Jipañ Ro Jet Kijenmej Ñe Rej Iioon Inepata

1. Ewi wãween ad maroñ anõke Jeova, eo Jemãd im el̦ap yokwe ippãn?

JEOVA ej lukkuun yokwe kõj. (Jon 3:16) Im jekõn̦aan anõke Jemãd ilañ, eo im el̦ap yokwe ippãn. Kõn men in, jej kajjioñ kwal̦o̦k ad ‘bũrom̦õj ippãn ro rej eñtaan, yokwe ro jeid im jatid, im kwal̦o̦k tũriam̦o’ ñan aolep, el̦aptata ñan ro “nukũd ilo tõmak.” (1 Pit. 3:8; Gal. 6:10) Ñe ro uwaan baam̦le eo ad ilo tõmak rej iioon apañ ko me rej kõm̦m̦an aer inepata, jekõn̦aan jipañ er.

2. Ta ko jenaaj etali ilo katak in?

² Aolep ro rekõn̦aan bwe ren uwaan baam̦le eo an Jeova renaaj iioon wãween ko me rej kõm̦m̦an aer inepata. (Mark 10:29, 30) Ilo an epaaktok jem̦l̦o̦kin jukjukun pãd in, enaaj lõñl̦o̦k wõt mãlejjoñ ko reppen me jenaaj aikuj in kijenmej kaki. Ewi wãween ad maroñ jipañ doon? Jen etale ta ko jemaroñ katak jãn bwebwenato ko ilo Baibõl̦ kõn Lot, Job, im Neomi. Jenaaj bar etale jet wãween ko reppen ro jeid im jatid rej jelm̦aiki ilo raan kein im lale ewi wãween ad maroñ jipañ er ñan kijenmej kõn apañ ko rej iiooni.

KIJENMEJ WÕT

3. Ãinwõt an alikkar ilo 2 Piter 2:7, 8, ta pepe eo ejjab em̦m̦an Lot ear kõm̦m̦ane, im ta ko rar wal̦o̦k tokãlik?

³ Lot ear kõm̦m̦ane juon pepe ejjab em̦m̦an ke ear kããlõt ñan jokwe ibwiljin armej ro rekanooj in nana ilo Sodom. (Riit 2 Piter 2:7, 8.) Jikin in ear m̦weiie im jeraam̦m̦an, bõtab elõñ wãween ko reppen Lot ear iiooni kõn an kar em̦m̦akũtl̦o̦k ñan ijin. (Jen. 13:8-13; 14:12) Bõlen kõn an kar lio pãleen yokwe jikin in ak epaake jet iaan armej ro ie, men in ear kõm̦m̦an bwe en jab pokake Jeova. Innem, ke Jeova ear jilkinlal̦tak kijeek im dekã ko rebwil ioon jikin in, liin ear luuji mour eo an. Ak l̦õmn̦ak m̦õk kõn lim̦aro ruo nejin Lot. Em̦m̦aan ro renaaj kar m̦areik er rar bar mej ilo Sodom. Im Lot ear luuji men ko m̦weien, ear jako m̦weo im̦õn, im men eo el̦aptata an kabũrom̦õjm̦õj me ear jako ej lio pãleen. (Jen. 19:12-14, 17, 26) Ilo tõre in me ear lõñ apañ ko rar wal̦o̦k, ear ke jako an Jeova kijenmej ippãn Lot? Ear jab.

4. Ewi wãween an kar Jeova kwal̦o̦k an kijenmej ippãn Lot? (Lale pija eo ilo kilin bok in.)

⁴ Meñe Lot ear kããlõt ñan jokwe ilo Sodom, ak Jeova ear kwal̦o̦k an tũriam̦o ilo an kar jilkinl̦o̦k enjel̦ ro bwe ren lo̦mo̦o̦rene im baam̦le eo an. Bõtab, ijello̦kun an kar m̦õkaj im pokake naanin jiroñ ko an enjel̦ ro bwe en kaiur im etal jãn Sodom, ear “rum̦wij” ak aepedped. Kõn men in, enjel̦ ro rar aikuj kabwijere pein im jipañ e im baam̦le eo an bwe ren ko jãn jikin kweilo̦k eo. (Jen. 19:15, 16) Innem enjel̦ ro rar ba ñane bwe en ko ñan tol̦ ko. Ak ijello̦kun an kar Lot pokake Jeova, ear kajjitõk aer etal ñan juon bukwõn epaak. (Jen. 19:17-20) Jeova ear kijenmej wõt ilo an roñjake im kõtl̦o̦k an Lot etal ñan bukwõn eo. Tokãlik Lot ear jino mijak in jokwe ijin im ear em̦m̦akũtl̦o̦k ñan tol̦ ko, ejja ijo wõt Jeova ear ba ñane ilo jinoin bwe en etal ñane. (Jen. 19:30) El̦ap wõt an kar Jeova lukkuun kwal̦o̦k an kijenmej! Ewi wãween ad maroñ kajjioñe e?

5-6. Ilo ad anõke Anij, ewi wãween ad maroñ l̦oore 1 Tessalonika 5:14?

⁵ Ãinwõt Lot, bõlen juon iaan ro uwaan baam̦le eo ad ilo tõmak emaroñ kõm̦m̦ani pepe ko rejjab em̦m̦an im bõktok jorrããn ñan e make. El̦aññe men in enaaj kar lukkuun wal̦o̦k, ta eo jenaaj kar kõm̦m̦ane? Bõlen jenaaj kar m̦õkaj im ba ñane bwe ej jeore men eo ear m̦adm̦õde, im enaaj kar m̦ool men in. (Gal. 6:7) Bõtab, ewõr wãween ko rem̦m̦anl̦o̦k jemaroñ kõm̦m̦ani. Jemaroñ kajjioñe wãween an kar Jeova jipañ Lot. Ewi wãween?

⁶ Jeova ear jilkinl̦o̦k enjel̦ ro bwe ren jab kakkõl wõt Lot ak bwe ren bar jipañe ñan ko jãn jorrããn eo enaaj kar bõktok ioon Sodom. Ãindeinl̦o̦k wõt, jemaroñ aikuj kakkõl eo jeid im jatid el̦aññe jej lo an kõm̦m̦ane juon men me ej kaal an iioon jorrããn. Ak jemaroñ bar jipañ e. Meñe erum̦wij an l̦oore naanin kakapilõklõk ko jãn Baibõl̦ kar lil̦o̦k ñane, ak jej aikuj kijenmej wõt ippãn. Jen ãinwõt kar enjel̦ ro ruo. Ijello̦kun ad ebbweer im kattol̦o̦k kõj jãn eo jeid im jatid, jej aikuj pukot wãween ko jemaroñ kõm̦m̦ani ñan jipañ e. (1 Jon 3:18) Jemaroñ aikuj kabwijere ak bõk pein ilo kõkkar im jipañe bwe en l̦oore naanin kakapilõklõk ko rem̦m̦an kar lil̦o̦k ñane.​—Riit 1 Tessalonika 5:14.

7. Ewi wãween ad maroñ anõke wãween an kar Jeova watõk Lot?

⁷ Jeova emaroñ kar kalimjek wõt likjab ko an Lot. Ak ijello̦kun an kar kõm̦m̦ane men in, ear kõm̦akũt rijjilõk Piter elõñ iiõ tokãlik ñan kwal̦o̦k kõn Lot bwe ej juon ri-wãnõk. El̦ap ad m̦õn̦õn̦õ bwe Jeova ej kõjekdo̦o̦n bõd ko ad! (Sam 130:3) Jemaroñ ke anõke wãween an kar Jeova watõk Lot? El̦aññe jej kalimjek wõt kadkad ko rem̦m̦an an ro jeid im jatid, enaaj l̦apl̦o̦k ad jel̦ã kijenmej ippãer. Men in enaaj kõm̦m̦an bwe en pidodol̦o̦k aer bõk jipañ jãn kõj.

KWAL̦O̦K TŨRIAM̦O

8. Ta eo tũriam̦o enaaj kõm̦akũt kõj ñan kõm̦m̦ane?

⁸ Ak Job ear oktak jãn Lot kõnke ear jab iioon eñtaan itok wõt jãn an kar kõm̦m̦ane juon pepe ejjab em̦m̦an. Ijoke, ekanooj l̦ap apañ ko ear iiooni. Ear jako men ko m̦weien, an utiej ilo jukjukun pãd eo, im an em̦m̦an ãjmour eo an. Men eo el̦apl̦o̦k an kar nana, ej bwe erro ar lio pãleen luuji aolep ajri ro nejierro ilo mej. Bareinwõt, l̦õm̦aro jilu m̦õttan Job me ear jab m̦ool aer m̦õttãiki rar n̦aruon. Ta juon iaan un ko unin an kar riabin ri-kaenõm̦m̦an rein jab kwal̦o̦k aer tũriam̦okake Job? Rar jab kajjioñ mel̦el̦e ta ko rar lukkuun wal̦o̦k ñane. Kõn men in, rar m̦õkaj im bõk l̦õmn̦ak ko rebõd im ekajete Job ilo juon wãween eddo. Ewi wãween ad maroñ kõjparok bwe jen jab kõm̦m̦ane juon bõd ãinl̦o̦k wõt men in? Eokwe, jej aikuj kile bwe Jeova wõt ejel̦ã kõn wãween eo juon armej ej iioone im aolep men ko rar wal̦o̦k. Lukkuun roñjake men ko eo ej iioon apañ ej ba. Jab roñjake wõt naan ko ej ba, ak kajjioñ in bar mel̦el̦e kõn an eddo bũruon. Innem jej kab naaj maroñ kwal̦o̦k ad lukkuun mel̦el̦e kõn eñjake eo an eo jeid im jatid.

9. Ta eo tũriam̦o enaaj bõbraik kõj jãn ad kõm̦m̦ane, im etke?

⁹ Tũriam̦o enaaj bõbraik kõj jãn ad ruruwe im kõnnaan kake apañ ko ro jet rej iiooni. Juon ri-ruruwe ejjab jipañ im kõkajoor eklejia eo. Ej ko̦kkure eklejia eo. (JK. 20:19; Rom 14:19) Ejjab juon eo ejouj ak ej juon ri-jajel̦o̦kjen̦, im naan ko an remaroñ ko̦kkure juon armej me em̦õj an jorrããn kadede. (JK. 12:18, UBS; Ep. 4:31, 32) Innem el̦apl̦o̦k an em̦m̦an ñe jej kalimjek kadkad ko rem̦m̦an kadkadin juon armej im l̦õmn̦ak kõn wãween ad maroñ jipañe ñan kijenmej kõn mãlejjoñ ko ej iiooni!

10. Ta eo jej katak jãn naan ko ilo Job 6:2, 3?

¹⁰ Riit Job 6:2, 3. Ewõr jet iien Job ear inepata im kwal̦o̦k “naanin jajel̦o̦kjen̦.” Bõtab, tokãlik ear bũrom̦õj im ajl̦o̦k kõn jet iaan men ko ear ba. (Job 42:6, UBS) Ãinwõt Job, juon armej ilo raan kein me ej kijenmej kõn apañ eo ej inepata kake emaroñ kwal̦o̦k naanin jajel̦o̦kjen̦ ko im ba men ko me tokãlik ej ajl̦o̦k kaki. Ta eo jen kõm̦m̦ane? Ijello̦kun ad ekajete, jen kwal̦o̦k tũriam̦o. Keememej bwe ekar jab karõk eo an Jeova in bwe jabdewõt iaad en iiooni apañ ko im wãween ko reppen me jej jelm̦aiki ilo raan kein. Innem jemel̦el̦e ñe juon eo etiljek ilo an karejar ñan Jeova ej kõnono naanin jajel̦o̦kjen̦ ñe el̦ap an inepata. Meñe men ko ej ba kõn Jeova ak kõn kõj rejjab jim̦we, jen jab m̦õkaj im illu ippãn ak ekajete kõn an ba naan kein.​—JK. 19:11.

11. Ewi wãween an em̦m̦aan ro rej lale eklejia anõke Ilaihu ñe rej kajim̦we ro jet?

¹¹ Jet iien, juon armej me ej kijenmej kõn apañ eo ej kõm̦m̦an an inepata ej aikuj bwe juon en kajim̦we ak lel̦o̦k naanin kauwe ñane. (Gal. 6:1) Ewi wãween an em̦m̦aan ro rej lale eklejia kõm̦m̦ane men in? Enaaj em̦m̦an ñe rej anõke Ilaihu, eo im ear roñjake Job im kajjioñ mel̦el̦e kõn eñjake ko an. (Job 33:6, 7) Ilaihu ear kajim̦we Job ãlikin wõt an kar mel̦el̦e kõn l̦õmn̦ak ko an. Em̦m̦aan ro rej lale eklejia me rej l̦oore joñak eo an Ilaihu renaaj lukkuun roñjake im kajjioñ mel̦el̦e kõn wãween eo armej eo ej iioone. Innem, ñe rej kajim̦we ro jet, enaaj pidodol̦o̦k an naan ko aer tõpar bũruon ro rej roñjake er.

BA NAAN KO REKAENÕM̦M̦AN

12. Ke ear mej l̦eo pãleen Naomi im l̦õm̦aro ruo nejin, ewi wãween an kar men in jelõt Naomi?

¹² Naomi ear juon kõrã eo etiljek me ear yokwe Jeova. Ak ãlikin an kar mej l̦eo pãleen im l̦õm̦aro ruo nejin, ear kõn̦aan ukot etan jãn Naomi ñan “Mera,” mel̦el̦ein “Bũrom̦õj.” (Rut 1:3, 5, 20, UBS, ftn., 21) Rut, kõrã eo pãleen kar juon iaan l̦õm̦aro nejin Naomi, ear pãdwõt ippãn ilo aolep mãlejjoñ ko ear iiooni. Rut ear jab jipañe wõt Naomi kõn aikuj ko an ak ear bar lel̦o̦k naanin kaenõm̦m̦an ko ñane. Rut ear kwal̦o̦k an yokwe im rejetake Naomi kõn jejjo naan ko me rar itok jãn bũruon.​—Rut 1:16, 17.

13. Etke ro me emej ro pãleer rej aikuji jipañ eo ad?

¹³ Ñe ej mej eo pãleen juon iaan ro uwaan baam̦le eo ad ilo tõmak, armej in ej aikuji jipañ eo ad. Jemaroñ keidi rippãlele ro ñan ruo wõjke me rar eddekl̦o̦k iturin doon. Ium̦win iiõ ko m̦aantak, okar ko okran wõjke ko rar idepdep im koba ippãn doon. Ñe rej kõteepe juon iaan wõjke ko im emej, emaroñ lukkuun l̦ap an jelõt wõjke eo juon. Ejjel̦o̦k oktak, ñe juon ej luuji eo pãleen ilo mej, emaroñ lukkuun l̦ap an men in jelõt eñjake ko an ium̦win juon iien eaetok. Paula, eo ear mej l̦eo pãleen ilo jidimkij, ej ba: “Ear lukkuun oktak kiiõ mour e aõ, im ear ejjel̦o̦k aõ kajoor. Ear jako eo m̦õtta me ilukkuun epaaketata. Iar kõnono ippãn l̦eo ippa kõn aolep men. Ilo iien ko iar lañlõñ ear m̦õn̦õn̦õ ippa im ear rejetak eõ ilo iien ko reppen. Aolep iien ear roñjake eõ ke iar kõnnaan kõn inepata ko aõ. Ear lukkuun ãinwõt ñe em̦õj aer kõrrãjete eõ.”b​—Lale kõmel̦el̦e eo itulal̦.

14-15. Ewi wãween ad maroñ kaenõm̦m̦ane juon armej me emej eo pãleen?

¹⁴ Ewi wãween ad maroñ kaenõm̦m̦an juon armej me emej eo pãleen? Men eo m̦oktata jemaroñ kõm̦m̦ane ej kõnono l̦o̦k ñane, jekdo̦o̦n ñe jemaroñ ãliklik ak jaje ta eo jen ba. Paula, eo ej kab m̦õj kwal̦o̦k kake, ej ba: “Imel̦el̦e bwe armej ro rej ãliklik ak jaje ta eo ren ba ñe juon ej mej. Rein rej inepata ñe enaaj bõd men ko rej ba. Ak ebwel̦o̦k ad roñ jãn juon meñe ejjab jejjet men ko ej ba jãn ñe jejjab roñ jãne ñan jidik.” Bõlen eo ebũrom̦õj ejjab kõtmãne bwe jen ba jet naan ko remmejaja. Paula ej ba: “El̦ap aõ kar kam̦m̦oolol ke ro m̦õtta rar ba wõt naan kein, ‘Ij bũrom̦õj waj ippam̦ kõn jako in an eo ejitõnbõro ippam̦.’”

¹⁵ William, eo me kõrã eo pãleen ear mej jet iiõ ko remootl̦o̦k, ej ba: “Em̦m̦an ippa ñe ro jet rej kõnono kõn men ko rem̦m̦an rej keememeji kõn kar kõrã eo pãleõ. Men in ej kõkajoor eõ kõn aõ jel̦ã bwe ro jet rar yokwe im kautiej e. Wãween in el̦ap an lukkuun jipañ eõ. Ear jubũruõ kõn naan ko aer kõnke kõrã eo pãleõ ear lukkuun aorõk ippa im l̦ap kun̦aan ñan ña.” Bianca, juon kõrã me emej l̦eo pãleen, ej kõmel̦el̦e im ba: “Ij kile bwe ñe ro jet rej jar ippa im riiti juon ak ruo eoon ippa, men in el̦ap an kaenõm̦m̦an eõ. El̦ap an jipañ ñe rej kõnnaan kõn l̦eo pãleõ im ñe rej roñjake aõ kõnnaan kõn e.”

16. (1) Ta eo jej aikuj in kõm̦m̦ane ñan juon armej me emej eo ejitõnbõro ippãn? (2) Ekkar ñan Jemes 1:27, ta eddo eo kar letok ñan kõj?

¹⁶ Ãinwõt an kar Rut pãdwõt ippãn Naomi, eo me ear mej l̦eo pãleen, ãindein jej aikuj wõnm̦aanl̦o̦k wõt im rejetake ro rar luuji ro rejitõnbõro ippãer ilo mej. Paula, eo kar kwal̦o̦k kake m̦oktal̦o̦k, ej ba: “Ãlikin wõt an kar mej l̦eo ippa, elõñ rar itok im jipañ eõ. Ak ãlikin jet iien, rar bar jepl̦aak ñan men ko rej kõm̦m̦ani ilo mour ko aer. Ijoke, mour e aõ ear lukkuun oktak kiiõ. El̦ap an lukkuun jipañ ñe ro jet rej kile bwe eo ebũrom̦õj ej aikuj jipañ im kaenõm̦m̦an ilo allõñ kan̦e tok, ak ilo bar iiõ kan̦e tok, ãlikin mej eo an eo ejitõnbõro ippãn.” Em̦ool bwe kajjojo armej reoktak jãn doon. Jel̦ak lale jet, em̦õkaj aer jel̦ã ukoktak ñan wãween ko rekããl rej wal̦o̦k kiiõ ilo mour ko aer. Ak ñan jet, kajjojo iien ñe rej kõm̦m̦ane juon men me rekõn kõm̦m̦ane ippãn eo ejitõnbõro ippãer, rebar jino bũrom̦õj kõnke ej kakeememej tok er bwe ejako. Wãween an armej ro bũrom̦õj kõn eo ejitõnbõro ippãer me em̦õj an jako, eoktak jãn doon. Jen keememej bwe em̦õj an Jeova letok jeraam̦m̦an im eddo eo ñan kõj bwe jen lale ro em̦õj an jako ro pãleer.​—Riit Jemes 1:27.

17. Etke ro me ro pãleer rar etal jãn er rej aikuji jipañ eo ad?

¹⁷ Jet rippãlele rej aikuj kijenmej kõn an rup bũrueer im inepata bwe em̦õj an eo pãleer jutak im etal jãn er. Joyce, eo me l̦eo pãleen ear etal jãne im bõk bar juon kõrã, ej ba: “Joñan an kõmmetak jepel, enanal̦o̦k jãn ñe l̦eo ippa ear mej. Kõnke el̦aññe en kar mej ilo juon ãkjitõn ak jãn juon nañinmej, men in ejjab juon men ear kããlõte ñan kõm̦m̦ane. Ak ikijjeen wãween in, l̦eo ippa ear make kããlõt ñan etal jãn ña. Iar lukkuun jook im l̦õmn̦ak bwe ejjel̦o̦k tokja.”

18. Ta ko jemaroñ kõm̦m̦ani ñan jipañ ro ejako an wõr pãleer?

¹⁸ Ñe jej kõm̦m̦ani men dikdik ko ñan kwal̦o̦k jouj ñan ro ejako an wõr pãleer, jej kaalikkar ñan er bwe jej lukkuun yokwe er. Kiiõ ke rej make iaaer, el̦apl̦o̦k aer aikuj m̦õttaer. (JK. 17:17) Ewi wãween am̦ maroñ kwal̦o̦k bwe kwõj juon m̦õttaer? Kwõmaroñ kũr waj er ñan kõjota bajjek ilo m̦weo im̦õm̦. Im kwõmaroñ kajjitõk ippãer bwe kom̦win kwal̦o̦k naan ippãn doon ak kõm̦m̦ani men ko rekam̦õn̦õn̦õ ippãn doon. Bar juon men kwõmaroñ kõm̦m̦ane ej ilo am̦ kajjitõk ippãer ñan kobawaj ilo iien kabuñ an baam̦le eo ami jet iien. El̦aññe kwõj kõm̦m̦ani men kein, kwõnaaj kam̦õn̦õn̦õik Jeova, eo ej “epaak ñan ro erup bũrueer” im ej “kõjparok kõrã ro emej pãleer.”​—Sam 34:18; 68:5, UBS.

19. Ta eo 1 Piter 3:8 ej jiroñ kõj bwe jen kõm̦m̦ane?

¹⁹ Ejjabto jãn kiiõ, ñe Aelõñ eo an Anij ej tõle lal̦ in, jenaaj mel̦o̦kl̦o̦k aolep “inepata ko jãn etto.” El̦ap ad kijoororetok iien eo ñe “ejjel̦o̦k en̦ enaaj keememeji men ko rar wal̦o̦k ilo iien ko rej mootl̦o̦k.” (Ais. 65:16, 17, UBS) M̦ae tõre en̦, jen rejetake doon im kam̦ool ilo naan im kõm̦m̦an ko ad jim̦or bwe jej yokwe aolep ro ilo baam̦le eo ad ilo tõmak.​—Riit 1 Piter 3:8.