Jerammõn ko Rej Itok Jen Ad Kwalok Kamolol kin Yokwe eo an Jehovah—Part 1
1 Ri jilek John ear je: “Jej yokwe bwe E ar yokwe kij mokta.” (1 Jon 4:19) Ñe jej lemnak kin aolep men ko me Jehovah ear litoki ñan kij, jej emmakit im oktak ñan kwalok kamolol eo ad elap. Jesus ear likit joñok eo ñan kõmman men in ilo an kwalok nan kin etan Anij im Ailiñ eo. (Jon 14:31) Ewõr tokjen lemnak kin wãwen ko jemaroñ kwalok ad kamolol kin yokwe eo an Jehovah im tokjen ko rej walok.
2 Etal Jen Em ñan Em: Jesus ear katakin ri kalor ro an kilen kõmman jerbal in kwalok nan kin Ailiñ eo. Nan in tel ko an rej kwalok ilo alikar bwe rar etal jen em ñan em, im kajededlok news eo emõn. (Luk 9:1-6; 10:1-7) Yokwe Anij im ri turid ej men eo jej aikwiji ñan kamakit kij ñan wõnmanlok im etal jen em ñan em ñe jej jelmae jab kea im jumae an armij. Bõtab, ilo ad kõmmane jej make bõk tokjen kinke tõmak eo ad enaj kajurlok im kejatdikdik eo ad enaj aibujuij lok.
3 Ilo ad jerbal iumin tel eo an enjel ro, jaar lo elõñ ro rej kwuli im mãro kin mol eo. (Rev. 14:6) Elõñ ri mweo rar ba bwe rar jar kin jibañ ke juõn Ri Kennan ear itok ñan mweo imwiir. Ruo Ri Kennan ro im juõn ajiri jidikdik rar etal jen em ñan em ilo juõn ene ilo Caribbean. Ke ritto ro rar bebe bwe renaj bõjrak im rol, ajiri eo ear make etal ñan bar juõn em im kalallal. Juõn kõrã ear kabellok kejam eo. Ke ritto ro rar lo men in, rar etal im konono ibben lio. Ear kadeloñ ir im ba bwe ej kab mwij an jar ñan Anij im kajitõk bwe en jilkintok Ri Kennan ro ñan katakin e Bible eo!
4 Kwalok Nan Iturin Ial ko: Ke ebin lo armij ilo mweo imwiir ilo jet jikin, kwalok nan iturin ial ej juõn wãwen ekeie ñan kwalok nan ñan armij. Bareinwõt, elõñ armij rej jokwe ilo jikin ko emwij worwori ak ilo moko ebin deloñ ie ijo jejjab maroñ etal jen em ñan em. Bõtab, kamolol eo ad kin yokwe eo an Jehovah ej kamakit kij ñan kortokjen jabdewõt ien emõntok ñan kebak armij kin ennan in Ailiñ eo, ekoba kwalok nan iturin ial.—Ken. 1:20, 21.
5 Kõmman Bar Jeblak ko: Ke jej bukõt ro rej “jelã kin aikwij eo air ilo jitõb,” jekõnan kõmman joñan ad maroñ ñan kabwe aikwij in. (Mat. 5:3, NW) Men in ej aikwij ad bar jeblak ñan wõtdikdik ine ko in mol eo me jaar kalbwini. (1 Kor. 3:6-8) Juõn sister ilo Australia ear likit juõn tract ibben juõn kõrã eo ear jab lukkun kwalok an itoklimo. Bõtab, sister eo ear kate e ñan bar lolok e ilo mweo imõn. Ke ear iion e, sister eo ear lo bwe elikin an kar iione ilo trip eo mokta, kõrã eo ear etal im wiaik juõn Bible elap wõnãn. Sister eo ear jino juõn Bible study ibben!
6 Kõmman Bible Study ko: Jerbal in emaroñ wãwen eo elaptata an kalañliñ im wõr tokjen ilo jerbal in kwalok nan eo ad. Ej juõn jerammõn elap ñan jibañ armij ñan katak kin Jehovah, ñan lo air kõmman oktak ko ilo air mour ñan kalañliñ e, inem ñan lo air baptais ñan kalikar wujleplok eo air ñan Anij!—1 Tess. 2:20; 3 Jon 4.
7 Ilo copy in tok, jenaj etale wãwen ko jet jej bõk jerammõn kin ad kwalok ad kamolol kin yokwe an Jehovah.