Jim̦we im Bõd: Baibõl̦ Eo—Juon Kein Jipañ Jemaroñ Lõke

NAANIN TÕL KO JEJ AIKUJI

Ilo Baibõl̦ eo, Jeovaa Anij ej kwal̦o̦k bwe ear kõn̦aan bwe armej ro ren reilo̦k ñane bwe en tõl er, im jab bwe armej ro ren make tõl er ak jineet buñtõn neer. (Jeremaia 10:23) Eñin unin ear letok naanin kakapilõk ko ilo Baibõl̦ ñan jipañ kõj jel̦ã ta ko rejim̦we im rebõd. Ej yokwe armej ro im ekõn̦aan kõjparok kõj jãn ad iioon wãween ko rekõmmetak im rekabũrom̦õjm̦õj itok jãn ad kõm̦m̦ani jokãlõt ko rebõd. (Duteronomi 5:​29, UBS; 1 Jon 4:8) Men eo el̦apl̦o̦k, kõnke ej ri-Kõm̦anm̦an eo ad, ewõr ippãn mãlõtlõt eo im jel̦ãl̦o̦kjen̦ eo ñan letok naanin kakapilõk ko rem̦m̦antata ñan jipañ kõj jel̦ã ta ko rejim̦we im rebõd. (Sam 100:3; 104:24) Meñe ãindein, ak Anij ejjab iuun jabdewõt armej ñan mour ekkar ñan kien ko an.

Jeova ear lel̦o̦k ñan em̦m̦aan im kõrã eo m̦oktata, Adam im Iv, aolep men ko rar aikuji bwe ren lukkuun m̦õn̦õn̦õ. (Jenesis 1:​28, 29; 2:​8, 15) Ear bareinwõt lel̦o̦k ñan er naanin tõl ko repidodo me ear kõtmãne bwe ren pokaki. Bõtab, ear kõtl̦o̦k bwe ren make kããlõt el̦aññe renaaj l̦oore naanin tõl ko an ak jaab. (Jenesis 2:​9, 16, 17) Ekabũrom̦õjm̦õj bwe Adam im Iv rar kããlõt ñan mour ekkar ñan ta eo rar l̦õmn̦ak bwe ejim̦we im ebõd ijello̦kun aer mour ekkar ñan l̦õmn̦ak ko an Jeova kõn men in. (Jenesis 3:6) Ta eo ear wal̦o̦k itok jãn aerro ãindein? El̦apl̦o̦k ke an armej ro lo m̦õn̦õn̦õ ñe rej make kããlõt ta ko rejim̦we im rebõd? Jaab. Jãn jem̦aan tok ñan raan kein, elõñ kein kam̦ool ko rej kaalikkar bwe ñe armej ro rejjab pokake kien ko an Anij kõn ta ko rejim̦we im rebõd, men in ejjab bõktok aenõm̦m̦an im m̦õn̦õn̦õ ñan er.—Ekklisiastis 8:9.

Baibõl̦ eo ej letok naanin tõl ko jej aikuji bwe jen maroñ jipañ kõj kõm̦m̦ani jokãlõt ko remãlõtlõt, jekdo̦o̦n ia eo jej jokwe ie ak wãween ad kar dik im rũttol̦o̦k. (2 Timote 3:​16, 17; lale bo̦o̦k eo etan “Juon Bok ñan Aolep Armej.”) Lale wãween an Baibõl̦ eo kõm̦m̦ane men in.

Katak kõn etke ejim̦we ñan n̦aetan Baibõl̦ eo “naanin Anij.” —1 Tessalonika 2:13. Alwõje pijain alwõj eo etan An Wõn Naan ko ilo Baibõl̦ Eo? ilo jw.org/mh.

WÃWEEN AN BAIBÕL̦ KAALIKKAR TA KO ANIJ EKÕN̦AAN BWE JEN KÕM̦M̦ANI

Baibõl̦ eo ej kwal̦o̦k kõn wãween an Jeova kõm̦m̦an ñan armej ro. Baibõl̦ ej jipañ kõj ñan mel̦el̦e ta ko Anij ej watõk bwe rejim̦we im rebõd, ta ko rem̦m̦an ñan kõj, im ta ko remaroñ ko̦kkure kõj. (Sam 19:​7, 11, UBS) Jej katak naanin kakapilõk ko rem̦m̦an me aolep iien remaroñ jipañ kõj ñan kõm̦m̦ani jokãlõt ko remãlõtlõt ilo mour ko ad kajjojo raan.

Ñan waanjoñak, l̦õmn̦ak kõn naanin kakapilõk eo ilo Jabõn Kõnnaan 13:20: “Kwõn etetal ippãn ro ri-mãlõtlõt innem kwõnaaj mãlõtlõt; a eo ej kõm̦m̦ao ippãn ro ri-bwebwe, enaaj jorrããn kake.” Naanin kakapilõk in ej jerbal ñan kõj ilo raan kein ãinwõt an kar bar jerbal ñan armej ro ilo etto. Baibõl̦ eo eobrak kõn naanin kakapilõk ko rem̦m̦an im remaroñ jipañ kõj.—Lale bo̦o̦k eo etan “Mãlõtlõt eo an Baibõl̦ Emaroñ Jipañ Wõt Kõj.”

Bõtab kwõmaroñ l̦õmn̦ak im ba, ‘Ewi wãween aõ maroñ jel̦ã bwe naanin kakapilõk ko ilo Baibõl̦ ikijjeen ta ko rejim̦we im rebõd rej jerbal wõt ilo raan kein?’ Katak eo tok juon enaaj kwal̦o̦k kõn bwebwenatoun armej ro me jemaroñ katak jãn er.