Jerammõn ko Rej Itok Jen Ad Kwalok Kamolol kin Yokwe eo an Jehovah—Part 2
1 Mõttan eo juõn in katak in ilo kar alliñ eo lok, kim ar kalikar emen wãwen ko jemaroñ kwalok ad kamolol kin yokwe eo an Jehovah ilo jerbal in kwalok nan eo ad. (1 Jon 4:9-11) Kiõ jenaj kobaik mõttan lalem wãwen ko ñan kõmmani men in. Ñe jej bõk kunad ilo joñan ad maroñ ñan jibañ ro jet kin men ko ilo jitõb, jej bõk jerammõn.
2 Kwalok Nan ilo Jabdewõt Ien Emõn Tok: Wãwen in ebolemen ñan lo armij ro rej kwuli im mãro kin wãnik im ñan lelok book im magazine ko ñan ir. Ej emõn ñan ‘wiaik ien’ im kwalok nan ilo jabdewõt ien im ñan jabdewõt armij ro jej iion ir. (Ep. 5:16) Jemaroñ aikwij beran ñan kwalok nan ilo wãwen in, ak elañe jej kamolol kin yokwe eo an Anij im aikwij ko an armij, jenaj kwalok nan ilo jabdewõt ien emõn tok.—2 Tim. 1:7, 8.
3 Juõn missionary ear bõk juõn jerammõn elap ke ear ijjino juõn bwebwenato ibben bar juõn ri iuwe ilo taxi eo. Emaan eo ear kwalok an itoklimo. Missionary eo ear bar jeblak ibben leo, im jinoe juõn Bible study ibben. Leo ear deloñ ilo mol eo im wõnmanlok ñan joñan eo ear erom juõn elder ilo juõn congregation!
4 Jeje Letter ko: Bõlen kin ad nañinmij ak kin an nana lañ jejjab maroñ etal jen em ñan em. Jemaroñ jeje letter ko, im kwalok nan jidik ikijen mail ñan armij ro jejelã kajjiir, ro rar luji ro rejitenburu ibbeir ilo mij, ak ro rar jako jen moko imwiir ilo territory eo. Jemaroñ kadeloñ juõn tract ejejjet me ewõr juõn ennan emejaja eo ej wawa ion Bible im ej rejañ eo ej bõke ñan uak elañe ewõr an kajitõk. Kajerbal address eo am make ak eo an Kingdom Hall eo; joij im jab kajerbal address eo an ra eo.
5 Kwalok Nan Ikijen Kajerbal Telephone: Wãwen in ej juõn wãwen emõn ñan jibadõk armij ro jaar jab maroñ iion ir ilo jerbal eo jen em ñan em. Elañe jej kõmmane ilo juõn wãwen ej kwalok lolokjen, joij, jelã kilen, im ilo kabel, jenaj maroñ bõk juõn uak emõn. February 2001 Ad Jerbal Ñan Ailiñ eo, peij 5-6, ej letok nan in rejañ ko rekeie kin ewi wãwen jemaroñ bõk tokjen ko remõntata.
6 Ke juõn sister ear kwalok nan ikijen kajerbal telephone, ear kajitõk ibben juõn kõrã elañe ear lemnak kin ta ilju eo an im an family eo an. Kõrã eo ear ba bwe ekar lemnak kake. Lio ear kwalok bwe kin an buromõj, ear kamake lok ian ilo mweo imõn. Itoklimo eo emol an sister eo ear lap an jelet buruen, im lio ear errã ñan iion e ilo juõn mõn wia ebak. Tokjen men in, kõrã eo ear mõnõnõ in bõk juõn katak kin Bible!
7 Karuwainene Ruwamaejet ro: Elañe jej yokwe ro ri turid, jenaj bukõt jabdewõt ruwamaejet ro rej itok ñan mõn kwelok eo ad im karuwaineneik e. (Rom 15:7) Kõmman bwe en lo bwe ej bed ibwiljin ro emol air itoklimo kin mour in jitõb eo an. Itoklimo eo ad emol im ad tilmake juõn katak kin Bible emaroñ kamakit e ñan bõk jibañ eo ad.
8 Mwilid Emõn: Kin mwilid emõn, jej kaibujuij mol eo. (Taitõs 2:10) Ñe ro ilo lal in rej kwalok men ko remõn kake kij einwõt Ri Kennan ro an Jehovah, rej bõktok nebar ñan Anij eo ad. (1 Pit. 2:12) Men in emaroñ bareinwõt jibañ ro jet ñan ijjino an etetal ilo ial in mour.
9 Etke kwojjab elij wãwen kein lalem ñan kwalok kamolol eo ad kin yokwe eo elap an Jehovah im jerbali? (1 Jon 4:16) Ke kwoj kõmmani, kwonaj madmõd elõñ jerammõn ko.