Ruo Em̦m̦aan ro Rekããl ilo Kumi eo Ej Lale Aolep Eklejia ko an Ri-Kõnnaan ro an Jeova

ILO Wõnje, Jãnwõde 18, 2023, kar kõm̦m̦ane juon kõjjel̦ã ilo jw.org bwe em̦õj jitõñ Jeid im Jatid Gage Fleegle im Jeffrey Winder bwe ren uwaan Kumi eo Ej Lale Aolep Eklejia ko an Ri-Kõnnaan ro an Jeova. Em̦m̦aan rein jim̦or eto aerro tiljek ilo aerro karejar ñan Jeova.

Jeid im Jatid Gage Fleegle ear dik im rũttol̦o̦k ilo m̦ool eo ilo Pennsylvania, ilo America. Ke ear juon jo̦dikdik, baam̦le eo an ear em̦m̦akũt ñan juon bukwõn jidikdik me ettol̦o̦k jãn bukwõn ko jet im el̦ap aer kar aikuj ri-kwal̦o̦k naan ro ie. Ejjabto tokãlik, ear peptaij ilo Nobõm̦ba 20, 1988 eo.

Ke ear dik, aolep iien jemãn im jinen Jeid im Jatid Fleegle rar rõjañe ñan bõk kun̦aan ilo jerbalin full-time. Ekkã aer kar kũrtok ri-lotok eo an eklejia eo im ri-Betel̦ ro ñan m̦weo im̦weer, im Jeid im Jatid Fleegle ear lo joñan an kar rein jeid im jatid lukkuun m̦õn̦õn̦õ. Ejjabto ãlikin an kar peptaij, ear jino rekũl̦ar bainier ilo Jeptõm̦ba 1, 1989. Innem ruo iiõ tokãlik, ear tõpare mejãnkajjik eo ear kõm̦m̦ane ke ear 12 an iiõ—ear jino jerbal ilo Betel̦. Ear jino jerbal ilo Betel̦ eo ilo Brooklyn ilo Oktoba 1991.

Ilo Betel̦, Jeid im Jatid Fleegle ear jerbal ilo jikin kõm̦m̦an bok eo ium̦win ruwalitõk iiõ ko, innem tokãlik ear jino jerbal ilo Service Department, ijo rej loloodjake jerbalin kwal̦o̦k naan. Ilo kar tõre in, ear pãd ilo eklejia eo an kajin Russia ium̦win jejjo iiõ ko. Innem ilo 2006 eo ear m̦areiki Nadia, eo me ear kobal̦o̦k ippãn im jino jerbal ilo Betel̦. Erro ar jipañ ilo eklejia eo an kajin Portuguese innem tokãlik rar jipañ ilo kajin Spanish ium̦win elõñl̦o̦k jãn joñoul iiõ ko. Ãlikin an kar Jeid im Jatid Fleegle jerbal ilo Service Department ium̦win elõñ iiõ ko, kar jitõñe bwe en jerbal ilo opij eo an Teaching Committee innem tokãlik ilo opij eo an Service Committee. Ilo M̦aaj 2022, kar jitõñe bwe en jerbal ãinwõt juon rijjipañ ñan Service Committee eo an Kumi eo Ej Lale Aolep Eklejia Ko.

Jeid im Jatid Jeffrey Winder ear dik im rũttol̦o̦k ilo Murrieta, ilo California. Ear dik im rũttol̦o̦k ilo m̦ool eo, im ear peptaij ilo M̦aaj 29, 1986. Ilo allõñ eo tokãlik, ear pepe ñan akjel̦õri bainier. Joñan an kar lukkuun em̦m̦an ippãn, ear kõn̦aan wõnm̦aanl̦o̦k wõt. Ãlikin jejjo allõñ in an akjel̦õri bainier, ear jino rekũl̦ar bainier ilo Oktoba 1, 1986 eo.

Ke ear juon jo̦dikdik, Jeid im Jatid Winder ear lol̦o̦k l̦õm̦aro ruo jein me rar jerbal ilo Betel̦. Men in ear kõm̦akũti ñan kõn̦aan jerbal ilo Betel̦ ñe erũttol̦o̦k. Im ilo kar Mãe 1990 eo, kar kũri bwe en jerbal ilo Betel̦ ilo Wallkill.

Ilo Betel̦, Jeid im Jatid Winder ear jerbal ilo elõñ department ko. Ear jerbal ilo department in karreo, ilo jikin kallib eo, im ilo opij eo an Betel̦. Ear m̦areiki kõrã eo pãleen etan Angela ilo 1997 eo, im erro ar jerbal ilo Betel̦ ippãn doon jãn kar tõre in tok ñan kiiõ. Ilo 2014 eo, erro ar em̦m̦akũt ñan Warwick ijo me Jeid im Jatid Winder ear jipañ ilo jerbalin ekkal eo ilo ra in. Ilo kar 2016 eo, erro ar em̦m̦akũt ñan Patterson (Watchtower Educational Center) ijo rej kõm̦m̦ani jet iaan jikuul̦ ko an doulul in ie. Im ilo Patterson ear jerbal ilo Audio/Video Services. Im emãn iiõ ko tokãlik erro ar jepl̦aak ñan Warwick, im kar kajjitõk bwe Jeid im Jatid Winder en jerbal ilo opij eo an Personnel Committee. Ilo M̦aaj 2022, kar jitõñe bwe en juon rijjipañ ñan Personnel Committee eo an Kumi eo Ej Lale Aolep Eklejia Ko.

Jej jar bwe Jeova en lukkuun kõjeraam̦m̦ane em̦m̦aan rein me rej “menin letok,” ilo aer wõnm̦aanl̦o̦k wõt im buul̦ kate er ilo aer jerbal ñan Aelõñ eo.—Eps. 4:8.