Jerbale Tiriamokake—Ewi Wãwen?
“Jen jerbale emõn ñõn armij otemjej, im elaplok ñõn ro rej ber ilo nukin tõmak.”—DRI GALETIA 6:10.
1, 2. Parable eo kin Ri Samaria eo ejoij ej katakin kij ta kin wãwen kwalok tiriamokake?
KE EAR konono ibben Jesus, juõn emaan eo elap an jelã kien Moses ear bõkmantak kajitõk in: “Wõn eo dri turu?” Ilo an uak, Jesus ear kwalok parable in: “Juõn armij ej wõnlõllok jen Jerusalem ñõn Jeriko, im ebol kin dri rakimi ro, rej wutik nuknuk ko an, im kakinijnij e, im ilok, im likit e keptata an mij. Ej etal jero juõn pris, ke ej wõlõllok ilo ial eo; im ke ej lo e, ej kijone im jer jen e. Im bareinwõt juõn dri Livai, ke ej itok im lo e, ej kijone im jer jen e. A juõn dri Sameria, ke ej etal, ej itok ijo ej ber ie: im ke ej lo e, ej tiriamokake, im ej itok ñõn iben, im kitimi kinij ko kinjen, im lutok ioir oil im wain, im kajijõt e ion kiru eo an, im bõktok e ñõn imõn drua maijet, im lale e. Im ran eo ilju ke ej ilok ej bõk ruo s̃illiñ im lelok ñõn dri lale mweo, im ba ñõn e, Kwon lale e; im jabrewõt eo kwoj koorlok, ñe ij bar itok, I naj nawõnam.” Tokelik, Jesus ear bõkmantak kajitõk eo ñan eo ear roñjake e: “Wõn iairjil, kwoj lemnok, ej dri turin eo e ar bol iben dri rakimi ro?” Im leo ear uak: “Eo e ar kõmõn joij ñõn e.”—Luk 10:25, 29-37.
2 Joñok eo an Ri Samaria eo im wãwen ear kea kake emaan eo me ear bok jorrãn ej kalikar kin melelen tiriamo eo emol! Kin an eñjake an tiriamokake, Ri Samaria eo ear emmakit ilo juõn wãwen me ear jibañ armij eo ear bõk jorrãn. Bareinwõt, Ri Samaria eo ear jab jelã kajjen eo ear bok jorrãn. Tiriamo eban bõjrak kin oktak in ailiñ, kabuñ, ak manit ko. Elikin an kwalok parable eo kin Ri Samaria eo ejoij, Jesus ear kakabilek ri roñjake eo: “Kwon ilok im kõmõnmõn einwõt.” (Luk 10:37) Jemaroñ bõk nan in kauwe in ñan buruõd im kate wõt kij ñan kwalok tiriamokake ñan ro jet. Ak ewi wãwen? Ilo wãwen et ko jemaroñ kwalok tiriamokake ilo ad mour jen ran ñan ran?
“Elañe Jeiõm im Jãtõm Eman . . . Ekelwan”
3, 4. Etke jej aikwij kwalok tiriamokake elaptata ilo congregation in Christian?
3 “Inem, einwõt eor ien iber,” ri jilek Paul ear ba, “jen jerbale emõn ñõn armij otemjej, im elaplok ñõn ro rej ber ilo nukin tõmak.” (Dri Galetia 6:10) Inem, jen lale ewi wãwen jemaroñ kalaplok ad kwalok tiriamokake ñan ro rej bed ilo nukin tõmak.
4 Ri jilek James ear rejañ Ri Christian ro remol kin aikwij eo ñan air kwalok tiriamokake ñan don, ear je: “Bwe ekajet im ejelok tiriamokake ej iben eo e ar jab tiriamokake.” (Jemes 2:13) Eon ko ibelakin ennan kein rekakõrmol rej kwalok jet wãwen ko jemaroñ keini ad kwalok tiriamokake ñan ro jet. Ñan wanjoñok, ilo Jemes 1:27 jej read: “Men in kabuñ erreo im jab etton iman mejen ar Anij im Jemer, eñin, bwe armij en lolok ro atajinemjen im kõra ejoko beleir ilo air jorran, im bwe en drebij e im jab lipjinjin kin lõl in.” Jemes 2:15, 16 ej ba: “Elañe jeiõm im jãtõm eman ak kõra ekelwan im ejelok kijen, im juõn iami ej ba ñõn ir, komin ilok ilo ainemõn, komin mãnãn im mãt; im e jab lelok ñõn ir men ko enbwinir rej aikwij, ewi tokjen?”
5, 6. Ilo wãwen et ko jemaroñ kalaplok ad kwalok tiriamo ñe jej kamao ibben congregation eo ilo bukwon eo ad?
5 Ad kea kake ro jet im bojak ñan jibañ ro ewõr air aikwij ej bar juõn kakõlle kin ro rej bed ilo kabuñ eo emol. Wãwen kabuñ eo ad ejjab kõtlok bwe itoklimo eo ad kin aikwij ko an ro jet en ilo nan wõt. Jen an eindein, juõn eñjake in tiriamo enaj kamakit kij ñan kõmmane juõn men ñan jibañ ro ewõr air aikwij. (1 Jon 3:17, 18) Aet, ad kõmat kijen juõn ri nañinmij, jibañ juõn ian ro reritto ñan kõmman jerbal ko ilo mweo imõn, ektak armij ro ñan kwelok ko an Christian ñe rej aikwiji, im kwalok joij ñan aolep ro rej tellokiir, rej mõttan leen tiriamo eo jej aikwij kwalok kake.—Duteronomi 15:7-10.
6 Meñe elap an aorõk ñan jibañ ro ilo congregation in Christian eo kin men ko lor kanniek, ej aorõklok ñan lelok ñan ir jibañ kin men ko lor jitõb. Bible eo ej kakabilek kij ñan “kaberan ro rej kũmkũm, jibõñ ro re mõjino.” (1 Dri Tessalonika 5:14) “Ro lilap” rej bõk rejañ bwe “ren dri katakin kin men ko remõn.” (Taitõs 2:3) Ñan overseer ro Ri Christian, Bible eo ej ba: “Im juõn eman e naj einwõt jikin tilekek jen kõto.”—Aiseia 32:2.
7. Jen joñok eo an ri kalor ro ilo Syrian Antioch, ta eo jemaroñ katak kake ikijen kwalok tiriamo?
7 Ijellokin air lelok jibañ ñan kõrã ro ejako beleir, ro atajinimjin, im ro rej aikwij bõk jibañ im kõketak ilo bukwon eo ad, jet ien congregation ko ilo ien eo Jesus im ri jilek ro rar bed ion lal rar kajutak juõn karõk ñan air jibañ ro mõttair ilo tõmak ilo jikin ko jet. Ñan wanjoñok, ke ri kanan eo Agabus ear kanan bwe “e naj ñitta elap i ene otemjej i lõl,” ri kalor ro ilo Syrian Antioch “r’ar bebe bwe einwõt air maroñ ren jilkinlok men in jibõñ jimjãn jimjãten rej jokwe i Judia.” Rar jilkinlok men kein ñan elder ro ijo “kin pein Barnebas im Saul.” (Jerbal 11:28-30) Ta kin ran kein? “Dri korijer e tiljek im meletlet” emwij an kajutak lajrak in kumi ko ñan jibañ kejbãrok ro jeid im jatid me ewõr air aikwij kin an kar walok jorrãn ko relap, einwõt lañ ko, makitkit lal ko, ak tsunamis (no ko relap). (Matu 24:45) Ilo ad mõnõnõ in lelok ien ko ad, jibadbad ko ad, im men ko mweied ñan jerbale karõk kein, ej juõn wãwen emõn ñan kwalok tiriamo.
“A Elañe Kom Kaljiklok Armij”
8. Ewi wãwen kalijeklok ej nae tiriamokake?
8 Ñan kakkõl kin men ko rej nae tiriamokake im “kien elap” kin yokwe, James ear je: “A elañe kom kaljiklok armij, komij kõmõn jerawiwi, im kien ej naruemi einwõt dri kõtõrei.” (Jemes 2:8, 9) Elañe jej kwalok joij le jen joñan ñan ro remweie ak rebuñbuñ, men in emaroñ kõmman bwe en diklok ad “eoroñ kir an ro ri jeramõl.” (Jabõnkennan 21:13) Kalijeklok ej kabañ juõn jitõb in tiriamokake. Jej kwalok tiriamokake ñe jej jerbal ibben ro jet ilo ejelok kalijeklok.
9. Etke ejjab nana ñan kwalok kautiej ñan ro rej tellokiir?
9 Ad jab kwalok kalijeklok ej melelen ke bwe ejjab maroñ laplok ad kwalok itoklimo ñan jabdewõt armij? Jaab. Ri jilek Paul ear jeje ñan Ri Christian ro ilo Philippi kin Epaphroditus, ri jerbal eo mõttan: “Komin nebar ro einwõt.” Etke? “Bwe kin jerbal an Kraist e ar ebak ñõn mij, im jab lemnok kin an mour, bwe en kõke matõn ami jerbal ñõn iõ.” (Dri Pilippai 2:25, 29, 30) Epaphroditus ear tellokin bõk nebar kin jerbal eo etiljek ear kõmmane. Bareinwõt, ilo 1 Timote 5:17, jej read: “Ren koutiej wõt elder ro rej iroij jime, im ro rej bareinwõt jerbal ilo nan im katakin, ren kanuij koutiej ir.” Ro rej kwalok kadkad ko remõn ilo jitõb rej bareinwõt tellokin bõk nebar. Ad kwalok kautiej kin men kein ejjab melelen bwe jej kwalok kalijeklok.
“Meletlet Jen Lõñ Ej . . . Eobrõk kin Tiriamokake”
10. Etke jej aikwij debiji loõd?
10 Ikijen lo eo, James ear ba: “Ej men eo enana im neõteoleol, im eobrõk kin uno kõnmij. Kin men eo jej nebar Iroij im Jemer; im kin men eo jej kõkol armij, ro emwij kõmõnmõn ir ilo wãwen Anij. Jen juõn wõt loñin ej waloktok jar ko im kõkol.” Ilo ejja men in wot, James ear kakobaba: “Ro jãtiõ, e jab emõn bwe en ein drein men kein. A elañe kãtõk emeo im akwail rej ilo buruemi, komin jab kimjãje im riõp nae mol. Meletlet in e jab eo ej wõnlõltak jen lõñ, a e jen lõl im ekar ñõn mõm ko im dimõn rõn. Bwe ijo kãtõk enana im akwail rej ber, jeurur im jerbal otemjej renana rej ber ie. A meletlet jen lõñ ej erreo mokta, inem e ainemõn, joij, ebiruru an rel, eobrõk kin tiriamokake im leen ko remõn, im ejelok akwail ak jela mon iben.”—Jemes 3:8-10, 14-17.
11. Ewi wãwen jemaroñ kwalok tiriamo ilo wãwen eo jej kajerbale loõd?
11 Kin men in, wãwen eo jej kajerbal loõd ilo ien jej kennan ibben ro jet ej kwalok elañe ewõr ibbeir meletlet eo me ej “eobrak kin tiriamokake.” Ta eo jenaj kwalok kake kij elañe jej kemjãje kin kij make, riap ñan ro jet, ak kajededlok ñidemij kinke jej ebanbane ir ak kinke jej akwel ibbeir? Sam 94:4 ej ba: “Ro dri kõmõn nana otemjej re jualõñlõñ kin ir mõke.” Im ñidemij elap an mõkaj an maroñ kokkure ãt eo emõn etan juõn armij ejelok ruõn! (Sam 64:2-4) Bareinwõt, lemnak mõk kin jorrãn ko renaj walok jen juõn “dri kennan wan [me], e naj kwalok riõp ko.” (Jabõn Kennan Ko 14:5; 1 Kiñ Ro 21:7-13) Elikin an konono kin jab jimwe wãwen kajerbal loõd, James ear ba: “Ro jãtiõ, e jab emõn bwe en ein drein men kein.” (Jemes 3:10) Tiriamokake emol ej kitibuj ad kajerbal loõd ilo juõn wãwen erreo, eainemõn, im ewõr kõmmanwa ie. Jesus ear ba: “A Ij ba ñõn kom, bwe nan wan otemjej armij re naj konono, re naj kwalok kaki ilo ran in ekajet.” (Matu 12:36) Elap an aorõk bwe jen kwalok tiriamo ilo wãwen eo jej kajerbal loõd!
“Jeorlok Bwir ko an Armij”
12, 13. (a) Ta eo jej katak kin tiriamo jen parable eo kin ri karejar eo me ekar wõr an muri elap ibben iroij eo? (b) Ta melelen ñan jolok muri an jeid im jatid “ñõn jiljilimjuõnñoul alen jiljilimjuõn”?
12 Parable eo an Jesus kin ri karejar eo ear wõr an muri ibben Iroij eo an, juõn king, kin 60,000,00 denarii ej kwalok bar juõn wãwen ñan kwalok tiriamokake. Kinke ear ejelok an maroñ ñan kõllã muri eo, ri karejar eo ear akwelap bwe en kwalok tiriamokake. Iroij eo ear “tiriamokake” ri karejar eo an im ear jolok an muri. Ak ri karejar eo ear illok im lo ri karejar eo mõttan me ear muri ibben jibuki denarii im ilo ejelok tiriamo ear jibwe e im jolok e na ilo prison. Ke iroij eo ear roñ kin ta eo ear walok, ear kirtok ri karejar eo me ear jolok an muri im ear ba: “O kwe dri nana; I ar kõtlok yuk jen muri eo otemjej, bwe kw’ar akwelap ñõn iõ. E jab emõn bwe kwo naj kar bareinwõt tiriamokake dri korijer ibõm einwõt I ar tiriamokake yuk ke?” Inem iroij eo ear likit e ilo kalbuj. Im Jesus ear kajemlok parable eo ilo an ba: “Im ein drein Jema i lõñ E naj kõmõnmõn ñõn kom, elañe kom otemjej jab jeorlok nana ko an ro jeõmi im ro jãtõmi jen buruemi.”—Matu 18:23-35.
13 Ilo alikar parable eo itu lañ ej kwalok bwe tiriamokake ej kitibuj ad bojak ñan jolok an don bwid! Jehovah emwij an jolok bwid eo ad elap kin jerawiwi. Inem jej aikwij bareinwõt “jeorlok bwir ko an armij.” (Matu 6:14, 15) Mokta jen an kar Jesus kwalok parable eo kin ri karejar eo me ear jab kwalok tiriamo, Peter ear kajitõk ibben: “Iroij, jete alen an jeiõ ak jãtiõ kõmõnmõn nana ñõn iõ im ij jeorlok nana eo? ñõn jiljilimjuõn ke?” Jesus ear uak: “I jab ba ñõn yuk ñõn jiljilimjuõn alen, a ñõn jiljilimjuõnñoul alen jiljilimjuõn.” (Matu 18:21, 22) Aet, armij eo me ej kwalok tiriamokake ej bojak ñan jolok bwid “ñõn jiljilimjuõnñoul alen jiljilimjuõn,” melelen men in, ilo ejelok jemlokin.
14. Ekkar ñan Matu 7:1-4, ewi wãwen jemaroñ kwalok tiriamo jen ran ñan ran?
14 Ilo an kamelele bar juõn wãwen ñan kwalok tiriamo, Jesus ear ba ilo Katak eo ion Tol eo: “Komin jab ekajet bwe en jab ekajet kom. Bwe ilo ekajet eo komij ekajet kake, naj ekajet kom . . . Im etke kwoj kalimjek belok erik iloan mejen jeõm im jãtõm a jab lemnok kin wijki iloan mejõm? A ekijkan am ba ñõn jeõm im jãtõm, In jolok belok erik jen mejõm; im lo, wijki ej ber iloan mejõm?” (Matu 7:1-4) Kin men in, jemaroñ kwalok tiriamo jen ran ñan ran ilo ad kijenmij kin likjap ko an ro jet im jab ekajete armij le jen joñan.
“Jerbale Emõn Ñõn Armij Otemjej”
15. Etke jejjab kwalok tiriamokake ñan ri tõmak ro mõttad wõt?
15 Ke book in Jemes ilo Bible ej kwalok kin tiriamokake eo rej kwaloke ibwiljin ri tõmak ro, men in ejjab melelen bwe kõmman ko rej kwalok tiriamo en ñan ro wõt im rej bed iloan congregation in Christian eo. ‘Jehovah ejoij ñõn armij otemjej,’ Psalm 145:9 ej ba, “im ej tiriamokake menin kõmõnmõn ko an otemjej.” Jej bõk rejañ ñan “kajeoñwe Anij” im ñan “jerbale emõn ñõn armij otemjej.” (Dri Epesõs 5:1; Dri Galetia 6:10) Meñe jejjab yokwe “lõl ak men ko ilo lõl,” jejjab likjap in kile aikwij ko an ro ilo lal in.—1 Jon 2:15.
16. Ta men ko rej jelet wãwen eo jej kwalok tiriamo ñan ro jet?
16 Einwõt Ri Christian ro, jej bojak kadede ñan lelok jibañ joñan wõt ad maroñ ñan ro rar lo “jerata” ak ro rej bed ilo wãwen ko elap air bin. (Ecclesiastes 9:11) Ilo mol, wãwen ko ad make enaj kwalok joñan lap in men ko jemaroñ kõmmane. (Jabõn Kennan Ko 3:27) Ñe jej lelok mweiuk ko ñan jibañ ro jet, jej aikwij kejbãrok bwe men in joij eo en jab rejañ ir ñan air jowan. (Jabõn Kennan Ko 20:1, 4; 2 Dri Tessalonika 3:10-12) Inem, jerbal in tiriamokake eo emol ej walok jen eñjake in tiriamo ekoba ad kwalok lolokjen.
17. Ta wãwen eo emõntata ñan kwalok tiriamokake ñan ro rejjab bed ilo congregation in Christian?
17 Wãwen eo emõntata ñan kwalok tiriamo ñan ro rejjab bed ilo congregation in Christian ej ñan kwalok nan ibbeir. Etke? Kinke enañin aolep armij ro rainin rej bed ilo marok kin men ko lor jitõb. Kin an ejelok ibbeir maroñ eo ñan kamadmõde abañ ko rej iioni im ejelok air kejatdikdik ñan ilju im jeklaj, enañin aolep armij rej “jibliklik einwõt s̃ip ko ejelok air s̃eperd.” (Matu 9:36) Ennan eo ilo Nan in Anij emaroñ jerbal einwõt juõn ‘lamp ñõn neiir,’ kinke emaroñ jibañ ir kamadmõde abañ ko air kin mour. Emaroñ bareinwõt juõn ‘meram ñan air ial’ kinke Bible eo ej kwalok kin karõk eo an Anij kin ran ko rej bed imad, im ej lelok ñan ir juõn bedbed ñan air debij juõn kejatdikdik emõn. (Sam 119:105) Ej juõn jerammõn ekanuij lap ñan keañ kin ennan eo emol ñan ro elap air aikwiji! Kinke jej bed ebake ien ‘eñtan eo elap,’ kiõ ej ien ñan ad kijejeto ilo jerbal in kwalok kin Ailiñ eo im jerbal in kõmman ri kalor. (Matu 24:3-8, 21, 22, 36-41; 28:19, 20) Ejelok bar juõn jerbal in tiriamo ej joñan an aorõkin wõt jerbal in.
Lelok “Men Ko Iloan”
18, 19. Etke jej aikwij kate ñan kalaplok wãwen an tiriamo jelet mour ko ad?
18 “Lelok men in tiriamo ko jen men ko iloan,” Jesus ear ba. (Luk 11:41) Elañe juõn jerbal emõn enaj walok kin tiriamo, ej aikwij itok jen iloan armij eo—jen juõn buru eyokwe im mõnõnõ. (2 Dri Korint 9:7) Ilo juõn lal ekkã an obrak kin lej, kibbon, im ejjab kea kin eñtan im abañ ko an armij, tiriamo rot in elap an emõn im kaemololo!
19 Inem, jen kate wõt kij bwe tiriamokake en alikarlok ilo mour ko ad. Elañe elaplok ad kwalok tiriamokake, enaj laplok ad einwõt Anij. Men in ej jibañ kij ñan mour ilo juõn wãwen elap an kamõnõnõ im kajuburu.—Matu 5:7.
Ta Eo Kwar Katak Kake?
• Etke ej juõn men elap an aorõk ñan kwalok tiriamokake ñan ri tõmak ro mõttad?
• Ewi wãwen jemaroñ kwalok tiriamokake iloan congregation in Christian?
• Ewi wãwen jemaroñ jerbale men ko remõn ñan ro rejjab bed ilo congregation eo?
[Pija eo ilo peij 8]
Ri Samaria eo ear kwalok tiriamo
[Pija ko ilo peij 9]
Ri Christian ro rej jebar elõñ jerbal ko kin tiriamo
[Pija eo ilo peij 10]
Wãwen eo emõntata ñan kwalok tiriamokake ñan ro rejjab bed ilo congregation eo ej ñan kwalok nan ibbeir