“En Romak Ami Maram”
1 Lal in ibelakid ej bed ilo marok ikijen mwil emõn im ilo jitõb. Meram in mol eo ej kajedmatmat “jerbal ko in marok jitokjeir” bwe jen maroñ bõprae men in latipñõl kein rekauwatata. Kin men in, ri jilek Paul ear rejañ Ri Christian ro: “Komin etetal einwõt ro nejin maram.”—Ep. 5:8, 11.
2 “Leen maram” elap an oktak jen marok eo an lal. (Ep. 5:9) Ñan kwalok leen in ej aikwiji joñok ko ad rekabwilõñlõñ in mour in Ri Christian, armij ro me Jesus ej buñburuen kaki. Jej aikwij bareinwõt kwalok kadkad ko einwõt jerbal kin aolepen buru, mol, im kijejeto kin mol eo. Leen in ej aikwij alikar ilo mour eo ad jen ran ñan ran im ilo jerbal in kwalok nan eo ad.
3 Romak ilo Aolep Ien ko Remõn: Jesus ear jiroñ ri kalor ro an: “En romak ami maram iman mejen armij.” (Mat. 5:16) Ilo ad kajeoñe Jesus, jej kwalok meram eo an Jehovah ilo ad kwalok kin Ailiñ eo an Anij im karõk ko an. Jej romak einwõt meram ñe jej lolok armij ilo moko imwiir im ñe jej kajededlok mol eo ilo jikin jerbal eo, ilo school, ibben ro ri turid, ak ilo jabdewõt jikin ej walok ien eo emõn.—Pil. 2:15.
4 Jesus ear ba bwe jet renaj kijirãte meram. (Jon 3:20) Inem jejjab ebwer ñe jarlepju in armij ro re makoko in kõtlok bwe “maram in gospel in aibujuij an Kraist” en romak ikijiir. (2 Kor. 4:4) Jehovah ej lo buruen armij im ejjab kõnan bwe jabdewõt ro rej kõmman nana ren bed ibwiljin armij ro an.
5 Ñe jej lor ial ko an Jehovah im lañliñ kin meram eo ilo jitõb, jemaroñ rome ro jet kake. Elañe rej kile ikijen mwilid bwe ewõr “maram in mour” ibbed, inem ir bareinwõt renaj emmakit ñan kõmman oktak ko rej men in aikwij bwe ren ro rej ri kotak meram.—Jon 8:12.
6 Ilo ad kõtlok bwe en romak meram eo ad, jenaj bõktok nebar ñan Ri Kõmanmõn eo ad im jibañ ro emol burueir ñan jelã kajjen im bõk kejatdikdik kin mour indio. (1 Pit. 2:12) Kinke meram eo ej bed ibbed, jen kajerbale ñan jibañ ro jet ñan dioj jen marok eo ilo jitõb im kwalok jerbal ko in meram.