Kijenmij Kin “Juõn Kãliklik Ilo Kõniek”

“Aõ joij e bwe ñõn yuk.”​​—⁠2 DRI KORINT 12:⁠9.

1, 2. (a) Etke jejjab aikwij bwok kin melejoñ im abañ ko jej jelmae? (b) Etke jej aikwij beranlok wõt meñe jej jelmae melejoñ ko?

“RO otemjej re kõnan mour im kwojarjar ilo Kraist Jisõs, naj matõrtõre ir.” (2 Timote 3:​12) Etke ej eindein? Kinke Satan ej ba bwe armij ej jerbal ñan Anij kin un ko rekibbon, im ej kate wõt e ñan kamole nan ko an. Juõn ien Jesus ear kakkõl ri jilek ro an retiljek: “Setan e ar kõnan bõk yuk bwe en liklik yuk einwõt wit.” (Luk 22:31) Jesus ej jelã bwe Anij ej kõtlok Satan bwe en melejoñe kij ikijen abañ ko rekõmetak kij. Emol, ejjab melelen bwe aolep abañ ko jej jelmae rej kajju tok jen Satan im dimon ro an. (Ekklisiastis 9:​11) Ak Satan ej kijoror in kajerbal jabdewõt wãwen joñan wõt an maroñ ñan rupe tiljek eo ad.

² Bible eo ej jiroñ kij bwe jejjab aikwij bwok kin melejoñ ko ad. Jabdewõt men ej buñõt kij, ejjab juõn men jej ruwamaejet kake ak jab kõtmene kake. (1 Piter 4:​12) Emol, “iñtan kein, ro jeõmi im jatõmi rej ber i lõl, rej iñtan kaki.” (1 Piter 5:⁠9) Ran kein, elap an Satan jibede aolep ri karejar ro an Anij. Devil eo ej mõnõnõ in lo ad eñtan ilo elõñ kain abañ ko rej einwõt kãliklik ko. Ñan kõtõbrak men in, ej kajerbal jukjuk im bed in an ilo juõn wãwen kalaplok jabdewõt kain ‘kãliklik ko ilo kannieked.’ (2 Dri Korint 12:⁠7) Mekarta, nitbwil eo an Satan ejjab aikwij rupe tiljek eo ad. Einwõt an Jehovah naj “kõmõn ial in ko” ñan kij bwe jen kijenmij iumin men in kabo eo, enaj kõmman eindein ñe jej jelmae abañ ko rej einwõt kãliklik ko ilo kannieked.​​—⁠1 Dri Korint 10:⁠13.

Ewi Wãwen Bõk Anjo Ion juõn Kãliklik

3. Ewi wãwen an Jehovah kar uak ke Paul ear kajitõk bwe en jolok kãliklik eo ilo kanniekin?

³ Ri jilek Paul ear eowore Anij ñan jolok kãliklik eo ilo kanniekin. “I ar akwelap ñõn Iroij kin men in alen jilu, bwe en joko jen iõ.” Kar ta uak eo an Jehovah ñan kajitõk eo an Paul? “Aõ joij e bwe ñõn yuk; bwe Aõ kajur e wãppenlok ilo mõjino.” (2 Dri Korint 12:​8, 9) Jen etale uak in im lale wãwen an maroñ jibañ kij anjo ion jabdewõt abañ in kãliklik ko rej kõmetak kij.

4. Ilo wãwen et ko Paul ear kortokjen joij im yokwe eo an Jehovah?

⁴ Lale bwe Anij ear rejañ Paul ñan kwalok an kamolol kin joij im yokwe eo emwij kwalok e ikijen Christ. Emol, Paul ear bõk elõñ jerammõn ko ilo elõñ wãwen ko. Ilo yokwe Jehovah ear lelok ñan e jerammõn in erom juõn ri kaloran Christ, meñe ear juõn ri jumae eo ekijejeto nae ri kalor ro an Jesus. (Jerbal 7:​58; 8:3; 9:​1-4) Tokelik Jehovah ear lelok ñan e ilo joij jerbal im jerammõn ko remõn. Ej alikar men eo jemaroñ katak jen men in. Meñe ilo ien ko renana, elõñ wõt jerammõn ko rej bed ibbed im jemaroñ kamolol kaki. Jejjab kõnan kõtlok bwe melejoñ ko ad ren kõmman bwe jen meloklok kin aolep men ko remõn Jehovah ear letok ñan kij.​​—⁠Sam 31:⁠19.

5, 6. (a) Ewi wãwen an Jehovah kar katakin Paul bwe kajur eo ekwojarjar ear “wãppenlok ilo mõjino” eo? (b) Ewi wãwen an joñok eo an Paul kar kamol bwe Satan ej juõn ri riap?

⁵ Yokwe im joij eo an Jehovah ej kabwe bar juõn men. Kajur eo an Anij elap an bwe ñan jibañ kij ilo melejoñ ko ad. (Dri Epesõs 3:​20) Jehovah ear katakin Paul bwe kajur eo ekwojarjar ej “wãppenlok ilo mõjino ko.” Ewi wãwen? Ilo yokwe ear lelok ñan Paul aolepen kajur eo ear aikwiji ñan anjo ion melejoñ eo an. Jeltokin, kijenmij eo an Paul im liki eo an ilo Jehovah rar kalikar ñan aolep bwe kajur eo an Anij ear bõk anjo ion emaan in emõjno im jerawiwi. Kiõ lale wãwen an men in jelet Devil eo, eo ej ba bwe armij ej karejar ñan Anij ñe emõn air mour im ejelok abañ ko jabdewõt. Tiljek eo an Paul ear einwõt ubrare mejen ri ruruwe eo!

⁶ Paul in, eo ear kobalok ibben Satan mokta ilo tarinae eo an nae Anij, juõn eo eutiej buru im matõrtõre Ri Christian ro, juõn Ri Pharisee eo ekijejeto im ilo ejelok bere ar lañliñ in bõk elõñ mweiuk ko remõn ilo an mour kinke ear lotak ilo juõn family eo eutiej im mweie. Kiõ Paul ear jerbal ñan Jehovah im Christ einwõt juõn eo “eriktata ian dri jilik” ro. (1 Dri Korint 15:⁠9) Kiõ, ilo ettã buru ear kõttãik e ñan Ri Christian ri tel ro governing body eo ilo ebeben eo kein kajuõn. Im ear kijenmij ilo tiljek meñe kãliklik eo ear bedwõt ilo kanniekin. Einwõt juõn men in kakitõtõik Satan, melejoñ ko Paul ear jelmae ilo mour eo an rar jab kõmman bwe kijejeto eo an en jakolok. Paul ear jab luji ñan jidik an reimanlok wõt ñan kejatdikdik eo bwe en wõr kunan ilo Ailiñ eo an Christ ilañ. (2 Timote 2:​12; 4:​18) Ejelok jabdewõt kãliklik, jekdon joñan an metak, emaroñ kar kadiklok kijejeto eo an. Eindein, jej aikwij bwe kijejeto eo ad en wõnmanlok im kajur wõt! Ilo an kejbãrok kij iumin melejoñ ko ad, Jehovah ej kautiej kij ilo an letok jerammõn eo ñan jibañ e kamol bwe Satan ej juõn ri riap.​​—⁠Jabõn Kennan 27:⁠11.

Men In Letok ko an Jehovah Rej Aorõk

7, 8. (a) Ewi wãwen an Jehovah kakajur ri karejar ro an ilo ran kein? (b) Etke read im katak Bible jen ran ñan ran elap an aorõk ñan kijenmij jen juõn kãliklik ilo kannieked?

⁷ Ran kein, Jehovah ej kamaroñ Ri Christian ro retiljek ikijen jitõb kwojarjar eo an, Nan eo an, im dolul in Ri Christian jimjãn jimjatin eo ad. Einwõt ri jilek Paul, jemaroñ likit eddo ko ad ion Jehovah ilo jar. (Sam 55:22) Meñe Anij emaroñ jab jolok melejoñ ko, emaroñ letok ñan kij meletlet eo ñan kijenmij, elaptata melejoñ ko ebwe air bin. Bareinwõt Jehovah emaroñ kakajur kij​​—⁠ilo an letok ñan kij “maroñ eo e kanuij lap”​​—⁠ñan jibañ kij kijenmij.​​—⁠2 Dri Korint 4:⁠7.

⁸ Ewi wãwen ad bõk kain jibañ rot in? Jej aikwij niknik ilo katak Nan in Anij, kinke jenaj lo nan in kainemõn ko iloan. (Sam 94:19) Ilo Bible eo, jej read kin nan ko an ri karejaran Anij rej uñure buruen armij, im remõn ñan kalmenlokjen kake. Ekkatak enaj kakajur kij bwe “maroñ eo e kanuij lap en jen Anij, im jab jen” kij make. Einwõt ñe jej aikwij mõñã ekan ko lor kanniek ran otemjej ñan bõk õn im kajur, eindein bareinwõt jej aikwij keini in katak nan ko an Anij. Jej kõmmane ke men in? Elañe jej kõmmane men in, inem jenaj lo bwe ad bõk “maroñ eo e kanuij lap” enaj jibañ kij ñan kijenmij iumin jabdewõt kãliklik ko remaroñ kõmetak kij kiõ.

9. Ewi wãwen elder ro remaroñ rejetak ro rej kijenmij kin abañ ko?

⁹ Ri Christian elder ro rej mijak Anij remaroñ “einwõt jikin tilekek jen kõto” in inebata, “juõn ken tõrak jen lañ” in abañ ko. Elder ro, rekõnan jerbal einwõt wãwen kein, rej kajitõk ilo ettã buru im mol ibben Jehovah ñan lelok ñan ir “loin ro emwij katakin ir” bwe ren jelã ewi wãwen air kajerbal nan ko rejimwe ñan uake ro rej eñtan. Nan ko an elder ro remaroñ einwõt utdikdik ko rej kaemololo im kainemõn jitõb eo ad ilo ien ko ebin mour ie. Ilo air “kaberan ro re kũmkũm,” elder ro remaroñ lukkun kõketak ro jeiir im jatiir ilo jitõb maan im kõrã ro rej mõk ak buromõj kinke ewõr kãliklik ko ilo Kanniekir.​​—⁠Aiseia 32:2; 50:4; 1 Dri Tessalonika 5:​14.

10, 11. Ewi wãwen an ri karejar ro an Anij bar rejañ ro me rej bed ilo melejoñ ko relap?

¹⁰ Aolep ri karejar ro an Jehovah rej mõttan family in Christian eo an eburukuk. Aet, jej einwõt ro rej “ran dron,” im ewõr juõn eddo ibbed ñan “yokwe dron.” (Dri Rom 12:5; 1 Jon 4:​11) Ewi wãwen ad kajejjet kitien eddo in? Ekkar ñan 1 Piter 3:​8, jej kõmman eindein ilo ad “[buruõd] otemjej wõt juõn, . . . tiriamokake dron, . . . yokwe einwõt jimjãn jimjãten” ñan aolep ri tõmak ro mõttad. Ikijen ro rej kijenmij kin juõn kãliklik elukkun metak ilo Kanniekir, jekdon elañe rej dik ak ritto, kij aolep jemaroñ lemnak kake ir ilo juõn wãwen ejej uan. Ewi wãwen?

¹¹ Jej aikwij kate kij ñan eñjake eñtan eo air. Elañe ejelok buromõj kin ir, ejelok eñjake, ejelok ad itoklimo kin ir, jemaroñ kalaplok air eñtan. Ad jelã kin melejoñ ko air enaj kamakit kij bwe jen lale ta eo jej ba, ewi wãwen ad konono ñan ir, im ewi wãwen ad jerbal ñan ir. Ad bõk juõn lemnak emõn im rejañ ir emaroñ jibañ ñan kadiklok eñtan eo jen jabdewõt kãliklik eo ej kaeñtan ir. Jemaroñ einwõt juõn men in kakajur ñan ir.​​—⁠Dri Kolosse 4:​11.

Ewi Wãwen An Jet Retiljek ro Rar Kijenmij

12-14. (a) Ta eo juõn Ri Christian ear kõmmane ñan kijenmij jen nañinmij in cancer? (b) Ewi wãwen an ri tõmak ro jein im jatin kõrã in jurak im rejañ e?

¹² Ñe jej ebaklok ñan jemlokin ran kein, “iñtan ko” renaj laplok wõt jen ran ñan ran. (Matu 24:⁠8) Inem, melejoñ ko remaroñ kaeñtan armij otemjej ion lal, elaptata ri karejar ro retiljek an Jehovah, rej kõmanman ankil an. Ñan wanjoñok, lemnak kin juõn Ri Christian eo ej kwalok nan full-time. Rar kile e einwõt juõn eo ear nañinmij kin cancer im rar aikwij mwijiti salivary im lymph gland ko jen buruen im joloki. Ke e im leo ibben rar jelã kin nañinmij in an, rar eowor ilo mõkaj ñan Jehovah kin juõn jar eaetok, im eowore. Ear ba tokelik bwe juõn ainemõn ekabwilõñlõñ ear itok ion. Ak, ear kijenmij ilo ien ko remõn im nana, elaptata ke ear aikwij kijenmij kin eñtan ko rar waloktok jen uno in kamadmõdi nañinmij eo an.

¹³ Ñan kamadmõde men in, liin ear kamaat an maroñ ñan jelã kin nañinmij in cancer eo an. Ear konono ibben doctor ro an. Ilo magazine kein Imõniaroñroñ, Awake!, im book ko eirlok wõt, ear lo bwebwenato ko an armij kin ewi wãwen an kar armij ro kajjojo kijenmij wõt kin nañinmij in. Bareinwõt ear readi eon ko ilo Bible ko rej kalikar maroñ eo an Jehovah ñan jurake armij ro an ilo ien abañ ko, im nan in kamelele ko jet ewõr jibañ ie.

¹⁴ Juõn katak ikijen kijenmij ilo ien buromõj ear kwalok nan kein: “Eo ej makelok ian, ej kabukot kõnan eo an, im ej lej nae meletlet otemjej e keie.” (Jabõn Kennan 18:⁠1) Inem katak in ear letok nan in kakabilek in: “Jumae Men in Kamakelok ian.”a Kõrã ri tõmak eo ear ba: “Elõñ rar jiroñ iõ bwe rar jar kin iõ; ro jet rar telephone tok ñan ibbã. Ruo elder ro rar keini air telephone tok iõ im lale ewi wãwen aõ mour. Iar bõk wut ko im elõñ card in yokyokwe ko. Bareinwõt jet iair rar keboje kijiõ. Bareinwõt, elõñ rar mõnõnõ in bõk eddo eo ñan ãñinlok iõ ñan doctor.”

15-17. (a) Ewi wãwen an juõn Ri Christian kijenmij jen abañ ko rar walok jen lanwõtwõt ko? (b) Ta men in jibañ eo ro iloan congregation eo rar lelok ñan e?

¹⁵ Juõn ri karejar eo an Jehovah etto an karejar ñan e ilo New Mexico, U.S.A., ear bed ilo ruo lanwõtwõt ko kin waan ettõr ko. Kenwan im aeran rar jorrãn, im ear kalaplok kũrro eo an eo ear kijenmij kake iumin elõñlok jen 25 yiõ ko. Ear ba: “Ear lap an bin aõ kotak bõra im inek jabdewõt men eddo lok jen lalem pound. Ak jar ilo kijejeto ñan Jehovah ear lukkun kakajur iõ. Katak ko jej ekkatak kaki ilo magazine in Imõniaroñroñ eo rar kõmman eindein bareinwõt. Juõn iair ear kamelele kin Micah 6:​8 (NW), im kwalok bwe etetal ilo inemõn ibben Anij ej melelen ad kile ewi joñan maroñ ko ad. Men in ear jibañ iõ ñan kamolol bwe jekdon ta wãwen eo ej ber , Ijjab kõnan ebwer, meñe joñan awa ko ij kajerbali ñan kwalok nan rar eietlok jen joñan eo iar kõnan. Karejar ñan e kin aolepen buruõd ej men eo eaorõktata.”

¹⁶ Bareinwõt ear ba: “Elder ro rar nebar iõ ien otemjej kin aõ kate wõt iõ ñan bed ilo kwelok ko im etal im kwalok nan. Ro redik rar yokyokwe iõ ilo air atbokwõj iõ. Ri kwalok ro rej pioneer rar meanwõd ibba im ekkã air ukõt schedule ko air ilo ran ko iar nañinmij im jab maroñ kwalok nan. Ke ear jab emõn lañ, ilo joij rar ãñinlok iõ ke rar bar jeblak ñan armij ro ak kir iõ bwe in jijet ibbeir ke rar katak Bible ibben ri katak ro air. Im ke iar jab maroñ bõklok juõn ieb in kwalok nan, ri kwalok ro jet rar bõk kein lelok ko aõ ilo ieb ko air ke iar bõk kunaõ ilo jerbal in kwalok nan.”

¹⁷ Lale mõk kin ewi wãwen elder ro ilo congregation eo im ri tõmak ro mõttair rar jibañ limarein ruo bwe ren kijenmij kin nañinmij ko air rej einwõt kãliklik. Ilo joij im wãwen ko rekeie rar jibañ ir ñan kabwe aikwij ko air ilo jitõb, kanniek, im eñjake. Wãwen kein rejjab ke rejañ yuk ñan jibañ bar jet lõmaro im limaro ilo tõmak rej lo kain abañ rot kein? Kom jodikdik ro bareinwõt kom maroñ jibañ ro rej jelmae kãliklik ko ilo kanniek.​​—⁠Jabõn Kennan 20:⁠29.

18. Ta nan in rejañ eo jemaroñ loe ilo bwebwenato ko an armij rar jeje ilo magazine kein Imõniaroñroñ im Awake!?

¹⁸ Magazine in Imõniaroñroñ im Awake! rar kwalok elõñ bwebwenato ko kin Ri Kennan ro rar kijenmij mokta, im rej kijenmij ñan kiõ, kin abañ ko an mour. Ñe kwoj keini in read katak kein, kwonaj lo bwe elõñ ian ro jeid im jatid ilo jitõb ibelakin lal rar aikwij kijenmij kin abañ ko kin wõnãn mour, luji jitenburu ro air ilo jorrãn ko an lal, im tarinae ko rekauwatata. Ro jet rej kijenmij kin kain nañinmij in mij turãjetiir. Elõñ rejjab maroñ kõmman men ko ro rejmour remaroñ kõmmane ilo tubidodoin. Elap an nañinmij ko air melejoñe ir, elaptata ñe rejjab maroñ bõk kunair ilo jerbal ko an Christian joñan wõt air kõnan kõmmane. Elap air kamolol kin jibañ im rejetak eo an ro jeiir im jatiir, ro redik im reritto, rej kwalok ñan ir!

Kijenmij Ej Bõktok Mõnõnõ

19. Etke Paul ear maroñ lañliñ wõt meñe ear jelmae elõñ melejoñ im likjap ko einwõt kãliklik ko an?

¹⁹ Paul ear mõnõnõ in lo wãwen an kar Anij kakajur e. Ear ba: “I kanuij mõnõnõ . . . in kemjãje kin mõjino ko aõ, bwe kajur eo an Christ en bed ioõ einwõt juõn em nuknuk. Inem buñburuõ ilo mõjino ko, ilo kajirere ko, ilo aikwij ko, im matõrtõr im abañ ko, kin Christ. Ñe ij mõjino, inem ij kajur.” (2 Corinthians 12:​9, 10, NW) Kin an make lo men in, Paul ear maroñ ba kin aolepen buruen: “Jab bwe ij konono kin aikwij: bwe emwij aõ katak, ilo jabrewõt kijkan aõ ber, in jokõne. I jela toõn bõptoa: ijo ko otemjej im ilo men otemjej emwij katakin iõ bwe in mãt im kab bwe in kwuli, bwe in bõptoa im kab bwe in aikwij. I maroñ in kõmõn men otemjej ilo Eo ej kakajur iõ.”​​—⁠Dri Pilippai 4:​11-​13.

20, 21. (a) Etke jemaroñ lo lañliñ ñe jej kalmenlokjen kin “men ko jejjab loi”? (b) Ta jet ian “men ko jejjab loi” ak kwoj kejatdikdik in loi kin mejem ilo Paradise eo ion lal?

²⁰ Inem, ilo ad kijenmij iumin jabdewõt kãliklik in kõkkar eo ilo kanniek, jemaroñ bõk elap mõnõnõ ilo ad kwalok ñan armij otemjej bwe kajur eo an Jehovah ej wãppenlok kin mõjno ko ad. Paul ear je: “Kim jab ebwer . . . ijoke kõkal am ran otemjej. Bwe am iñtan eo emera im iumelok, elap otem lap an jerbale ñõn kim aibujuij e jemlõm erro im in drio. Ke kimij kalimjek men ko . . . jejjab loi: bwe men ko . . . jejjab loi rej in drio.”​​—⁠2 Dri Korint 4:​16-​18.

²¹ Enañin aolep armij ro an Jehovah ilo ran kein rej kejatdikdik ñan mour ilo Paradise eo an ion lal im bõk jerammõn ko ear kallimur kake. Kain jerammõn rot kein jemaroñ watõki einwõt “men ko jejjab maroñ loi” ilo ran kein. Bõtab, ien eo ñe jenaj lo jerammõn kein kin mejed, im lañliñ kaki ñan indio ej mõkajtok wõt. Juõn ian jerammõn kein enaj walok ñe jej rõlok jen ien eo jejamin bar eñtan kin jabdewõt abañ einwõt kãliklik ko! Nejin Anij enaj “kokkure jerbal ko an Devil” im “kokkure devil eo, [bwe] kajur in mij iben.”​​—⁠1 Jon 3:8; Dri Hibru 2:​14.

22. Ta eo jej aikwij liki kake im beek in kõmmane?

²² Kin men in, jabdewõt kãliklik eo ej wie kanniekid, jen kijenmij kake. Einwõt Paul, enaj wõr kajur ibbed ñan kõmman eindein jen Jehovah, eo ej kakajur kij. Ñe jej mour ilo Paradise ion lal, jenaj nebar Jehovah aduij Anij ran otemjej kin men ko remõn otemjej an.​​—⁠Sam 103:⁠2.

[Kamelele ko itulal]

Ewi Wãwen Am Naj Kar Uak?

• Etke im ewi wãwen Devil eo ej kajeoñ in rupe tiljek eo an Ri Christian ro remol?

• Ewi wãwen kajur eo an Jehovah ear “wãppenlok ilo mõjino”?

• Ewi wãwen an elder ro im ro jet maroñ rejañ ro rej inebata kin abañ ko?

[Pija eo ilo peij 10]

Jilu alen Paul ear jar bwe Anij en jolok kãliklik eo jen kanniekin