Wãwen ko ñan Kalaplok Jerbal in Kwalok Nan eo Am
1 Elaplok jen 40 yiõ ko remotlok, juõn katak etan “Kwoj Kõmman ke Joñan Wõt Am Maroñ?” ear walok ilo magazine in Watchtower, in January 15, 1955. Ilo yokwe rar kwalok kin ewi wãwen armij ro an Jehovah remaroñ kakõmõnmõnlok jibadbad ko air make ilo jerbal in kwalok nan bwe ren maroñ kalaplok jerbal ko air kin Ailiñ eo. Nan in kakabilek in emõn ej bareinwõt jerbal rainin, ke jej wõnmanlok ñan kakõmõnmõnlok jerbal ko ad.
2 Kien eo elaptata en kamakit jerbal ko ad otemjej ej: “Im kwon yokwe Iroij am Anij kin aolepen buruõm, im kin aolepen am, kin aolepen am lolãtãt, im kin aolepen am kajur.” (Mark 12:30) Jej kwalok ad yokwe Jehovah ilo ad kortokjen aolep ien ko remõn rej bellok ñan kij ñan kowõnmanlok jerbal eo an kin Ailiñ eo. Lemnak kin wãwen kein im kwo maroñ kalaplok jerbal in kwalok nan eo am.
3 Inek Eddo ko Am: Brother ro emwij air wujleplok air mour remaroñ jibadõk ñan air tellokin jerbal einwõt ministerial servant ro inem wõnmanlok ñan jerbal einwõt elder ro. Katak ko “Kwoj Jibarõk Ke Jerbal Ko Relaplok?” im “Tellokim Ke Jerbal?,” ilo Maaj 1, 1991, magazine in Imõniaroñroñ (September 1, 1990, The Watchtower), ear kamakit elõñ brother ro ñan lelok ir make ñan lale eddo ko an congregation eo. Kajitõk ibben elder ro ilo bukwon eo am kin nan in rejañ ko rejejjet kin ewi wãwen kwo maroñ jibadõk im tellokin bõk jerbal ko relaplok.
4 Rej rejañ elder ro im ministerial servant ro ejelok beleir ñan air lukkun lemnak in kadeloñ etair ilo Ministerial Training School eo. Kwo maroñ jelã kin school in ilo am read reference ko iumin “Ministerial Training School” ilo Watch Tower Publications Indexes in 1986-1995, 1996, im 1997. Kwoj lo ke ‘juõn aur elap’ ej bellok imam? (1 Kor. 16:9a) Elõñ brother ro me rar deloñ ilo kejam in rar jab jelã kin aolep jerammõn in jerbal ko renaj bellok ñan ir elikin air kadiojlok. Rainin rej mõnõnõ in jerbal ilo Bethel ak einwõt special pioneer ro, missionary ro, ak circuit overseer ro.
5 Jibadõk kin Jerbal in Kwalok Nan Full-Time: Jodikdik ro rej kadiojlok jen high school, limaro ri belele ro me ejelok air job, im jabdewõt ro rej tõbar yiõ in retire eo air rej aikwij lukkun lemnak kin pioneer. Elij September 1998 Ad Jerbal Ñan Ailiñ Eo peij eo iloa, inem konono ibben pioneer ro me wãwen ko ibbeir rej einlok wõt ko ilo mour eo am. Men in emaroñ naj kamakit yuk ñan kalaplok jerbal in kwalok nan eo am ilo am pioneer, einwõt rej kõmmane. (1 Kor. 11:1) Ta eo enaj kõmman bwe kwon maroñ kalaplok jerbal eo am ñan 70 awa ko ilo juõn alliñ im ilo wãwen in jerbal einwõt juõn regular pioneer?
6 Elõñlok jen 17,000 brother im sister ro rej kiõ jerbal ilo ra ko im imõn Bethel ko ibelakin lal. March 1995 Ad Jerbal Ñõn Ailiñ Eo ej konono kin ta eo rej aikwij kõmmane ñan tellokin air bõk jerbal in. Etke kwojjab read insert eo im lale elañe kwoj juõn ian ro remaroñ tellokin bõk jerammõn in einjuõn kin jerbal ilo Bethel?
7 Jerbal Ijo Elap Air Aikwiji Jibañ Ie: Kwoj jokwe ke ilo juõn territory emakijkij air jerbal ie ak ijo elõñ brother ro rej bõk kunair in inek eddo ko? Kwar lemnak ke in kalaplok jerbal in kwalok nan eo am ilo am emmakit ñan juõn jikin elaplok air aikwiji jibañ ie? Bõlen kwomaroñ emmakit ñan juõn jikin ebak im rej aikwiji elõñlok ri jerbal ro ie. (Mat. 9:37, 38) Jab kõmmane men in ilo jidimkij. Ej juõn men ej tellokin jar kake. (Luk 14:28-30) Bwebwenato ibben elder ro im circuit overseer eo kin wãwen ko ibbam. Renaj bwebwenato ibbam elañe ej juõn men in meletlet ñan emmakit kiõ ak ñan kebojak in kõmmane ilo ran ko renaj itok. Elañe kwo kõnan jeje ñan Society eo im kajitõk kin tu-ia rekõnan bwe kwon emmakit ñan e, juõn letter emwij sign i jen Congregation Service Committee eo am ej aikwij koba ibben letter eo am.
8 Kakõmõnmõnlok Emõn in Jerbal in Kwalok Nan eo Am: Kij aolep jemaroñ kalaplok ad bõk kunad ilo jerbal in kwalok nan ilo ad kakõmõnmõnlok emõn in jerbal eo ad. Kwoj bõk kunam ke ilo aolep wãwen kwalok nan ko, ekoba etal jen em-ñan-em im kwalok nan ilo jabdewõt ien emõn tok im bareinwõt kõmman bar jeblak ko im Bible study ko? Elañe kwoj kõmman juõn Bible study, kwomaroñ ke kakõmõnmõnlok kabel eo am ñan katakin? Emõn ñan elij May 1999 Ad Jerbal Ñan Ailiñ Eo peij eo iloa kin nan in rejañ ko me kwomaroñ kajerbali ñan kamakit ri katak ro am ñan wõnmanlok im wujleplok air mour im baptais.
9 Juõn etale elaplok an mũlal kin wãwen ko jemaroñ kalaplok im kakõmõnmõnlok jerbal in kwalok nan eo ad jemaroñ loi ilo katak 9 in book eo Organized to Accomplish Our Ministry. Emol kij aolep jekõnan kõmman joñan eo jemaroñ ilo jerbal eo an Anij. Etke kwojjab lukkun lemnak kin mejenkajjik ko am ilo jitõb? Kõmman einwõt 1 Timote 4:15 ej rejañ kake: “Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.”