Juon Eo Ekããl ñan Kumi eo Ej Lale Aolep Eklejia ko an Ri-Kõnnaan ro an Jeova

ILO kar jibboñõn Wõnje, Jãnwõde 24, 2018, ri-jerbal ro ilo Betel̦ ko ilo Amedka im Canada rar roñ kõjjel̦ã in ejejuwaan: Jeid im jatid Kenneth Cook, Jr., ej kiiõ uwaan Kumi eo Ej Lale Aolep Eklejia ko an Ri-Kõnnaan ro an Jeova.

Kenneth Cook ear dik im rũttol̦o̦k ilo Pennsylvania, ilo Amedka. M̦okta jãn an kar kadiwõjl̦o̦k jãn high school, ear jino jel̦ã kõn m̦ool eo jãn kar juon m̦õttan ri-jikuul̦, im ear peptaij ilo Juun 7, 1980. Tokãlik ear jino jerbalin full-time ilo doulul in ãinwõt juon rekũl̦ar bainier ilo Jeptõm̦ba 1, 1982. Ãlikin an kar bainier ium̦win ruo iiõ, rar kũrl̦o̦k e bwe en etal im jerbal ilo Betel̦, innem ear jino jerbal ilo Wallkill, New York ilo Oktoba 12, 1984.

Ium̦win 25 iiõ, jeid im jatid Kenneth ear kõm̦m̦an elõñ kain jerbal ko ilo jikin kõm̦m̦an bok eo im ilo opij eo ilo Betel̦. Ear m̦areik kõrã eo pãleen etan Jamie ilo 1996, im erro jim̦or ar jerbal ilo Wallkill. Tokãlik ilo kar Tijem̦ba 2009 eo, erro ar em̦m̦akũtl̦o̦k ñan Patterson, New York. Kar jilkinl̦o̦k Kenneth ñan ijin bwe en jipañ ilo opij eo me ej jeje im uwaake kajjitõk ko jãn ri-riit ro. Innem ilo Eprõl̦ 2016 eo, ãlikin aerro kar ro̦o̦l ñan Wallkill im pãd jidik ie, erro ar em̦m̦akũtl̦o̦k ñan Brooklyn, New York im jerbal ie. L̦alem allõñ tokãlik, kar kiiõ jilkinl̦o̦k erro ñan Warwick, New York. Im ilo Jãnwõde 2017 eo, kar jitõñ jeid im jatid Kenneth bwe en rijjipañ ilo Kamiti in Jeje Katak eo ñan Kumi eo Ej Lale Aolep Eklejia ko an Ri-Kõnnaan ro an Jeova.