Emwij An Jehovah Bwini “Kolan Bõrõmi Otemjelok”

“Juõn iair [bao sparro] e jamin wutlok ion brij im Jememi e jab lale. A emwij bwini kolan bõrõmi otemjelok.”​—MATU 10:29, 30.

1, 2. (a) Etke Job ear lemnak bwe Anij ear ilok jen e? (b) Nan ko an Job ear melelen ke bwe ear oktak im jumae Jehovah? Kamelele.

“O ANIJ, ij kir ñõn yuk, ak kwojjab uak; Im ñe ij jar, kwoj kejekdron iõ. Kwoj kõmmõn ñõn iõ ilo am lej; Kwoj kaiñtan iõ kin aoleben am kajur.” Armij eo ear ba nan kein ear lukkun eñtan! Im ejelok bwilõñ, kinke ear luji aolep men ko mweien, juõn jorrãn ear mõn ajiri ro nejin, im ear bõk juõn nañinmij enana. Armij in kar Job, im melejoñ eo an ekaeñtanan kar jeje kake ilo Bible eo im elap tokjen ñan kij.—Job 30:20, 21.

² Nan ko an Job ear einwõt ñe ear jumae Anij, ak ear jab eindein. Job ear baj kwalok wõt eñtan eo ear eñjake ilo tu-mũlal in buruen. (Job 6:2, 3) Ear jaje bwe Satan eo kar unjen melejoñ ko an, inem ilo bwid ear lemnak bwe Anij ear ilok jen e. Job ear bareinwõt ba ñan Jehovah: “Etke Kwoj binej turin mejõm, im likit iõ dri kijirãte Yuk?”a—Job 13:24.

3. Ñe ej walok abañ ko, ta eo jemaroñ lemnak kake?

³ Rainin, elõñ ian armij ro an Jehovah rej eñtan kin tarinae ko, bwok ko ilo kien ak jukjuk im bed eo, jorrãn ko, air rittolok, nañinmij, jeramel, im an kien ko kemo jerbal eo ad. Bõlen kwe bareinwõt kwoj iion melejoñ ko. Jet ien, kwomaroñ bõk lemnak in bwe Jehovah ej noj mejen jen yuk ak ejjab buñburuen kake yuk. Elap am jelã nan ko ilo Jon 3:16: “Bwe kin an Anij yokwe lõl, E ar letok juõn wõt Nejin E ar keutak.” Ak, ñe ej lap am eñtan im ejjab bõjrak, kwomaroñ lemnak: ‘Emol ke an Anij yokwe iõ? Ej lo ke men eo ij iione? Ej kea kake iõ ke?

4. Ta abañ eo etto an bed Paul ear aikwij in kijenmij kake, im juõn wãwen einwõt in emaroñ jelet kij ilo wãwen et ko?

⁴ Lemnak kin ta eo ear walok ñan ri jilek Paul. “Ar letok ñõn iõ juõn kãliklik ilo kõniekiõ, juõn dri jilikan Setan bwe en ubrare iõ,” ear je, im ear wõnmanlok: “I ar akwelap ñõn Iroij kin men in alen jilu, bwe en joko jen iõ.” Jehovah ear roñ akwelap ko an. Mekarta, ear kalikar ñan Paul bwe ejamin joloke ikijen juõn men in bwilõñ. Jen an eindein, Paul ear aikwij atartar ion kajur eo an Anij ñan jibañ e kijenmij kin ‘kãliklik ilo kõniekin.’b (2 Dri Korint 12:7-9) Einwõt Paul, bõlen kwoj iion juõn melejoñ. Kwomaroñ lemnak, ‘Kin an Jehovah jab kamadmõde melejoñ eo aõ, melelen ke bwe ejaje ta eo ij inebata kake ak bwe ejjab kea kake iõ?’ Uak eo ej jaab! Itoklimo eo an Jehovah kin ri karejar ro an retiljek kajjojo ej alikar ilo ta eo Jesus ear jiroñ ri jilek ro an kake elikin an kar kãlet ir. Jen lale ewi wãwen nan ko an remaroñ kõketak kij rainin.

“Komin Jab Mijõk”—Etke?

5, 6. (a) Ewi wãwen an kar Jesus jibañ ri jilek ro bwe ren jab mijak kin ta ko rej bed imair? (b) Ewi wãwen Paul ear kwalok an liki kin kejbãrok eo an Jehovah?

⁵ Ri jilek ro rar bõk kajur ko rekabwilõñlõñ jen Jesus, ekoba “kajur ion jitõb õtton ro bwe ren kajutõklok ir, im bwe ren kemour nañinmij otemjej im mõjino otemjej.” Ak, ejjab melelen men in bwe rejamin iion melejoñ im abañ ko. Jesus ear kwalok ilo tibdikin kin jet ian men ko renaj iioni. Bõtab, ear rejañ ir: “Im komin jab mijõk ro rej mõn enbwin, a jab maroñ mõn an: a emõn komin mijõk Eo ej maroñ mõn an im enbwin na ilo Geena.”—Matu 10:1, 16-22, 28.

⁶ Ñan jibañ ri jilek ro an bwe ren melele kin etke rejjab aikwij mijak, Jesus ear kwalok kin ruo wanjoñok ko. Ear ba ñan ir: “Re jab wia ruo bao sparro kin juõn penni ke? im juõn iair e jamin wutlok ion brij im Jememi e jab lale. A emwij bwini kolan bõrõmi otemjelok. Inem komin jab mijõk, elap ami aurõk jen elõñ sparro.” (Matu 10:29-31) Lale bwe Jesus ear kobaik ad jab mijak in jelmae abañ ko ibben ad liki bwe Jehovah ej kea kake kij kajjojo. Alikar, ri jilek Paul ear wõr an liki rot in. Ear je: “Elañe Anij ej ber iber, wõn ej jumae kij? Eo e ar jab drebij Nejin wõt jen iñtan, a E ar ketõk E kin kij otemjej, ekijkan, E jamin bareinwõt wujleptok men otemjej iben ñõn kij ke?” (Dri Rom 8:31, 32) Jekdon ta abañ ko kwoj jelmaiki, kwe bareinwõt kwomaroñ liki bwe Jehovah ej kea kake yuk elañe kwoj kejbãrok am tiljek ñan e. Men in enaj alikarlok ñe jej etale nan in kakabilek eo an Jesus ñan ri jilek ro an.

Aorõkin juõn Bao Sparrow

7, 8. (a) Ewi wãwen air kar lemnak kin bao sparrow ko ilo ran ko an Jesus? (b)  Etke Matu 10:29 ej kajerbal nan in Greek eo “sparro” eo edik?

⁷ Wanjoñok ko an Jesus rar jejjet air kwalok kin itoklimo eo an Jehovah kin kajjojo ri karejar ro An. Lemnak mokta kin sparrow ko. Ilo ran ko an Jesus, rar mõñã, ak kin air kokkure leen jikin kallip ko, kar watõki men in mour ko renana. Kin an lukkun lõñ im dik wõnãn sparrow ko, rar maroñ wiaik ruo ekkar ñan wõnãn money ilo ran kein, ediklok jen lalem jããn. Joñoul jããn enaj kar maroñ wiaik jab emen sparrow ak lalem—bao eo juõn rej baj leloke, einwõt ejelok aorõkin!—Luk 12:6.

⁸ Lemnak, bareinwõt, kin joñan bao in. Ñe jej keidi juon sparrow ibben bao ko jet, elukkun dik. Ak, nan in Greek eo rej ukõte “sparrow” ilo Matu 10:29 ej jitõñlok ñan sparrow ko redik. Alikar bwe Jesus ear kõnan bwe ri jilek ro an ren lemnak kin bao eo ediktata im dik tokjen.

9. Wanjoñok eo an Jesus kin sparrow ko, ta eo elaptata an kalikare?

⁹ Wanjoñok eo an Jesus kin sparrow ko ej kalikar men in: Men eo ejelok tokjen ibben armij eaorõk ibben Anij. Jesus ear kalikar lok mol in ilo an kobaik nan ko bwe juõn sparrow ejamin “wutlok ion brij” im Jehovah ejjab lale.c Alikar, elañe Jehovah Anij ej lale bao eo ediktata im dik tokjen, enaj laplok an itoklimo kin men ko rej walok ñan juõn armij eo ej karejar ñan e!

10. Ta aorõkin nan kein: “A emwij bwini kolan bõrõmi otemjelok”?

¹⁰ Ijellokin wanjoñok eo an kin sparrow ko, Jesus ear ba: “A emwij bwini kolan bõrõmi otemjelok.” (Matu 10:30) Nan kein rej kalikarlok melele eo kin wanjoñok eo an Jesus kin sparrow ko. Lemnak: Bõran juõn armij ewõr 100,000 wũd in kol ko ie. Ejelok juõn kol eaorõklok jen ko jet . Ak Jehovah Anij ej lali im bwini kajjojo iair. Kin men in, ejelok juõn men ilo mour ko ad Jehovah ejaje kake. Jehovah e jelã kin kadkad ko kadkadin ri karejar ro an kajjojo. Emol, ej “lale buruen.”—1 Samuel 16:7.

11. Ewi wãwen David ear kwalok an liki bwe Jehovah ej itoklimo kake?

¹¹ David, eo ear iion elõñ abañ ko, ear liki bwe Jehovah ej lale e. “O Jeova, kw’ar kalimjek iõ im jela iõ,” ear je. “Kwo jela aõ jijõt im aõ jutõk: Kwo jela aõ lemnok jen etolok.” (Sam Ko 139:1, 2) Kwomaroñ bareinwõt liki bwe Jehovah e jelã kin yuk. (Jeremiah 17:10) Kwon jab mõkaj im bõk lemnak in bwe elap an jettokjen ñan an Jehovah lale yuk!

“Kwoj Likit Dren in Kemjalal ko Aõ ilo Boto eo Am”

12. Ewi wãwen jej jelã bwe Jehovah ej lo abañ ko armij ro an rej eñtan kaki?

¹² Jehovah e jelã kin ri karejar ro an kajjojo im abañ ko rej eñtan kaki. Ñan wanjoñok, ke rar kaeñtan Ri Israel ro einwõt ri kamakoko, Jehovah ear ba ñan Moses: “Emol I ar lo iñtan an ro droõ rej ber i Ijipt, im I ar roñjake air lamij kin ro rej kejerbal ir; bwe I jela buromõj ko air.” (Exodus 3:7) Elap an kainemõn kij ñan jelã bwe ñe jej bed ilo juõn melejoñ ak eñtan, Jehovah ej lo ta eo ej walok im ej roñ ñe jej lamõj ñan e!

13. Ta eo ej kamol bwe ewõr an Jehovah eñjake kin ro ri karejaran?

¹³ Kejbãrok eo an Jehovah kin armij ro rej bed ilo juõn kõtan emõn ibben ej bareinwõt alikar ilo eñjake ko an ñan Ri Israel ro. Meñe eñtan ko air ekkã air kar walok jen bõt, Isaiah ear je ikijen Jehovah: “Ilo aolepen air jorran ar kejorran E.” (Aiseia 63:9) Inem, einwõt juõn ri karejaran Jehovah etiljek, kwomaroñ liki bwe ñe kwoj eñtan, Jehovah ej eñjake eñtan ko am. Men in en kar kamakit yuk ñan jelmaik abañ ko am ilo beran im wõnmanlok im karejar ñan e joñan wõt am maroñ.—1 Piter 5:6, 7.

14. Kar ta wãwen ko ke kar kine Sam 56?

¹⁴ Tõmak eo an King David bwe Jehovah ear kea kake im eñjake eñtan ko an ej alikar ilo Sam 56, me David ear kine ke ear ko jen King Saul. David ear ko ñan Gath, ak ear mijak kinke Ri Philistine ro remaroñ kar kile im jibwe. Ear je: “Ro rej kijirãt iõ re kõnan wõrõñõlok iõ aolepen ran; bwe relõñ rej jua im iri nae iõ.” Kinke ear bed ilo kauwatata, David ear reilok ñan Jehovah. “Iomin aolepen ran rej kankeke nan ko aõ,” ear ba. “Lemnok ko air otemjej re nae iõ kin nana.”—Sam Ko 56:2, 5.

15. (a) Ta melelen an kar David kajitõk ibben Jehovah bwe en kejbãrok den in kemjalal ko an ilo juõn boto ak jei ilo juõn book? (b) Ñe jej kijenmij kin juõn melejoñ kin tõmak eo ad, ta eo jemaroñ liki ?

¹⁵ Inem, ke ear je Sam 56:8, David ear kwalok nan kein rekaitoktoklimo: “Kwoj bwini jebwãbwe ko aõ, Kwoj likit dren in kemjalal ko aõ ilo boto eo Am; re jab ilo buk ne Am ke?” Nan kein elap air kwalok kin kejbãrok eo an Jehovah! Ñe jej bed iumin abañ ko, jemaroñ lamõj ñan Jehovah ilo an toor den in kemjalal . Armij eo ewãppen Jesus ear bareinwõt kõmman eindein. (Dri Hibru 5:7) David ear tõmak bwe Jehovah ear kalimjek e im ear kememej eñtan ko an, einwõt ñe ear kejbãrok den in kemjalal ko an ilo juõn boto ak ear jei ilo juõn book.d Bõlen kwoj lemnak bwe den in kemjalal ko am renaj kar kabool juõn boto ak elõñ page ko ilo juõn book. Elañe eindein, kwomaroñ bõk kainemõn kinke Bible eo ej ba ñan kij: “Jeova ej ebak ñõn ro erup burueir, im Ej lomoren ro retã wõt ilo air.”—Sam Ko 34:18.

Erom juõn Jeran Ebake Anij

16, 17. (a) Ewi wãwen jej jelã bwe Jehovah ej kea kin abañ ko armij ro an rej iioni? (b) Ta eo Jehovah ear kõmmane ñan kõtlok bwe armij ro ren erom ro rebake?

¹⁶ Kin an Jehovah bwine ‘kolan bõrad’ men in ej jibañ kij ñan melele bwe jej kabuñ ñan juõn Anij eo ej lale im kea kin kij. Meñe jej aikwij kõttar mae lal eo ekãl kar kallimur kake ñan lo an jako metak im eñtan ko, kiõ Jehovah ej kõmmane juõn men ekabwilõñlõñ ñan armij ro an. David ear je: “Bebe etino an Jeova iben ro rej mijõk E, im E naj kwalok ñõn ir bujen eo An.”—Sam Ko 25:14.

¹⁷ Ebin ad melele kin ewi wãwen armij ro rejjab wãppen remaroñ erom juõn jeran ebak ñan Jehovah ak jelã “bebe etino eo an.” Ak, Jehovah ej kirtok ro rej mijak e bwe ren bed ilo em nuknuk eo an. (Sam Ko 15:1-5) Im ta eo Jehovah ej kõmmane ñan ro ear kirtok ir? Ej kõmman bwe ren jelã bujen eo an, ekkar ñan David. Jehovah ej kwalok men ko rittino einwõt “karõk eo an” ñan ri kanan ro, bwe ren jelã ta eo rej aikwij kõmmane ñan mour ekkar ñane.—Amos 3:7.

18. Ewi wãwen jej jelã bwe Jehovah ekõnan bwe jen ejaak juõn kõtan ebak ñan e?

¹⁸ Emol, ekamãnãn buru ñan jelã bwe kij armij ro jej jab wãppen jemaroñ erom ro jeran rebake Eo Eutiejtata, Jehovah Anij. Ilo mol, ej rejañ kij ñan ad kõmmane. “Komin druaklok ñõn Anij, im E naj druakwoj ñõn kom,” Bible eo ej ba. (Jemes 4:8) Jehovah ekõnan bwe jen ejaak juõn kõtan ebake e. Ilo mol, ededelok an bõk buñten nee ko mokta bwe en maroñ wõr juõn kõtan rot in. Katok in binmour eo an Jesus ear kabellok juõn ial ñan ad maroñ ejaak juõn jimjera ibben Anij Ekajur Bõtata. Bible eo ej ba: “Jej yokwe bwe E ar yokwe kij mokta.”—1 Jon 4:19.

19. Ewi wãwen kijenmij ej kakajur kõtan eo ad ibben Jehovah?

¹⁹ Kõtan in ebak ej kajurlok ñe jej kijenmij iumin abañ ko. Ri kalor eo James ear je: “A en wãppen an kijenmij jerbal, bwe komin wãppen wõt im eyu im enjelok ami aikwij.” (Jemes 1:4) “Jerbal” et eo naj kõtõbrake ilo ad kijenmij kin abañ ko? Kememej “kãliklik ilo kõniek” eo an Paul. Kijenmij eo an, ta eo ear kõtõbrake? Paul ear ba kin melejoñ ko an: “Inem I naj kanuij mõnõnõ in kimjãje kin mõjino ko aõ, bwe kajur an Anij en ber ioõ. Inem ebuñburuõ ilo mõjino ko, ilo jorran ko, ilo aikwij ko, ilo matõrtõr ko, ilo iñtan ko kin Kraist: bwe ñe I mõjino, inem I kajur.” (2 Dri Korint 12:9, 10) Paul ear lo bwe Jehovah enaj kar lelok kajur eo ak “maroñ eo e kanuij lap” elañe ear juõn men in aikwij—bwe en maroñ kijenmij. Men in ear kõmman bwe en ebak ñan Christ im ñan Jehovah Anij.—2 Dri Korint 4:7; Dri Pilippai 4:11-13.

20. Ewi wãwen jej jelã bwe Jehovah enaj rejetak im kainemõn kij ñe jej jelmae melejoñ ko?

²⁰ Bõlen Jehovah ear kõtlok bwe melejoñ ko am ren wõnmanlok wõt. Elañe eindein, kememej kallimur eo an ñan ro rej mijak e: “I jamin likit yuk, im I jamin illok jen kwe in drio.” (Dri Hibru 13:5) Kwomaroñ lo rejetak im kainemõn rot in. Jehovah emwij an “bwini kolan bõrõmi.” Ej lo am kijenmij. Ej eñjake eñtan ko am. Emol an kea kake yuk. Im ejamin “meloklok ami jerbal im yokwe, eo kom ar kwalok kin etan.”​—Dri Hibru 6:10.

[Kamelele ko itulal]

Kwoj Kememej Ke?

• Ta men ko remaroñ kõmman bwe juõn armij en eñjake bwe Anij ear ilok jen e?

• Ta eo jemaroñ katak jen wanjoñok ko an Jesus kin sparrow ko im kin an Anij bwini kolan bõrad?

• Ta melelen an Jehovah likit den in kemjalal ko an juõn armij ilo “boto” eo an ak jei ilo “book” eo an?

• Ewi wãwen jemaroñ erom juõn jeran ebake Jehovah ak jelã “bebe etino eo an”?

[Pija eo ilo peij 19]

Ta eo jemaroñ katak jen wanjoñok eo an Jesus kin sparrow ko?

[Credit Line]

© J. Heidecker/VIREO

[Pija eo ilo peij 20]

Etke Jehovah ear jab jolok ‘kãliklik eo ilo kõniekin’ Paul?

[Pija eo ilo peij 21]

Ilo ad ekkeini ad read Bible, jenaj lo bwe emol an Anij kea kake kij kajjojo