Anij Ej Lale im Kõjparok Eok

UNIN AN ARMEJ JAB TÕMAK BWE ANIJ EJ LALE ER: Ekkar ñan rũmmãlõtlõt ro, rej ba bwe elõñl̦o̦k jãn 100 bilien bũl̦ãnet ko ilañ. Innem, elõñ armej rejjab tõmak bwe Anij ej lale kõj kõnke lal̦ in ej make wõt dik jãn bũl̦ãnet ko jet. Rej ba, ‘Ta kõj bwe Rũkõm̦anm̦an eo en lale im kõjparok kõj ke lal̦ in jej pãd ie elukkuun dik?’

KÕMEL̦EL̦E KO ILO BAIBÕL̦: Anij eban kar letok Baibõl̦, innem mel̦o̦kl̦o̦k kõj. El̦ap an kõjparok im lale kõj, im ej kam̦oole men in ke ej ba: “Inaaj katakin eok im kakapilõk eok.”​—Sam 32:8, UBS.

L̦õmn̦ak m̦õk kõn juon kõrã in Ijipt etan Hegar me ear mour ilo iiõ ko 1,900 m̦okta jãn Kũraij. Hegar ear rijerbal ñan juon kõrã etan Serai. Ak Hegar ear jab kwal̦o̦k kautiej ñan Serai. Kõn men in, Serai ear kwal̦o̦k an illu ñane im Hegar ear ko ñan ãne jem̦aden. Kiiõ ke Hegar ear kõm̦m̦ane juon bõd, mel̦el̦ein ke bwe ejako an Anij lale im kõjparoke? Eokwe, Baibõl̦ ej ba: ‘Enjel̦ an Jeova ear loe’ Hegar im kaenõm̦m̦ane. Enjel̦ in ear ba ñane: “Jeova ear roñ am̦ eñtaan.” Tokãlik, Hegar ear ba ñan Jeova, “Kwe juon Anij Kwõj lo” men otemjej.​—Jenesis 16:4-13.

Anij ej lo men otemjej, im kõn men in ej bar lale im kõjparok eok. L̦õmn̦ak m̦õk kõn juon kõrã me el̦ap an yokwe ajri ro nejin. Enaaj l̦apl̦o̦k an jipañ ajri ro reddik jãn ro rerũttol̦o̦k. Unin ej kõnke el̦apl̦o̦k an ajri ro reddik aikuj jipañ jãn ro rerũttol̦o̦k. Ilo ejja wãween in wõt, el̦apl̦o̦k an Anij lale im kõjparok kõj ñe jej bũrom̦õj im pãd ilo aikuj. Jeova ej ba bwe meñe ej ‘jokwe ilo jikin eutiej im kwõjarjar, ak ej bareinwõt’ pãd epaake ro erup bũrueer. Unin an epaake er ej bwe en ‘kõmour bũruon ro rebũrom̦õj.’​—Aiseia 57:15.

Bõtab, bõlen kwõj kajjitõk im ba: ‘Ta ko Anij ej loi ñe ej kalimjek eõ? Ej ke baj lale jekjekũ, ak ej ke lale bũruõ im mel̦el̦e kõn ña?’ Eokwe, katak in tok juon enaaj uwaake kajjitõk in.