‘En Wãwen Dein Ami Jar’

KWOJ jelã ke nan ko ilo Jar eo an Iroij? Ej jar eo elaptata Jesus Christ ear katakin kake. Ilo ien eo ear kwalok Katak eo an ebuñbuñ ion Tol eo, Jesus ear ba: “En wãwen drein ami jar.” (Matu 6:9) Kinke Jesus ear kwalok jar in, ekkã air naetan Jar eo an Iroij.​—Latin, Paternoster.

Elõñ million armij ro ibelakin lal rar ememej wõt Jar eo an Iroij im ekkã air eliji, bõlen jen ran ñan ran. Ilo yiõ ko rej kab motlok, elõñ rar jar kake ilo jikin school ko im jikin ko jet armij ro rar bed ie. Etke elõñ armij elap air kaorõk Jar eo an Iroij?

Ilo katak ko an, kabuñ eo Roman Catholic ej watõk Jar eo an Iroij einwõt “jar eo eaorõktata an Christian.” Bõtab, jej aikwij kile bwe, elõñ ian ro rej eliji Jar eo an Iroij rejjab kanuij melele kake. “Elañe kwoj bed ilo juõn kabuñ in Christian bõlen kwomaroñ elij jar eo ilo mõkaj,” newspaper eo Canada’s Ottawa Citizen ej ba, “ak emaroñ bin jidik elañe kwoj karumijlok am eliji im kõmmane ilo juõn wãwen kwoj melele kake.”

Ej lukkun ke aorõk bwe jen melele kin ta eo jej jar kake ñan Anij? Etke Jesus ear kwalok Jar eo an Iroij ñan kij? Ta melelen men in ñan kwe? Kiõ jen etale kajitõk kein.