Kejatdikdik Kin Jerkakbiji​—Ta Melelen Ñan Yuk?

“Kwoj erlokwe peiõm im kamat air kõnan ñõn men otemjej remour.” —SAM 145:16.

1-3. Ta kejatdikdik eo an jet kin ilju im jeklaj? Kwalok juõn wanjoñok.

CHRISTOPHER eo im ej ratimjuõn yiõ dettan Christopher im leo jein, rar jolok juõn jibboñ, ibben uncle, aunt, im ruo cousin, ilo jerbal in kwalok nan jen em ñan em ilo jikin eo ebak ñan Manchester, England. Awake! magazine eo ej kamelele kin ta eo ear walok. “Ilo elikin raelep, rar ilok ilo ial eo air lok ñan Blackpool, ñan air aluij juõn jikin ikkure ebake lojet. Ereñ 6 rar ibwiljin armij ro 12 rar mij ilo juõn lanwõtwõt ilo ial, eo me policeman ro rej kwalok kake einwõt ‘juõn jorrãn elap ijo elõñ rar mij.’”

² Boñin eo mokta jen jorrãn eo, family eo ear bed ilo Congregation Book Study eo, im rar katak kin mij. “Christopher ear juõn ladik ejelã kalmenlokjen,” jemen ear ba. “Ilo boñin eo, ear konono ilo alikar kin lal eo ekãl im kejatdikdik eo an kin ilju im jeklaj. Inem, ke bwebwenato eo am ear wõnmanlok, Christopher ear ba ilo idiñ: ‘Tokjen eo kin ad juõn ian Ri Kennan ro an Jehovah ej eñin bwe meñe mij ej kõmetak kij, jej jelã bwe juõn ien jenaj bar lo don ijin ion lal.’ Ejelok juõn ilo ien eo ear jelã ak kile joñan naj aorõkin nan kein.”a

³ Elõñ yiõ ko mokta, ilo 1940, juõn Ri Kennan ilo Austria etan Franz ear jelã bwe renaj mõn e ilo air jebbare kinke ej kõnan tiljek ñan Jehovah. Franz ear jeje ñan jinen jen juõn jikin kalbuj ilo Berlin: “Ekkar ñan jelãlokjen eo aõ, elañe iar bõk kallimur [in tarinae] eo, inaj kar kõmman juõn jerawiwi ej tellokin mij. Men in ejamin naj kar emõn ñan iõ. Enaj kar ejelok aõ kejatdikdik in jerkakbiji. . . . Im kiõ, Jinõ im aolep ro jeiõ im jatiõ, rar jiroñ iõ rainin kin ekajet eo aõ, im kwon jab mijak, ej mij, im renaj mõn iõ ilju jibboñ. Ij bõk aõ kajur jen Anij, einwõt an eindein ibben aolep Ri Christian ro remol jen ien ko remotlok. . . . Elañe komij jutak bin ñan mij, jenaj bar iion don ilo jerkakbiji eo. . . . Mae ien en jenaj bar iion don.”b

4. Bwebwenato kein rej jelet yuk ilo wãwen et, im ta eo jenaj etale ilo katak in tok juõn?

⁴ Kejatdikdik kin jerkakbiji elap an kar aorõk ñan Christopher im Franz jimor. Ear mol ñan ir. Bwebwenato kein elap air jelet buruõd! Ñan kamũlallok kamolol eo ad ñan Jehovah im kakajurlok kejatdikdik eo ad kin jerkakbiji eo, jen etale kin etke enaj walok jerkakbiji eo im ewi wãwen men in en kar jelet kij.

Vision kin Jerkakbiji eo Ion Lal

5, 6. Ta vision eo ri jilek John ear je ilo Reveles̃õn 20:​12, 13 ej kwalok kake?

⁵ Ilo juõn vision kin men ko renaj walok ilo Juõn Thousand Yiõ in Iroij eo an Christ Jesus, ri jilek John ear lo an walok jerkakbiji eo ion lal. “Im I ar lo ro remij, ro relap im ro redrik,” ear ba. “Im lometo e ar lelok ro remij ro ilo e, im Mij im Hedis r’ar lelok ro remij ro ilo ir.” (Reveles̃õn 20:​12, 13) Jekdon ewi joñan utiejiir​—elañe “ro relap” ak “ro redrik”⁠—aolep ro ilo Hades (Sheol), lũp eo lũpen armij, renaj diojtok. Ro rar mij ilo lometo renaj bareinwõt mour ilo ien eo. Men in kabwilõñlõñ in me enaj walok ej mõttan karõk eo an Jehovah.

⁶ Iroij eo an Christ iumin juõn thousand yiõ enaj ijjino ñe enaj liãbe Satan im likit e ilo abyss eo. Iumin iroij eo an ejelok juõn ian ro renaj jerkakbiji ak ro rej deod jen eñtan eo elap enaj jebwãbwe ibben Satan, bwe ejamin naj maroñ makitkit. (Reveles̃õn 20:​1-3) Juõn thousand yiõ emaroñ einwõt juõn ien eaetok ñan yuk, ak ilo mol, Jehovah ej watõke “einwõt juõn ran.”​—2 Piter 3:⁠8.

7. Ta eo enaj bedbed in ekajet eo ilo Juõn Thousand Yiõ in Iroij eo an Christ?

⁷ Ekkar ñan vision eo, Juõn Thousand Yiõ in Iroij eo an Christ enaj juõn ien ekajet. Ri jilek John ear je: “I ar lo ro remij, ro relap im ro redrik rej jutõk iman tron eo; im ar kebellok buk ko: im ar kebellok bar juõn buk, eo ej buk in mour: im ar ekajet ro remij jen men ko emwij jeje ilo buk ko, ekar ñõn jerbal ko air. . . . Im ar ekajete ir, kaju iair, ekar ñõn jerbal ko air.” (Reveles̃õn 20:​12, 13) Lale bwe bedbed in ekajet in ejjab atartar ion ta eo armij eo ear kõmmane ak jab kõmmane mokta jen an kar mij. (Dri Rom 6:⁠7) Jen an eindein, ej wawa ion “buk ko” me enaj kabelloki ilo ran ko renaj itok. Men ko juõn armij ej kõmmani elikin an katak jen kobban buk kein naj bedbed in bebe eo elañe renaj je etan ilo “buk in mour.”

“Jerkakbiji in Mour” ak “Jerkakbiji in Ekajet”

8. Ta naj jemlok ko ruo ñan ro renaj jerkakbiji?

⁸ Mokta ilo vision eo an John, ej kwalok kin Jesus bwe ibben “ki ko ki in mij im ki an Hedis.” (Reveles̃õn 1:​18) Ej jerbal einwõt “Iroij in mour” eo an Jehovah, eo kar kamaroñ e ñan ekajete “ro remour im ro remij.” (Jerbal 3:​15; 2 Timote 4:⁠1) Ewi wãwen enaj kõmmane men in? Ilo an kajerkakbiji ro rej kiki ilo mij. “Komin jab bwilõñ kin men in,” Jesus ear ba ñan jar eo ear kwalok nan ñan ir, “bwe auõ ej itok, ilo eo ro otemjej rej ber ilo lũp ko, re naj roñ ainiken, im drioijtok.” Inem ear kobaik: “Ro rar kõmõn emõn, ñõn jerkakbiji in mour: im ro r’ar kõmõnmõn nana, ñõn jerkakbiji in ekajet.” (Jon 5:​28-​30) Inem, ilju et eo ej kõttar maan im kõrã ro retiljek jen ien ko etto?

9. (a) Ñe rej jerkakbiji, ta men ko elõñ renaj katak kaki? (b) Ta jerbal in katakin eo enaj walok?

⁹ Ñe rein retiljek jen ien ko etto rej jerkakbiji, renaj lo bwe kallimur ko rar liki emwij air jejjet kitieir. Enaj lap air itoklimo in jelã wõn Inen kõrã eo an Anij, me ej konono kake ilo kanan eo mokta ilo Bible, ilo Jenesis 3:​15! Enaj lap air mõnõnõ in jelã bwe Messiah in kar kallimur kake, Jesus, ear tiljek ñan mij, im ilo wãwen in lelok an mour einwõt katok in binmour eo! (Matu 20:28) Ro rej karuwaineneiktok ro rej jerkakbiji renaj lo elap lañliñ ilo air jibañ ir melele bwe katok in binmour in ej juõn wãwen Jehovah ej kwalok joij im tiriamokake eo an. Ñe ro rej jerkakbiji rej lo ta ko Ailiñ in Anij ej kõtõbraki ñan kajejjet kitien karõk eo an Jehovah kin lal in, ejelok bere bwe burueir enaj obrak kin nan in nebar ko ñan Jehovah. Enaj wõr ien ko remõn ñan air kwalok tiljek eo air ñan Jemeir ilañ eo ej yokwe im ñan Nejin. Aolep ro rej mour renaj mõnõnõ in bõk kunair ilo jerbal eo elap ñan katakin elõñ billion ro renaj jerkakbiji, ro me rej bareinwõt aikwij bõk men in letok eo an Anij kin binmour eo.

10, 11. (a) Ta ien ko remõn Juõn Thousand Yiõ eo enaj letok ñan aolep ro ion lal? (b) Ewi wãwen men in en jelet kij?

¹⁰ Ñe Abraham enaj jerkakbiji, enaj lo elap mõnõnõ ilo an lo im mour iumin iroij eo an “jikin kwelok” eo me ear reimanlok ñane. (Dri Hibru 11:10) Job eo etiljek enaj lukkun mõnõnõ ñe ej jelã bwe wãwen mour eo an ear kakajurlok ri karejar ro jet an Jehovah me rar jelmae melejoñ ko kin tõmak eo air! Im Daniel enaj kõnan jelã kin jejjet in kitien kanan ko kar kamakit e ñan an jeje kaki!

¹¹ Emol, aolep ro rej bõk mour ilo lal eo ekãl im wãnik, ilo air jerkakbiji ak ikijen air deod jen eñtan eo elap, enaj lap air aikwij katak kin karõk eo an Jehovah kin lal in im ro rej jokwe ion. Kejatdikdik eo ñan mour indio im ñan nebar Jehovah ñan indio enaj kõmman bwe program in katak eo iumin Juõn Thousand Yiõ eo en lap an kamõnõnõ. Bõtab, men eo kij kajjojo jej kõmmane ke jej katak jen kobban booklemlem ko ej men eo elaptata an aorõk. Jenaj ke jerbale men eo jej katak? Jenaj ke kalmenlokjen im bõk ñan buruõd melele eo eaorõk me enaj kakajur kij ñan jumae kate eo eliktata an Satan ñan kajebwãbweik kij jen mol eo?

12. Ta eo enaj jibañ ro kajjojo ñan air bõk kunair joñan wõt air maroñ ilo jerbal in katakin eo im ñan ukõt lal in ñan juõn paradise?

¹² Jen jab meloklok kin jerammõn ko raibujuij me renaj walok ilo ad jerbale tokjen katok in binmour eo an Christ. Ro renaj bar mour ilo jerkakbiji eo rejamin eñtan kin nañinmij ko ak jorrãn ko ilo enbwiniir me rej iioni kiõ. (Aiseia 33:24) Juõn enbwin emõn im kejatdikdik eo kin ejmour ewãppen enaj kamaroñ aolep ro rej jokwe ilo lal eo ekãl ñan air bõk kunair ilo jerbal eo ñan katakin billion ro renaj jerkakbiji ñan air etetal ilo ial in mour. Armij rein renaj bareinwõt bõk kunair ilo jerbal eo elaptata kar kajeoñ in kõmmane ion lal​—jerbal eo ñan ukõt aolepen lal in ñan juõn paradise ñan aibujuij eo an Jehovah.

13, 14. Ta unin naj kõtlok Satan ilo melejoñ eo eliktata, im ta eo emaroñ jemlok eo ñan kij kajjojo?

¹³ Ñe naj kõtlok Satan jen abyss eo ñan an bõktok melejoñ eo eliktata, Satan enaj bar kajeoñ in kajebwãbweik armij. Ekkar ñan Reveles̃õn 20:​7-9, aolep ‘dri ailiñ ko kar mone ir,’ ak kumi in armij ro, me rej reel ibben kilan eo enana an Satan naj tellokin air bõk ekajet eo indio: ‘Kijeek enaj wanlaltak jen lañ im kañ ir.’ Ñan ro ibwiljiir me rar jerkakbiji iloan Juõn Thousand Yiõ eo, jorrãn in ej melelen bwe rar bõk juõn jerkakbiji in ekajet. Ak ijo tu-rãjet, ro retiljek rej jerkakbiji renaj bõk men in letok eo kin mour indio. Emol, jerkakbiji eo air naj juõn “jerkakbiji in mour.”​—Jon 5:​29.

¹⁴ Ewi wãwen kejatdikdik eo kin jerkakbiji ej kainemõn kij kiõ? Elaplok an aorõk, ta eo jej aikwij kõmmane ñan bõk tokjen ko ilo ran ko renaj itok?

Men ko Jemaroñ Katak Kiõ

15. Ewi wãwen tõmak ilo jerkakbiji eo emaroñ jibañ kij kiõ?

¹⁵ Bõlen ejjab to jen ien eo kwar luji juõn eo ejitenburu ibbam ilo mij im kwoj kate wõt yuk kin oktak eo elap ear walok. Kejatdikdik eo kin jerkakbiji ej jibañ yuk bwe en wõr am ainemõn im kajur iloa eo ejelok ibben ro rejaje mol. “A kim jab kõnan, ro jãtim, bwe komin jaje kin ro rej kiki,” Paul ear kainemõn ro ilo Tessalonika, “bwe komin jab buromõj einwõt ro jet, ro ejelok kejatrikrik ibeir.” (1 Dri Tessalonika 4:⁠13) Kwoj pijaik yuk ke ilo lal eo ekãl, im kwoj lo an walok jerkakbiji eo? Elañe eindein, inem kwon bõk kainemõn kiõ ilo am kalmenlokjen kin kejatdikdik eo ñan am bar lo ro rejitenburu ibbam.

16. Ta naj eñjake ko am ñe enaj walok jerkakbiji eo?

¹⁶ Kwomaroñ eñtan kiõ kin tokjen jumae eo an Adam, bõlen ilo am bõk juõn nañinmij elap. Kwon jab kõtlok bwe buromõj en kõmman bwe kwon meloklok kin kejatdikdik eo ekalañliñ ñan am maroñ jerkakbiji im bar mour ilo ejmour im kajur ilo lal eo ekãl. Inem ñe kwoj kabellok mejõm im lo ro rej lañliñ kin jerkakbiji eo am, kwonaj kamolol Anij kin joij im yokwe eo an.

17, 18. Ta katak ko ruo jej aikwij bõk ñan buruõd?

¹⁷ Ilo kõtan ien in, lemnak kin ruo katak ko jej aikwij bõk ñan buruõd. Juõn ej aorõkin ad jerbal ñan Jehovah kin aolepen buruõd kiõ. Ilo ad kajeoñe Master eo ad, Christ Jesus, mour in karmijeteik kõnan ko ad make ej kalikar yokwe eo ad ñan Jehovah im ro ri turid. Elañe jumae ak matõrtõr ej kautameik wãwen ad kabwe aikwij ko an family eo ad ak ej bõk anemkwoj eo ad, jej bebe ñan ad jutak bin wõt ilo tõmak jekdon ta melejoñ ko jej jelmaiki. Elañe ri jumae ro rej ba bwe renaj mõn kij, inem kejatdikdik eo kin jerkakbiji ej kainemõn im kakajur kij ñan ad tiljek wõt ñan Jehovah im Ailiñ eo an. Aet, kijejeto eo ad kin jerbal in kwalok nan kin Ailiñ eo im kõmman ri kalor ro ej letok ñan kij kejatdikdik eo kin jerammõn ko indio me Jehovah ej keboji ñan ro rewãnik.

¹⁸ Katak eo kein karuo ej ikijen wãwen eo jej jelmaik men in kabo ko rej walok kin jab wãppen eo ad. Jelãlokjen eo ad kin kejatdikdik eo kin jerkakbiji im kamolol eo ad kin joij eo an Jehovah ej kakajur lok bebe eo ad ñan jutak bin wõt. “Komin jab yokwe lõl ak men ko ilo lõl,” ri jilek John ear kakkõl. “Elañe jabrewõt armij ej yokwe lõl, yokwe Jemer e jab ilo e. Bwe men ko otemjej ilo lõl, mõm an kõniek, mõm an mej ko, im wuj wan an mour in, re jab an Jemer a rej an lõl. Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:​15-​17) Men in kareelel ko an lal in ikijen arõk mweiuk enaj ejelok tokjeir ñan kij ñe jej keidi ibben “mour eo emol.” (1 Timote 6:​17-​19) Elañe jej iion men in kabo eo ñan kõmman lũñ, jenaj bin wõt im jumaiki. Jej kile bwe elañe jej mij mokta jen Armageddon, ak jej wõnmanlok wõt ilo juõn ial eo Jehovah ejjab buñburuen kake men in ej kõmman bwe jen einwõt ro ejelok air kejatdikdik kin jerkakbiji.

19. Ta jerammõn eo elap jej aikwij kememej wõt?

¹⁹ Ilõñin men otemjej, jen jab meloklok kin jerammõn eo elap me ej bed ibbed ñan kalañliñ buruen Jehovah kiõ im indio. (Jabõn Kennan Ko 27:11) Tiljek eo ad ñan mij ak ñan jemlokin jukjuk im bed in ej kwalok ñan Jehovah bwe jej jutak ibben ikijen aitwerõk eo kin iroij bõtata eo an. Inem enaj juõn men in kalañliñ elap ñan mour ilo Paradise eo ion lal ikijen ad deod jen eñtan eo elap ak ilo ad iion men in bwilõñ eo kin jerkakbiji!

Kamat Kõnan ko Ad

20, 21. Ta eo enaj jibañ kij ñan tiljek wõt meñe ewõr kajitõk ko ejañin wõr uakiir kin jerkakbiji eo? Kamelele.

²⁰ Bwebwenato eo ad kin jerkakbiji ear jab uake aolep kajitõk ko ad. Ewi wãwen Jehovah enaj karõk men ko ñan ro rar belele ke rar mij? (Luk 20:​34, 35) Jerkakbiji eo enaj walok ke ilo jikin ko armij ro rar mij ie? Armij ro renaj ke jerkakbiji ebak ñan jikin eo ro uan family ko air rej jokwe ie? Elõñ kajitõk ko jet kin jerkakbiji eo rejañin uak. Bõtab, jej kememej nan ko an Jeremiah: “Jehovah ej kwalok an emõn ñan eo ej liki e, ñan armij eo ej bukõt wõt e. Emõn bwe armij eo en kõttar wõt, meñe ilo ikõñ, kin lomor eo an Jehovah.” (Lamentations 3:​25, 26, NW) Ilo ien eo ejejjet, Jehovah enaj uak aolep kajitõk ko ad. Etke jemaroñ liki men in?

²¹ Lemnak kin nan in kakõrmol ko an ri jeje sam ke ear al kin Jehovah: “Kwoj erlokwe peiõm im kamat air kõnan ñõn men otemjej remour.” (Sam 145:⁠16) Ke jej rittolok, kõnan ko ad rej oktak. Men eo jaar kejatdikdik kake ke jaar ajiri jejjab kõnan kiõ. Men eo jej iione im bareinwõt kejatdikdik ko ad rej jelet lemnak eo ad kin mour. Mekarta, jabdewõt kõnan ko ad rekkar renaj walok ilo lal eo ekãl, Jehovah enaj kajejjeti.

22. Etke ewõr ibbed un eo emõn ñan ad nebar Jehovah?

²² Men eo elaptata kiõ ej bwe jen tiljek. “Rej kajitõkin dri kõmñe, bwe ren lo an armij tiljek.” (1 Dri Korint 4:⁠2) Kij jej ri karejar ro kin news eo emõn im aibujuij kin Ailiñ in Anij. Ilo ad tiljek in keañ kin news in emõn ñan jabdewõt armij jej iion ir, men in enaj jibañ kij ñan bedwõt ilo ial eo ej tellok ñan mour. Kememej bwe “ien im men in walok” rej itok ñan kij aolep. (Ekklisiastis 9:​11) Ñan kadiklok jabdewõt inebata ko rej walok jen men ko jejaje kaki ilo mour, debij kejatdikdik eo eaibujuij kin jerkakbiji. Kwon jelã bwe elañe kwonaj mij mokta jen an naj jino Juõn Thousand Yiõ in Iroij eo an Christ, kwomaroñ liki bwe jibañ eo enaj itok. Ilo ien eo ejejjet an Jehovah kwonaj maroñ elij nan ko an Job ñan Ri Kõmanman eo: “Kwo naj kir im I naj uak Yuk.” Jen nebar Jehovah, eo ekõnan kajerkakbiji ro rej bed ilo lemnak eo an!​—Job 14:⁠15.

[Kamelele ko itulal]

Kwoj Kememej ke?

• Ion bedbed et eo naj ekajete armij ro ilo Juõn Thousand Yiõ eo?

• Etke jet renaj bõk “jerkakbiji in mour” im ro jet “jerkakbiji in ekajet”?

• Ewi wãwen kejatdikdik in jerkakbiji eo emaroñ kainemõn kij kiõ?

• Ewi wãwen nan ko ilo Sam 145:16 rej jibañ kij ñan kijenmij kin kajitõk ko ejañin wõr uakiir kin jerkakbiji eo?

[Pija ko ilo peij 19]

Ewi wãwen tõmak ilo jerkakbiji eo emaroñ jibañ kij kiõ?