Ruo Em̦m̦aan ro Rekããl ilo Kumi eo Ej Lale Aolep Eklejia ko an Ri-Kõnnaan ro an Jeova

ILO Oktoba 5, 2024, kar kõm̦m̦ane kõjjel̦ã in ilo kar kweilo̦k eo ejejuwaan an iiõ eo 2024 (annual meeting): Em̦õj jitõñ em̦m̦aan ro jeid im jatid etaer in Jody Jedele im Jacob Rumph bwe ren uwaan Kumi eo Ej Lale Aolep Eklejia ko an Ri-Kõnnaan ro an Jeova. Ium̦win elõñ iiõ ko m̦aantak tok ñan kiiõ, em̦m̦aan rein jim̦or rej tiljek wõt ilo aerro karejar ñan Jeova.

Jeid im Jatid Jedele ear l̦otak ilo Missouri, ilo America im ear dik im rũttol̦o̦k ilo m̦ool eo. Baam̦le eo an rar jokwe ilo juon jikin me jejjo wõt Ri-Kõnnaan ro an Jeova ie. Kõn men in, ear iioone elõñ ro jeid im jatid jãn elõñ jikin ko reoktak jãn doon ke rar etal ñan ijo ej jokwe ie ñan jipañ ilo jerbalin kwal̦o̦k naan. Yokwe eo aer im aer bõrokuk ippãn doon ear lukkuun jelõt Jeid im Jatid Jedele. Ke ear jo̦dikdik wõt, ear peptaij ilo Oktoba 15, 1983. Ear lukkuun em̦m̦an ippãn jerbalin kwal̦o̦k naan, im ãlikin an kar kadiwõjl̦o̦k jãn high school, ear jino rekũl̦ar bainier ilo Jeptõm̦ba 1989.

Ke Jeid im Jatid Jedele ear dik, rũtto ro jinen im jemãn rekõn bõkl̦o̦k e im ledik eo jatin bwe ren lol̦o̦k Betel̦. Iien kein rar lol̦o̦k Betel̦ ear kõm̦akũt erro ñan likũt bwe aerro jerbal ilo Betel̦ en juon mejãnkajjik. Im eñin men eo rar jim̦or kõm̦m̦ane tokãlik. Jeid im Jatid Jedele ear jino jerbal ilo Betel̦ eo ilo Wallkill ilo Jeptõm̦ba 1990. Ear m̦okta jerbal ilo department in karreo im tokãlik, ilo Medical Services.

Ilo kar tõre in, ear l̦ap aikuj ilo elõñ eklejia ko me rej kajin Spanish im rar aikuj em̦m̦aan ro jeid im jatid bwe ren jipañ er. Kõn men in, Jeid im Jatid Jedele ear etal ñan juon iaan eklejia kein im jino katak kajin Spanish. Ejjabto tokãlik, ear iioone juon jeid im jatid kõrã etan Damaris me ear bar bainier ilo ejja circuit eo an wõt. Tokãlik, erro ar m̦are, im Damaris ear jino jerbal ilo Betel̦ ippãn.

Ilo kar 2005 eo, rar etal jãn Betel̦ bwe ren lale rũtto ro jineerro im jemãerro. Ilo kar tõre in, rar jim̦or rekũl̦ar bainier. Jeid im Jatid Jedele ear jipañ katakin ilo Jikuul̦in Bainier, im ear uwaan kumi eo ej loloodjake ro rej del̦o̦ñ ilo aujpitõl̦ (Hospital Liaison Committee) im kumi eo ej loloodjake jerbalin ekkal Im̦õn Kweilo̦k ko (Regional Building Committee).

Ilo kar 2013 eo, ra eo ear bar kũr Jeid im Jatid Jody im Damaris Jedele ñan Betel̦ bwe ren jipañ ilo jerbalin ekkal eo ilo Warwick. Jãn kar iien in tok ñan kiiõ, rar bareinwõt jerbal ilo Betel̦ ko ilo Patterson im Wallkill. Jeid im Jatid Jedele ear jerbal ilo jerbalin ekkal ko an doulul in (Local Design/Construction Department) im ilo Hospital Information Services. Ilo M̦aaj 2023, kar jitõñe bwe en rijjipañ ñan Service Committee. Ilo an reilikl̦o̦k ilo aolep department ko ear jerbal ie, ej ba: “Ñe kwõj bõk jerbal ko rekããl, bõlen jet iien kwõj ikkũm̦kũm̦ im mijak. Bõtab eñin iien eo me eaorõk bwe kwõn keememej ñan atartar ioon Jeova kõnke E eo ej kõm̦m̦an bwe jen erom jabdewõt men jej aikuj erom.”

Jeid im Jatid Rumph ear l̦otak ilo California, ilo America. Ke ear dik, ear jako an kõrã eo jinen kweilo̦k im kwal̦o̦k naan. Meñe ãindein, ak jinen ear kate ñan katakin e katak ko rem̦ool jãn Baibõl̦. Bareinwõt, kajjojo iiõ Jeid im Jatid Rumph ekõn lol̦o̦k lel̦l̦ap eo jibwin, eo ear juon ri-karejeran Jeova me etiljek. Lel̦l̦ap in jibwin ear jipañe bwe en itoklimo kõn m̦ool eo, im ke ear 13 an iiõ, ear kajjitõk ñe emaroñ katak Baibõl̦. Ilo Jeptõm̦ba 27, 1992, ke ear juon jo̦dikdik, ear peptaij. Im ej juon jeraam̦m̦an bwe kõrã eo jinen ear bar jino karejar ñan Jeova im aolepen ro uwaan baam̦le eo an rar jino kõm̦m̦an wõnm̦aanl̦o̦k ko im peptaij.

Ke Jeid im Jatid Rumph ear juon jo̦dikdik, ear lo an bainier ro lukkuun m̦õn̦õn̦õ. Innem ãlikin an kadiwõjl̦o̦k jãn high school, ear jino bainier ilo Jeptõm̦ba 1995 eo. Im ilo iiõ eo 2000, ear em̦m̦akũt ñan Ecuador bwe en jipañ ilo jikin in el̦ap aikuj ri-kwal̦o̦k naan ie. Ilo ijin, ear iioone juon jeid im jatid kõrã jãn Canada etan Inga, innem tokãlik erro ar m̦are. Erro ar jino mourin m̦are eo aerro ilo juon bukwõn ilo Ecuador, im ear wõr juon kumi jidikdik in ri-kwal̦o̦k naan ro ijin. Rainin, em̦õj an oktak kumi jidikdik in ñan juon eklejia me el̦ap an kõm̦m̦an wõnm̦aanl̦o̦k ko.

Tokãlik, Jeid im Jatid Jacob im Inga Rumph rar jerbalin jipejel̦ bainier, innem tokãlik kar jitõñ erro ñan kõm̦m̦ane jerbalin lol̦o̦k eklejia ko. Ilo 2011 eo, kar kũr erro ñan kilaaj eo kein ka 132 ilo Jikuul̦in Giliad. Ãlikin aerro kar kadiwõjl̦o̦k jãn jikuul̦ in, elõñ jikin ko erro ar em̦m̦akũt ñani im elõñ kain jerbal ko erro ar kõm̦m̦ani. Ñan waanjoñak, erro ar jerbal ilo Betel̦, jerbalin mijinede, im jerbalin lol̦o̦k eklejia ko. Bareinwõt, Jeid im Jatid Rumph ear juon iaan ro rar katakin ilo Jikuul̦ eo ñan Ri-Kwal̦o̦k Naan ro an Aelõñ Eo.

Kõn wõt nañinmejin COVID-19, Jeid im Jatid Jacob im Inga Rumph rar aikuj bar jepl̦aak ñan America. Kar kũr erro ñan Betel̦ eo ilo Wallkill, ijo Jeid im Jatid Rumph ear bõk kamminene ilo Service Department. Innem tokãlik, kar jilkinl̦o̦k erro bwe ren ro̦o̦l ñan ra eo ilo Ecuador, ijo kar jitõñ Jeid im Jatid Rumph bwe en uwaan kumi in Em̦m̦aan ro Rej Lale Ra Eo. Ilo 2023 eo, kar jilkinl̦o̦k erro ñan Warwick. Ilo Jãnwõde 2024 eo, kar jitõñ Jeid im Jatid Rumph bwe en juon rijjipañ ñan Service Committee. Ilo an kõl̦mãnl̦o̦kjen̦ kõn aolep jikin ko ear jerbal ie, ej ba, “Men eo ej kõm̦m̦an bwe juon jerbal en aorõk im jejuwaan ej armej ro kwõj jerbal ippãer, jab jikin eo kwõj jerbal ie.”

El̦ap ad kam̦m̦oolol kõn jerbal ko rel̦l̦ap an em̦m̦aan rein jeid im jatid, im jej “wõnm̦aanl̦o̦k wõt im kaorõk kain [em̦m̦aan] rot in.”—Pil. 2:29.