KAJJITÕK KO BAIBÕL̦ EJ UWAAKI

Ta in Raanin Ekajet?

Ilo tõre ko etto, Anij ear kõjerbal riekajet ro ñan kõjparok armej ro an jãn an ro jet kõm̦m̦ani men ko rejjab jim̦we ñan er. (Ri Ekajet 2:18) Baibõl̦ ej kwal̦o̦k bwe Raanin Ekajet eo me enaaj wal̦o̦k ilju im jekl̦aj ej juon iien ekam̦õn̦õn̦õ kõnke Jeova, Riekajet eo el̦ap, enaaj lo̦mo̦o̦ren armej ro jãn men ko rejjab jim̦we im renana.​—Riit Sam 96:12, 13; Aiseia 26:9.

Anij ear jitõñ Jijej ñan ekajete ro remej im ro remour. (Jerbal 10:42; 17:31, UBS) Elõñ armej ro rar mej ak rar jab jel̦ã kõn Anij. Bõtab ilo naaj Raanin Ekajet eo, Jijej enaaj kõmour armej rein bwe ren maroñ katak kõn Anij eo em̦ool im yokwe e.​—Riit Jerbal 24:15, UBS.

Etke Raanin Ekajet eo enaaj wal̦o̦k ium̦win 1,000 iiõ?

Ium̦win 1,000 iiõ, ro remej renaaj jerkak im bar mour. (Revelesõn 20:4, 12, UBS) Rein renaaj aikuj iien ñan aer katak kõn Anij im pokake e. Elõñ armej rej ba bwe naaj ekajete armej ro ekkar ñan kõm̦m̦an ko aer kar m̦okta. Bõtab, Baibõl̦ ej kwal̦o̦k bwe naaj ekajete armej ro ekkar ñan kõm̦m̦an ko aer ãlikin aer naaj jerkak jãn mej.​—Riit Rom 6:7.

Baibõl̦ ej kwal̦o̦k kõn bar juon raanin ekajet me enaaj jidimkij an wal̦o̦k, im enaaj wal̦o̦k m̦okta jãn an ijjino 1,000 iiõ ko. Jet iien Baibõl̦ ej n̦aetan raan in iien eo ãliktata ak jem̦l̦o̦kin, ãinwõt an alikkar ilo katak ko ilo jinoin bok in. Ilo raan in, Anij enaaj jol̦o̦k aolep armej ro renana. (2 Piter 3:7) Kõn men in, jej aikuj kõjparok wõt im kaalikkar bwe jej yokwe Anij.​—Riit 2 Piter 3:9, 13.