KATAK KO KÕN TAITÕL̦IN BOK IN | ETKE JET ARMEJ REJ L̦ÕMN̦AK BWE EPEN ÑAN YOKWE ANIJ?
Unin Epen An Jet Armej Yokwe Anij
“Kwõn yokwe Irooj [Jeova] am̦ Anij kõn aolepen bũruom̦ im kõn aolepen am̦, im kõn am̦ l̦õmn̦ak otemjej. Eñin kien eo el̦ap im m̦okta.”—Jijej Kũraij ear ba naan kein ilo iiõ eo 33.a (Lale kõmel̦el̦e eo itulal̦.)
Epen an jet armej yokwe Anij. Taunin? Eokwe, rej ba bwe epen aer mel̦el̦e kake Anij. Bareinwõt rej ba bwe ejjab kea im kaorõk er, im enana an kõm̦m̦an ñan armej. Jen lale ta ko jet armej rar ba kõn men in:
“Meñe aolep iien iar jar im kajjitõk jipañ ippãn Anij, iar l̦õmn̦ak bwe ejjab epaake kõj armej. Ikõn l̦õmn̦ak bwe ejjel̦o̦k an Anij kea im yokwe.”—Marco, jãn Itali.
“Meñe iar lukkuun kõn̦aan bwe in juon eo ej jerbal ñan Anij ak ãinwõt iar l̦õmn̦ak bwe ejjab yokwe kõj. Iar l̦õmn̦ak bwe Anij ejjab jouj, im men eo wõt ej kõm̦m̦ane ej kaje armej. Iar jab tõmak bwe ej yokwe im kea.”—Rosa, jãn Guatemala.
“Ke iar dik ikõn l̦õmn̦ak bwe Anij ej lale wõt ñe ewõr ad bõd bwe en kaje kõj ñe ej tõllo̦kũd ñan bõk kaje. Tokãlik, iar tõmak bwe Anij ejjab kea ñan jidik. Iar watõke bwe ej ãinwõt juon ri tõl eutiej me ej loloorjake armej ro ej tõl er ak ejjab yokwe im kea kake er.”—Ramona, jãn Canada.
Ak baj kwe, kwõl̦ak lale epidodo ke ñan yokwe Anij? Ium̦win elõñ iiõ in an armej ro l̦õmn̦ak kõn kajjitõk in. Im ilo m̦ool, kar m̦okta enañin aolep armej ro ilo kabuñ ko rej ba rej Kũrjin rar jab jar ñan Anij. Etke? Kõnke rar lõl̦ño̦ñ kõn e im mijake. Juon ri kwal̦o̦k bwebwenatoun armej etan Will Durant ej ba: “Armej ro rar kanooj lõl̦ño̦ñ im mijak Anij im men in ear bõbraik er jãn aer jar ñan e.”
Ta eo bwe armej ren l̦õmn̦ak rot in kõn Anij? Ta eo Baibõl̦ ej kwal̦o̦k kake kõn Anij? Jemaroñ ke jel̦ã kõn katak ko rem̦ool kõn e me renaaj jipañ kõj ñan yokwe e?