Box In Kajitõk
◼ Wõn eo en jar ilo kwelok ko an congregation eo?
Jar ko ilo congregation eo ej juõn mõttan eaorõk in kabuñ eo ad. Jutak ilo etan ro jet iman Jehovah ej juõn jerammõn eaorõk im juõn eddo elap. Ilo lemnak kin aorõkin, elder ro rej aikwij lukkun kalmenlokjen ñe rej bebe kin wõn ian brother ro rej tellokiir jar ilo kwelok ko. Brother ro emwij air baptais me rej jutak ikijen congregation eo rej aikwij Christian ro reritto ilo jitõb im rej jelã kajjiir einwõt joñok ko remõn im ro me congregation eo ej lukkun kautieji. Jar ko air ewõr kautiej ie ren kalikar bwe ewõr juõn kõtan emõn ibbeir im Jehovah Anij. Katak eo “Praying Before Others With a Humble Heart” ilo May 15, 1986, magazine an The Watchtower ilo kajin English ej kõlajrak kakabilek ko raorõk me elap an maroñ jibañ ro rej jar ilobwilij ilo etan congregation eo.
Elder ro rejamin kajitõk ibben juõn brother bwe en jar elañe rej ekiljake kin mwilin. Rejamin kãlet juõn brother eo ewõr an inebata ak ekkã an kajerbal jar ilobwilij einwõt juõn ial ñan kwalok an abõnõnõ. (1 Tim. 2:8) Meñe juõn likao emaroñ baptais, elder ro rej aikwij bebe elañe ebwe an ritto ilo jitõb ñan an jar ilo etan congregation eo.—Jerbal 16:1, 2.
Jet ien ilo kwelok ko ñan kwalok nan, emaroñ juõn men in aikwij bwe juõn sister emwij an baptais en jar bwe ejelok juõn brother eo ewõr an maroñ ñan jutak ikijen kumi eo. Sister eo ej aikwij kalibubu bõran. Elañe ejamin wõr juõn brother eo ej tellokin ñan bed ilo jet kwelok ko ñan kwalok nan, elder ro ren jitõñ juõn sister eo ewõr an maroñ ñan an tel.
Ekkã an chairman eo an Public Meeting eo en jar. Bõtab, ilo kwelok ko jet an congregation eo, ñe ewõr elõñlok brother ro jet rej tellokin, brother ro ijellokin eo ej kabellok kwelok eo ak eo rar jitõñ e ñan kwalok katak eo eliktata en kabellok ak kajemlok kin jar. Ilo jabdewõt wãwen, ren kejelãiki lok iman bwe brother eo en maroñ kalmenlokjen kin ta eo enaj ba. Inem enaj maroñ jar ilo juõn wãwen ewõr melelen im ej walok jen buru me ej ekkar ñan kwelok eo.
Jar kein rejjab aikwij aetok. Ñe juõn brother ej jar ilobwilij, enaj emõnlok an armij maroñ melele kin ta eo ej ba elañe ej jutak, im ej bwe ainikien, im ej alikar an konono. Men in enaj kõtlok bwe aolep ro rej kwelok ren roñ jar eo im ilo jemlokin ren maroñ ba jen burueir “Amen!”—1 Kron. 16:36; 1 Kor. 14:16.