Anõke Rũkanaan ro ilo Am̦ Kaarmejjeteik Eok Make

EWÕR juon men jej kõm̦m̦ane im ej ãinl̦o̦kwõt kar jerbal eo an rũkanaan ro etto. Ilo ukokin Baibõl̦ eo ad ilo kajin Pãlle etan New World Translation me kar kõm̦m̦ane ilo 2013 eo, ilo ijo me ej kwal̦o̦k mel̦el̦ein naan ko ilo Baibõl̦, ej kwal̦o̦k kõn mel̦el̦ein naan in rũkanaan. Ej ba bwe naan in rũkanaan ej mel̦el̦ein “juon eo Anij ej kõjerbale ñan kwal̦o̦k kõn karõk ko an. Rũkanaan ro rej jerbal ãinwõt rũkõnnaan ro an Anij ilo aer kwal̦o̦k kõn kobban ilju im jekl̦aj, ekoba katak ko, kien ko, im naanin ekajet ko an Jeova.” Meñe jejjab kõm̦m̦an kanaan kõn kobban ilju im jekl̦aj, ak jej kwal̦o̦k kõn katak ko an Anij ilo Baibõl̦.​—Matu 24:14.

Ej juon jeraam̦m̦an el̦ap ñan kwal̦o̦k ñan ro jet kõn Anij eo ad, Jeova, im ñan katakin er kõn ta kõn̦aan eo an ñan aolep armej! Jej bõk kun̦aad ilo jerbal in ippãn enjel̦ ro rej “kãke imejatoto.” (Revelesõn 14:6) Bõtab, ewõr men ko reppen jej iiooni im remaroñ kõm̦m̦an ad mel̦o̦kl̦o̦k bwe jerbal in jej kõm̦m̦ane ej juon jeraam̦m̦an el̦ap. Ta jet iaan men ko reppen jej iiooni? Ewõr iien jemaroñ m̦õk, ebbeer, ak pere kõj make. Rũkanaan ro retiljek ilo iien ko etto rar bar bõk ejja eñjake kein, bõtab rar jab bõjrak jãn aer kõm̦m̦ane jerbal eo aer. Jeova ear jipañ er ñan kajejjet jerbal ko aer. Jen etale joñak ko an jet rũkanaan ro, im lale ewi wãween jemaroñ anõke er.

RAR LUKKUUN KATE ER

Jet iien jerbal ko jej kõm̦m̦ani kajjojo raan remaroñ kam̦m̦õkm̦õk im men in emaroñ kõm̦m̦an bwe jen jab kõn̦aan etal im kwal̦o̦k naan. Em̦ool bwe jej aikuj kõm̦m̦an iien ñan ad kakkije. Jijej im rijjilõk ro an rar bar kõm̦m̦ane men in. (Mark 6:31) Bõtab, l̦õmn̦ak m̦õk kõn Ezekiel ke ear pãd ilo Babil̦on im kõn men eo ear kõm̦m̦ane ibwiljin RiIsrael ro me kar kajipo̦kweik er jãn Jerusalem. Juon iien, Anij ear jiroñ Ezekiel bwe en bõk juon pirõk im jiñaiki jikin kweilo̦k in Jerusalem ioon. Innem Ezekiel ear aikuj kõm̦m̦an ãinwõt ñe ej nitbwili jikin kweilo̦k in. Ear aikuj kõm̦m̦ane men in ilo an babu im ũlũl kõn ituanmiiñin ium̦win 390 raan. Innem ñe em̦õj, ear aikuj oktak im ũlũl kõn ituanmoon̦in ium̦win 40 raan. Jeova ear jiroñ Ezekiel: “Inaaj lukwõj eok bwe kwõn jab maroñ oktak jãn turãjet ñan turãjet m̦ae jem̦l̦o̦kin tarin̦ae in.” (Ezekiel 4:1-8, UBS) Men in emaroñ kar kairuj RiIsrael ro bwe ren kõn̦aan lale ta eo Ezekiel ej kõm̦m̦ane. Ear lukkuun kam̦m̦õkm̦õk men in ak Ezekiel ear aikuj kõm̦m̦ane ium̦win juon jim̦a iiõ. Enaaj kar ewi wãween an maroñ kajejjet jerbal in an?

Ezekiel ear mel̦el̦e unin an kar Anij jilkinl̦o̦ke bwe en jerbal ãinwõt juon rũkanaan. Ke Anij ear jilkinl̦o̦ke, ear ba: “El̦aññe [RiIsrael ro] rej roñjake ak jab . . . , renaaj jel̦ã bwe juon rũkanaan ear pãd ippãer.” (Ezekiel 2:5) Ezekiel ear keememej wõt unin an Anij lel̦o̦k jerbal eo an. Kõn men in, ear m̦õn̦õn̦õ in kõm̦m̦an ãinwõt ñe ej nitbwili Jerusalem. Tokãlik rar kõjjel̦ãiki im RiIsrael ro jet me kar kajipo̦kweik er bwe “em̦õj ko̦kkure jikin kweilo̦k eo.” RiIsrael ro rar jel̦ã kiiõ bwe ear wõr juon rũkanaan ibwiljier. Alikkar bwe Ezekiel ear juon rũkanaan em̦ool.​—Ezekiel 33:21, 33.

Rainin, jej kakkõl armej ro bwe naaj ko̦kkure jukjukun pãd in enana an Setan. Meñe jemaroñ m̦õk, ak jej kate wõt kõj ñan kwal̦o̦k kõn Naanin Anij, jepl̦aak ippãn armej ro, im katak Baibõl̦ ippãer. Ilo an jejjet kũtien kanaan ko kõn jem̦l̦o̦kin jukjukun pãd in, jej m̦õn̦õn̦õ bwe Anij ej kõjerbal kõj “ñan kwal̦o̦k kõn karõk ko an.”

RAR KIJENMEJ MEÑE RAR EBBEER IM INEPATA

Kajoor eo an Jeova ej jipañ kõj bwe jen kate wõt kõj. Meñe ãindein, ak jet iien jemaroñ inepata im ebbeer kõn wãween an armej ro kõm̦m̦an ñan kõj ñe jej kwal̦o̦k naan ñan er. Em̦m̦an ñe jej keememej joñak eo an rũkanaan Jeremaia. Ke ear kwal̦o̦k kõn naan ko an Anij ñan RiIsrael ro, rar kajjirere kake im ba naan ko reddo ñane. Juon iien, Jeremaia ear ba: “Iban keememej E, im iban bar kõnnaan ilo Etan.” Jeremaia ear inepata im ebbeer ãinwõt bar kõj jet iien. Jekdo̦o̦n, ak ear wõnm̦aanl̦o̦k wõt im kwal̦o̦k kõn naan ko an Anij. Etke? Rũkanaan in ear wõnm̦aanl̦o̦k im ba bwe naan ko an Jeova rar pãd ‘ilo bũruon ãinwõt juon kijeek eurur im ekilõk ilo di ko diin, im ear m̦õk in dãpiji, im ear bane.’​—Jeremaia 20:7-9.

Ãindeinl̦o̦k wõt, el̦aññe jej inepata im ebbeer kõn wãween an armej ro kõm̦m̦an ñan kõj ilo jerbalin kwal̦o̦k naan, jemaroñ kõl̦mãnl̦o̦kjen̦ kõn ennaan eo jej kwal̦o̦k kake. Men in enaaj jol̦o̦k ad inepata im ebbeer im kõm̦m̦an bwe ennaan in jej kwal̦o̦k kake en ãinwõt ‘juon kijeek me ej urur ilo di ko diid.’ Jemaroñ kõm̦m̦an bwe kijeek in en urur wõt ilo ad riit Baibõl̦ kajjojo raan.

RAR MAROÑ JOL̦O̦K L̦ÕMN̦AK KO REKABBWEERER

Jet rũkarejar ro an Jeova remaroñ lukkuun inepata ke kar lel̦o̦k ñan er juon jerbal me rejaje kilen kõm̦m̦ane ak rejaje etke kar lel̦o̦k jerbal eo ñan er. Emaroñ kar eñin bar eñjake eo an rũkanaan Hoseia. Jeova ear jiroñe im ba: “Kwõn etal im bõk juon pãleem̦, e rũl̦õñ, im ro rej l̦otak kõn l̦õñ.” (Hoseia 1:2) Enaaj kar ta eñjake eo am̦ el̦aññe Anij ear ba bwe kõrã eo kwõnaaj m̦areiki enaaj juon kõrã ekijoñ? Hoseia ear kõm̦m̦ane men eo Jeova ear ba. Ear bõk kõrã eo etan Gomer bwe en pãleen, im ear l̦otak juon nejierro l̦addik. Tokãlik, lio ear bar kõl̦otak juon leddik im bar juon l̦addik. Bõtab, ear bõro̦ro kake ajri rein ruo kõn an kar ellolo. Jeova ear ba l̦o̦k im̦aan ñan Hoseia bwe kõrã eo naaj ippãn enaaj ‘lukwarkware ri yokwe ro an.’ Men in ej kaalikkar bwe enaaj yokwe elõñl̦o̦k jãn juon em̦m̦aan. Im ear ba bwe kõrã in enaaj kajjioñ bar ro̦o̦l ñan Hoseia. El̦aññe kar kwe rũkanaan in, kwõnaaj ke kar m̦õn̦õn̦õ in bar ro̦o̦l ñan kõrã in? Eñin kar men eo Jeova ear jiroñ Hoseia bwe en kõm̦m̦ane! Ejjab men in wõt, ak rũkanaan in ear bar wiaiki liin ak bõke kõn juon on̦ãn el̦ap.​—Hoseia 2:7, UBS; 3:1-5, UBS.

Hoseia emaroñ kar l̦õmn̦ak el̦aññe ewõr tokjãn an kõm̦m̦ane men eo Jeova ear ba en kõm̦m̦ane. Meñe ãindein, ak ear tiljek im pokake wõt. Men eo Hoseia ear kõm̦m̦ane ej jipañ kõj ñan mel̦el̦e kõn joñan an kar Anij inepata im bũrom̦õj ke RiIsrael ro rar jab tiljek ñane. Im ilo m̦ool, ewõr jet RiIsrael ro me em̦ool bũrueer rar jepl̦aak ñan Anij.

Rainin, Anij ejjab jiroñ jabdewõt iaad ñan pãleek juon kõrã ekijoñ. Bõtab, jemaroñ ke katak jãn Hoseia kõn an kar m̦õn̦õn̦õ in kõm̦m̦ane men eo Anij ear jiroñe ñan kõm̦m̦ane? Juon men jej katak ej bwe jen m̦õn̦õn̦õ in kwal̦o̦k kõn nuuj eo em̦m̦an kõn Aelõñ eo ilo̦bwilej im jãn em̦ ñan em̦ jekdo̦o̦n ñe emaroñ pen ñan kõj. (Jerbal 20:20) Bõlen ewõr jet wãween kwal̦o̦k naan ko me remaroñ pen ñan kõj. Elõñ ro im rar katak ippãn Ri Kõnnaan ro an Jeova rar ba bwe relukkuun m̦õn̦õn̦õ in katak Baibõl̦ bõtab reban kwal̦o̦k naan jãn em̦ ñan em̦. Ak tokãlik elõñ iaaer rar maroñ kõm̦m̦ane men in meñe ilo jinoin rar l̦õmn̦ak bwe rejjab maroñ. Kwõj ke kile ta eo kwõmaroñ katak jãn men in?

Ewõr bar juon men jemaroñ katak jãn Hoseia kõn an kar m̦õn̦õn̦õ in kõm̦m̦ane juon men epen Anij ear ba en kõm̦m̦ane. Hoseia emaroñ kar jekpen bwe en jab kõm̦m̦ane men in. Bareinwõt, ejjel̦o̦k juon enaaj kar jel̦ã kõn men eo Anij ear kajjitõk ippãn bwe en kõm̦m̦ane ñe ear jab je im kwal̦o̦k kake. Ãindeinl̦o̦k wõt, emaroñ pel̦l̦o̦k juon iien em̦m̦an ñan ad kwal̦o̦k naan ñan ro jet meñe ejjel̦o̦k juon ejel̦ã kake. Eñin men eo ear wal̦o̦k ñan Anna, juon leddik ilo juon high school ilo Amedka. Rũkaki eo an ear kajjitõk ippãn rijikuul̦ ro ilo kilaaj eo an bwe ren jeje im kwal̦o̦k kõn juon men me el̦ap aer tõmak kake, im bwe ren kajjioñ in kareel rijikuul̦ ro jet bwe ren bar tõmak men in. Anna emaroñ kar pepe ñan jab kwal̦o̦k kõn tõmak eo an ilo iien in. Bõtab, ear kile bwe ej juon iien em̦m̦an ñan an kwal̦o̦k kõn Anij. Kõnke ear jel̦ã ta ko rijikuul̦ ro ilo kilaaj eo an renaaj ba, ear jar ñan Jeova, im kiiõ ear lukkuun kõn̦aan kortokjãn iien in epel̦l̦o̦k ñan an kwal̦o̦k naan. Ear je juon an peba me ej kõmel̦el̦e kõn kein kam̦ool ko me rej kariabe tõmak eo bwe armej rej itok jãn menninmour ko.

Ke Anna ear kwal̦o̦k kõn peba eo an ñan kilaaj eo, juon iaan ledik ro ear kwal̦o̦k elõñ kajjitõk ko ñan kajjioñ kariabe Anna. Ledik in ear lukkuun tõmak bwe armej rej itok jãn menninmour ko. Bõtab, ear lukkuun em̦m̦an an Anna jojomare tõmak eo an. Rũkaki eo an ear lukkuun bwilõñ im ear lel̦o̦k ñan Anna juon menin nõbar kõnke em̦m̦antata wãween an kar kõmel̦el̦e. Jãn kar iien eo, elõñ alen an kar Anna bwebwenato im kwal̦o̦k naan ippãn ledik eo me ear kwal̦o̦k elõñ kajjitõk ko. Anna ear m̦õn̦õn̦õ in kortokjãn iien in em̦m̦an ñan an kwal̦o̦k naan im ear watõk bwe ej ãinwõt juon jerbal Jeova ear lel̦o̦k ñane. Kõn men in, ej ba: “Ejako kiiõ aõ mijak in kwal̦o̦k kõn nuuj eo em̦m̦an.”

Meñe ejjab kõj rũkanaan, ak jemaroñ bar lo tõprak ilo ad kajejjet jerbal eo Jeova ear letok ñan kõj ilo ad kaarmejjeteik kõj make ãinwõt kar Ezekiel, Jeremaia, im Hoseia! Ilo iien kabuñ an baam̦le ak ilo iien ko jej katak ippãd make, bõlen jemaroñ katak kõn rũkanaan ro jet ilo iien ko etto im kõl̦mãnl̦o̦kjen̦ kõn wãween ad maroñ anõke joñak ko aer.