Ñe Kwõj Jelm̦ae Juon Nañinmej El̦ap

“Ke iar jel̦ã bwe ewõr aõ nañinmej in kããnjer ilo m̦õjñalũ kab ilo ãrũ, iar l̦õmn̦ak bwe inaaj mej. Bõtab ãlikin aõ kar ro̦o̦l jãn ippãn taktõ eo, iar l̦õmn̦ak ippa make im ba: ‘Eokwe iar jab kõtmãne bwe enaaj kar wal̦o̦k men in, ak kiiõ ij aikuj l̦õmn̦ak kõn wãween imaroñ kijenmej kõn men in ewal̦o̦k ñan ña.’”—Linda, 71 an iiõ.

“Iar lukkuun eñtaan kõn juon kain nañinmej me ej jelõt nõõb ko ilo ituanmiiñin meja. Jet iien joñan an metak, ekõm̦m̦an bwe en l̦ap aõ eñtaan im inepata. Im elõñ alen ear ãinwõt ñe imake iaõ im ikõn bar l̦õmn̦ak in bõk mour e aõ.”—Elise, 49 an iiõ.

Juon l̦al̦l̦ap ej pãd ilo wiil̦jea im ro rejitõnbõro ippãn rej pãd ippãn

EL̦AÑÑE kwe ak juon eo ejitõnbõro ippam̦ em̦õj an juon iaamiro kar bõk juon kain nañinmej ekauwõtata, ejjel̦o̦k pere bwe kwõjel̦ã ewi joñan an men in kaeñtaanan. Im ijello̦kun nañinmej eo, kwõnaaj kar aikuj bar kijenmej kõn eñjake ko rej wal̦o̦k. Emaroñ l̦ap am̦ inepata im mijak ñe kwõj l̦õmn̦ak kõn iien ko kwõnaaj aikuj ro̦o̦l im taktõ, ak ñe epen ñan am̦ maroñ kõl̦l̦ã on̦ããn ak bõk jipañ ñan taktõ, ak an uno ko kwõj bũki jelõt ãnbwinnũm̦. Ñe el̦ap ad inepata kõn nañinmej ko ad, men in emaroñ lukkuun l̦ap an kaeñtaan im kainepataik kõj.

Ia eo jemaroñ bõk jipañ jãne? Elõñ armej rar lo bwe wãween eo el̦ap an kar jipañ er ej ilo aer atartar ioon Anij ilo aer jar ñane im ilo aer riiti eoon ko rekaenõm̦m̦an jãn Baibõl̦. Bar juon wãween emaroñ jipañ ej ikijjeen an baam̦le ko im ro jerad im m̦õttad rejetak im jipañ kõj.

WÃWEEN AN KAR RO JET MAROÑ KIJENMEJ

Robert, eo im 58 an iiõ ej ba: “Kwõn kwal̦o̦k am̦ tõmak ilo Anij ilo am̦ jelm̦aik nañinmej eo am̦, im enaaj jipañ eok. Kwõn jar ñan Jeova im kwal̦o̦k kõn eñjake ko am̦ ñane. Kajjitõk kõn jetõb kwõjarjar eo an. Im kajjitõk bwe en kõm̦m̦an bwe kwõn kajoor bwe men in en kaenõm̦m̦an baam̦le eo am̦ im bwe kwõn m̦õn̦õn̦õ wõt ilo am̦ kijenmej wõt kõn nañinmej eo am̦.”

Robert ear wõnm̦aanl̦o̦k im ba: “El̦ap an jipañ ñe ro ilo baam̦le eo am̦ rej kwal̦o̦k aer l̦õmn̦ak im kea kõn eñjake ko am̦. Aolep raan eban jab wõr juon ak ruo rej ko̦o̦l̦tok im kajjitõk ejet aõ mour. Im ij bar bõk kõketak jãn ro m̦õtta ilo jikin ko jet. El̦ap an rein kõkajoor eõ im jipañ eõ bwe in jab ebbweer.”

Ñe kwõj juon eo ej lol̦o̦k juon m̦õttan me enañinmej, l̦õmn̦ak kõn men in Linda ej kajjioñ ba: “Ekkã an ri-nañinmej ro kõn̦aan kate er joñan wõt aer maroñ ñan mour ãinwõt ñe ejjab er ri-nañinmej, im remaroñ jab kõn̦aan kõnono kõn nañinmej ko aer. Eñin unin, em̦m̦anl̦o̦k ñe ilo am̦ bwebwenato ippãer, kwõn kõnnaan ippãer kõn men ko ekkã ami bwebwenato kaki.”

Meñe jej jelm̦ae ak bõk juon nañinmej el̦ap, ak an Anij kõkajoor kõj kab letok naanin kaenõm̦m̦an ko jãn Baibõl̦, im bareinwõt ikijjeen jipañ eo jãn baam̦le ko ad kab ro jerad im m̦õttad, jemaroñ lõke bwe ewõr tokjãn ñan ad mour.

Eoon ko ilo Baibõl̦ me Remaroñ Jipañ

Atartar ioon Anij.

“Iar kappukot Jeova, im ear uwaak eõ, im ear lo̦mo̦o̦r eõ jãn aõ mijak otemjej. Rijjeram̦õl in ear kũr, im Jeova ear roñjake.”—Sam 34:4, 6.

Linda, eo me kar kwal̦o̦k kake m̦oktal̦o̦k, ej ba: “Ijjañin kar jar im ba, ‘Kõm̦m̦an bwe en em̦m̦anl̦o̦k aõ mour.’ Aolep iien ij jar im ba, ‘Jipañ eõ bwe in kajoor im jipañ eõ bwe in maroñ kijenmej kõn nañinmej in aõ.’”

Riiti Naanin Anij ñan bõk kõkajoor.

“Innem ri-jokwe ie ejãmin ba, ‘inañinmej.’”—Aiseia 33:24.

Kõl̦mãnl̦o̦kjen̦ kõn kallim̦ur ko an Anij kõn ilju im jekl̦aj. Men in enaaj kõm̦m̦an bwe en wõr juon am̦ kõjatdikdik, eo im enaaj kõkajoor eok bwe kwõn maroñ kijenmej.

Kappok jipañ jãn baam̦le eo am̦ kab ro jeram̦ im m̦õttam̦.

“Juon jeran ej yokwe iien otemjej; im juon jein im jatin, ear l̦otak bwe en rijjipañ ilo iien jorrããn.”—Jabõn Kõnnaan 17:17.

Elise, eo me kar kwal̦o̦k kake m̦oktal̦o̦k, ej rõjañ im ba: “Kwõn jab kamakel̦o̦k iaam̦, kwõn kõtl̦o̦k bwe ro m̦õttam̦ ren jipañ eok. Emaroñ wõr iien ko kwõj eñjake am̦ make iaam̦ im kwõj l̦õmn̦ak bwe Anij ejjab roñjake eok, ak kwõn jab kamakel̦o̦k iaam̦.”