Lo Mõnõnõ Ilo Mour eo Kin Mijak Jehovah
“O komin mijõk Jeova, komeo dri’mõn ro An; bwe ejelok aikwij iben ro remjõk E.”—SAM 34:9.
1, 2. (a) Ilo wãwen et kabuñ in Christendom rej watõk ñan mijak Anij? (b) Ta kajitõk ko jenaj etale kiõ?
RI KWALOK ro ilo kabuñ ko an Christendom ekkã air katakin armij bwe ren mijak Anij kinke ej bedbed ion katak eo ewan bwe Anij ej kaeñtan ro rejerawiwi ilo juõn jikin eñtan. Kain katak rot in ej nae ta eo Bible ej katakin kin Jehovah bwe E ej juõn Anij in yokwe im ekajet jimwe. (Jenesis 3:19; Duteronomi 32:4; Dri Rom 6:23; 1 Jon 4:8) Bar ri tel ro an kabuñ ko an Christendom rej oktak kin men ko rej katakin armij kake. Rejjab ba bwe jej aikwij mijak Anij. Ijellokin men in, rej katakin bwe Anij ej mõnõnõ ibben aolep armij jekdon ta eo rej kõmmane ilo mour eo air. Men in bareinwõt ejjab katak eo Bible ej katakin.—Dri Galetia 5:19-21.
2 Ilo mol, Bible eo ej rejañ kij ñan mijak Anij. (Reveles̃õn 14:7) Katak in jen Bible eo ej jomantak kajitõk ko. Etke juõn Anij in yokwe ekõnan bwe jen mijak e? Kain mijak rot eo Anij ekõnan jen kij? Ta tokjen ko ibbed ñan mijak Anij? Jenaj etale kajitõk kein ilo ad wõnmanlok im katak kin Sam eo kein ka 34.
Etke Mijak Anij
3. (a) Ewi wãwen am lemnak kin kien eo ñan mijak Anij? (b) Ta unin ro rej mijak Jehovah remõnõnõ?
3 Einwõt Ri Kõmanman im Iroij Bõtata eo ijoko otemjej ilañ im ion lal, Jehovah ej tellokin ñan ad mijak e. (1 Piter 2:17) Bõtab, mijak rot in ejjab einwõt ñe kwoj wũdiddid kin juõn anij elukkun lej. Ej juõn kain mijak me elap am kautiej e kinke kwo jelã kain Anij rot Jehovah. Bareinwõt ekoba mijak eo me juõn ejjab kõnan kaburomõj e. Mijak Anij elap an wõr kautiej ie im ej kalañliñ, ejjab kaburomõjmõj ak kalelñoñ kij. Jehovah, ej juõn “Anij e mõnõnõ,” ekõnan bwe armij ren lo mõnõnõ ilo mour. (1 Timote 1:11) Bõtab, ñan kõmmane men in, jej aikwij mour ekkar ñan kien ko an Anij. Ibben elõñ armij, melelen men in bwe renaj aikwij kõmman oktak ko ilo mour. Aolep ro rej kõmman oktak ko renaj bõk eñjake eo emol an ri jeje sam David: “O kwon erjoñ im lo bwe Jeova e joij; emõnõnõ eo ej liki E. O komin mijõk Jeova, komeo dri’mõn ro An; bwe ejelok aikwij iben ro remjõk E.” (Sam 34:8, 9) Kinke emõn kõtan eo air ibben Jehovah, aolep ro rej mijak Jehovah ejelok aikwij ko ibbeir.
4. Ta kallimur eo David im Jesus jimor rar lelok?
4 Lale mõk ke ear jerbale nan in ilo ran ko an, David ear kautiej armij ro an ikijen an naetair “dri’mõn ro.” Rar mõttan ailiñ eo ekwojarjar an Anij. Rar likit air mour ilo kauwatata ñan lor David. Meñe kar ien eo rar ko jen King Saul, David ear kwalok an liki Jehovah bwe en wõnmanlok im lelok men in aikwij ko. David ear je: “Kon in laiõn rej aikwij im kwũli, a ro rej bukot Jeova re jamin aikwij jabrewõt men emõn.” (Sam 34:10) Jesus ear kallimur ñan ri kalor ro an einlok wõt an kar David kõmmane.—Matu 6:33.
5. (a) Armij ro rar lor Jesus rar itok jen ia im ewi wãwen air bed? (b) Ta nan in kakabilek eo Jesus ear lelok kin mijak?
5 Elõñ ian ro rar roñjake Jesus rar itok jen ro rejerata, ro rejjab utiej an ro Ri Jew. Kin men in, Jesus ear “tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Matu 9:36) Armij rein ettã burueir remaroñ ke beran im lor Jesus? Ke rar kõmmane, rar aikwij mijak Jehovah, im jab armij. Jesus ear ba: “Komin jab mijõk ro rej mõn enbwin, im tokelik ejelok air maroñ in kõmõn. A Ij kwalok ñõn kom mokta Eo kom naj mijõke; Komin mijõk E, eo elikin an mõn Ej maroñ in jolok na ilo Geenna; Aet, Ij ba ñõn kom, E in komin mijõke. Re jab wiakaki lailim sparro kin ruo penni ke? im ejelok juõn iair melokloke iman mejen Anij. A emwij bwini kõlan bõrõmi otemjelok. Komin jab mijõk: elap ami emõn jen elõñ sparro.”—Luk 12:4-7.
6. (a) Ennan et ko an Jesus emwij an kakajurlok Ri Christian ro? (b) Etke Jesus ej joñok eo emõntata kin mijak Anij?
6 Ilo ien eo ro rej mijak Jehovah rej bõk ijjibed ko jen ri kijirãt ro air ñan bõjrak jen air karejar ñan Anij, remaroñ kememej nan in kakabilek eo an Jesus: “Jabrewõt eo e naj kwalok Iõ iman mejen armij rõn, Nejin armij e naj bareinwõt kwalok e iman mejen enjel ro an Anij: A eo e naj karmijet Iõ iman mejen armij, naj karmijet e iman mejen enjel ro an Anij.” (Luk 12:8, 9) Ennan kein emwij air kakajurlok Ri Christian ro, elaptata ro rej bed ilo ailiñ ko me rej kamoik kabuñ eo emol ie. Ri Christian rein retiljek rej wõnmanlok ilo air kaibujuij Jehovah ilo kwelok ko im ilo air jerbal in kwalok nan ilo ittino. (Jerbal 5:29) Jesus ear kwalok joñok eo elap kin wãwen eo ear “ujõke” Anij. (Dri Hibru 5:7) Nan in Anij ilo kanan ear ba kin e: “Im Jitõb õn Jeova e naj ber ion, jitõb in . . . mijõk Jeova. Im An lõñliñ e naj ilo mijõk Jeova.” (Aiseia 11:2, 3) Inem, ibben Jesus ewõr maroñ eo elap ibben ñan katakin kij kin tokjen ko kin mour ilo mijak Anij.
7. (a) Ewi wãwen Ri Christian ro remaroñ uak nan in kir eo einlok wõt an kar David kõmmane? (b) Ewi wãwen ro jemen im jinen remaroñ lor joñok eo emõn an David?
7 Aolep ro rej lor joñok eo an Jesus im bokake katak ko an, rej uak nan in kir eo einlok wõt an David ke ear ba: “Kom ro nejiõ, komin item roñjake iõ; I naj katakin kom mijõk Jeova.” (Sam 34:11) Ear emõn ibben David ñan naetan armij ro an “ro nejiõ” kinke rar kautiej e einwõt ri tel eo air. David ear jibañ ro rar lor e ilo men ko lor jitõb bwe remaroñ burukuk ibben don im bõk joij eo an Anij im mõnõnõ kake. Ej juõn joñok emõn ñan Ri Christian ro jemen im jinen! Jehovah ear lelok ñan ir ledik im ladik ro nejiir im kamaroñ ir ñan “kakajiririik ir ilo kaje im kowe an Iroij.” (Dri Epesõs 6:4) Ikijen air bwebwenato ibben ajiri ro nejiir kin men ko lor jitõb kajjojo ran im ilo air keini in katak Bible eo ibbeir, ro jemen im jinen renaj jibañ ro nejiir ñan lo lañliñ ilo air mijak Jehovah.—Duteronomi 6:6, 7.
Wãwen eo ñan Kamineneik Kij ñan Mijak Anij
8, 9. (a) Etke mijak Anij ej juõn mour ekaitoktoklimo? (b) Ta eo ej kitibuj ad kajerbale loid ilo jimwe?
8 Einwõt ke jaar konono kake ilo jinoin, mijak Jehovah ejjab bõprae kij jen ad bõk lañliñ. David ear kajitõk: “Wõn armij eo ej yokwe mour, im e kõnan elõñ ran bwe en lo emõn?” (Sam 34:12) Alikar, mijak Jehovah ej men eo eaorõk ñan bõk juõn mour eaetok im lañliñ im lo emõn. Bõtab, e bidodo ñe juõn ej ba, “Ij mijak Anij.” Ejjab bidodo ñan kwaloke ilo wãwen mwilid. Kin men in, David ear wõnmanlok ñan kamelele kin ewi wãwen jemaroñ kwalok ad mijak Anij.
9 “Kwon drebij loõm jen nana, im tiõm jen konono etao.” (Sam 34:13) Jitõb eo an Anij ear kakõrmol ri jilek Peter ñan kwalok nan kein ilo Sam 34 elikin an kar kakabilek Ri Christian ro bwe ren yokwe don einwõt jimjãn jimjatin. (1 Piter 3:8-12) Ad kejbãrok loid jen men ko renana ej melelen bwe jen jab ñidemij. Ijellokin men in, jenaj kate kij ñan kõketak don ilo ien jej bwebwenato ibben ro jet. Bareinwõt, jenaj kate wõt kij ilo beran ñan konono mol eo.—Dri Epesõs 4:25, 29, 31; Jemes 5:16.
10. (a) Kwalok ta melelen ñan bõprae kij jen men ko renana. (b) Ta eo ej kitibuj ad kõmmane men ko remõn?
10 “Kwon illok jen nana im kõmõn emõn, kwon kabukot ainemõn im lukwõrkwõre.” (Sam 34:14) Jej bõprae kij jen men ko Anij ej dike einwõt mour in lũñ, kwot, anijnij, lej, kadõk, im kajerbal uno ko rekajur. Bareinwõt jej karmijete men in kamõnõnõ ko me rej kwalok men in jõjõ kein. (Dri Epesõs 5:10-12) Jen an eindein, jenaj kajerbal ien ko ad ñan kõmman emõn. Men eo emõntata jemaroñ kõmmane ej ikijen ad keini in bõk kunad ilo jerbal in kwalok nan kin Ailiñ eo im jerbal ñan kõmman ri kalor, jerbal eo ñan jibañ ro jet bwe remaroñ bõk lomor. (Matu 24:14; 28:19, 20) Kõmman emõn ekoba ad kebojak lok iman im bed ilo kwelok ko an Christian, lelok jabawõt ko ñan rejetak jerbal in kwalok nan eo ej walok ibelakin lal, kejbãrok Kingdom Hall eo ad im bojak ñan jibañ Ri Christian ro ewõr air aikwij.
11. (a) Ewi wãwen David ear jerbale men ko ear katakin kin ainemõn? (b) Ta eo kwomaroñ kõmmane ñan ‘jibadõk ainemõn’ ilo congregation eo?
11 David ear kwalok juõn joñok emõn kin wãwen eo ñan jibadõk ainemõn ibben don. Ruo kõtan kar wõr bellok ibben ñan an mõn Saul. Ilo ien kein ruo, ear kate wõt e ñan an jab kwalok lej, im tokelik ear konono ilo kautiej ibben king eo ilo kejatdikdik bwe en wõr ainemõn ikõtairro. (1 Samuel 24:8-11; 26:17-20) Ta eo jemaroñ kõmmane elañe juõn men ej iten kokkure ainemõn ilo congregation eo? Jej aikwij “bukõt ainemõn, im jibadõke.” Kin men in, elañe jej kile bwe kõtan eo ad ibben juõn mõttad ri tõmak ejjab emõn, jen bokake nan in kakabilek eo an Jesus: “Kainemõn jeõm im jãtõm mokta.” Inem jemaroñ wõnmanlok ilo jerbal ko jet ilo kabuñ eo emol.—Matu 5:23, 24; Dri Epesõs 4:26.
Mijak Anij ej Bõktok Jerammõn ko Relap
12, 13. (a) Ta tokjen ko ro rej mijak Anij rej mõnõnõ kake kiõ? (b) Ta ãjinkij eo elap mõttan wõt jidik ri kabuñ ro retiljek renaj bõke?
12 “Mejen Jeova ñõn ro remõn, im lojiliñin rebellok ñõn air kir.” (Sam 34:15) Lokbook eo an Anij kin ien eo ear jerbal ibben David ej kamol bwe ennan kein remol. Rainin, jej lo lañliñ eo emũlal im ainemõn kinke jejelã bwe Jehovah ej kejbãrok kij. Jej liki bwe aolep ien enaj kõke aikwij ko ad, meñe jej inebata kin juõn men elap. Jej jelã bwe mõttan wõt jidik aolep ri kabuñ ro remol renaj jelmae ien tarinae eo an Gog in Magog im ien “ran eo elab im kaamijak an Iroij.” (Joel 2:11, 31; Ezekiel 38:14-18, 21-23) Jekron ta men ko jenaj jelmae kake, nan ko an David renaj mol ibbed: “Ro dri’mõn r’ar kir im Jeova e ar roñjake, im lomorir jen jorran ko air otemjej.”—Sam 34:17.
13 Enaj juõn ien ekairujruj ñan lo wãwen eo Jehovah enaj kabujuij ãt eo etan elap! Buruõd enaj obrak kin kautiej eo elaplok an mulal, im ri jumae ro aolep renaj jook ilo air lo jemlokin. “Turin mejen Jeova e nae ro rej kõmõn nana, bwe en kokkure ememej ir jen lõl.” (Sam 34:16) Enaj juõn ãjinkij elap ñan bõk lomor im drelõñ ilo lal ekal im ewãnik an Anij!
Kallimur ko Jen Jehovah Me Rej Jibañ Kij ñan Kijenmij
14. Ta eo emaroñ jibañ kij ñan kijenmij meñe jej ion eñtan ko?
14 Inem, ñan wõnmanlok im bokake Jehovah ilo juõn lal enana im lej, jej aikwij kijenmij. Mijak Anij ej juõn kein jibañ elap ñe jej katak ñan bokake Anij. Kinke jej mour ilo ien ko renana, jet ian ro ri karejaran Jehovah rej ion melejoñ ko relap me rej kaburomõj im kabwer ir. Bõtab, remaroñ liki bwe elañe rej reilok im atartar ion Jehovah, enaj jibañ ir ñan kijenmij. Nan ko an David elap air kainemõn im remol: “Jeova ej ebak ñõn ro erup burueir, im Ej lomoren ro retã wõt ilo air.” (Sam 34:18) Ilo rejañ, David ear wõnmanlok im ba: “Elõñ iñtan an ro remõn, a Jeova ej lomorir jen ir otemjej.” (Sam 34:19) Jekron ewi joñan an lap eñtan ko rej walok ibbed, ewõr maroñ ibben Jehovah ñan lomoren kij.
15, 16. (a) Ta jorrãn eo David ear roñ elikin an kine Sam 34? (b) Ta eo enaj jibañ kij kijenmij iumin melejoñ ko?
15 Ejjab to elikin an kine Sam 34, David ear roñ kin jorrãn eo ear walok ibben ro rar bed ilo jikin Nob, ke Saul ear mõn ir ñan mij ekoba enañin aolep priest ro. Men in ear lap an kaburomõj David ke ear lemnak kin jorrãn eo ear walok ilo jikin in ekar lolok im unin Saul ear mõn armij ro ijo! (1 Samuel 22:13, 18-21) Ejelok bere bwe David ear reilok im jar ñan Jehovah ñan bõk jibañ, im ear bõk kainemõn bwe kejatdikdik in jerkakbiji enaj walok ibben “ro remõn” ilo ran ko rej bedotok.—Jerbal 24:15.
16 Rainin, kejatdikdik in jerkakbiji ej bar juõn men ej kakajur kij. Jejelã bwe ro rej nae kij reban kokkure kij indio. (Matu 10:28) David ear kwalok lemnak ko einlok wõt ilo nan kein an: “Ej kejbãrok drin otemjej [ri wãnik], ejelok iair im e moruj.” (Sam 34:20) Eon in ear jejjet kitien ibben Jesus. Meñe rar mõn Jesus, ejelok di ko diin kar “moruj.” (Jon 19:36) Ilo bar juõn wãwen, Sam 34:20 ej kallimur ñan kij bwe jabdewõt melejoñ ko ri kabit ro im ro mõttair “s̃ip” renaj ione, reban kokkure ir ñan indio. Ilo kõkkar, dii ko diir rejamin moruj.—Jon 10:16.
17. Ta jorrãn eo enaj buñõt aolep ro rej kijirãte ro don Jehovah?
17 Wãwen bed an ro renana eoktak. Mõttan wõt jidik renaj madmõd leen ko renana rar jeori. “Nana e naj kokkure ro dri jerawiwi , im ro rej kijirãt ro remõn naj liakelok ir.” (Sam 34:21) Aolep ro rej wõnmanlok im jumae ro don Anij renaj lo jorrãn eo elap. Ñe Jesus Christ enaj itok, renaj “iñtan ilo kokkure in drio.”—2 Dri Tessalonika 1:9.
18. Ilo wãwen et “jar elap” rej anemkwoj kiõ jen jerawiwi, im ta men ko enaj walok ibbeir ilo ran ko rej bed iman?
18 Sam eo an David ej kajemlok kin nan in kallimur kein: “Jeova ej lomoren an ro dri korijeran, im ejelok ian ro rej liki E naj liakelok ir.” (Sam 34:22) Ilo tujemlokin 40-yiõ ko in an iroij, Kiñ David ear ba: “Eo [Anij] e ar lomoren aõ jen jorran.” (1 Kiñ Ro 1:29) Einwõt David, ro rej mijak Jehovah renaj maroñ reiliklok im mõnõnõ kinke rar bõk lomor jen jerawiwi ko air im ellã jen melejoñ ko rar ioni. Kiõ, enañin aolep Christian ri kabit ro emwij air bõk jinekjej ilañ. Juõn “jar elap” jen ailiñ otemjej koba ibben bwen ri kabit ro an Jesus rej karejar ñan Anij ilo lañliñ kin air erreo im jutak iman Jehovah. Remaroñ kõmmane men in kinke rej jerbale air tõmak kin bõtõktõkin Jesus me ej kanemkwoj ir jen jerawiwi. Iumin iroij eo an Christ aetokin juõn thousand yiõ, joñan lapin kajur in binmour eo enaj jerbal ibbeir, me enaj tellok ñan mour ewãppen.—Reveles̃õn 7:9, 14, 17; 21:3-5.
19. Ta eo ro uan “jar elap” rej beek ñan kõmmane?
19 Etke jerammõn kein renaj walok ibben “jar elap” in ri kabuñ ro an Anij? Kinke emwij air beek ñan wõnmanlok ñan mijak Jehovah, im karejar ñan e jen burueir ikijen air bokake bwe ej tellokin. Ilo mol, ad mijak Jehovah ej kõmman bwe ad mour en lemõnõnõ kiõ im ej jibañ kij “bõk mour eo emol”—mour indio ilo lal ekãl an Anij.—1 Timote 6:12, 18, 19; Reveles̃õn 15:3, 4.
Kwoj Kememej Ke?
• Etke jej aikwij mijak Anij, im ta melelen ad mijak e?
• Ewi wãwen mijak anij ej jelet mwillid?
• Ta jerammõn ko rej itok jen ad mijak Anij?
• Ta kallimur ko elap air jibañ kij ñan kijenmij?