Wõnmanlok Wõt im Lor Jesus
1 Ilo juõn ien Jesus ear ba: “Elañe jabdewõt armij e kõnan lor Iõ, en make karmijete, im bõk alal in kaiñtan eo an im wõnmanlok wõt im lor iõ.” (Mat. 16:24, New World Translation) Emol jekõnan emmakit ilo jimwe ñõn nan ko an Jesus. Jen etale ta eo ej kitibuj ilo kajjojo nan ko ilo kir eo an.
2 “En Make Karmijete”: Ñe jej wujleplok ad mour ñõn Jehovah, jej karmijete kõnan ko ad make. Melele in nan in Greek eo rej ukõte “karmijete” ej “ñõn ba jaab.” Melelen menin bwe jej karmijete ilo mõnõnõ mejenkajjik, kõnan, men ko rej kabidodoik mour, im men in kõmõnõnõ ko ad rekibbõn—im bebe ñõn kabuñburuen Jehovah ñõn indio.—Rom. 14:8; 15:3.
3 “Bõk Alal in Kaiñtan eo An”: Mour in Christian ej juõn mour in bõk alal in kaiñtan eo kin katok in jerbal ñõn Jehovah. Juõn wãwen jitõb in make karmijete ej alikar ej ikijen an juõn kate e ilo jerbal in kwalok nan. Ñõn tõre in ilo yiõ in, elõñ ri kwalok ro rar lõñliñ kin jerbal in auxiliary pioneer. Bõlen kwoj juõn iair im kwomaroñ kamol bwe jerammõn ko kwoj bõki elaplok an kabwe men in katok ko kwoj kõmmõni. Ro rejjab maroñ jerbal einwõt auxiliary pioneer ekkã air kõmmõn karõk ñõn kalaplok air ien in kwalok nan einwõt ri kwalok ro ilo congregation eo. Kin men in, jet congregation ko rej karõke kwelok ko kin kwalok nan jet minute emõkajlok jen mokta. Elõñ ri kwalok ro rej kamolol bwe eaetoklok ien air maroñ kwalok nan. Jet rar lo tõbrak ko remõn ke rar bebe ñõn kwalok nan ñõn ‘mõttan juõn em’ ak ñõn jerbal ‘jet minute aetoklok.’
4 Bar juõn wãwen remaroñ kalikar jitõbõn karmijete ir make ej ikijen air kõmmõn jet mejenkajjik ko air make. Ilo air kõmmõn karõk ko im kakõmõnmõnlok schedule eo air, jet rar maroñ erom regular pioneer ro. Ro jet rar maroñ karõk wãwen ko air make bwe ren maroñ jerbal ilo Bethel ak einwõt missionary.
5 “Wõnmanlok im Lor Iõ”: Meñe ri kalor ro an Jesus rar iion elõñ melejoñ ko, rar bõk rejañ jen kijejeto im kijenmij eo an ilo jerbal in kwalok nan. (John 4:34) An bed ibbeir im ennan eo an ear kakajurlok jitõb eo air. Eñin unin ro rar lor e rar kwalok lõñliñ eo emol. (Mat. 11:29) Jen bareinwõt rejañ don ñõn kijenmij ilo jerbal in eaorõk kin kwalok kin Ailiñ eo im kõmmõn ri kalor ro.
6 Kij aolep jen emmakit ilo emõn ñõn nan in kir eo an Jesus ñõn wõnmanlok im lor e ilo ad kaddek jitõbõn karmijete kij make. Ñe jej kõmmõne, jenaj lo mõnõnõ eo elap kiõ im jemaroñ reimanlok ñõn elaplok mõnõnõ ilo ran ko renaj itok.