Nan eo an Jehovah Ej Mour Wõt

Katak ko Relap Jen Book In Ruo Kronikel

ILO an jino book in Ruo Kronikel, Solomon ej iroij einwõt king ilo Israel. Book in ej kajemlok kin nan kein an Cyrus king in Persia ñan Ri Jew ro ilo Babylonia: “[Jehovah] E ar jiroñ iõ bwe in kalek ñõn E juõn im i Jerusalem, eo ilo Juda. Jabrewõt eo ej ibemi ian ro dri ailiñ An otemjej, Jeova Anij eo an En iben, im en wõnliñlok wõt.” (2 Kronikel 36:23) Priest eo Ezra ear kadedelok an je book in ilo 460 B.C.E., im ej kitibuj men ko rar walok iumin 500 yiõ ko​—jen 1037 B.C.E. ñan 537 B.C.E.

Nan in keañ eo an Cyrus ear kamaroñ Ri Jew ro ñan air jeblak ñan Jerusalem im bar kajutak kabuñ eo an Jehovah ie. Bõtab, kin an to air bed ilo kamakoko ilo Babylon men in ear jelet ir ilo juõn wãwen enana. Ri jibokwe ro me rar jeblak rar jaje kin bwebwenato ko etto kin ailiñ eo air. Ruo Kronikel ej lelok ñan ir juõn lajrak in men ko rar walok iumin iroij eo an king ro ilo menmenbwij eo an David. Bwebwenato in ej bareinwõt kaitoklimoid kinke ej kalikar kin jerammõn ko rej walok ilo ad bokake Anij eo emol im jerata ko rej walok elañe jejjab bokake.

Juõn King Ej Kalek Juõn Em Ñan Jehovah

(2 Kronikel 1:1–​9:​31)

Jehovah ej lelok ñan King Solomon men ko emol an kar kõnan​—meletlet im jelãlokjen​—im bareinwõt mweiuk im utiej. King in ej kalek juõn em elukkun aibujuij ñan Jehovah ilo Jerusalem, im armij ro rej “mõnõnõ im lõñliñ ilo buruer.” (2 Kronikel 7:10) Solomon “e ar mweie im meletlet jen kiñ ro otemjej ilo lõl.”​—2 Kronikel 9:22.

Elikin an kar iroij ilo Israel iumin 40 yiõ, Solomon ej ‘kiki iben ro jiman, im rar kalibwin e ilo jikin kwelok an Devid, jemen: im Rihoboam e ar kiñ im binej jenkwõn.’ (2 Kronikel 9:31) Ezra ear jab jeje kin an kar Solomon jebwãbwe jen kabuñ eo emol. Men ko wõt renana ear kwalok kaki kar kin an king eo korlok horse ko jen Egypt im kin an belele ibben kõrã eo nejin Pharaoh. Ilo wãwen in Ezra ear kwalok bwebwenato in ilo juõn wãwen emõn.

Emwij Uaki Kajitõk ko Rej Bedbed ion Bible:

4:​2-4​—Etke rar kajerbal ekjap in cow koman ko ke rar kalek bedbed in lomalo unlok eo? Ilo Bible eo, cow koman ko rar kõkkar kin kajur. (Ezekiel 1:10; Reveles̃õn 4:6, 7) Jokãlet eo kin cow koman ko ekkar kinke cow koman ko 12 jinibõrõrõ rar inek “lomalo” eo ekilep, eo ear 30 ton eddo in im ear maroñ teiñi kin 17,400 gallon in den. Air kõmmani cow koman ko kin un in ear jab kokkure kien eo kein karuo, eo ear kemo air kõmman ekjap ko ñan air kabuñ ñani.​—Exodus 20:4, 5.

4:5​—Jete gallon ko rar maroñ teiñi loan lomalo unlok eo? Lomalo eo emaroñ eteiñ kin 17,400 gallon in den im ebool. Bõtab, ekkã air teiñi ñan joñan in ruo mõttan jilu. Juõn Kiñ Ro 7:​26 ej ba: “im kobõn ruo tausan bath [11,600 gallon].”

5:​4, 5, 10​—Ta eo kõbwebweien imõn kabbed eo rar likiti ilo temple eo an Solomon? Men eo wõt rar bõke jen imõn kabbed eo im likiti ilo temple eo an Solomon kar Tebteb eo. Elikin air kalek temple eo, rar bõk imõn kabbed eo jen Gibeon ñan Jerusalem im kakone ijo.​—2 Kronikel 1:3, 4.

Tokjen Katak ko ñan Kij:

1:​11, 12. Kajitõk eo an Solomon ear kwalok ñan Jehovah bwe bõk meletlet im jelãlokjen kar men ko elaptata an kar kõnan. Jar ko ad ñan Anij ej kwalok ta eo ej bed ilo buruõd. Ej men in meletlet ñan etale ta eo jej jar kake.

6:​18-​21. Meñe jabdewõt em eban debij Anij, temple eo ear jerbal einwõt jikin eo ñan kabuñ ñan Jehovah. Rainin, jikin kabuñ eo emol ej Kingdom Hall ko an Ri Kennan ro an Jehovah.

6:​19, 22, 32. Jehovah ear roñjake jar ko an aolep armij​—jen king eo ñan ro rettãtata ilo ailiñ eo​—bareinwõt ruwamaejet ro me rar kebak e ilo mol in burueir.a​—Sam Ko 65:2.

LAJRAK IN KING RO ILO MENMENBWIJ EO AN DAVID

(2 Kronikel 10:1–​36:23)

Ailiñ in Israel ear jebel ilo ruo mõttan ko​—ailiñ ko joñoul itueañ im ailiñ ko ruo an Judah im Benjamin iturak. Priest ro im Ri Levite ro ilo aolepen Israel rar likit tiljek eo ñan bujen Ailiñ eo ilõñin kijejeto eo kin ailiñ eo air im rar rejetak Rehoboam nejin Solomon. Enañin 30 yiõ ko elikin an dedelok air kalek temple eo, kar kwote aolep mweiuk ko iloan.

Ian king ro 19 elikin Rehoboam, 5 iair rar tiljek, 3 rar emõn ilo jinoin ak tokelik rar jab tiljek, im juõn ear ukwelok jen ial eo an ebwid. Iroij ro jet rar kõmman men ko renana iman mejen Jehovah. Elaplok kar kwalok kake makitkit ko an king ro lalem me rar liki Jehovah. Bwebwenato ko kin an Hezekiah bar kajutak jerbal ko ilo temple eo im an Josiah kõmman juõn kwojkwoj in Kijone elap ealikar an kar kõketak Ri Jew ro me rej itoklimo in bar kajutak kabuñ eo an Jehovah ilo Jerusalem.

Emwij Uaki Kajitõk ko Rej Bedbed ion Bible:

13:5​—Ta melelen “bujen in jãtõk” eo? Kinke salt ej kejbãrok bwe en jab kõt men ko, ear kõkkar kin juõn men etto an bed im ejjab oktak. Inem, “bujen in jãtõk,” eo ej jitõñlok ñan juõn bujen ebin.

14:​2-5; 15:17​—King Asa ear jolok ke aolep “jikin ko re utiej”? Alikar, ear jab. Bõlen Asa ear jolok jikin ko reutiej me ewõr kõtan ñan kabuñ ñan anij ko rewan ak ear jab jolok ijo armij ro rar kabuñ ñan Jehovah ie. Ak remaroñ kar bar kalek jikin ko reutiej ilo tujemlokin iroij eo an Asa. Jehoshaphat nejin Asa ear jolok jikin kein. Ilo mol, jikin ko reutiej rar jab lukkun jako, meñe ilo ien iroij eo an Jehoshaphat.​—2 Kronikel 17:5, 6; 20:31-33.

16:13, 14​—Kar tile ke Asa? Jaab, “kijeek e kanuij lap” ej jitõñlok ñan air tile spice ko, im jab enbwinin king eo.

35:3​—Ia eo Josiah ear bõktok Tebteb eo ekwojarjar jene ñan temple eo? Bible eo ejjab ba elañe juõn ian king ro renana ear bõk Tebteb eo jen temple eo ak elañe Josiah ear likiti ilo bar juõn jikin ñan kejbãrok e ke rar kõkãl temple eo. Ien eo wõt kar konono kake Tebteb eo elikin ran ko an Solomon kar ien eo ke Josiah ear bõktoke ñan temple eo.

Tokjen Katak ko ñan Kij:

13:13-​18; 14:11, 12; 32:​9-​23. Elap ad maroñ katak kin aorõkin ad atartar ion Jehovah!

16:​1-5, 7; 18:​1-3, 28-​32; 21:​4-6; 22:10-​12; 28:16-​22. Koba ibben ruwamaejet ro ak ro rejjab tõmak ej bõktok jorrãn. E men in meletlet elañe jej bõprae ad bõk kunad ilo lal in ilo jabdewõt wãwen.​—Jon 17:14, 16; Jemes 4:4.

16:​7-​12; 26:16-​21; 32:25, 26. Utiej buru ear kõmman bwe King Asa en oktak im nana ilo yiõ eo eliktata in an mour. Jitõb in utiej buru ear tellok Uzziah ñan an jorrãn. Hezekiah ear emmakit ilo juõn wãwen ejjab meletlet im bareinwõt ilo utiej buru ke ear kwalok ñan ri karejar eo jen Babylon aolep men ko raorõk ilo temple eo. (Aiseia 39:1-7) “Ablip ej ilok iman kokkure,” Bible eo ej kakkõl, “im utiej buru iman buñ.”​—Jabõn Kennan Ko 16:18.

16:9. Jehovah ej kajerbal kajur eo an ñan jibañ ro burueir rewãppen ñan e.

18:12, 13, 23, 24, 27. Einwõt Micaiah, jej aikwij beran in konono kin Jehovah im karõk ko an.

19:​1-3. Jehovah ej bukõt men ko remõn ilo kij meñe jej lelok ñan e unin an illu ibbed.

20:​1-​28. Ñe jej reilok ñan Jehovah ñan an tel kij, jemaroñ liki bwe Jehovah enaj kõmman bwe jen loe.

20:17. Ñan lo “lomor an Jeova,” jej aikwij “berwõt” ilo ad rejetak Ailiñ in Anij. Jen ad make lolorjake men ko, jej aikwij “jutõk,” im liki Jehovah.

24:17-​19; 25:14. Kabuñ ñan ekjap ear juõn aujid ñan Jehoash im Amaziah nejin. Rainin, kabuñ ñan ekjap emaroñ bareinwõt juõn menin kabo, elaptata ñe ej walok ilo ankwonak ak kijejeto kin juõn ailiñ.​—Dri Kolosse 3:5; Reveles̃õn 13:4.

32:​6, 7. Kij bareinwõt jej aikwij beran im kajur ke jej “kõnõk aolepen ken tõrinae an Anij” im bõk kunad ilo tarinae eo ilo jitõb.​—Dri Epesõs 6:11-18.

33:​2-9, 12, 13, 15, 16. Juõn armij ej kwalok bwe emol an ukwelok ilo an ilok jen ial eo ebwid im ej kate e ñan kõmman men eo ejimwe. Ion bedbed in ukwelok eo emol, juõn armij enana einwõt Manasseh emaroñ bareinwõt bõk tiriamokake an Jehovah.

34:​1-3. Meñe wãwen ko ilo ien jaar rittolok rar nana, men in ejjab aikwij bõprae kij jen ad jelã im karejar ñan Anij. Ke Josiah ear rittolok, juõn kilan emõn emaroñ kar itok jen Manasseh, jimman eo ear ukwelok. Kilan kein rar jelet Josiah ilo wãwen ko remõn. Emaroñ eindein ibbed.

36:17, 22, 23. Nan ko an Jehovah rej jejjet kitieir ien otemjej.​—1 Kiñ Ro 9:7, 8; Jeremiah 25:9-11.

Juõn Book ear Kamakit e

“Josaia e ar bõklok men in jõjõik ko otemjej jen ene ko otemjej iben ro nejin Israel,” 2 Kronikel 34:33 ej ba, “im e ar kõmõn bwe ir otemjej ar lo ir ilo Israel ren korijer, aet korijer ñõn Jeova air Anij.” Ta eo ear kamakit Josiah ñan an kõmmane men in? Ke secretary eo Shaphan ear bõklok book eo rar loe ñan King Josiah kin Kien eo an Jehovah, king eo ear karõk bwe ren konono i lojilñiir. Men eo Josiah ear roñjake ear lap an jelet buruen im kamakit e ñan an kijejeto in kowõnmanlok kabuñ eo emol ilo aolepen an mour.

Ilo ad konono im kalmenlokjen kin Nan eo an Anij, men in emaroñ lap an jelet kij. Ñe jej lemnak kin bwebwenato ko kin king ro ilo menmenbwij eo an David ej rejañ kij ñan kajeoñe joñok ko an ro rar kalikar air liki Jehovah im ñan bõprae mwil ko an ro rar jab. Ruo Kronikel ej kamakit kij ñan ad tiljek ñan Anij eo emol. Ennan eo, emol an mour im jerbal wõt.​—Dri Hibru 4:12.

[Kamelele ko itulal]

[Pija eo ilo peij 29]

Kwoj jelã ke taunin ejejjet air kar kajerbal cow koman ko iumin lomalo unlok eo?