Ewõr ke Ibbam Jitõb in Karmijete Kõnan ko Am Make?
1 Kamolol kin men eo Jesus Christ ear kõtõbrake ñan armij ilo ejelok kibbon en kar kamakit kij aolep ñan kajerbal maroñ, mour, im kajur ko ad ilo juõn wãwen jej karmijete kij make. Jeje ko rej añõtñõt: “Komin lelok enbwinemi men in jurtak emour, ekwojarjar, men in kabuñburuen Anij, eñin ami jerbal men in Jitõb.” (Rom 12:1) Etale kwe make jen ien ñan ien enaj jibañ yuk ñan lo elañe kwoj kwalok jitõb rot in ilo joñan eo am maroñ.
2 Ilo Jibadõk Jelãlokjen eo jen Bible: Kwar karõk ke ien ñan am keini in read im katak Bible? Kwoj lor ke schedule eo? Ej manit eo am ke ñan kebojak kin kwelok ko an congregation eo? Elañe kwoj bõran juõn family, kwoj keini ke am katak Bible ibben family eo am? Kõmman men kein ej aikwiji am bõk ien kwonaj kar kajerbale ñan aluij television ak lale computer eo ak kõmman jerbal ko jet. Bõtab, ej juõn men in katok edik, ilo am jelã bwe ien eo kwoj kajerbale ñan katak Nan in Anij enaj jibañ yuk ñan bõk mour indio!—Jon 17:3.
3 Ilo Katakin Ro Nejõm: Ien eo emõntata ñan katak kin ial in karmijete kõnan ko ad make ej ñe jej ajiri. Katakin ro nejõm bwe meñe ewõr ien ñan ikkure, ej aikwij bareinwõt wõr ien ñan jerbal im kõmman makitkit ko rej theocratic. (Ep. 6:4) Lelok ñan ir jerbal ko rej aikwij kõmmani ilo mweo. Kõmman juõn schedule ñan keini am bõk kunam ilo jerbal in kwalok nan ibbeir. Kabin lok nan in jiroñ ko am kin joñok eo am emõn.
4 Ilo Makitkit ko an Congregation: Juõn congregation ej kajurlok ñe aolep rej mõnõnõ in lelok ir make ñan kõtõbrak men ko rej ñan tokjen eo an aolep. (Hib. 13:16) Kwomaroñ ke kalaplok ien eo kwoj kajerbale ilo jerbal in kwalok nan kin Ailiñ eo im kõmman ri kalor ro? Kwomaroñ ke kwalok am mõnõnõ in jibañ ro renañinmij ak re ritto, bõlen ilo am jibañ in ektaketok ir ñan kwelok ko?
5 Mokta jen an kar kõmman men in katok eo elaptata ilo an katok kin mour eo an, Jesus ear kakabilek ri kalor ro an ñan kalimjeklok men ko an Ailiñ eo, im kõmman bwe aolep men ko jet ilo mour ren kein karuo. (Mat. 6:33) Ad jibadõk juõn jitõb rot in ñan karmijete kij make enaj bõktok mõnõnõ eo elaptata ilo ad wõnmanlok wõt im karejar ñan Jehovah kin lañliñ.