Ro Jemen im Jinen—Katakin Ro Nejimi Jen Ien Rej Niñniñ
1 “Kwon kibel juõn ajiri ilo ial eo en etal ie, im ñe e ridto e jamin illok jen e.” (Ken. 22:6) Ro jemen im jinen, elañe komijjab kõnan bwe ro nejimi ren “illok jen” ial in mol eo, ñããt eo komij aikwij jino ami katakin ir? Jen ien rej niñniñ!
2 Ke Paul ear ba bwe kar katakin Timothy kin men ko ilo jitõb jen ke ear “ajiri,” alikar ear melelen jen ien ear niñniñ. (2 Tim. 3:14, 15) Tokjen men in, Timothy ear eddeklok im juõn emaan eritto ilo jitõb. (Pil. 2:19-22) Ro jemen im jinen, kom bareinwõt aikwij katakin ro nejimi jen ien rej “ajiri” bwe ren ‘ridtolok iman Jeova.’—1 Sam. 2:21.
3 Lelok Den eo Rej Aikwiji ñan Eddeklok: Einwõt an wijki ko redik aikwij an tortok wõt den ñan i bwe ren eddeklok ñan wijki ko rekilep, ajiri ro ilo jabdewõt yiõ dettair rej aikwij air ebok kin den in mol eo jen Bible bwe ren rittolok im ri karejar ro an Anij reritto ilo jitõb. Wãwen eo elaptata ñan katakin ajiri ro kin mol eo im ñan jibañ ir bõk juõn kõtan ebak ibben Jehovah ej ikijen juõn family Bible study ekkeini kõmmane. Ak ro jemen im jinen, lemnak kin maroñ eo an kajjojo ajiri ñan roñjake. Ñan ajiri ro redik, ien katak ekadu ak emakijkij kõmmane enaj laplok an bolemen jen ko raetok ak reiet.—Dut. 11:18, 19.
4 Kwon jab dodoorlok maroñ eo an ro nejimi ñan katak. Bwebwenato ibbeir kin armij ro ilo Bible. Kõtlok bwe ren jiñaik pija ko kin wãwen ko ilo Bible ak kõmman tieta kin men ko kar walok. Kortokjen cassette in aluij ko im cassette in roñjake ko ad, ekoba drama ko ilo Bible. Ukõt katak in family eo ñan an jejjet ñan dettan im maroñ in katak an ro nejimi. Katak eo ilo jinoin en lamwan, im jidik kin jidik; ak ñe ajiri eo ej rittolok, katak eo an en laplok im ekoba men ko jet rekãl. Kõmman bwe katak kin Bible en juõn ien ekaitoktoklimo im oktak jen don. Kwo kõnan bwe ro nejimi ren kaddeklok air “mako” kin Nan eo, inem kõmmane ilo joñan am maroñ bwe katak eo en kaitoktoklimo.—1 Pit. 2:2.
5 Kõmman Bwe Ren Bõk Kunair ilo Congregation eo: Likit mejenkajjik ko rej wõnmanlok iman ro nejimi bwe ren bõk kunair ilo joñan air maroñ ilo congregation eo. Ta eo emaroñ mejenkajjik eo mokta? Jemen im jinen ruo ajiri redik rar ba: “Erro jimor kar katakin ir ñan jijet im jab keroro ilo Kingdom Hall eo.” Tokelik, kar jibañ ajiri ro ñan uak ilo nan ko air make ilo kwelok ko im ñan kõmman bwe en mejenkajjik eo air ñan kadeloñ etair ilo Theocratic Ministry School eo. Ilo jerbal in kwalok nan, mejenkajjik ko remõn ñan kõtõbraki emaroñ koba lelok juõn tract ñan juõn ri mweo, ñan readi juõn eon, ñan kwalok juõn ennan in lelok magazine, im ñan bwebwenato ilo emõn ibben ri mweo.
6 Likit juõn Joñok Ekijejeto: Ro nejimi rej roñ ke ami konono kin Jehovah im jar ñan e ran otemjej? Rej lo ke ami katak Nan eo an, bed ilo kwelok ko, bõk kunami ilo kwalok nan, im lo mõnõnõ in kõmanman ankil an Anij? (Sam 40:8) Eaorõk bwe rej kõmmane im bwe komij kõmman men kein ibben don. Juõn nejin kõrã eritto ear ba kin jinen, eo ear kakajiririk jiljino ajiri ro bwe ren Ri Kennan ro retiljek: “Men eo elaptata an kabwilõñ kim kar joñok eo make an Jinim—ear ellajok kennan jen nan ko.” Juõn jemen ak jinen me ewõr emen ajiri ro ear ba: “ ‘Jehovah ej moktata ilo ad mour’ ear jab baj nan ko wõt kar konono kake ak kar wãwen am mour.”
7 Ro jemen im jinen, jino ilo mõkaj ñan katakin ro nejimi, katakin ir kin mol eo jen Nan eo an Anij, likit imair mejenkajjik ko relaplok, im likit joñok eo emõntata. Kom naj mõnõnõ bwe kom ar kõmman men kein!