Ñe Eo Pãleed Ejjab Tiljek ñan Kõj

“Ke l̦eo ippa ear ba bwe ej etal jãn ña kõnke ej bar lo juon eo edikl̦o̦k jãn ña, iar kon̦aan mej. Iar l̦õmn̦ak bwe ejjab jim̦we men eo ear kõm̦m̦ane ñan ña, el̦aptata ñe ij keememejtok elõñ iaan men ko iar kaarmejjeteiki kõn wõt e.”—Maria, jãn Spain.

“Ke lio pãleõ ear etal jãn ña, ear ãinwõt ñe ewõr juon men emej itulowaõ im ejjel̦o̦k aõ kajoor ñan jidik. Mejãnkajjik ko am̦ro, men ko kom̦ro kar kõtmãne kaki, im bũl̦ããn ko am̦ro rar jako. Elõñ iien ko iar l̦õmn̦ak bwe em̦m̦anl̦o̦k aõ mour, bõtab il̦ak ilbõk, ebar wal̦o̦ktok eñjake in bũrom̦õj.”—Bill, jãn Spain.

ÑE JUON rippãlele ejjab tiljek ñan eo pãleen, ej juon men el̦ap an kõmmetak. M̦ool, elõñ rar maroñ jol̦o̦k bõd ko an ro pãleer ãlikin an rein lukkuun ukel̦o̦k jãn bõd ko aer im kõm̦m̦an bwe en bar em̦m̦an pãd eo aer.a (Lale kõmel̦el̦e eo itulal̦.) Ijoke, jekdo̦o̦n ñe rippãlele ro renaaj pãdwõt ippãn doon ak jepel, ñe juon ejel̦ã bwe eo pãleen ear jab tiljek ñane, enãj baj l̦ap an metak wõt. Ta eo rein remaroñ kõm̦m̦ane ilo iien in me elukkuun rup bũrueer?

EOON KO ILO BAIBÕL̦ ME REMAROÑ JIPAÑ

Meñe elõñ rar iioon bũrom̦õj im rar metak kõn an ro pãleer jab tiljek ñan er, ak rein me rar tiljek wõt rar bõk kaenõm̦m̦an jãn eoon ko ilo Baibõl̦. Rar kile bwe Anij ej lo aer metak im bwe ebũrom̦õj kõn er.—Malakai 2:13-16, UBS.

“Ñe ij inepata im jorrããn kwõj kaenõm̦m̦an eõ im kalañlõñ eõ.”—Sam 94:19, UBS.

Bill ej ba: “Ke iar riiti eoon in, iar pijaikl̦o̦k an Jeova lukkuun kaenõm̦m̦an eõ, ãinwõt an juon jemãn eo me el̦ap an yokwe eo nejin naaj kar bar kõm̦m̦ane.”

“Kwõtiljek ñan ro retiljek.”—Sam 18:25, UBS.

Carmen, juon eo me l̦eo pãleen ear jab tiljek ñane ium̦win elõñ allõñ ko, ej kõmel̦el̦e im ba: “L̦eo ippa eto an jab tiljek ñan ña. Bõtab iar lõke bwe Jeova enaaj tiljek ñan ña im bwe eban kõmetak eõ.”

“Kom̦win jab inepata kõn jabdewõt, a ilo men otemjej kõn jar im akwel̦ap . . . kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi.”—Pilippai 4:6, 7.

Sasha ej ba: “Elõñ alen aõ kar riiti eoon in. Im ke iar kal̦apl̦o̦k aõ jar ñan Anij, ear kõm̦m̦an bwe in lo aenõm̦m̦an.”

Armej ro itulõñ im rar kwal̦o̦k kõn kar eñjake ko aer, ewõr iien rar tõn ebbweer. Bõtab rar lõke wõt Jeova Anij im rar bõk kõkajoor jãn Naan ko an. Bill ej ba: “Meñe elõñ men ko rekabũrom̦õjm̦õj rar wal̦o̦k ilo mour e aõ, bõtab tõmak eo aõ ilo Anij ear jipañ eõ bwe in wõnm̦aanl̦o̦k wõt im lo m̦õn̦õn̦õ. Meñe iar etetal ‘ilo kom̦lal̦ in annañin mej,’ ak Anij ear pãdwõt ippa.”—Sam 23:4.

a Ñan bõk mel̦el̦e ko jet ikijjeen an juon jol̦o̦k bõd eo an eo pãleen ak jaab, lale katak 13 pãr. 14-16 ilo bok eo etan, Ta ko Kwõj Aikuj Kõm̦m̦ani bwe Baam̦le n̦e Am̦ En M̦õn̦õn̦õ?

Wãween an Kar Ro Jet Maroñ Kijenmej

Riit im kõl̦mãnl̦o̦kjen̦ kõn naan ko rekaenõm̦m̦an jãn Baibõl̦.

Bill ej ba: “Iar riiti bokin Job im tokãlik iar riiti Sam, im iar kõkal̦l̦eiki ijoko me relukkuun kar jejjet ñan wãween ko iar iiooni. Iar kile bwe ro rar jei bok kein rar bar iioon ejja kain bũrom̦õj im metak rot kein wõt me ij iiooni.”

Bõk kaenõm̦m̦an jãn al ak kõjañjañ ko.

Carmen ej ba: “Ilo iien ko me iar jaje kiki in boñ, ikõn roñjake al in kõjañjañ ko. Men in el̦ap an kar jipañ kaenõm̦m̦an eõ.” Daniel ej ba: “Iar katak kilen kõjañjañ kõn kũta, im wãween kõjañjañin al ko el̦ap aer kar jipañ eõ bwe in bar lo aenõm̦m̦an.”

Kõnono ippãn juon kõn eñjake ko am̦.

Daniel ej ba: “Ikõn jab imminene in kõnono kõn eñjake ko aõ. Bõtab ewõr jet m̦õtta im ikõn kõnnaan ippãer aolep raan. Ij kwal̦o̦k ñan er kõn eñjake ko aõ ilo aõ jejel̦o̦k ñan er im ilo iien ko ij lo er im kõnono ippãer, men in ear l̦ap an jipañ eõ.” Sasha ej ba: “Elukkuun kar l̦ap an baam̦le eo aõ jipañ eõ im ear juon men iar aikuji. Aolep iien jinõ ear jipañ eõ. Ñe ij kõn̦aan kõnono kõn juon men, ej pãd im lukkuun roñjake. Jema ear bar kõm̦m̦an bwe in eñjake yokwe im kõjparok eo an, im ear jipañ eõ bwe en bar jidik kõn jidik em̦m̦anl̦o̦k aõ mour.”

Niknik ilo jar.

Carmen ej ba: “Aolep iien iar jar. Iar eñjake an Anij pãd iturũ, roñjake eõ, im jipañ eõ. Ilo iien in me ear lukkuun pen, el̦ap aõ kar epaakel̦o̦k Anij.”