Kajur Meñe Jej Mõjno
MÕJNO ko am remaroñ kabwer yuk. Rej eddeb einwõt bilobar ko ion bar. Kwo maroñ lemnak bwe kwo jamin maroñ anjo ioir, ak kwo maroñ lemnak bwe ejelok tokjõm, im lemnak bwe ro jet remõnlok jen yuk. Ak, bõlen kwoj bõk juõn nañinmij enana me ej jelet kajur im mõnõnõ eo am kin mour. Jekdon ta un eo, kwomaroñ eñjake bwe kwo ban ellã ion abañ kein. Kwo maroñ eñjake einwõt kar Job, eo ear ba ñan Anij: “O emõn Kwon noj iõ ilo Hedis, im kejbãrok iõ ilo etino mae ien an mirlok Am illu, im kajejit ñõn iõ juõn ien, im kememej iõ!”—Job 14:13.
Ewi wãwen am maroñ ellã jen abañ in? Meñe emaroñ bin, kwoj aikwij bõjrak jen am lemnak kin abañ ko. Ñan wanjoñok, kwomaroñ etale kajitõk eo ekakõrmol an Jehovah ñan ri karejaran etiljek Job: “Kwar ber ia ke I ar likit loñtõk ko loñtõn lõl? Kwon kwalok, elañe eor jelalokjen ibõm. Wõn e ar bek kin joñok ko an, elañe kwo jela? ak wõn eo e ar kõnike juõn lain ion?” (Job 38:4, 5) Ke jej lemnak kin aorõkin kajitõk kein, alikar jenaj emmakit im kile meletlet im kajur eo elap an Jehovah. Ear kõtlok bwe wãwen eo ilo lal in rainin en wõnmanlok kin juõn un emõn.
“Juõn Kãliklik ilo Kõniekiõ”
Bar juõn ri karejaran Jehovah etiljek ear kajitõk ibben bwe en kamakit ‘juõn kãliklik ilo kõniekin,’ juõn abañ ej wõnmanlok wõt. Ri jilek Paul ear akwelap ilo an jar ñan Anij jilu alen ñan an rõlok jen abañ eo. Jekdon kar ta abañ eo, einwõt juõn kãliklik, emaroñ kar kõmman bwe Paul en luji mõnõnõ eo an ilo jerbal eo an Jehovah. Paul ear kõkkar kin kãliklik in ilo kanniekin einwõt ñe rej ubrare ien otemjej. Jehovah ear uak: “Aõ joij e bwe ñõn yuk, bwe Aõ kajur e wãppenlok ilo mõjino.” Jehovah ear jab jolok kãliklik eo jen kanniekin Paul. Paul ear aikwij kate, ak ear kobaiktok nan kein: “Bwe ñe I mõjino, inem I kajur.” (2 Kor. 12:7-10) Ta melelen an ba men in?
Abañ eo an Paul ear jab jako ilo juõn wãwen ekabwilõñlõñ. Meñe eindein, ear jab bõpraik e jen an kõtõbrak elõñ men ko relap ilo jerbal eo an Jehovah. Paul ear atartar wõt ion Jehovah ñan an rejetake im ien otemjej ear kajitõk ibben kin jibañ. (Pil. 4:6, 7) Ilo jemlokin lok mour eo an, Paul ear maroñ ba: “I ar tõrinae tõrinae emõn, I ar kamwijlok aõ elulu, I ar drebij tõmak eo.”—2 Tim. 4:7.
Jehovah ej kajerbal maan ro rejjab wãppen ñan air kõtõbrak ankilan jekdon ta likjap im abañ ko air, im e eo ej tellokin bõk nebar. Emaroñ lelok ñan ir tel im meletlet ñan air kijenmij ñe rej jelmae abañ ko im debij wõt mõnõnõ eo air ilo jerbal eo an. Aet, emaroñ kajerbal armij ro rejjab wãppen ñan air kõmmani jerbal ko relap jekdon ta mõjno ko air.
Paul ear kwalok etke Anij ear jab jolok kãliklik eo ilo kanniekin: “Bwe in jab jualõñlõñ.” (2 Kor. 12:7) “Kãliklik” eo an Paul ear kakememej e kin joñan maroñ ko an im ear jibañ e ñan an debij wõt juõn lemnak ettã kin e make. Men in ej einlok wõt men eo Jesus ear katakin kake: “Im jabrewõt eo e naj mõke koutiej e, naj kõtaik e; im eo e naj mõke kõtaik e, naj koutiej e.” (Mat. 23:12) Melejoñ ko remaroñ katakin ri karejar ro an Anij ettã buru im jibañ ir ñan air kile bwe ñan an juõn maroñ kijenmij ej aikwij in atartar ion Jehovah. Kin men in, einwõt ri jilek eo, remaroñ “kimjãje ilo Iroij [Jehovah].”—1 Kor. 1:31.
Mõjno ko Rittino
Jet emaroñ wõr air mõjno ko me rejjab kile ak rej ãliklik in kwaloki. Ñan wanjoñok, juõn armij emaroñ lap an liki emake ellã jen joñan, im atartar ion make. (1 Kor. 10:12) Bar juõn mõjno ekkã an walok ñan armij ro rejjab wãppen ej kõnan eo bwe ro jet ren kautiej ir.
Joab, eo ear erom kaben in jar in tarinae eo an King David, ear beran, ewõr an kabel ñan kõmman bebe ilo mõkaj ilo ien ko rebin, im maroñ kamadmõd abañ ko. Bõtab, Joab ear wõr ruõn kin juõn bwid elap eo im ear kwalok juõn jitõb in wãlok im juõn kõnan elap ñan bõk kajur ak maroñ. Ilo lej ear mõn ruo kaben in jar in tarinae. Mokta ear irenwone ilo an mõn Abner. Tokelik, ilo mon ke ej yokyokwe leo rilikin Amasa, Joab ear jibwe kwõdeak ko an Amasa kin pein anbwijmaroñ einwõt ñe ej iten mejenmaiki inem ear wãkare kin jãje eo ej bed ilo pein tuanmiñ. (2 Sam. 17:25; 20:8-10) Amasa ear bõk jerbal eo an Joab einwõt kaben in jar in tarinae ko im Joab ear bõk ien in ebellok ñan an jolok ri jumae eo an, bõlen ilo an kejatdikdik bwe enaj kar bar bõk jerbal eo an. Kwomaroñ lo bwe Joab ear jab debij eñjake eo an, ekoba kõtõbar eo an ekibbon. Ear jerbal ilo lej ak ear jab buromõj ak ajlok kin men eo enana ear kõmmane. Ke ear ebake an King David mij, ear jiroñ leo nejin, Solomon bwe Joab en bõk kaje ak mij kin nana eo ear kõmmane.—1 Kiñ. 2:5, 6, 29-35.
Jej jab aikwij kõtlok bwe kõnan ko ad rebwid ren anjo jen kij; jemaroñ anjo ion mõjno ko ad. Mokta jej aikwij jelã im kile mõjno ko ad. Inem emmakit ñan ad anjo ioir. Jemaroñ jar ñan Jehovah ien otemjej, kajitõk jibañ eo an ñan ad anjo ion mõjno ko, im ilo niknik katak Nan eo an, im bukõt wãwen ko ñan ad tarinaik kõnan kein. (Hib. 4:12) Ak jenaj bõlen aikwij in wõnmanlok wõt im anjo ion likjap ko im jab ebwer. Tarinae in emaroñ wõnmanlok wõt toan wõt ad jab wãppen. Paul ear kalikar men in kin emake, ej jeje: “Bwe jab men eo I kõnan, men in ij kõmõn; a men eo ij kijirãte, men in ij kõmõne.” Bõtab, einwõt am jelã, Paul ear jab kõtlok bwe mõjno eo an en anjo, einwõt ñe ear jab maroñ debij kõnan ko an. Ear jab eindein, ak ear kate tarinaik mõjno ko an, im atartar ion jibañ eo an Anij ikijen Jesus Christ. (Rom. 7:15-25) Bar juõn ien, Paul ear ba: “Ij jekanunõk enbwiniõ, im kamakokoik e, bwe ilo jabrewõt, mõjen aõ kwalok gospel ñõn ro jet, ña in jab joko.”—1 Kor. 9:27.
Armij ro ekkã air kõmman jekben kin men ko rej kõmmani. Jemaroñ jumae men in ilo ad kaddek lemnak eo an Jehovah, kõmman einwõt an kar Paul rejañ Ri Christian ro: “Komin jõjõike men eo enana; komin edrep ñõn men eo emõn.” (Rom. 12:9) Ilo tarinae eo ñan ad anjo ion mõjno ko, jenaj aikwij mol, kate, im jelã debij kõnan ko ad make. David ear kajitõk ibben Jehovah: “Kwon ekajete kõnan ko aõ im lemnak ko aõ.” (Psa. 26:2) Ear jelã bwe Anij emaroñ etale ilo jejjet kõnan ko ad remũlal tata im letok ñan kij jibañ ñe jej aikwiji. Ñe jej lor tel ko Jehovah ej litok ikijen Nan eo an im jitõb kwojarjar eo an, jemaroñ kõmman wõnmanlok ñan ad anjo ion likjap ko ad.
Jet remaroñ inebata kin abañ ko me rej eñjake bwe rejjab maroñ make kamadmõdi. Elder ro ilo congregation eo remaroñ lewõj jibañ im nan in rejañ ko ilo yokwe. (Ais. 32:1, 2) Ak ej juõn men in meletlet ñan ad kwalok kõmmanwa kin men ko jej kõtmene kaki. Ñan jet abañ ko, ejelok mejelan ko reyu ilo jukjuk im bed in kiõ. Mekarta, elõñ rar katak ñan air kijenmij, im men in ear kamaroñ ir ñan air mour ilo juburu.
Kein Kamol kin Rejetak eo an Jehovah
Jekdon ta abañ ko jej jelmae ilo ien kein rebin, jemaroñ liki bwe Jehovah enaj tel im rejetak kij. Bible eo ej rejañ kij: “Inem komin kõtãik kom iomin pein Anij ekajur, bwe En koutiej kom ilo ien ekar: Im komin likit ami inebata otemjej na iben, bwe Ej ierki kom.”—1 Pit. 5:6, 7.
Ke Kathy, eo etto an jerbal ilo Bethel iumin elõñ yiõ ko, ear lo bwe leo belen ear bõk nañinmij eo etan Alzheimer (Juõn nañinmij me jidik kin jidik ej kõmman bwe en jab emõn an kamelij eo jerbal), ear lemnak bwe ejamin naj kar maroñ kijenmij iumin wãwen ko rebin me renaj walok jen nañinmij in. Akwelap ilo jar ñan Jehovah kin meletlet im kajur ilo eñjake ear oktak im juõn men ear aikwij in kõmmane kajjojo ran. Ke ejmour eo an leo ibben ear nanalok, maan ro jein im jatin ilo jitõb rar kwalok yokwe eo an Christian ilo air bõk ien im kate ir ñan air melele kin nañinmij eo, im kõrã ro jein im jatin Kathy ilo jitõb rar rejetake ilo eñjake. Ri Christian rein rar mõttan kein kakajur ko Jehovah ear letok, im Kathy ear maroñ kauk leo belen mae ien eo ear mij enañin 11 yiõ ko tokelik. Kathy ej ba: “Kin den in kemjalal im jen aolepen buruõ iar kamolol Jehovah kin aolep jibañ ko an, ear jibañ iõ wõnmanlok wõt. Iar jab jelã bwe imaroñ wõnmanlok wõt im kõmman men eo iar aikwij bwe in kõmmane iumin juõn ien aetok meñe ij mõjno kin aõ mõk!”
Jibañ ñan Anjo ion Mõjno ko Rittino
Ñe kajjojo armij rej eñjake bwe ejelok tokjeir, remaroñ lemnak bwe Jehovah ejamin roñjake ñe rej kir kin jibañ ilo ien rej eñtan. Inem ej juõn men elukkun emõn ñan ad lemnak kin ta eo David ear ba ke ear eñjake an buromõj kin bwid eo elap ear kõmmane ibben Bath-sheba: “Buru erup im etã O Anij, Kwo jamin kejekron.” (Sam 51:17) David ear ukwelok ilo mol, im ear jelã bwe emaroñ kar kebak Anij im ear wõr an liki bwe enaj kar tiriamokake e. Jesus ear kwalok eñjake eo an Jehovah. Ri jeje Gospel eo Matthew ear jerbale nan ko an Aiseia ñan Jesus: “Koba eobõp E jamin ruje, flax e batat E jamin kwũne.” (Mat. 12:20; Ais. 42:3) Ke ear bed ijin ion lal, Jesus ear kwalok tiriamokake ñan ro rettã im ro rar jorrãn. Ear jab, ilo kõkkar kune kijeek in mour eo an juõn eo ear einwõt wick eo an juõn lamp enañin kun. Jen an eindein, ilo joij ear lale im kejbãrok ro rej eñtan im bar kaurur kijeek in mour eo air. Eñin kar wãwen an jerbal ke ear mour ibben armij ro. Kwoj tõmak ke bwe Jesus ej wãwen dein wõt im bwe emaroñ tiriamokake mõjno ko ad? Lale Dri Hibru 4:15 ej kalikar bwe e ej Juõn eo emaroñ “tiriamokake mõjino ko ar.”
Ke ej jeje kin “kãliklik ilo [kõniekin],” Paul ear lo bwe kajur an Christ ear “ber” ion. (2 Kor. 12:7-9) Ear eñjake kejbãrok eo an Anij ikijen Christ, einlok wõt armij eo ej bed ilo juõn em nuknuk, ej eñjake an bõk kejbãrok jen lañ ko. Einwõt Paul, jejjab aikwij kõtlok bwe mõjno im abañ ko ad ren anjo iod. Ñan ad kejbãrok wõt kõtan eo ad emõn ibben Anij, jemaroñ kajerbal aolep menin letok ko Jehovah ej litok ikijen congregation eo an ion lal. Jemaroñ kõmman jabdewõt men jemaroñ kõmmane inem reilok ñan Jehovah kin liki bwe enaj tel ial ko ad. Ilo ad lo wãwen an kajur eo an Anij jibañ kij kin mõjno ko ad, jemaroñ ba einwõt kar Paul: “Ñe I mõjino, inem I kajur.”—2 Kor. 12:10.
[Pija eo ilo peij 3]
Paul ear wõnmanlok wõt im jar ñan Jehovah ñan tel e bwe en kõtõbrak jerbal eo an
[Pija eo ilo peij 5]
King David ear jitõñ Joab ñan an lale jar in tarinae eo
[Pija eo ilo peij 5]
Joab ear emmakit im mõn Amasa, eo ear jumaik e
[Pija eo ilo peij 6]
Ilo yokwe elder ro rej letok nan in tel jen Bible eo me remaroñ jibañ kij ñan ad kijenmij iumin abañ ko