Etke Jerbal ko Rejjab Jim̦we im M̦ool Rej Wal̦o̦k Wõt?

“Juon armej ewõr an maroñ ioon bar juon bwe en kajorrããn e.”​​—EKKLISIASTIS 8:⁠9.

ELUKKUUN jejjet naan kein ilo eoon in kõnke eñin wãween an kar armej ro tõl jãn jem̦aan tok ñan kiiõ. Eñin unin elukkuun lõñ jorrããn ko rej wal̦o̦k. Jãn etto, elõñ armej ro rar lukkuun kõn̦aan jipañ bwe en jim̦wel̦o̦k jerbal ko rej wal̦o̦k ak rejjab lo tõprak. Etke? Eokwe ej kõn an ro jet kũbbon̦ im kõn̦aan bwe ren bõk jeraam̦m̦an ko ñan er make. Ta unin ej wal̦o̦k men in? Etke jerbal ko rejjab jim̦we im m̦ool rej wal̦o̦k wõt? Eokwe, ewõr jilu men ko me rej jelõt armej im kõm̦m̦an bwe ren jab jim̦we ilo aer jerbal.

1. Jejjab weeppãn.

Baibõl̦ ej ba bwe jej pãd “ium̦win jerawiwi” ak jejjab weeppãn. (Rom 3:⁠9) Ej ãinwõt juon nañinmej me jaar bõke jãn jemed im jined im ej pãd ippãd. Jerawiwi ej ãinwõt juon ad irooj kõnke jãn etto in an tõl mour ko ad im ej ãindein an wõnm̦aanl̦o̦k wõt. Jerawiwi ej kõm̦m̦an an elõñ armej kõn̦aan likũt kõn̦aan ko aer m̦okta jãn ro jet. Im ej kõm̦m̦an aer kõn̦aan bwe ren m̦weiie im jeraam̦m̦an ak bwe ren jerbal ilo jab jim̦we im m̦ool ñan ro jet.​—Rom 5:21; 7:​17, 20, 23, 25.

2. Kapo ko jãn armej ro jej mour ibwiljier.

Lal̦ in eobrak kõn armej ro rekũbbon̦ im el̦ap aer l̦õmn̦ak wõt kõn er make. Kõn an ãindein, ro me rejjab kõn̦aan kõm̦m̦ani men kein renana epen aer oktak jãn ro jet. Kõn an armej kõn̦aan katõprak kõn̦aan ko aer rekũbbon̦, rej kate er ñan kõm̦m̦an bwe en l̦ap aer maroñ im kajoor. Rej bar kõn̦aan bwe en l̦ap aer m̦weiie meñe ejjab menin aikuj ñan er. Eñin unin rej jerbal ilo jab jim̦we im m̦ool bwe en tõprak kõn̦aan kein aer. Ijello̦kun an armej ro kõjparok er bwe ren jab po ilo men kein, rej ‘l̦oor elõñ armej ñan kõm̦m̦ani men ko renana.’​—Exodus 23:⁠2.

3. Kapo ko jãn Setan Tepil̦ eo.

Setan ej juon jetõb eo ej jum̦ae im ej ‘m̦on̦e aolepen lal̦.’ (Revelesõn 12:⁠9) Ej kate wõt ñan kapo im m̦on̦e armej ro. Men in ej kam̦õn̦õn̦õik e. Armej rekõn̦aan bwe en em̦m̦an kõjeiier im lõñ aer m̦weiuk im jããn. Bõtab, Setan ej m̦on̦e armej ro ilo an kõjerbal kõn̦aan kein aer m̦ae iien eo repo im kõm̦m̦ani jerbal ko rejjab jim̦we im m̦ool.

Mel̦el̦ein ke bwe jej pãd ium̦win pein Setan im ej iuuni kõj bwe jen pokake e? Eokwe, jenaaj etale uwaak eo ilo katak eo tok juon.