Etke Jej Aikwij Kejbãrok Buk ko Ar?

Juõn ian un ko unin ej kinke Dri Kennan ro an Jeova rej kaurõk ien air katak Baibel ibeir mõke. (Jon 17:3) Eor tokjen ar kejbarõk buk ko ar ilo mweo imwed bwe jen maroñ bukõt melele ko, uaki kajitõk ko, im kapojõklok iman ñõn kwelok ko ar. Ebiruru ñõn ar maroñ bõk kemelele ko kin Baibel eo im jej aikwij kortokjen men in.

Bar juõn un ej kinke kajjojo dri Kristian ej aikwij “mõke inek [ijo] kwonan.” (Gal. 6:5) Elañe elõñ ar kajitõk, jej aikwij kõmõn bwe en juõn mõnit iber ñõn ar mõke bukõt melele ko mokta im kajitõk iben ro jet elañe ej menin aikwij. Enaj laplok ar maroñ in jela emõn jen nana im melele Nan ko an Anij elañe jej niknik in katak Baibel eo im kortokjen buk ko me jar kakoni.—Hib. 5:11-14.

Jej aikwiji kajur eo an Anij kab buk ko jen rolul eo an ñõn jibõñ kij melele nan ko an ilo Baibel eo. (Jerb. 8:30, 31) Juõn ian buk ko ar eaurõktata ej Imõniaroñroñ eo. Jej aikwij kejbarõki im kakoni Imõniaroñroñ ko an kajjojo aliñ. Ñe jej riiti ilo buk ko ar kin kemelele ko kin eon ko ilo Baibel im wãwen jemaroñ jerbali, bwelen jemaroñ jei buk eo im numba in peij eo iturin eon eo ilo Baibel eo ar mõke. Ilo wãwen in, elañe jej aikwiji bar kemelele kein kin eon in, enaj mõkõjlok ar loi.

Jet ro jemen im jinen ajiri ro rar jibõñ ro nejier ñõn air jela kejbarõk im kakon buk ko air mõke kinke rejela bwe remaroñ naj aikwiji kiõ wõt ak ilo ran ko rej ber iman. Bwelen remaroñ kejenolok juõn ak ruõ jikin kakon me rej ñõn buk ko wõt me rej kajerbali ñõn katak ibeir mõke ak iben baamle eo. Ejelok berre bwe juõn ian men ko raurõk ilo mweo imõn dri Kristian ro, ej jikin eo rej kakoni im kejbarõki buk ko air.