Kien Yokwe Ilo Buruen Armij

“Inaj likit kien ko aõ ilo lemnak ko air im jei ilo burueir.”​—JEREMIAH 31:33.

1, 2. (a) Ta eo jenaj lale kiõ? (b) Ewi wãwen Jehovah ear kwalok emake ion Tol Sainai?

ILO KATAK ko ruo lok iman, jaar katak bwe ke Moses ear wanlaltak jen Tol Sinai, turin mejen ear romak meram kin aibujuij eo an Jehovah. Bareinwõt, jaar bwebwenato kin veil ak kein kalibubu eo Moses ear kajerbale. Kiõ jen bwebwenato kin bar juõn men me ewõr melelen ñan Ri Christian ro ilo ran kein.

² Ke Moses ear bed ion tol eo, ear bõk nan in jiroñ ko jen Jehovah. Ke rar kweloklok ibben don iturin Tol Sinai, Ri Israel ro rar lo juõn wãwen ekabwilõñlõñ ke Anij ear kwalok emake. “Eor jorur im jarõm ko, im kõro e mijil ion tol eo, im ainiken jilil e kanuij lap; im armij otemjej ilo kamp eo rar wuririr. . . . Im aolepen tol Sainai e ar kanuij batat, bwe Jeova e ar wõnlõltok ion ilo kijeek; im batin e ar wõnliñlok einwõt bat in ubaj, im aolepen tol eo e ar kanuij bañijñij.”​—Exodus 19:16-18.

3. Jehovah ear kajerbal wõn ñan lelok Kien ko Joñoul ñan Israel, im ta eo Israel ear melele kake?

³ Jehovah ear kajerbal juõn enjel ñan konono im lelok Kien ko Joñoul ñan ir. (Exodus 20:1-17) Inem, ejelok bere bwe kien kein rar itok jen Anij eo Eutiejtata. Jehovah ear jei kien kein ion dekã​—dekã ko me Moses ear rupi ke ear lo an Ri Israel ro kabuñ ñan juõn kon in cow gold. Jehovah ear bar jei kien ko an ion dekã ko. Ilo ien in, ke Moses ear bõklaltak dekã ko jen tol eo, meram ear romak jen turin mejen. Ilo ien eo, aolep armij ro rar melele bwe kien kein rar lukkun aorõk.​—Exodus 32:15-19; 34:1, 4, 29, 30.

4. Etke Kien ko Joñoul rar aorõk?

⁴ Dekã ko ruo me Anij ear jei Kien ko Joñoul ioir rar likiti iloan tebteb in kallimur eo im likiti ilo jikin Kwojarjar Otem Kwojarjar ilo imõn kabbed eo im tokelik ilo temple eo. Kien ko rar bedbedin bujen Kien eo Anij ear lelok ñan Moses im rar bedbedin kien ko ailiñ in Israel ear bõk jen Anij ñan tel ir. Rar kamol bwe Jehovah ear bed ibben armij ro an.

5. Ilo wãwen et ko kien ko an Anij rar kwalok bwe ear yokwe Israel?

⁵ Kien kein rar kalikar elõñ men ko kin Jehovah, elaptata kin yokwe eo an ñan armij ro an. Men in ear juõn men in letok eaorõk ñan ro rar lori! Juõn ri meletlet ear je: “Ejelok bar juõn book in kien armij rar je mokta ak elikin . . . emaroñ joñan wõt ak laplok an aorõk jen kien kein joñoul an Anij.” Ikijen Kien ko Anij ear lelok ñan Moses, Jehovah ear ba: “Kin men in, kiõ, elañe komij eoroñ ainikiõ im kejbãrok bujen eo Aõ, inem kom naj Aõ mweiuk e aurõk, jen ailiñ ko otemjej: bwe aolepen lõl, Aõ: im kom naj ñõn Iõ juõn ailiñ in pris ro, im ailiñ e kwojarjar. Nan kein nan ko kwo naj konono ñõn ro nejin Israel.”​—Exodus 19:5, 6.

Juõn Kien Emwij Jei ilo Buruen Armij

6. Ta kien eo ear laplok an aorõk jen kien ko kar jei ion dekã?

⁶ Aet, kien kein an Anij rar lukkun aorõk. Bõtab, kwo jelã ke bwe Christian ri kabit ro ewõr juõn men elaplok an aorõk jen kien ko emwij jei ion dekã? Jehovah ear kanan bwe enaj kar kõmman juõn bujen ekãl eo ear oktak jen bujen eo ear kõmmane ibben ailiñ in Israel eo mokta. “Inaj likit kien ko aõ ilo lemnak ko air im jei ilo burueir.” (Jeremiah 31:31-34) Jesus, Ri Kilajrak in bujen eo ekãl, ear jab lelok juõn kien ilo jeje ñan ri kalor ro an. Ikijen nan ko an im men ko ear kõmmani ear likit kien ko an Jehovah ilo lemnak im buruen ri kalor ro an.

7. Moktata, wõn eo ear bõk “kien Kraist,” im tokelik wõn ro rar kobalok ibbeir?

⁷ Kien in rar naetan “kien Kraist.” Kar lelok, jab ñan ailiñ in Israel eo mokta, ak ñan juõn ailiñ ilo jitõb, “Israel an Anij.” (Dri Galetia 6:2, 16; Dri Rom 2:28, 29) Israel eo an Anij ej Christian ri kabit ro. Tokelik, juõn “jar elap” jen ailiñ ko otemjej rar kobalok ibbeir ñan kabuñ ñan Jehovah. (Reveles̃õn 7:9, 10; Zechariah 8:23) Einwõt “juõn wõt bwij” iumin “juõn s̃eperd,” kumi kein ruo rej jimor bõk “kien Kraist,” im kõtlok bwe en tel ir ilo men otemjej rej kõmmane.​—Jon 10:16.

8. Kar ta oktak eo ikõtan Kien eo Anij ear lelok ñan Moses im kien Christ?

⁸ Ri Israel ro mokta rar lotak iumin Kien eo Anij ear lelok ñan Moses, inem rar aikwij bokaki. Ilo oktan, Ri Christian ro rej bed iumin kien Christ kinke rej kãlet in kõttãik ir ñan e, jekdon ta ailiñ eo air im ia eo rar lotak ie. Rej katak kin Jehovah im wãwen ko an im rekõnan kõmanman ankil an. Kinke kien Anij “emwij jeje ilo burueir,” Christian ri kabit ro rejjab bokake Anij kinke ej juõn men rej aikwij kõmmane ak kin air naj bõk kaje elañe rej kiblia. Unin an ri kabit rein bokake ej wawa ion juõn men elaplok im kajurlok, im armij ro jet naetair sheep ro jet rej bokake kien Anij kinke ear jeje kien kein ilo burueir bareinwõt.

Kien ko Rej Wawa ion Yokwe

9. Ewi wãwen Jesus ear kalikar bwe kien ko an Jehovah rar bedbed ion yokwe?

⁹ Juõn wõt nan ej kwalok kin ta melelen aolep kien ko an Jehovah: yokwe. Ej mõttan kabuñ eo emol jen ien ko mokta im ñan indio. Ke juõn armij ear kajitõk ibben Jesus kin ta kien eo elaptata ilo Kien eo Anij ear lelok ñan Moses, ear uak: “Kwon yokwe Iroij am Anij kin aolepen buruõm im kin aolepen am, im kin am lemnok otemjej.” Kien eo kein karuo kar: “Kwon yokwe dri turõm im einwõt kwe.” Inem ear ba: “Kien otemjej im dri kanan rej kejil ilo kien kein ruo.” (Matu 22:35-40) Inem Jesus ear kalikar bwe aolep Jeje ko ilo kajin Hibru, ekoba Kien eo Anij ear lelok ñan Moses im Kien ko Joñoul, rar bedbed ion yokwe.

10. Ewi wãwen ad jelã bwe kien Christ ej bedbed ion kadkadin yokwe?

¹⁰ Kien ko ilo buruen Ri Christian ro rej bedbed ke ion yokwe eo an Anij im ri turiir bareinwõt? Aet! Kien Christ ej kitibuj air yokwe Anij im ekoba juõn kien ekãl​—Ri Christian ro rej aikwij yokwe don. Rej aikwij kwalok yokwe einwõt an kar Jesus kõmmane, ear mõnõnõ in lelok mour eo an ñan lomoren ro jeran. Ear katakin ri kalor ro an bwe ren yokwe Anij im yokwe don, einwõt ear yokwe ir. Jej kile wõn Ri Christian ro remol ñe rej yokwe don, kadkad eo elaptata. (Jon 13:34, 35; 15:12, 13) Jesus ear kaiñi ir bwe ren yokwe ri kijirãt ro air bareinwõt.​—Matu 5:44.

11. Ewi wãwen an kar Jesus kwalok yokwe ñan Anij im armij?

¹¹ Jesus ear likit joñok eo emõn kin kwalok yokwe. Einwõt juõn enjel ekajur ilañ, ear mõnõnõ in bõk kunan ñan kalaplok men ko an Jemen ion lal. Ijellokin an lelok mour eo an bwe armij ro ren maroñ mour indio, ear kwalok kin wãwen an armij ro maroñ mour ilo jimwe. Ear ettã buru, joij, im mõnõnõ in kabwe aikwij ko an armij ro rar lukkun inebata im buromõj. Bareinwõt ear kate in lelok “nan ko nan in mour in drio,” ñan jibañ ro jet bwe ren jelã Jehovah.​—Jon 6:68.

12. Etke jemaroñ ba bwe yokwe Anij im yokwe ro ri turid rej ekkejel ibben dron?

¹² Emol, yokwe Anij im yokwe ro ri turid rej ekkejel ibben dron. Ri jilek Jon ear ba: “Yokwe e jen Anij . . . Elañe armij ej ba, Ña ij yokwe Anij, im ej kijirãte jein im jãtin, e dri riõp: bwe eo e jab yokwe jein im jãtin eo e ar lo e, ej ban yokwe Anij eo e ar jab loe.” (1 Jon 4:7, 20) Jehovah ej unjen yokwe im ej joñok eo emõntata ilo kwalok kadkadin yokwe. Men otemjej ej kõmmane rej wawa ion yokwe. Jej kwalok yokwe kinke emwij an kõmanman kij ilo yokwe. (Jenesis 1:27) Ñe jej yokwe ro ri turid, jej kamol yokwe eo ad ñan Anij.

Ñan Yokwe Ej Melelen Bokake

13. Elañe jekõnan yokwe Anij, ta eo jej aikwij kõmmane mokta?

¹³ Ewi wãwen ad maroñ yokwe Anij, eo jejjab maroñ loe? Buñten nee eo kein kajuõn im elap an aorõk ej bwe jen jelã kajjen. Jejjab maroñ yokwe juõn eo jejaje kajjen. Inem, Nan in Anij ej rejañ kij bwe jen jelã kajjen Anij ilo ad konono Bible, jar, im kobalok ibben ro rej jelã kajjen im yokwe e. (Sam Ko 1:1, 2; Dri Pilippai 4:6; Dri Hibru 10:25) Gospel ko emen elap an wõr tokjeir, kinke ke Jesus Christ ear mour im jerbal ion lal, ear kwalok kadkadin Jehovah ilo ial ko an otemjej. Kõnan eo ad ñan bokake Anij im kajeoñe kadkad ko kadkadin enaj laplok wõt elañe jej kalaplok ad jelã kin e im kamolol kin an kwalok yokwe ñan kij. Aet, yokwe Anij ej kitibuj ad bokake e.

14. Etke jemaroñ ba bwe kien ko an Anij rejjab eddo?

¹⁴ Ñe jej yokwe armij ro, jejelã kin ta men ko rekõnan im jab kõnan, im jej emmakit ekkar ñan jelã in. Jejjab kõnan kaburomõj ro jej yokwe ir. Ri jilek Jon ear je: “Bwe eñin yokwe Anij, bwe jen kejbãrok kien ko An: im kien ko An re jab erro.” (1 Jon 5:3) Rejjab eddo im lõñ. Yokwe ej tel kij. Jejjab aikwij kiili kien ko ñan tel kij ilo ial ko ad otemjej ; yokwe eo ad kin Anij ej tel kij. Elañe jej yokwe Anij, jej mõnõnõ in kõmanman ankil an. Inem jej kabuñburuen Anij, im jej bõk jerammõn ko. Tel eo an ej emõn ñan kij ien otemjej.​—Aiseia 48:17.

15. Ta eo enaj kamakit kij ñan kajeoñe Jehovah? Kamelele.

¹⁵ Yokwe Anij ej kamakit kij ñan kajeoñe kadkad ko kadkadin. Ñe jej yokwe juõn armij, jej mõnõnõ kin kadkad ko ej kwaloki im jekõnan bwe jen einwõt e. Lemnak kin kõtan eo ikõtan Jehovah im Jesus. Rar bed ibben don ilañ iumin elõñ billion yiõ ko. Ear lap air yokwe don. Nememen Jemen ear lukkun alikar ilo mour eo an Jesus eñin unin ear maroñ ba ñan ri kalor ro an: “Eo e ar lo Ña, e ar lo Jema.” (Jon 14:9) Ñe jej bõk jelãlokjen im kamolol kin Jehovah im Nejin, ej kamakit kij bwe jen kajeoñe ir. Yokwe eo ad kin Jehovah, im jibañ eo jen jitõb kwojarjar eo an, renaj kamaroñ kij ñan “wutik armij eo mokta kab jerbal ko an. Im [jen] kõnõk armij ekãl.”​—Dri Kolosse 3:9, 10; Dri Galetia 5:22, 23.

Jerbale Yokwe

16. Ewi wãwen jerbal in kwalok nan eo ad im katakin armij ej kalikar ad yokwe Anij im ro ri turid?

¹⁶ Einwõt Ri Christian ro, jej kõtlok bwe yokwe eo ad ñan Anij im ro ri turid en kamakit kij bwe jen bõk kunad ilo jerbal in kwalok nan kin Ailiñ eo im kõmman ri kalor ro. Ñe jej kõmman eindein, jej kabuñburuen Jehovah Anij, “Eo e kõnan lomoren armij otemjej, im bwe ren item jela mol.” (1 Timote 2:3, 4) Ilo wãwen in jej lo lañliñ ñe jej jibañ ro jet bwe kien Christ en bed ilo burueir. Im jej mõnõnõ ñe jej lo wãwen an kadkad ko kadkadiir oktak im kwalok kadkadin Jehovah. (2 Dri Korint 3:18) Emol, ñe jej jibañ ro jet ñan air jelã kajjen Anij ej men in letok eo eaorõktata jemaroñ lelok ñan ir. Ro rej bõk jimjera eo an Jehovah remaroñ bed ilo juõn kõtan emõn ibben ñan indio.

17. Etke ej juõn men in meletlet bwe jen kaddek yokwe eo ad kin Anij im ro ri turid im jab kin mweiuk ko?

¹⁷ Jej bed ilo juõn lal ej arõk mweiuk. Ak, mweiuk ko rejjab maroñ bedwõt ñan indio. Armij ro remaroñ kwoti ak remaroñ kõt. (Matu 6:19) Bible eo ej kakkõl kij: “Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:16, 17) Aet, Jehovah enaj bed ñan indio, im aolep ro rej yokwe im karejar ñan e bareinwõt. Inem emenin meletlet bwe jen kaddek yokwe eo ad kin Anij im armij im jab kin men ko an lal, kinke men kein renaj jako.

18. Ewi wãwen juõn missionary ear kwalok yokwe eo emol?

¹⁸ Ro rej kwalok yokwe rej kaibujuij Jehovah. Lemnak kin Sonia, juõn missionary ilo Senegal. Ear katak Bible ibben juõn kõrã etan Heidi, eo ear bõk nañinmij in HIV jen leo belen eo ejjab juõn ri tõmak. Elikin an leo belen mij, Heidi ear baptais, ak ejjabto tokelik ear mõjnolok, im bed ilo hospital kin an bõk nañinmij in AIDS. Sonia ear ba: “Ri jerbal ro ilo hospital eo rar kate ir ñan jibañ e, ak ear iet ri jerbal ro. Ro uan congregation eo rar bõk kunair ñan bed ibben im jibañ e ilo hospital eo. Ilo ran eo kein karuo, I ar bed iturin mae ien eo ear mij. Juõn doctor ear lo iõ im ba: ‘Abañ eo elaptata kimij loe ej bwe ro nukin ri nañinmij ro rejjab kõnan bed ibbeir ñe rej jelã bwe rej bõk nañinmij in AIDS. Etke kwe, meñe ejjab nukõm, im kwoj jab jen ailiñ eo an, ak kwokõnan bed ibben?’ Iar kamelele bwe ñan ña, Heidi ear lukkun jeiõ ak jatiõ, einwõt ekar wõr ejja jineir im jemeir wõt juõn. Kin kõtan in ibben, iar mõnõnõ in kejbãrok e.” Sonia ear jab bõk jorrãn jen jibadbad ko an ñan kejbãrok Heidi.

19. Kinke kien Anij ej bed ilo buruõd, ta eo jen kortokjen ?

¹⁹ Elõñ wanjoñok ko kin kwalok yokwe jemaroñ lo ibwiljin ri karejar ro an Jehovah. Ejelok juõn lajrak in kien einwõt ear bed ibben ailiñ in Israel mokta ej kõmman bwe armij ren kile armij ro an Anij rainin. Jen men in, jej lo jejjet in kitien eo kin ta eo kar je ilo Dri Hibru 8:10: “Bwe eñin bujen eo I naj kõmõn iben imõn Israel elikin ran ko, Iroij ej ba; I naj likit kien ko Aõ ilo air lolãtãt, im I naj jeji ilo burueir: im I naj air Anij, im re naj ro droõ.” Ien otemjej jen kaorõk kien yokwe eo Jehovah ear jeje ilo buruõd, im bõk jabdewõt ien emõn ñan kwalok yokwe.

20. Etke kien Christ ej juõn men eaorõk ewõr ibbed?

²⁰ Jej lukkun lañliñ in karejar ñan Anij ibben juõn dolul in jimjãn jimjatin ibelakin lal eo me ej kwalok yokwe! Ro ewõr kien Christ ilo burueir rej lañliñ kin juõn men elukkun aorõk ewõr ibbeir ilo lal in ejelok yokwe ie. Rej lañliñ ejjab kin yokwe eo an Jehovah wõt ak bareinwõt kin juõn lukluk in yokwe ekajur ibwiljin dolul in jimjãn jimjatin eo. “Lo enañin emõn im men in mõnõnõ, ñe ro jim jein im jim jãtin rej ber iben dron ilo buru juõn!” Meñe Ri Kennan ro an Jehovah rej bed ilo elõñ ailiñ ko, konono elõñ kajin ko, im ekajjo air manit, rej lañliñ kin air burukuk ilo kabuñ. Burukuk in ej kabuñburuen Jehovah. Ri jeje sam ear je: “Ijo [ibwiljin juõn jar in armij rej burukuk ilo air yokwe] Jeova e ar kaiñi jerammõn, aet mour in drio.”​—Sam Ko 133:1-3.

Kwomaroñ ke Uak?

• Ewi kar aorõkin Kien ko Joñoul?

• Ta kien eo rej jei ilo buruõd?

• Ta jerbal eo an yokwe ilo “kien Kraist”?

• Ilo wãwen et ko jemaroñ kwalok ad yokwe Anij im ro ri turid?

[Pija eo ilo peij 15]

Ri Israel ro ear wõr kien ko kar jei ion dekã ko

[Pija eo ilo peij 17]

Sonia ibben juõn ledik ilo Senegal ilo 2004 district convention eo