Ewõr Ke Juon Kein Jipañ me Jemaroñ Lõke bwe Enaaj Jipañ Kõj ñan Lo Juon Ilju im Jekl̦aj eo Eaenõm̦m̦an im Ejokwane?

Ãinwõt ad kar kõnono kake ilo katak ko m̦oktal̦o̦k, armej rar kajjioñ pukot kilen aer maroñ lo juon ilju im jekl̦aj eo em̦m̦anl̦o̦k. Rej kõm̦m̦ane men in ikijjeen aer likũt aer tõmak im kõjatdikdik ilo kajoor ko me rej tõmak bwe rej karõk ta ko renaaj wal̦o̦k ñan juon armej, ekoba aer pukot jel̦ãl̦o̦kjen̦, m̦weiuk, im aer kate er bwe ren juon armej eo em̦m̦an. Ijoke, an juon kajjioñ l̦oore wãween kein ej ãinwõt ñe ej kõjerbal juon mab me ebõd ñan an maroñ jibadekl̦o̦k juon jikin. Mel̦el̦ein ke bwe ejjel̦o̦k jikin bõk jipañ me jemaroñ lõke bwe enaaj jipañ kõj ñan ilju im jekl̦aj eo ad? Jaab!

IAL̦AN JIPAÑ JÃN JUON EO ELUKKUUN UTIEJ

Ñe jej kõm̦m̦an pepe ko, ekkã ad kepaake juon eo me erũttol̦o̦k jãn kõj im el̦apl̦o̦k an mãlõtlõt jãn kõj. Ejja ãindeinl̦o̦k wõt, jemaroñ bõk jipañ ñan lo juon ilju im jekl̦aj eo em̦m̦an jãn Juon eo me ej make wõt l̦apl̦o̦k an rũtto im mãlõtlõtl̦o̦k jãn kõj. Jemaroñ lo naanin kakapilõklõk ko An ilo jeje ko rekkwõjarjar me kar jino kõm̦m̦ani enañin 3,500 iiõ ko remootl̦o̦k. Jeje kein rekkwõjarjar em̦õj kõm̦m̦ani bwe ren pãd ilo juon bok rej n̦aetan Baibõl̦ eo.

Etke kwõmaroñ lõke Baibõl̦ eo? Kõnke eo me ear Je Baibõl̦ eo ej Eo im ej make wõt totata an pãd im mour im emãlõtlõt tata jãn jabdewõt armej kab men ko ipel̦aakin lañ im lal̦. Kar kõmel̦el̦e kõn E im ba bwe ej “Eo jãn indeeo” im bwe ej “jãn indeeo ñan indeeo.” (Daniel 7:9; Sam 90:2) E eo ‘ear kõm̦anm̦an lañ ko, E Anij! Ear ejaake im kõm̦anm̦an lal̦.’ (Aiseia 45:18, UBS) Ej kwal̦o̦k kajjien ilo an kõjerbal ãt in etan make, Jeova.—Sam 83:18.

Kõnke Baibõl̦ eo ej jãn eo im ear kõm̦anm̦an aolep armej, ejjab kwal̦o̦k kalijekl̦o̦k im ba bwe em̦m̦anl̦o̦k jet ri-aelõñ ak jet wãween mour an armej jãn bar jet. Ejjel̦o̦k jem̦l̦o̦kin an jerbal naanin kakapilõklõk ko ie im rejipañ aolep armej jãn aolep aelõñ. Em̦õj ukote ilo elõñl̦o̦k kajin ko im em̦õj an l̦apl̦o̦k an ajeededl̦o̦k ipel̦aakin lal̦ jãn jabdewõt bok.a Mel̦el̦ein bwe aolep armej jãn jabdewõt jikin epidodo aer maroñ mel̦el̦e kake im bõk naanin tõl ko jãne. Mel̦el̦e kein rem̦ool rej rejetake ennaan eo me ej itok jãn Baibõl̦ eo make:

“Anij ejjab kalijekl̦o̦k, bõtab ilo aelõñ otemjej, ej buñbũruon kake jabdewõt eo ej mijake im kõm̦m̦ani men ko rejim̦we.”—JERBAL 10:34, 35.

Ãinwõt an juon jemãn im jinen eo el̦ap yokwe ippãer lel̦o̦k jipañ ak tõl ñan ajri ro nejier, Jeova Anij ej juon Jemãn el̦ap an yokwe im ekõn̦aan letok jipañ ñan kõj ikijjeen Naan ko an ilo Baibõl̦ eo. (2 Timote 3:16) Kwõmaroñ lõke Naan ko an, kõnke ear kõm̦anm̦an kõj im ejel̦ã ewi wõt wãween mour eo me ej make wõt em̦m̦antata ñan kõj.

JUON KEIN JIPAÑ ME JEMAROÑ LÕKE

Jemaroñ lõke bwe Baibõl̦ eo ej juon kein jipañ me emaroñ jipañ kõj ñan ilju im jekl̦aj kõnke 2,000 jim̦a iiõ ko remootl̦o̦k, ear kwal̦o̦k kõn kanaan ko rejejjet im rejim̦we kõn m̦akũtkũt ko ilo nãj lal̦ in im kõm̦m̦an ko an armej me jej loi ilo raan kein.

M̦AKŨTKŨT KO

“Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon. Bareinwõt, enaaj wõr m̦akũtkũt lal̦ ko rel̦l̦ap, im enaaj wõr ñũta im nañinmej ko rekapopo ilo elõñ jikin ko.”—LUK 21:10, 11.

KÕM̦M̦AN KO

“Ilo raan ko ãliktata, iien ko rekanooj in nana im reppen renaaj wal̦o̦k. Armej renaaj yokwe er make, renaaj arõk jããn, kõmjãje, jãjjãj, renaaj kõnono n̦ae Anij im ro jet, jab pokake jemãer im jineer, jaje kam̦m̦oolol, im jab tiljek, enaaj ejjel̦o̦k yokwe ippãer, renaaj m̦akoko in errã ilo jabdewõt pepe, renaaj ruruwe, jaje irooj ioer make, lãj, dike em̦m̦an, renaaj ketake ro repaake er, renaaj l̦oor wõt kõn̦aan ko aer, utiej bũrueer, im renaaj yokwe menin kabuñbũrueer ijello̦kun aer yokwe Anij.”—2 TIMOTE 3:1-4.

Ta l̦õmn̦ak eo am̦ ñe kwõj lo bwe ejejjet im jim̦we men ko me Baibõl̦ ear kwal̦o̦k kaki jãn jem̦aan kõn ta ko rej wal̦o̦k ilo raan kein? Ejjel̦o̦k pere bwe kwõnaaj errã ippãn Leung, eo ej jãn Hong Kong, ej ba: “Kar je kanaan ko ilo Baibõl̦ ilo iien ko etto. Ejjel̦o̦k jabdewõt armej en̦ emaroñ kar kwal̦o̦k kõn ta ko renaaj wal̦o̦k ilju im jekl̦aj ilo jejjet im jim̦we. Alikkar bwe Baibõl̦ ej aikuj in itok jãn juon eo me el̦ap an utiej im kajoor jãn kõj.”

Elõñ bũki kanaan ko ilo Baibõl̦ me em̦õj aer jejjet kũtieer.b Men in ej kam̦ool bwe Naan ko ilo Baibõl̦ rej lukkuun itok jãn Anij. Jeova ej ba, “Ña Anij, im ejjel̦o̦k ãinwõt [ña]. Im Ij kwal̦o̦k jem̦l̦o̦kin jãn jinoin.” (Aiseia 46:9, 10) Kõn men in, ejjel̦o̦k pere bwe kwõmaroñ lõke ta eo Baibõl̦ ej ba kõn ilju im jekl̦aj.

NAANIN TÕL KO REMAROÑ JIPAÑ EOK KIIÕ IM ÑAN INDEEO

Ñe kwõj l̦oore naanin tõl ko ilo Jeje ko Rekkwõjarjar, kwõnãj bõk tokjãn. L̦õmn̦ak kõn jet iaan waanjoñak kein.

BÕK JUON L̦ÕMN̦AK EJOKKUN WÕT JUON KÕN JÃÃN IM JERBAL

“Em̦m̦anl̦o̦k juon pã eobrak, im aenõm̦m̦an ippãn, jãn ruo pã robrak im ippãer jerbal im ãinwõt kañ kõto.”—EKKLISIASTIS 4:6.

MOURIN BAAM̦LE

“Kajjojo iaami ej aikuj yokwe lio pãleen ãinwõt an yokwe e make. Bareinwõt, lio ej aikuj lukkuun kwal̦o̦k kautiej ñan l̦eo pãleen.”—EPESÕS 5:33.

KÕTAAN KO AN ARMEJ IPPÃN DOON

“En jokwõd am̦ illu, im kwõn ilo̦k jãne; im kwõn jab inepata in kõm̦m̦an nana wõt.”—SAM 37:8.

Ñe kwõnaaj jerbale ta ko Baibõl̦ ej ba, kwõnaaj bõk tokjãn kiiõ im enaaj kõm̦m̦an bwe en pel̦l̦o̦k juon ilju im jekl̦aj em̦m̦an ñan kwe. Ilo Baibõl̦, jej lo kallim̦ur ko an Anij kõn juon ilju im jekl̦aj em̦m̦an me ej kitibuj

AENÕM̦M̦AN IM JOKWANE

“Renaaj m̦õn̦õn̦õ kõn aenõm̦m̦an el̦ap.”—SAM 37:11.

JIKIN JOKWE IM M̦ÕÑÃ ÑAN AOLEP

“Renaaj kalõk m̦õko, im jokwe ilo er; im renaaj kallib jikin kallibin kũreep, im m̦õñã jãn leen.”—AISEIA 65:21.

AN EJJEL̦O̦K BAR NAÑINMEJ AK MEJ

“Enaaj ejjel̦o̦k bar mej, bũrom̦õj, lim̦õ im eñtaan.”—REVELESÕN 21:4.

Ta ko kwõj aikuj in kõm̦m̦ani bwe kwõn maroñ bõk kain ilju im jekl̦aj rot in? Lale katak eo tok juon.

a Ñan bõk mel̦el̦e ko jet ikijjeen ukokin Baibõl̦ eo im an ajeeded, etal ñan www.jw.org im lale ium̦win ijo ej ba BIBLE TEACHINGS > HISTORY & THE BIBLE.

b Ñan bõk mel̦el̦e ko jet, lale katak 2 ilo bok eo etan Ta eo Baibõl̦ Ej Lukkuun Katakin Kõj? me Ri-Kõnnaan ro an Jeova rar kõm̦m̦ane. Ebar pãd ilo online ilo www.jw.org/mh. Lale ium̦win ijo ej ba L̦ÃIBRÃRE > BOK IM BROCHURE.