Ewõr Ke Tokjãn Naanin Tõl ko ilo Baibõl̦ ñan Raan Kein?

JET REJ BA EJJEL̦O̦K TOKJÃN. Juon taktõ ej ba bwe ñe juon ej bõk naanin tõl ko jãn Baibõl̦, ej ãinwõt ñe ej kõjerbal juon bokin science jãn iiõ ko 1920 ñan katakin ilo kilaaj in science. Bareinwõt, juon eo ejjab tõmak ilo Baibõl̦ emaroñ kajjitõk ippãn bar juon el̦aññe enaaj kar kõjerbal bokin kõmel̦el̦e ko an kampiutõr ko jem̦aan, bwe en jel̦ã kilen kõjerbal kampiutõr ko raan kein. Ealikkar bwe jet rej l̦õmn̦ak bwe ejjel̦o̦k tokjãn Baibõl̦ kõnke ej juon bokin jem̦aan.

Innem etke ewõr en̦ ekõn̦aan kõjerbal Baibõl̦ ilo raan kein ke elõñ kein jerbal ko rekapeel? Raan kein elukkuun lõñ website ko rej litok naanin tõl ko im naanin kakapilõklõk ko jãn iien ñan iien. Bareinwõt, ro rej kõm̦m̦an bũrookraam̦ ko im pija ko ilo tipi rej kwal̦o̦k naanin kakapilõklõk ko jãn taktõ ro remãlõtlõt, rijeje ro, im ro el̦ap aer jel̦ã im imminene kõn wãween mour. Im ilo m̦õn wia ko, elukkuun lõñ bok ko rej wiakaki me rej kwal̦o̦k mel̦el̦e ko im naanin kakapilõklõk ko ñan jipañ kõj, im joñan aer lo el̦ap tõprak rej kõm̦m̦an elõñ pilien im pilien jããn.

Innem kõnke elukkuun lõñ mel̦el̦e ko rekããl jemaroñ bũki, etke jej aikuji Baibõl̦ eo ke ej jãn enañin 2,000 iiõ ko remootl̦o̦k? Im ejjab ke jim̦we an jet ba bwe ad kõjerbal Baibõl̦, ejjel̦o̦k oktak jãn ñe jaar kõjerbal bokin science ko jem̦aan ak bokin kõmel̦el̦e ko an kampiutõr ko jem̦aan? Eokwe ilo m̦ool, l̦õmn̦ak in elukkuun bõd. Em̦ool bwe katak ko an science im kein jerbal ko rekapeel em̦õkaj aer oktakl̦o̦k im kããll̦o̦k, ak aikuj ko an armej renañin ke oktak? Ñan rainin, armej rej pukot kilen bwe ren jubõro ilo mour ko aer im jokwane. Bareinwõt rej pukot kilen bwe en wõr aenõm̦m̦an ilo baam̦le ko aer im bwe ren ejaak jem̦jerã ko rem̦m̦an.

Meñe Baibõl̦ ej bokin jem̦aan, ak emaroñ jipañ kõj armej ilo aikuj kein ad im bar elõñ men ko jet. Baibõl̦ ej kaalikkar bwe naan ko ie rej jãn Rũkõm̦anm̦an eo ad. Bok in ej kwal̦o̦k elõñ naanin tõl im kakapilõklõk ko kõn aolep wãween ko jej iiooni ilo mour ko ad im ej bar jipañ kõj bwe jen pojak ñan jabdewõt mãlejjoñ. (2 Timote 3:16, 17, UBS) Ejjab men in wõt, ak Baibõl̦ ej bar kaalikkar bwe naanin kakapilõklõk ko ie rej ñan indeeo​—mel̦el̦ein bwe ejãmin jako an wõr tokjãer! Baibõl̦ ej ba: “Naanin Anij ej mour.”​—Hibru 4:12.

Naan ko ilo Baibõl̦ relukkuun ke m̦ool? Ej ke juon bokin jem̦aan im ejjel̦o̦k tokjãn ñan raan kein, ke ta elukkuun ke aorõk im wõr tokjãn iaan aolep bok ko jet? Eokwe ilo bok in, aolep katak ko ie renaaj uwaaki kajjitõk kein. Eñin ej bok eo kein kajuon im ej m̦õttan bar bok ko jet me rej wal̦o̦k ilo wãween in ekããl im renaaj kwal̦o̦k wõt kõn juon men im kõmel̦el̦eiki.