Kõttar Ran eo an Jehovah Ilo Kijenmij
“Ilo ami tõmak komin . . . kijenmij.”—2 PITER 1:5, 6.
1, 2. Ta in kijenmij, im etke Ri Christian ro rej aikwiji?
RAN eo elap an Jehovah ej ebak. (Joel 1:15; Zephaniah 1:14) Einwõt Ri Christian ro me emwij air beek ilo burueir ñan tiljek wõt ñan Anij, jej kijoror wõt ñan ien eo ñe Jehovah enaj kokwojarjar iroij bõtata eo an. Mae ien eo, jej jelmae kijirãt, kauwe, matõrtõr, im mij kin tõmak eo ad. (Matu 5:10-12; 10:22; Reveles̃õn 2:10) Ej aikwij wõr kijenmij—maroñ eo ñan jutak bin nae melejoñ ko. Ri jilek Peter ear rejañ kij: “Ilo ami tõmak komin . . . kijenmij.” (2 Piter 1:5, 6) Jej aikwij kijenmij, kinke Jesus ear ba: “A eo e naj kijinmij ñõn jemlokõn, e in e naj mour.”—Matu 24:13.
2 Bareinwõt jej nañinmij, buromõj, im bed ilo melejoñ ko jet. Satan enaj mõnõnõ elañe jej ebwer! (Luk 22:31, 32) Kin jibañ jen Jehovah, jemaroñ kijenmij ilo elõñ kain melejoñ ko. (1 Piter 5:6-11) Jen etale jet bwebwenato ko rar walok im rej kamol bwe jemaroñ kõttar kin ran eo an Jehovah ilo kijenmij im tõmak eo jamin jako.
Nañinmij Ear Jab Kabõjrak Ir
3, 4. Kwalok juõn wanjoñok me ej kalikar bwe jemaroñ karejar ñan Jehovah ilo tiljek meñe jej nañinmij.
3 Anij ejjab kejmour nañinmij ko ad ilo juõn wãwen ekabwilõñlõñ, ak ej kamaroñ kij ñan kijenmij wõt ñe jej nañinmij. (Sam 41:1-3) “Toan wõt aõ maroñ kememej,” Sharon ear ba, “I ar bed ilo wheelchair in. Jen ien aõ kar lotak im liktak, nañinmij in cerebral palsy (kin an jorrãn kamelij eo ej jelet an maroñ kamakit muscle ko im an konono) ear bõprae iõ jen aõ mour ilo mõnõnõ einwõt juõn ajiri.” Sharon ear bõk kejatdikdik ke ear katak kin Jehovah im kallimur ko an kin ejmour eo ewãppen. Meñe ebin an konono im etetal, ej lo lañliñ ilo jerbal in kwalok nan. Enañin 15 yiõ ko remotlok, ear ba: “Ejmour eo aõ emaroñ nanalok wõt, ak liki eo aõ ilo Anij im kõtan eo aõ ibben rej einwõt kein lomor ko ñan ña. Elap aõ mõnõnõ bwe ij bed ibwiljin ro don Jehovah im bõk wõt jibañ jen e!”
4 Ri jilek Paul ear rejañ Ri Christian ro ilo Thessalonica bwe ren “kaberan ro rej kũmkũm” ak kainemõn ro reburomõj. (1 Dri Tessalonika 5:14) Wãwen kein einwõt lukkun buromõj emaroñ kabwer armij. Ilo 1993, Sharon ear je: “Kin aõ eñjake bwe I ar lukkun likjap, I ar . . . lukkun ebwer iumin 3 yiõ ko. . . . I ar bõk kainemõn im nan in kakabilek ko jen elder ro. . . . Ikijen magazine in Imõniaroñroñ eo, ilo yokwe Jehovah ear letok melele ko kin unin an juõn armij lukkun buromõj im kõnan ebwer. Aet, ej yokwe armij ro an im melele kin ta eñjake ko air.” (1 Piter 5:6, 7) Sharon ej karejar ñan Anij ilo tiljek ke ej kõttar wõt kin ran eo elap an Jehovah.
5. Ta eo ej kamol bwe Ri Christian ro remaroñ kijenmij iumin elõñ inebata ko?
5 Jet Ri Christian ro rej lukkun inebata kin men ko rar walok ilo mour eo air mokta. Harley ear bed ilo tarinae ilo Bata eo an Lal kein ka ruo im enana an kiki kin an ettõnak wõt kin tarinae eo. Ilo ien an kiki, ekin lamõj im ba: “Kwon lale! Ekkõl wõt!” Lak ruj, ear lukkun tutu kin menokadu. Tokelik, ear maroñ jibadõk juõn wãwen mour me ear errã ibben nan in tel ko an Anij, inem jidik kin jidik, ettõnak kein rar diklok im jako.
6. Ewi wãwen an kar juõn Christian bõk anjo ion juõn nañinmij elukkun kaburomõj e?
6 Juõn Ri Christian eo ear bõk nañinmij eo etan bipolar disorder ak juõn nañinmij eo me joñan an lukkun buromõj ejjab kõnan kõmman jabdewõt men im kamao ibben ro jet. Inem men in ear kõmman an bin an kwalok nan kin Ailiñ eo. Bõtab, ear kate wõt e ñan kõmman jerbal in kinke ear kile bwe jerbal in emaroñ lomoren e im ro rej roñjake e. (1 Timote 4:16) Jet ien ear jab maroñ kallallal ion kejam eo, ak ear ba, “Elikin jejjo wõt minute, I ar maroñ anjo ion eñjake ko aõ, im wõnmanlok ñan mweo juõn, im bar kajeoñ. Ilo aõ wõnmanlok wõt ilo jerbal in kwalok nan, ear bwe aõ ejmour wõt ilo jitõb.” An bed ilo kwelok ko ear juõn aitwerõk elap bareinwõt, ak brother in ear kile aorõkin an kobalok ibben ro jein im jatin ilo tõmak. Kin men in, ear kate wõt e bwe en bed ilo kwelok ko.—Dri Hibru 10:24, 25.
7. Meñe jet iair rej mijak in konono iman mejen armij ak bed ilo kwelok eo, ewi wãwen air kwalok kijenmij?
7 Jet Ri Christian ro rej bõk nañinmij eo ej naetan phobia —nañinmij in mijake jet wãwen ak men ko. Ñan wanjoñok, remaroñ mijak in konono ibben armij ro ak bed ilo juõn kwelok. Baj lemnak wõt kin joñan an bin air maroñ uak ilo kwelok ko ilo Kingdom Hall eo ak kwalok juõn katak ilo kwelok eo Theocratic Ministry School (ak School in Kwalok Nan eo an Christian)! Ak, rej kijenmij wõt, im elap ad kamolol kin air bed im bõk kunair ilo kwelok ko.
8. Ta eo elaptata an wõr tokjen ñe juõn armij ej aikwij kijenmij iumin abañ ko kin eñjake?
8 Ñan jibañ juõn armij ñan kijenmij iumin abañ kein rej jelet eñjake ko an, emaroñ juõn men in aikwij ñan kalaplok ien an kakije im kiki. Emaroñ aikwij bõk jibañ jen juõn doctor. Bõtab, elaplok tokjen ej bwe en jar im bõk jibañ jen Anij. “Kwon jolok inek eo am ion Jeova, im E naj baur yuk,” Sam 55:22 ej ba. “E jamin likit ro remõn bwe ren makõtkit.” Inem, ilo mõnõnõ, kwoj aikwij “liki Jeova kin aolepen buruõm.”—Jabõn Kennan Ko 3:5, 6.
Kijenmij ilo Ien Mij eo an Juõn Eo Ebake Kij
9-11. (a) Ta eo emaroñ jibañ kij ñan kijenmij ñe jej buromõj kin mij eo an juõn eo ejitenburu ibbed? (b) Ewi wãwen joñok eo an Anna emaroñ jibañ kij ñan kijenmij ñe jej buromõj kinke juõn eo ejitenburu ibbed emij?
9 Ñe emij juõn uan family eo ad, elukkun lap ad buromõj kake ir. Abraham ear jañ ke Sarah, lio belen eo ej jitenburu ibben ear mij. (Jenesis 23:2) Bareinwõt armij eo ewãppen Jesus ear “jõñ” ke Lazarus eo jeran ear mij. (Jon 11:35) Inem ej biktokin armij ñan ad buromõj ñe juõn eo ejitenburu ibbed emij. Bõtab, Ri Christian ro rejelã bwe ewõr juõn kejatdikdik kin jerkakbiji. (Jerbal 24:15) Kin men in, rejjab “buromõj einwõt ro jet, ro ejelok kejatrikrik ibeir.”—1 Dri Tessalonika 4:13.
10 Ewi wãwen jemaroñ kijenmij ñe jej buromõj kinke emij juõn eo ebake kij? Bõlen juõn wanjoñok enaj jibañ kij ñan melele kake. Ejjab to ad buromõj ñe juõn jerad ej itoitak ñan juõn jikin etolok kinke jej jelã bwe jenaj bar loe ñe ej jeblaktok. Emaroñ diklok ad buromõj elañe jej bõk juõn lemnak einlok wõt in ñe juõn Ri Christian etiljek ej mij, kinke jej jelã bwe jenaj bar loe ilo ien jerkakbiji eo.—Ekklisiastis 7:1.
11 Ñe jej atartar ion “Anij in ainemõn otemjej” kin aolepen buruõd, enaj jibañ kij ñan kijenmij ilo ien mij eo an juõn eo ej ebak ñan kij. (2 Dri Korint 1:3, 4) Bareinwõt jenaj kõmman eindein ñe jej kalmenlokjen kin ta eo Anna kõrã eo ejako belen ear kõmmane ilo ebeben eo kein kajuõn. Leo belen ear mij elikin wõt air mare jiljilimjuõn yiõ ko. Ak ke ear 84 an yiõ, ear jerbal wõt ñan Jehovah ilo temple eo. (Luk 2:36-38) Kin an kabuñ ñan Anij kin aolepen mour eo an, ejelok bere, bwe men in ear jibañ e ñan kijenmij wõt ilo ien an buromõj im makelok ian. Ad ekkeini in bõk kunad ilo makitkit ko an Christian, ekoba jerbal in kwalok nan kin Ailiñ eo, remaroñ jibañ kij ñan kijenmij ilo ien jej buromõj kin mij eo an juõn eo ej ebak ñan kij.
Kijenmij Wõt ilo Elõñ Kain Melejoñ
12. Jet Ri Christian ro rar kijenmij ilo melejoñ et eo kin mour in family?
12 Jet Ri Christian ro rej aikwij kijenmij ilo melejoñ ko kin mour in family. Ñan wanjoñok, elañe juõn ri belele ej lũñ, men in emaroñ lap an kokkure family eo! Kin an ilbõk im buromõj, eo belen ejelok ruõn ejjab maroñ kiki im emaroñ lap an jañ kinke eo ear lũñ ear jab tiljek ñan e. Ñe ej kõmman jerbal ko meñe rebidodo emaroñ kõmman bwid ilo makitkit ko an ak jorrãn ko remaroñ walok. Belen eo ejelok ruõn emaroñ jab kõnan mõñã, emaroñ aidiklok, im lukkun inebata. Emaroñ bin an bõk kunan ilo jerbal ko an Christian. Im abañ in enaj lap an jelet ajiri ro nejiir!
13, 14. (a) Ilo wãwen et eo kwoj bõk kõketak jen jar eo an Solomon ilo ien eo ear ajelok temple eo? (b) Etke jej jar kin jitõb kwojarjar?
13 Ñe jej bed ilo melejoñ rot kein, Jehovah ej letok jibañ eo jej aikwiji ñan kijenmij ilo ien eo. (Sam 94:19) Anij ej roñjake jar ko an ro don, einwõt ej kwalok kake ilo jar eo an King Solomon ke ear ajelok temple eo an Jehovah. Solomon ear jar ñan Anij: “Jar im akwelap eo jabrewõt armij e naj kõmõne, ak armij otemjej dri Israel, eo e jela nañinmij in buruen, im ej erlokwe pein ñõn mwin: inem kwon eoroñ ilo lõñ ko jikõm, im jeorlok, im kõmõn, im lelok ñõn jabrewõt armij ekar ñõn ial ko an otemjej, kwo jela kake buruen; (bwe kwe, kwe wõt, kwo jela buruen armij otemjej); bwe ren mijõk Yuk ran ko otemjej rej mour ilo eneo Kwar letok ñõn ro jimam.”—1 Kiñ Ro 8:38-40.
14 Elaptata enaj juõn men in jibañ elap ñan ad jar kin jitõb kwojarjar eo. (Matu 7:7-11) Leen jitõb kwojarjar ej koba kadkad rot kein einwõt lañliñ im ainemõn. (Dri Galetia 5:22, 23) Elap ad ainemõn ñe Jemed ilañ ej uake jar ko ad—lañliñ ej bõk jikin buromõj, im ainemõn ej bõk jikin illu!
15. Ta eon ko ilo Bible remaroñ kadiklok inebata ko ad?
15 Ñe jej aikwij kijenmij kin abañ ko relap, jej kõtmene bwe enaj wõr inebata. Ak jemaroñ kadiklok jet ian inebata kein elañe jej kememej wõt kin nan ko an Jesus: “Komin jab inebata buruemi kin ami mour, ta eo kom naj mõña, ak ta eo kom naj irak; im bareinwõt kin enbwinemi, ta kom naj balle. . . . A komin bukot mokta ailiñ in Anij, im kwojarjar eo An [Anij]; im naj koorlok men kein otemjej ñõn kom.” (Matu 6:25, 33, 34) Ri jilek Piter ej rejañ kij ñan ‘likit ad inebata otemjej na iben Anij, bwe Ej ierki kij.’ (1 Piter 5:6, 7) Ej juõn men ekkar ñan ad kate kij ñan kamadmõde juõn abañ. Bõtab, elikin ad kamaat ad maroñ ñan kõmman men in, inebata kin men eo ejjab maroñ bõk jikin jar. Ri jeje Sam ear al: “Kwon karebillok am ial ion Jeova, kwon bareinwõt liki E, im E naj kõmõne.”—Sam 37:5.
16, 17. (a) Etke jejjab maroñ anemkwoj jen aolep inebata ko? (b) Ta tokjen eo jenaj loe elañe jej jerbale Dri Pilippai 4:6, 7?
16 Paul ear je: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.” (Dri Pilippai 4:6, 7) Alikar, ro nejin Adam rejjab wãppen im kin men in rejjab maroñ anemkwoj jen aolep inebata ko. (Dri Rom 5:12) Ri Hittite limaro belen Esau rar “men in kaburomõj” eo ñan jemen im jinen Esau, Aisak im Rebeka. (Jenesis 26:34, 35) Nañinmij ear kainebataik Ri Christian ro einwõt Timothy im Trophimus. (1 Timote 5:23; 2 Timote 4:20) Paul ear inebata kin ri tõmak ro mõttan. (2 Dri Korint 11:28) Ak Eo ej “roñjake jar” ej bed ien otemjej ñan jibañ ro rej yokwe e.—Sam 65:2.
17 Ñe jej kõttar kin ran eo an Jehovah, “Anij in ainemõn” eo enaj jurake im kainemõn kij. (Dri Pilippai 4:9) Jehovah ej “tiriamokake, im E joij,” im ej “emõn, im kõnan jeõrlok” bwid, im “E kememej bwe kim bõñõlñõl.” (Exodus 34:6; Sam Ko 86:5; 103:13, 14) Inem jen ‘kwalok kajitõk ko ad ñan e,’ im jenaj bõk “ainemõn jen Anij”—ainemõn eo ej ellã jen jelã otemjej.
18. Einwõt emwij an kwaloke ilo Job 42:5, ewi wãwen jemaroñ “lo” Anij?
18 Ñe Anij ej uake jar ko ad, jej jelã bwe Ej bed ibbed. Elikin an Job kijenmij iumin melejoñ ko an, ear ba: “I kar roñjake kin lojiliñiõ kin Kwe [Jehovah]; a kiõ meja ej kab lo Yuk.” (Job 42:5) Kin mej in kõkkar eo ñan melele, tõmak, im kamolol, jemaroñ kalmenlokjen kin wãwen an Anij jerbal ibbed im jemaroñ “lo” e elaplok jen mokta. Kõtan rot in elap an kainemõn buruõd im lemnak ko ad!
19. Ta eo enaj walok elañe jej ‘likit aolep inebata ko ad ion Jehovah’?
19 Elañe jej ‘likit aolep inebata ko ad ion Jehovah,’ jenaj maroñ kijenmij iumin melejoñ ko im bõk ainemõn eo ej kejbãrok buruõd im lemnak ko ad. Itumũlalin buru in kõkkar eo ad, jenaj anemkwoj jen ad abõnõnõ, lelñoñ, im ilbõk. Lolãtãt eo ad ejamin bwok ak inebata.
20, 21. (a) Bwebwenato eo an Stephen ej letok kamol et eo kin ainemõn eo jemaroñ bõke ñe jej bõk matõrtõr? (b) Kwalok juõn wanjoñok ilo ran kein kin ainemõn eo jemaroñ bõke ñe jej kijenmij iumin melejoñ ko.
20 Ri kalor eo Stephen ear ainemõn im jokane ke ear aikwij kijenmij wõt ilo juõn melejoñ ekauwatata kin tõmak eo an. Mokta wõt jen an kar kwalok ennan eo an eliktata, aolep ro rar bed ilo Sanhedrin eo rar “lo turin mejen, einwõt turin mejen enjel.” (Jerbal 6:15) Baotokin kar einwõt eainemõn—einwõt juõn enjel, juõn ri keañ an Anij. Elikin an Stephen kajerwawaik bwid eo air kin mij eo an Jesus, ri ekajet ro rar “bukwe burueir, im rej kijdreken ñiir ñõn e.” Kin an “obrõk kin Jitõb Kwojarjar,” Stephen ear “kalimjeke lõñ, im lo aibujuij an Anij, im Jisõs ej jutõk i anbijmaroñõn Anij.” Kin an bõk kakajur jen vision eo, Stephen ear maroñ kejbarok an tiljek ñan mij. (Jerbal 7:52-60) Meñe jejjab lo vision ko, jemaroñ bõk ainemõn im jokane jen Anij ñe jej bõk matõrtõr.
21 Lemnak kin eñjake ko an jet Ri Christian ro ke rar bed ilo eñtan iumin pein Ri Nazi ro ilo Bata eo an Lal Kein Ka II. Ke ear bwebwenato kin ta eo ear walok ñan e ilo mõn ekajet eo, juõn ear ba: “Rar kejelã bwe renaj mõn iõ ñan mij. I ar roñjake, inem elikin aõ konono nan kein, ‘Kwon tiljek wõt ñan mij,’ im jejjo wõt nan ko jet kin Iroij eo ad, im ear jemlok. Ak jen jab inebata kake kiõ. Kinke ainemõn rot in ibba ej ellã jen am maroñ jelã kake!” Juõn Ri Christian emõn dettan ear bojak in mij kin an armij ro jebbare bõran. Ear jejelok ñan jemen in jinen im ba: “Emotlok lukkun boñ. Ewõr wõt ien ñan aõ ukõt bebe eo aõ. Bõtab, Imaroñ ke bar lo mõnõnõ ilo lal in elañe I ar karmijeteik Iroij eo ad? Emol jaab! Ak kiõ komro maroñ liki bwe inaj mij ilo mõnõnõ im ainemõn.” Ejelok bere bwe Jehovah ej jurake ri karejar ro an retiljek.
Kwomaroñ Kijenmij!
22, 23. Ta eo kwomaroñ liki kake ñe kwoj kijenmij im kõttar kin ran eo an Jehovah?
22 Bõlen kwojañin jelmae aitwerõk kein jaar bwebwenato kaki. Ak, Job eo ear mijake Anij ear jimwe ke ear ba: “Armij, eo ej lotak jen kõra, reit wõt ran ko an, im rej obrõk kin jorran.” (Job 14:1) Bõlen kwoj juõn jemen ak jinen eo ej kate in tel ajiri ro nejõm ñan mour ekkar ñan Bible eo. Rej aikwij kijenmij iumin melejoñ ko ilo school, ak elap am mõnõnõ ñe rej jutak bin ibben Jehovah im bokake kien ko an rewãnik! Bõlen kwar jelmae melejoñ ko relap im kabo ko ilo jikin jerbal eo am. Bõtab, kwomaroñ kijenmij ilo melejoñ kein, kinke ‘Jehovah ej inek eddo ko am.’—Sam 68:19.
23 Kwomaroñ watõk kwe make einwõt juõn armij bajjek. Ak kememej bwe Jehovah ejamin meloklok jerbal eo am im yokwe eo kwoj kwalok kin ãt eo ekwojarjar etan. (Dri Hibru 6:10) Kin jibañ eo jen e, kwomaroñ kijenmij ilo men ko rej melejoñe tõmak eo am. Inem kwon kobaik am kõmanman ankil an Anij ilo jar ko im karõk ko am. Inem kwomaroñ liki bwe Jehovah enaj kajerammõn im jurake yuk ñe kwoj kõttar im kijenmij wõt mae ran eo an Jehovah ej itok.
Ewi Wãwen Am Naj Uak?
• Etke Ri Christian ro rej aikwij kijenmij?
• Ta eo emaroñ jibañ kij ñan kijenmij ñe jej nañinmij im ñe jej buromõj kinke emij juõn armij ejitenburu ibbed?
• Ewi wãwen jar ej jibañ kij ñan kijenmij ilo melejoñ ko?
• Etke jemaroñ kijenmij wõt ñe jej kõttar kin ran eo an Jehovah?
[Pija eo ilo peij 15]
Liki Jehovah ej kamaroñ kij nan kijenmij ñe jej buromõj kinke emij juõn armij ejitenburu ibbed
[Pija eo ilo peij 17]
Jar jen buruõd ej jibañ kij ñan kijenmij kin men ko rej melejoñe tõmak eo ad