Jen Mour Ekkar ñan Jar eo an Jijej​—M̦õttan eo Kein Karuo

1-3. Etke juon jeid im jatid jiroñ ear lukkuun tõmak bwe Jeova ejel̦ã kõn aikuj ko an?

LANA, juon jeid im jatid jiroñ me ej rekũl̦ar bainier eban mel̦o̦kl̦o̦k ta eo ear wal̦o̦k ke ear pãd ilo Jãmne ilo kar 2012 eo. Jiroñ in ear kile bwe Jeova ear uwaake ruo iaan jar ko an. Ke ear uwe ilo juon train l̦o̦k ñan airport eo, ear kajjitõk ippãn Jeova bwe en jipañe pukot juon eo emaroñ kwal̦o̦k naan ñane. Ke ear tõparl̦o̦k airport eo, rar ba bwe enaaj rum̦wijl̦o̦k iien an kãlo̦k ñan raan eo juon. Kõn men in, Lana ear jar im kajjitõk ippãn Jeova bwe en jipañe kõnke em̦õj an kõjerbal enañin aolepen jããn ko an im kiiõ eaikuj jikin an pãd ilo boñõn eo.

² Ej m̦õj wõt an Lana jar ak ej roñ juon ainikien armej ej ba, “Yokwe Lana, kwõj ita ijin?” Armej in ej juon likao me erro Lana kar pãd ilo juon wõt jikuul̦. Jinen im jibwin likao in rar etal ippãn ñan airport eo kõnke likao in ej itõn etal ñan South Africa. Ke Lana ear kwal̦o̦k kõn an aikuj jikin an kiki boñõn eo, jinen im jibwin likao eo rar ba bwe en etal im kiki ilo m̦weo im̦weer. Rar kajjitõk elõñ kajjitõk ko kõn tõmak eo an Lana im kõn an jerbalin bainier.

³ Jibboñõn raan eo juon, ãlikin m̦õñã in jibboñ, Lana ear bar uwaaki kajjitõk ko aer kõn Baibõl̦. Lana ear kajjitõk ippãer kõn atõrej im nõmba in talboon ko aer bwe juon en kab wõnm̦aanl̦o̦k wõt im uwaaki kajjitõk ko aer. Lana ear jepl̦aak ñan aelõñ eo an im ejjel̦o̦k jorrããn ear wal̦o̦k ñane. Ej wõnm̦aanl̦o̦k wõt im bainier. Jiroñ in ear kile bwe Jeova ear roñjake jar ko an, im bwe ear jel̦ã kõn aikuj ko an, im ear jipañe.​—Sam 65:2.

4. Ta ko jenaaj etali ilo katak in?

⁴ El̦aññe ejidimkij an wal̦o̦k apañ ko ñan kõj, em̦õkaj ad jar ñan Jeova bwe en jipañ kõj, im em̦õn̦õn̦õ in uwaaki jar ko ad. (Sam 34:15; Jabõn Kõnnaan 15:8) Bõtab, jar eo an Jijej ej katakin kõj bwe ewõr men ko raorõkl̦o̦k jej aikuj jar kaki. Ilo katak in, jenaaj etale kajjitõk ko 4 ãliktata ilo jar eo an Jijej me remaroñ jipañ kõj bwe jen tiljek wõt ñan Jeova.​—Riit Matu 6:11-13.

“RAININ KWÕN LETOK ÑAN KÕM KIJEM”

5, 6. Ke Jijej ear jar, ear ba, “kwõn letok ñan kõm kijem rainin.” Etke ear katakin kõj ñan jar kõn men in meñe emaroñ lõñ kijed m̦õñã?

⁵ Ke Jijej ear kwal̦o̦k jar eo an, ear jab ba, “kwõn letok kijõ rainin.” Bõtab, ear ba, “kwõn letok ñan kõm kijem rainin.” Victor, juon em̦m̦aan me ej jerbalin lol̦o̦k eklejia ko ilo Africa ej kõmel̦el̦e im ba: “El̦ap aõ kam̦m̦oolol Jeova bwe kõm̦ro lio ippa ejjab aikuj inepata kõn ia eo m̦õñã ko kijem rej itok jãne, ak inepata kõn wõn eo enaaj kõl̦l̦ã on̦ãn m̦õko kõm̦ro ej pãd ie. Ro jeim im jatim rej m̦õn̦õn̦õ in lale im jipañ kõm̦ro aolep raan. Ak ij jar bwe ro rej jipañ kõm̦ro ren maroñ jel̦ã kilen kõm̦adm̦õdi apañ ko rej wal̦o̦k ñan er kõnke epenl̦o̦k mour raan kein.”

⁶ Meñe emaroñ lõñ kijed m̦õñã, ak em̦m̦an ñe jej bar l̦õmn̦ak kõn rũttõmak ro m̦õttad me rej kwõle kõn aer jerata ak bõlen kõnke ear wal̦o̦k juon jorrããn el̦ap ijo jikier. Jen jab baj jar wõt kõn rein, ak jej aikuj bar kõm̦m̦ani men ko jej jar kaki. Ñan waanjoñak, jemaroñ jipañl̦o̦k rũttõmak ro m̦õttad kõn men ko rej aikuji. Bareinwõt, jemaroñ keini ad jabawõt ñan jerbalin kwal̦o̦k naan eo ipel̦aakin lal̦ in, im tõmak bwe jabawõt kein ad rej jipañ rũttõmak ro m̦õttad.​—1 Jon 3:17.

7. Ewi wãween an Jijej katakin kõj bwe jejjab aikuj inepata bũruod kõn ilju?

⁷ Ãlikin an kar Jijej katakin armej ro kilen jar, ear bar katakin er bwe ren jab l̦õmn̦ak in koorl̦o̦k m̦weiuk. Ear kwal̦o̦k kõn wãween an Anij kõjparok mar ko, im ear ba: “Ejjab l̦apl̦o̦k An kanuknuk kom̦ ke? O kom̦ eo, edik ami tõmak! Innem kom̦win jab inepata bũruomi im ba, . . . ‘Ta eo jenaaj kõn̦ake?’” Ãlikin, ear bar ba: “Kom̦win jab inepata bũruomi kõn ilju.” (Matu 6:30-34) Jejjab aikuj inepata kõn aikuj ko ad ilju im jekl̦aj. Jen jokwane wõt kõn men ko ewõr ippãd me jej aikuji ñan mour kajjojo raan. Ñan waanjoñak, jemaroñ jar kõn jikin ad jokwe, juon ad jerbal ñan kabwe aikuj ko an baam̦le eo ad, im mãlõtlõt ñan kõm̦m̦ani pepe ko rem̦m̦an ñan ãjmour eo ad. Bõtab, ebar wõr juon men el̦apl̦o̦k an aorõk jej aikuj jar kake.

8. Ta eo naan ko an Jijej kõn m̦õñã eo kijed kajjojo raan ej kakeememej kõj kake? (Lale pija eo ilo jinoin katak in.)

⁸ Naan kein an Jijej kõn m̦õñã eo kijed kajjojo raan ej kakeememej kõj kõn m̦õñã eo juon ilo kõkkar me el̦apl̦o̦k ad aikuji. Jijej ear ba: “Armej ejãmin mour kõn pilawã wõt, a kõn naan otemjej rej wal̦o̦ktok jãn lo̦ñiin Anij.” (Matu 4:4) Kõn men in, jej aikuj jar bwe Jeova en katakin wõt kõj im letok ñan kõj naanin tõl ko me jej aikuji ñan ad maroñ epaake wõt e.

“JOL̦O̦K AMWÕJ M̦URI IPPAM̦”

9. Etke jerawiwi ko ad rej ãinwõt m̦uri ko?

⁹ Jijej ear ba: “Jol̦o̦k amwõj m̦uri ippam̦.” Bõtab, ilo bar juon iien ke ear kwal̦o̦k ejja jar in wõt, ear ba: “Jeorl̦o̦k amwõj jerawiwi.” (Matu 6:12; Luk 11:4) Ear ba men in kõnke jerawiwi ko ad rej ãinwõt m̦uri ko. Ilo kar 1951 eo, juon Naan in Keeañ ear kõmel̦el̦e bwe ñe jej jerawiwi, ej ãinwõt ñe jej m̦uri ippãn Jeova. Men ko jej m̦uri ñan Jeova kaki, ej ad yokwe e im pokake. Kõn men in, ñe jej jerawiwi n̦ae Anij, jejjab kaalikkar ad yokwe im pokake. Naan in Keeañ eo ej ba bwe el̦aññe Jeova ekõn̦aan, emaroñ jol̦o̦k jem̦jerã eo ad ippãn. Ej wõnm̦aanl̦o̦k wõt im ba bwe ad jerawiwi ej kaalikkar ad jab yokwe Anij.​—1 Jon 5:3.

10. Etke Jeova emaroñ jeorl̦o̦k jerawiwi ko ad, im ewi wãween ad l̦õmn̦ak kõn men in?

¹⁰ El̦ap ad m̦õn̦õn̦õ bwe Jeova ear letok Jijej bwe en mej kõn kõj ñan jeorl̦o̦k jerawiwi ko ad! Ealikkar bwe jej aikuji an Jeova jeorl̦o̦k ad bõd aolep raan. Jijej ear mej kõn kõj enañin 2,000 iiõ ko remootl̦o̦k. Meñe ãindein, ak ewõr tokjãn katok in mour eo an ñan kõj ilo raan kein. Jej aikuj kwal̦o̦k ad kam̦m̦oolol Jeova aolep iien kõn menin letok in eaorõk. Ejjel̦o̦k juon iaad emaroñ kar katok kõn mour eo an ñan kanemkwõj aolep armej jãn jerawiwi im mej. (Riit Sam 49:7-9, UBS; 1 Piter 1:18, 19.) Naan ko ilo jar eo an Jijej me ej ba, “jeorl̦o̦k amwõj jerawiwi” ej kakeememej kõj bwe ro jeid im jatid rej aikuji katok in mour eo an Jijej, ãinwõt ad bar aikuji. Jeova ekõn̦aan bwe jen l̦õmn̦ak kõn er im jem̦jerã eo aer ippãn. Men in ekitibuj an m̦õkaj ad jol̦o̦k aer bõd ñe rej jerawiwi n̦ae kõj. Enañin aolep iien, bõd ko aer n̦ae kõj rej bõd jiddik. Bõtab, ñe jej jol̦o̦k aer bõd, jej kaalikkar ad yokwe er. Jej bareinwõt kaalikkar bwe el̦ap ad kam̦m̦oolol kõnke Jeova ej bar jol̦o̦k ad bõd.​—Epesõs 4:32.

11. Etke elukkuun aorõk bwe jen jol̦o̦k an ro jet bõd?

¹¹ Kõnke jejjab weeppãn, jet iien emaroñ pen ñan ad jol̦o̦k an ro jet bõd ñe rej kal̦õkatip kõj. (Livitikõs 19:18) Ñe jenaaj jino kõnnaan kõn men eo rar kõm̦m̦ane ñan kõj, ro jet remaroñ jino jait ippãd im men in emaroñ ko̦kkure bõrokuk eo ilowaan eklejia eo. Ñe jej kõtl̦o̦k bwe men in en wõnm̦aanl̦o̦k wõt, jej kwal̦o̦k bwe jejjab kaorõk menin letok eo jãn Anij kõn katok in mour eo an Jijej, im jeban bõk tokjãn ko jãne. (Matu 18:35, UBS) El̦aññe jejjab jol̦o̦k an ro jet bõd, Jeova ejjab maroñ jol̦o̦k ad bõd. (Riit Matu 6:14, 15.) Bareinwõt, ñe jekõn̦aan bwe Jeova en jol̦o̦k bõd ko ad, jej aikuj kate kõj bwe jen jab kõm̦m̦ani men ko ediki.​—1 Jon 3:4, 6, UBS.

“JAB KADEL̦O̦Ñ KÕM ILO KAPO”

12, 13. (1) Ta eo ear wal̦o̦k ñan Jijej ãlikin an kar peptaij? (2) Etke jejjab aikuj n̦aruon ro jet ñe jej po ilo menin kapo ko? (3) Ta eo Jijej ear kam̦oole ke ear tiljek wõt ñan mej?

¹² Naan ko ilo jar eo an Jijej me rej ba “jab kadel̦o̦ñ kõm ilo kapo” rej kakeememej kõj kõn ta eo ear wal̦o̦k ñan Jijej ãlikin wõt an kar peptaij. Kajoor eo an Anij ear tõll̦o̦k Jijej ñan ãne jem̦aden “bwe tepil̦ en kapo E.” (Matu 4:1; 6:13) Etke Jeova ear kõtl̦o̦k bwe men in en wal̦o̦k? Kõnke unin an kar Jeova jilkintok Jijej ñan lal̦ in ej bwe en kõm̦adm̦õde aitwerõk eo ear wal̦o̦k ke Adam im Iv rar kõjekdo̦o̦n tõl eo an Jeova. Kõn aerro kar jum̦ae, men in ear kõm̦m̦an bwe en wal̦o̦k jet kajjitõk ko me ekar bõk iien ñan lo uwaakier. Ñan waanjoñak, ekar ke wõr likjab ilo wãween an kar Jeova kõm̦anm̦an armej ro? Juon armej eo me eweeppãn emaroñ ke tiljek wõt ñan Jeova meñe ej iioon kapo “jãn eo enana”? Im em̦m̦anl̦o̦k ke ñe armej ro rej tõl er make im jab kõtl̦o̦k an Anij tõl er? (Jenesis 3:4, 5) Ilju im jekl̦aj ñe enaaj lukkuun alikkar uwaakin aolep kajjitõk kein, aolep ro ilañ im ilal̦ renaaj jel̦ã bwe wãween tõl eo an Jeova em̦m̦antata.

¹³ Jeova eokkwõjarjar, im eban kapo jabdewõt armej bwe ren kõm̦m̦ani men ko renana. Setan eo ej “ri kapo.” (Matu 4:3) Setan ej kajjioñ kapo kõj ilo elõñ wãween ko. Bõtab, kõj aolep ewõr ad maroñ ñan make kããlõt. Kõj kajjojo ewõr ad maroñ ñan kããlõt el̦aññe jenaaj jum̦ae menin kapo ko ke ak jaab. (Riit Jemes 1:13-15, UBS.) Ke Setan ear kajjioñ kapo Jijej, Jijej ear m̦õkaj im jum̦aik menin kapo ko an Setan ilo an kwal̦o̦kl̦o̦k ta ko Naanin Anij ej ba. Jijej ear tiljek wõt ñan Anij. Bõtab, Setan ear jab ebbeer. Ear kõttar “m̦ae bar juon iien” bwe en kajjioñ bar kapo Jijej. (Luk 4:13) Jekdo̦o̦n ta ko Setan ear kõm̦m̦ani ñan kajjioñ kapo Jijej, ak Jijej ear pokake wõt Anij ãinwõt ke ej Rũtõl eo an. Men in Jijej ear kõm̦m̦ane ear kam̦ool bwe juon eo me eweeppãn emaroñ tiljek wõt ñan Jeova meñe ilo iien ko reppen me ej iioon mãlejjoñ ko rel̦l̦ap. Setan ej kajjioñ kapo rũkal̦oor ro an Jijej, ekoba kwe. Setan ekõn̦aan bwe kwõn jab pokake Jeova.

14. Ta ko jej aikuj kõm̦m̦ani bwe jen jab po ilo menin kapo ko?

¹⁴ Kajjitõk ko kõn an Jeova tõl rej wõnm̦aanl̦o̦k wõt. Kõn men in ilo tõre in kiiõ, Jeova ej kõtl̦o̦k bwe Setan en kajjioñ kapo kõj. Bõtab, Jeova ejjab ‘kadel̦o̦ñ kõj ilo kapo.’ Ejel̦ã bwe jenaaj tiljek wõt ñane, im ekõn̦aan jipañ kõj. Ak ejjab iuuni kõj ñan kõm̦m̦ane men eo ejim̦we. Ej kautiej maroñ eo ad ñan kããlõt. Kõn men in, ej kõtl̦o̦k bwe jen make kããlõt el̦aññe jenaaj tiljek wõt ñane ke ak jaab. Ewõr 2 men ko jej aikuj kõm̦m̦ani bwe jen jab maroñ po ilo menin kapo ko: (1) Jej aikuj epaake wõt Jeova, im (2) jej aikuj jar aolep iien bwe en jipañ kõj. Ak kajjitõk eo in kiiõ, ewi wãween an Jeova uwaaki jar ko ad bwe jen jab po ilo menin kapo ko?

15, 16. (1) Ta jet iaan menin kapo ko jej aikuj kõjparok kõj jãni? (2) Wõn eo jenaaj n̦aruon el̦aññe jej po ilo menin kapo ko?

¹⁵ Jeova ej letok ñan kõj kajoor eo an ñan jipañ kõj jum̦ae menin kapo ko an Setan. Bareinwõt, Jeova ej letok ñan kõj Baibõl̦ im eklejia eo ñan kakkõl kõj kõn men ko rekauwõtata. Ñan waanjoñak, ej kakkõl kõj bwe jen jab jol̦o̦k aolep iien ko ad, jããn ko ad, im maroñ ko ad ñan men ko me jejjab lukkuun aikuji. Espen im Janne, rej ruo rippãlele ro me rej jokwe ilo juon iaan jikin ko rem̦weiie ilo Europe. Ium̦win elõñ iiõ ko, erro kar rekũl̦ar bainier ilo juon iaan jikin ko ilo Europe me rar aikuj rukwal̦o̦k naan ie. Bõtab, ke ear lõñ nejierro ajri, erro kar aikuj bõjrak jãn bainier. Kiiõ ewõr 2 nejierro ajri. Espen ej ba: “Ekkã am̦ro jar ñan Jeova bwe en jipañ kõm̦ro bwe kõm̦ro en jab po ilo menin kapo ko, ãinwõt ke kiiõ kõm̦ro ejjab maroñ jol̦o̦k el̦ap iien ãinwõt kar m̦okta ilo jerbal eo an Jeova. Kõm̦ro ej kajjitõk ippãn Jeova ñan jipañ kõm̦ro ñan dãpij wõt jem̦jerã eo am̦ro ippãn im ñan kijejeto wõt ilo jerbalin kwal̦o̦k naan.”

¹⁶ Bar juon iaan menin kapo ko jej aikuj kõjparok kõj jãne ej pija ko rettoon. El̦aññe jej po ilo menin kapo in, jeban n̦aruon Setan. Etke? Kõnke Setan im men ko ilo lal̦ in reban iuuni kõj bwe jen kõm̦m̦ani men ko renana. Jet armej rej alwõji pija ko rettoon kõnke rejjab maroñ jol̦o̦k l̦õmn̦ak ko rettoon im nana. Ak elõñ ro jeid im jatid rar kõjekdo̦o̦n menin kapo in, im kõj bareinwõt jemaroñ.​—1 Korint 10:12, 13.

“LO̦MO̦O̦REN KÕM JÃN EO ENANA”

17. (1) Ewi wãween ad maroñ kwal̦o̦k bwe jekõn̦aan bwe Jeova en ‘lo̦mo̦o̦ren kõj jãn eo enana’? (2) Iien ta eo ekaenõm̦m̦an ej epaaktok?

¹⁷ Ewi wãween ad maroñ kwal̦o̦k bwe jekõn̦aan bwe Jeova en ‘lo̦mo̦o̦ren kõj jãn eo enana’? Ilo ad jab m̦õttan lal̦ in im “jab yokwe lal̦ ak men ko ilo lal̦.” (Jon 15:19; 1 Jon 2:15-17) El̦ap ad naaj jokwane im aenõm̦m̦an ñe Jeova enaaj jol̦o̦k Setan im ko̦kkure jukjukun pãd in enana! Bõtab m̦ae tõre en̦, jej aikuj keememej bwe Setan “el̦ap an illu, bwe ejel̦ã jidik wõt iien ippãn.” Enaaj kate joñan wõt an maroñ ñan kabõjrak kõj jen ad karejar ñan Jeova. Kõn men in, jej aikuj jar aolep iien bwe Jeova en kõjparok kõj jãn Setan.​—Revelesõn 12:12, 17.

18. El̦aññe jekõn̦aan bwe jen el̦l̦ã im mour ilo naaj jem̦l̦o̦kin jukjukun pãd in an Setan, ta eo jej aikuj kõm̦m̦ane?

¹⁸ Kokõn̦aan ke mour ilo juon jukjukun pãd me ejjel̦o̦k Setan? Eokwe, kwõn jar wõt bwe Aelõñ eo an Anij en itok, en kwõjarjar etan Anij, im en jejjet ankilaan ijin ioon lal̦. Aolep iien atartar wõt ioon Jeova bwe en lale im kõjparok eok im lewaj ñan kwe aolep men ko kwõj aikuji bwe kwõn tiljek wõt ñane. Aet, kwõn kate eok joñan wõt am̦ maroñ ñan mour ekkar ñan jar eo an Jijej.