Ewi Aorõkin Mour Eo Am?

ELÕÑ rainin rej aikwij lukkun kate iumin wãwen ko rebin ñan baj mour wõt. Ak, remaroñ liki bwe Anij enaj “lomoren ro dri jorran” jen ijjibed im eñtan ko. (Job 36:​15) Kwomaroñ liki bwe Anij ej watõk mour ko an kajjojo armij bwe raorõk. “Kwon kir ñõn iõ ilo ran in jorran,” Jehovah Anij, Ri Kõmanman eo ej ba, im “I naj lomoren yuk.”​—Sam 50:15.

Ebin ke ñan am tõmak bwe Ri Kõmanman eo ej watõk yuk​—jen ibwiljin elõñ billion armij ro ion lal​—bwe kwo aorõk? Inem lale ta eo ri kanan eo Isaiah ear je kin billion iju ko ilo billion galaxy ko ilo lañ ko ibelakid. Jej konono: “Komin reiliñlok, im lo wõn eo E ar kõmõnmõn men kein, eo Ej kadriojlok ir kin orair; Ej ãñiñin ir otemjej; kin An kajur elap, im kin An bin ilo maroñ potata, ejelok juõn ej likjõp.”​—Aiseia 40:⁠26.

Kwo melele ke ta melelen men in? Milky Way galaxy eo ad​—ikijen solar system eo ad ej juõn mõttan edik​—ewõr enañin 100 billion iju ko. Im ewõr jete galaxy ko jet? Ejelok juõn elukkun jelã, ak watwat ko an jet rej ba 125 billion. Alikar ewõr juõn joñan ekanuij lap kin oran iju ko ilañ! Ak, Bible eo ej jiroñ kij bwe Ri Kõmanman eo an lañ im lal ej jelã etan kajjojo iju ko.

“Emwij Bwini Kolan Bõrõmi Otemjelok”

‘Ak,’ jet remaroñ jumae, an ‘baj jelã wõt ãt ko etan billion iju ko​—ak billion armij ro​—ejjab melelen bwe ej kea kake ir einwõt armij ro kajjojo.’ Juõn computer me ebwe an kajur emaroñ kejbãrok ãt ko etan elõñ billion armij ro. Ak, ejelok juõn ej lemnak bwe computer eo ej kea kake jabdewõt iair. Bõtab, Bible eo ej kwalok bwe Jehovah Anij ejjab jelã wõt ãt ko etan billion armij ro ak bareinwõt ej kea kake ir einwõt armij ro kajjojo. “Komin likit ami inebata otemjej na iben,” ri jilek Peter ear je, “bwe Ej ierki kom.”​—1 Piter 5:⁠7.

Jesus Christ ear ba: “Re jab wia ruo bao sparro kin juõn penni ke? im juõn iair e jamin wutlok ion brij im Jememi e jab lale. A emwij bwini kolan bõrõmi otemjelok. Inem komin jab mijõk, elap ami aurõk jen elõñ sparro.” (Matu 10:​29-​31) Lale bwe Jesus ear jab ba bwe Anij enaj baj lale wõt kin ta eo ear walok ñan sparro ko im ñan armij ro. Ear ba: “Elap ami aurõk jen elõñ sparro.” Etke elaplok am aorõk? Kinke kar kõmanman yuk “ilo wãwen Anij”​—kin maroñ eo ñan kaddeklok im kwalok kadkad ko kin mwil emõn, ilo jelã kõmmanwa, im ilo jitõb me rej kwalok kin kadkad ko reutiej kadkadin Anij.​—Jenesis 1:​26, 27.

“e Naj Kõtlok Ro Dri Aikwij Ke Rej Lamij”

Meñe elõñ armij rej aikwij eñtan kin elõñ wãwen ko renana rainin, mour ej juõn men in letok eaibujuij. Im jej kate kij joñan wõt ad maroñ ñan kejbãroke. Mour ilo ran ko renaj itok me Anij ej kallimur kake emõnlok jen ad aikwij kate kij ñan baj bed im mour ilo wãwen ko rebin im kaeñtanan. Ej karõk eo an Anij in ñan lomoren kij jen mour in eñtan im jekdon eo ad kiõ, bwe jen maroñ “bõk mour eo emol” me Anij ear karõke ilo jinoin ñan armij.​—1 Timote 6:​19.

Anij enaj kõmman men kein aolep kinke kij kajjojo jej aorõk ilo mejen. Ear karõk bwe Nejin, Jesus Christ, en letok katok in binmour eo me ej men in aikwij ñan kanemkwoj kij jen jerawiwi, jab wãppen, im mij eo jaar jolete jen ro jimmad im jibwid, Adam im Eve. (Matu 20:28) “Bwe kin an Anij yokwe lõl,” Jesus Christ ear ba, “E ar letok juõn wõt Nejin E ar keutak, bwe jabrewõt eo ej liki E . . . en mour in drio.”​—Jon 3:​16.

Ta eo Anij enaj kõmmane ñan ro kiõ me rej jorrãn kin eñtan im ijjibed ko? Ikijen Nejin, Nan in kakõrmol eo an Anij ej jiroñ kij: “Bwe e naj kõtlok ro dri aikwij ke rej lamij, im ro dri jeramel, ro ejelok air dri jibõñ. E naj tiriamokake ro dri jeramel im ro dri aikwij, im e naj lomoren mour an ro dri aikwij. E naj wiaik air jen matõrtõr im kokkure, im e naj aurõk bõtõktõkir [ak, mour eo air] iman mejen.”​—Sam 72:​12-​14.

Mõttan wõt jidik Anij enaj bõktok “ien ko ien karõk men otemjej” ikijen kien Ailiñ eo an ilo pein Nejin, Jesus Christ. (Jerbal 3:​21; Matu 6:​9, 10)Kwonaj bed ke ñan lañliñ kin mour eo Jehovah ear kallimur kake? Ej am jokãlet. Kimij rejañ yuk ñan kortokjen men in letok ko Anij ear kõmmani ñan bõktok jerammõn kein aolep. Ro rej kõmmane magazine in renaj mõnõnõ in jibañ yuk ñan kõmmane men in.

[Pija eo ilo peij 5]

“Elap ami aurõk jen elõñ sparro”