Kalaplok Jerbal in Kwalok Nan Ke Jemlokin Ej Ebaktok
1 Ien madmõd ej juõn ien lañliñ. Ej bareinwõt juõn ien elap jerbal. Ewõr juõn joñan ien ñan aini men in eddek ko. Ri jerbal ro ren jab bed bajjek ilo jerbal eo air.
2 Ilo an konono ilo nan in kõkkar, Jesus ear keidi “jemlokin juõn jukjuk im bed” ñan juõn ien madmõd. (Mat. 13:39, New World Translation) Jej bed ilo jemlokin jukjuk im bed in, ilo an wõr juõn joñan bwen ien ñan kwalok nan “i aolepen lõl.” (Mat. 24:14) Ñe jemlokin ej ebaktok, jej aikwij kalaplok ijo kunad ilo jerbal in kwalok nan. Etke? Jesus ear kamelele: “Elap jonikõn, a eiet dri jerbal.”—Mat. 9:37, 38; Rom 12:11.
3 Kwon Kate Yuk: Ke Jesus ear jino jerbal in kwalok nan eo an elap, ear wõr wõt ibben jilu im jimettan yiõ ko ñan kõtõbrak ta eo kar karõke ñan an kõmmane. Ear kate e ilo jerbal in kwalok nan eo an, im ba: “In kwalok nan emõn an ailiñ in Anij ñõn jikin kwelok ko jet; bwe ar jilkintok Iõ kin men in.”—Luk 4:43.
4 Jesus ear likit ibben ri kalor ro an juõn eñjake in ekaiuriur. (Mark 13:32-37) Eñin unin “ran otemjej iloan tempel, im ilo jikir e jab mwij air katakin im kwalok Jisõs bwe E dri Kraist.” (Jerbal 5:42) Jerbal ko ediklok aorõkiir rar jab men ko moktata ilo air mour. Meñe rar iet, rar lo tõbrak in kwalok news eo emõn “ñõn ro otemjej rej ber iomin lõñ.”—Kol. 1:23.
5 Ewõr juõn un elaplok unin jej aikwij kaddek ejja eñjake in ekaiuriur kiõ, ke “jemlokõn men otemjej ej ebaktok.” (1 Pit. 4:7) Jehovah emwij an karõk juõn ran im awa ñan bõktok jemlokin jukjuk im bed in. (Mat. 24:36) Jerbal in kwalok nan naj mwij kõmmane ilo kõtan bwen ien in. Eñin unin jej wõnmanlok in kalaplok jibadbad ko ad ñan jibadõk elõñlok armij kin news eo emõn.
6 Ilo ad kalaplok ijo kunad ilo jerbal in kwalok nan ke ej ebaktok jemlokin, ilo juburu jenaj maroñ ba ñan Jehovah, einwõt Jesus ear kõmmane: ‘I ar kamwijlok jerbal eo Kw’ar letok ñõn Iõ bwe In kõmõne.’—Jon 17:4.