“En Romaak Ami Meram”
1. Ta eo jej aikuj kwal̦o̦ke ñan armej ro otemjej?
1 Aolep raan, aiboojoj in meram in al̦ ej bõktok nõbar ñan Jeova Anij. Bõtab, ewõr juon meram ilo kõkkar me Jijej ear rõjañ ri kal̦oor ro an bwe ren bõke. Ta meram in? Ej “meram in mour.” (Jon 8:12) Ewõr jet eddo ak jerbal ko raorõk ñan aolep ro im rej bõk meram in. Jijej ear jiroñ ri kal̦oor ro an: “En romaak ami meram im̦aan mejãn armej.” Jijej ear kõn̦aan bwe ri kal̦oor ro an ren kajerbale meram in im jipañ ro jet. (Matu 5:16) Rainin meram in m̦ool eo ejjab alikkar ñan armej ro, eñin unin jej aikuj kwal̦o̦ke. Armej ro el̦apl̦o̦k wõt aer aikuji meram in jãn kar m̦okta! Ewi wãween jemaroñ l̦oor joñak eo an Kũraij im kõm̦m̦an bwe en romaak ad meram?
2. Jijej ear kalikkar bwe eaorõk ñan an armej ro jel̦ã kõn meram eo. Ewi wãween?
2 Ikijjeen Kwal̦o̦k Naan: Jijej ear kajerbale men ko m̦weien, iien im maroñ ko an ñan kwal̦o̦k kõn meram eo ak katak ko rem̦ool kõn Anij. Ear kajeded meram in ilo m̦oko im̦õn armej, ijoko ilobwilij, ioon tol̦ ko im jabdewõt jikin emaroñ lo armej ro ie. Ear kile bwe elukkuun aorõk ñan an armej ro jel̦ã kõn meram in. (Jon 12:46) Bwe en maroñ tõpar elõñl̦o̦k armej, Jijej ear katakin im kapoj ri kal̦oor ro an bwe ren ãinwõt “meram in lal̦.” (Matu 5:14) Ri kal̦oor ro rar kõm̦m̦an bwe en romaak aer meram ilo aer kar kwal̦o̦k kõn katak ko rem̦ool im bareinwõt ilo aer kõm̦m̦an em̦m̦an ñan armej otemjej.
3. Ta jet iaan wãween ko jemaroñ kwal̦o̦k naan ñan armej ro?
3 Armej ro doon Anij rej kaorõke eddo eo aer ñan “etetal ãinwõt ro nejin meram,” im rej kwal̦o̦k naan ilo aolep jikin ko ewõr armej ie. (Ep. 5:8, UBS) Ewi wãween jet rej kõm̦m̦ane men in? Jet rej riiti Baibõl̦ eo ak bok ko jet an doulul in ilo jikin ko armej ro remaroñ lo er. Rej kõm̦m̦ane men in ilo jikin jerbal ak jikin jikuul̦ ko ilo iien aer kakkije, kõnke men in emaroñ kepel̦l̦o̦k juon iien em̦m̦an ñan aer bwebwenato ippãn ro rej kwal̦o̦k aer itoklimo. Juon jiroñ ear kõm̦m̦ane men in im ear maroñ katak ippãn juon iaan ri jikuul̦ ro ilo kilaj eo an. Ear bareinwõt likũt jet bok ko ippãn 12 iaan ri jikuul̦ ro jãn kilaj eo an.
4. Etke eaorõk bwe jãn kwal̦o̦k m̦wil ko rem̦m̦an?
4 Ikijjeen M̦wilid: Bar juon wãween jej kwal̦o̦k bwe en romaak ad meram ej ikijjeen m̦wil ko m̦wilid kajjojo raan. (Ep. 5:9, UBS) Jej aikuj kwal̦o̦k m̦wilin Kũrjin ilo jikin jerbal, jikin jikuul̦ im jikin ko jet kõnke men in emaroñ kepel̦l̦o̦k jet iien ko rem̦m̦an ñan ad kwal̦o̦k kõn katak ko rem̦ool jãn Baibõl̦ eo. (1 Pi. 2:12, UBS) Ñan waanjoñak, juon ri kaki ilo jikuul̦ ear call l̦o̦k ñan ippãn jinen im jemen juon l̦addik 5 an iiõ ilo kilaj eo an kõn an lukkuun em̦m̦an m̦wilin. Kõrã in ear ba: “Elukkuun em̦m̦an m̦wilin l̦addik in, im el̦ap an jel̦ã kõn ta ko renana im bareinwõt men ko rem̦m̦an!” Aet, jerbal in kwal̦o̦k naan eo ad im m̦wil ko m̦wilid rej kareel armej ro bwe ren jibadektok “meram in mour” im nõbar Jeova Anij.