tokjen men in, elõñ ailiñ ko rej kab lo juõn joñan elap in armij ro jen ailiñ ko jet rej bed ibbeir. Ri Kennan ro an Jehovah rar bõk eddo eo. Ñan wanjoñok, ilo Italy, ewõr congregation im kumi ko rej kajju im konono ilo 22 kajin ko ijellokin kajin Italy. Ñan jibañ ri kwalok ro ñan kwalok nan ñan armij ro rej konono ilo kajin ko jet, ej kab mwij air karõk 70 katak ko ñan katakin armij ñan konono ilo 14 kajin ko, ekoba kajin ri jaroñroñ eo, kajin Italian Sign Language. Ilo elõñ ailiñ ko jet, Ri Kennan ro an Jehovah rej kate wõt ir ñan jibadõk aolep ri ailiñ ro ilo ailiñ eo air. Aet, kin jibañ eo an Jehovah, emol bwe jar eo elap ej diojtok jen elõñ kumi ko rej kajju jen don ilo kajin ko air.

“I Aolepen Lõl”

19, 20. Ta nan ko an Paul rej jejjet kitieir ilo juõn wãwen ekabwilõñlõñ ilo ran kein? Kamelele.

¹⁹ Ilo ebeben eo kein kajuõn, ri jilek Paul ear jei: “R’ar jab roñ ke? Aet, emol, Ainikeir ej ilok ñõn aolepen lõl, im nan ko air ñõn ijo ko jemlokõn lõl.” (Dri Rom 10:18) Elañe ear mol men in ilo ebeben eo kein kajuõn, elaplok an mol men in ilo ran kein! Elõñ million​—bõlen elõñlok jen jabdewõt ien mokta ilo bwebwenato ko an lal​—rej ba: I naj wijtak Jeova ien otemjej; An nebar e naj ber i loñiõ ien otemjelok.”​—Sam 34:1.

²⁰ Bareinwõt, jerbal in ejjab diklok. Oran ri kwalok ro an Ailiñ eo ej orlok wõt. Elaplok ien rej bõki ñan kõmman jerbal in. Elõñ million alen rej jeblak im bwebwenato ibben armij im elõñ thousand katak ko kin Bible rar ejaak. Im joñan an armij ro itoklimo ej laplok wõt. Yiõ eo lok, juõn laplok ekãl kin 16,097,622 armij rar bed ilo kwojkwoj eo ñan Kememeje mij eo an Jesus. Alikar, elap wõt jerbal jej aikwij kõmmane. Inem jen wõnmanlok im kajeoñe ro jeid im jatid rej retiljek im rar kijenmij iumin matõrtõr ko relap. Im jen kwalok kijejeto eo an jeid im jatid ro me jen 1919 liñtak rar kamaat air maroñ ilo jerbal eo an Jehovah. Kij aolep jej aikwij lamõj kin nan ko an ri jeje sam: “Men otemjej eor air menono ren nebar Jeova. Komin nebar Jeova!”​—Sam 150:6.

[Kamelele eo itulal]

Kwomaroñ Kamelele Ke?

• Ta jerbal eo ro jeid im jatid rar jino kõmmane ilo 1919, im etke ear juõn aitwerõk?

• Rar aintok wõn ro bwe ren jurake jerbal in kwalok nan?

• Ta men in kamol ko missionary im ro jet rar ejaak ilo ailiñ ko retolok?

• Ta men in kamol ko kwomaroñ kwalok bwe Jehovah ej kajerammõn jerbal eo an armij ro ilo ran kein?

[Jaat ilo peij 24-27]

2003 SERVICE YEAR REPORT EO AN RI KENNAN RO AN JEHOVAH’S IBELAKIN LAL

(Lale bok in)

[Pija ko ilo page 20, 21]

Bwoktak eo an bata eo kein karuo an lal ear jab kõmman bwe ri karejar ro an Jehovah ren bere kin air kamwijlok jerbal in kwalok nan

[Etan ro rej kõmman]

Bõkkolok: pija eo an U.S. Navy; ro jet: pija eo an U.S. Coast Guard

[Pija ko ilo peij 22, 23]

Jar eo elap enaj kar diojtok jen bwij im konono otemjej