Ruaklok ñan Anij
Eo Ej Watõk Kij Einwõt Ro Raorõk
“BURUER ej liakelok kij.” Bible eo ej kamol bwe jet ien buruõd emaroñ kõmman bwe en tarjen joñan ad notaik kij make. Emol, men in emaroñ kõmman bwe jen eñjake bwe Anij ejjab yokwe im kea kake kij. Bõtab, Bible eo ej kallimuri kij: “Anij elap jen buruer im E jela men otemjelok.” (1 Jon 3:19, 20) Anij elaplok an jelã kin kij. Wãwen an lemnak kin kij emaroñ lukkun oktak jen ad lemnak kake kij make. Inem ewi joñan aorõkid iman mejen—Jehovah Anij eo me lemnak ko an reutiejlok? Uak eo emaroñ lujur buruõd jen wanjoñok eo Jesus ear kajerbale ilo ruo ien ko rejenolok jen don.
Juõn ien, Jesus ear ba bwe kar “wia ruo bao sparro kin juõn penni .” (Matu 10:29, 31) Ekkar ñan Luk 12:6, 7, Jesus ear bar ba: “Re jab wiakaki lailim sparro kin ruo penni ke? Im ejelok juõn iair melokloke iman mejen Anij . . . Komin jab mijõk: elap ami emõn jen elõñ sparro.” Wanjoñok in elamwan im elap an kajur ej katakin kij kin wãwen lemnak eo an Jehovah kin ri kabuñ ro an.
Bao sparrow ko kar bao ko rediktata wõnãir ian bao ko jet kar kajerbal ñan mõñã. Alikar bwe Jesus ear kalimjek kõrã eo ejeramel—bõlen emaroñ bar jinen—ilo mõn wia jidik ko rej wia bao kein redik ñan najidik family ko air. Kin juõn (assarion) money in Rome, juõn jããn ediklok aorõkin jen lalem jããn ko ilo ran kein, juõn emaroñ wia ruo sparrow kin jããn in. Joñan an lukkun dik wõnãn bao kein kin ruo jããn, ri wia eo emaroñ bõk jab emen ak lalem bao sparrow, im lelok juõn kin ejelok wõnãn.
Jesus ear kamelele bwe ejelok juõn bao sparrow “Anij ear meloklok” ak ej wõtlok “ion brij im Jememi e jab lale.” (Matu 10:29) Jehovah ej lo bwe kajjojo ien juõn bao sparrow ej wõtlok ñan lal bõlen kinke e kinejnej ak ej jok ion lal ñan kabuk kijen mõñã. Meñe armij ro rej watõk bao ko rejjab aorõk, ak ibben Jehovah, Ej watõki raorõk kinke ear kõmanmani im ej kememeji. Ilo mol, rej menin mour ko raorõk. Kwoj ke lo point eo eaorõk ijin Jesus ej kwaloke?
Ilo katak eo an, ekkã an Jesus keidi katak ko, im kwalok kin wãwen an katak ko redik maroñ jerbal ñan men ko raorõklok. Ñan wanjoñok, Jesus ear bareinwõt ba: “Bao reven ko: bwe re jab jeor, im jab marmir; ejelok imõn mweieir ak imõn kijeir; im Anij ej najirik ir: kijkan elap ami emõn jen bao ko ke?” (Luk 12:24) Kiõ point eo ilo nan ko an Jesus kin bao sparrow ko ej alikarlok: Elañe Jehovah ej kea kin bao jidik kein, elaplok an kea kin armij ro rej yokwe e im kabuñ ñan e!
Ilo an alikar nan ko an Jesus, jejjab aikwij bõk eñjake eo bwe jejjab lukkun aorõk ibben Anij eo “elaplok jen buruõd.” Ejjab ke juõn menin kainemõn ñan jelã bwe Ri Kõmanman eo ad ejelã ta eo ilo buruõd me kij make jejjab jelã kake?
[Pija An Eo Ej Komman ilo peij 30]
Sparrows: © ARCO/D. Usher/age fotostock